زوجتي العزيزة وجودج غير حياتي (واقعية)

[محبة الطاعات]

بسم الله الرحمن الرحيم​

​

بعد محاظرة سعد لعمر و حمد اذن العشاء و في الصلاة زاد بكاء حمد ونحيبة لأنه كان يتذكر مع الايات افعاله اللي كانت تنافيها و بعد الصلاة سعد قرر انه ما يترك حمد يروح الشقة و انه لازم يخليه يتسامح من ابوة و امه لأن رضى الوالدين احد اهم اسباب دخول الجنة في البداية حمد كان خايف و متردد لكن عمر شجعة و اصر عليه, وبعد تشجيع و اصرار وافق حمد لكن طلب من سعد انه يكون بروحه معاهم ما يبي نورة تشوفنه لأنه للحين نفسيته تعبانة و لما عمر تطمن على صديقة سلم عليهم و راح البيت و سعد اخذ حمد و وداه البيت و طلب سعد من اخوة في البداية انه ينتظر بالسيارة عشان يقدر يضبط الأوضاع في البيت و بعد شوي طلع سعد و على وجهه ابتسامة كبيرة و قال حق حمد يلا, حمد حس بالخوف و حس بأطرافة ترتعش لكن توكل على الله و دخل البيت و اول ما دخل شاف امة و ابوة قاعدين و عيونهم مركزة على الباب​

* حمد(منزل راسة بالأرض): السلام عليكم و رحمة الله و بركاتة.
* ام حمد + ابو حمد: عليكم السلام و رحمة الله و بركاتة.
* سعد: حياك حمد البيت بيتك.
* حمد: مشكور.<<< و دخل حمد المجلس و على طول راح يحب راسه ابوة و سالت دموعة
* حمد(وهو يبكي): يبا سامحني تكفى انا خطيت و طالبك تسامحني و ترضى علي انا بدونك و لاشي.
* ابو حمد(و هو يبكي و يسحب حمد و يضمة): حمد انت ولدي اذا ما اسامحك من يسامحك.
* حمد(لف على امة و حاول انه يبوس رجلها بس الام ما خلته): يمة تكفين سامحيني.
* ام حمد(و هي تبكي و ماسكته من كتوفة عشان ما تخليه يبوس رجلها و بعدين ضمتة): روح يا وليدي و الله اني راضية عليك لي يوم الدين.
* حمد(و هو ضام ركبتين امه بيد و ركبتين ابوة باليد الثاني): عسى ربي لا يحرمني منكم و لا يخليني يوم واحد ان كنت بخليكم تغضبون علي مرة ثانية.
* ام حمد+ ابو حمد: استغفر الله.
* سعد(و يحاول يغطي دموعة بشماغة): حمد لا تقول جذي حرام.​

استمر حمد في البكى و النحيب في حظن امة شوي و في حظن ابوه شوي و كأنة طفل لغاية ما حس بالتعب و الأرهاق و نام و هو في حظن امة في هاليوم حمد نام بالمجلس لأن امة و ابوة ما قدروا يصحونة لأن شكله كان مرهق و تعبان فخلوه نايم بالمجلس و على صلاة الفجر الأب قام يصلي الفجر بالمسجد و قبل لا يطلع من البيت شاف حمد فقرر انه يصحية عشان ياخذه وياه
و اول ما جاء الأبو يصحية حمد اخترع و قام مفزوع لكن ابوه طمنة و قاله ان اذان الفجر اذن قوم نصلي هني ارتسمت بسمة على شفاة حمد اول مرة يحس انة قريب من ابوة مع انه قبل لا ينحرف كان ابوة مدلعه اخر دلع لكن هالمرة كانت غير و لما راحوا المسجد الكل كانوا مستغربين ( حمد بالمسجد!!! ) و كلها دقايق الا يدخل المسجد ابو عمر و معاة عمر و زاد الأستغراب عند الجيران ( حمد + عمر بالمسجد سبحان الله ان الله يهدي من يشاء ) طبعاً الكل كانو فرحانين فيهم و الكل حيوهم بأحسن تحية عشان يحببونهم بالمسجد ما كانوا يدرون ان حمد و عمر قلبهم تعلق بالمساجد​

​

و جاء اليوم الموعود يوم الأحد حمد كان متردد و خايف في هاليوم كيف بيكلم بو محمد؟ و كيف بيفاتحة بالموضوع؟ و شنو يرد عليه لو سأله سؤال معين؟, و على الغدا كان حمد و ابو حمد و ام حمد و نورة قاعدين على السفرة
​

* نورة: حمد لو سمحت صب لي عصير.
* حمد(سرحان في وادي ثاني):!!!!!!
* نورة: حـــــــــــمـــــــــــــد (بصوت عالي) صب لي عصير.<<<<< الكل قاموا يطالعونها و يطالعون حمد بسبب صوتها المزعج
* حمد(و أخيراً انتبه لها): هلأ .. عصير .. اي ان شاء الله. <<<< و اخذ الكوب من ايدها و هو يصب انكب منه شوي على الطاولة
* أم حمد: حصل خير ... حصل خير .. خلة انا بشيله صبر شوي.<<< و قامت المطبخ و جابت لها شي تمسح فيه العصير
* حمد: هااااا ... انا اسف .. ما ادري كيف كبيته,انا اسف خليه انا بمسحة.
* ام حمد: ما عليه يا وليدي ما يوقع الا الشاطر انا قمت الحين حصل خير.
* ابو حمد: شفيك حمد اليوم مو انت حمد اللي نعرفه شصاير لك؟
* حمد: و الله ماني عارف شنو اقول لك بس........ <<< و رجع يفكر
* ابو حمد: تكلم قول يا وليدي انت مالك حد الا احنا الحين.
* حمد: على الأقل انا عندي انتوا الحين و قبل ما كان عندي احد.
* نورة: حمد ترى اعصابي تعبت و انا انطر تكلم.
* حمد: ههههههههههه يا الملقوفة و انتي قاعدة تنطرين بعد.
* نورة: اي قاعدة انطر ابي اعرف اخوي حبيبي شنو فية فديت قلبه انا.
* حمد: ايه عليج بس الموضوع ما ينفع ينقال بوجودج يعني بلا هالحركات لما تخلص الغدا بقول حق ابوي و امي و انتي بعدين بتعرفين.
* نورة: اوكي يما من الحين اقولج اول ما حمد يخلص انا انطرج بغرفتي عشان تقولين لي و عشان اشيل الغدا انا بتيسر بكمل عصيري في غرفتي عشان تقدرون تاخذون راحتكم يلا مع السلامة.
* حمد: مع السلامة. <<<<< و جلس يراقبها لغاية ما سمع صوت باب غرفتها
* حمد: يبا بصراحة انا بغيت اكمل نص ديني.
* ام حمد(قاطعته): حمد احنا ما صدقنا الله هداك رديت على غنيمة حرام عليك يا وليدي و الله حرام انت تبيني اروح فيها.
* حمد: يما اي غنيمة الله يهداج غنيمة انا من يوم رديت من السفر تعذرت لها اني ما بتزوجها و هي تقبلت الموضوع و انا غيرت رقمي عشان لا ارجع لها لا هي و لا غيرها و هي راحت في طريجها خلااااااااااااص.
* ابو حمد: حمد سعد قالي بالموضوع كله و انا ان شاء الله بروح وياك عشان نخطب لك البنت اللي تبيها.
* حمد: صج .. صج يبا احلف .. لا لا ما اصدق الحمد لله انك بتوقف وياي.<<<< و رفع ايدة يحمد ربه
* ام حمد: و انا اخر من يعلم من هذي اللي تبيها؟ من بنته؟
* ابو حمد: بنت بو محمد اللي يصير حق بو فهد رفيجي تعرفينه كنت كله اقولج عنه و زوجتة كانت كله تسلم عليج.
* ام حمد: ايييييي يحليلهم هذولي ناس طيبين و اكيد بنتهم نفسهم.
* حمد(مصدوم): شنووووو انت تعرفهم يبا؟؟؟؟؟
* ابو حمد: اي يا وليدي هذي علاقة قديمة و ان شاء الله بتجدد و بنصير اهل هالمرة.
* حمد: بس يبا انا ما اقدر اكلمهم انت تدري بتاريخي الاسود و اكيد دام انهم يعرفونك ما بيوافقون علي لأنهم اكيد يعرفوني بعد.
* ابو حمد: لا يوليدي ما اعتقد على العموم شرايك تخليني انا اتصل اليوم عليهم لأن سعد قالي انك اليوم بتكلم بو محمد بالليل.
* حمد: اي و الله يبا انت كلمة و فاتحة بالموضوع, يبا تكفى لا تخليني بروحي.
* ابو حمد: اكيد انا قلت لك طول ما انت ماشي بطريج الصح انا وياك و مو بس انا طول ما ربي راضي عليك وايد ناس بيوقفون وياك و ان شاء الله خير.
​

ابو حمد اتصل على بو محمد عقب صلاة العشا و فاتحة بالموضوع و اتفقوا انهم يزورونهم في يوم الجمعة ​

​

و في يوم الجمعة ابو محمد طلب انه يسأل عن حمد و عقب اسبوع يرد عليهم طبعا انتوا تعرفون ان حمد في هالأسبوع كان على اكثر من نار و هو ينتظر اجابة بو محمد ​

​

و بعد اسبوع بو محمد اتصل على بو حمد و قاله انهم موافقين بس عندهم شروط و لازم يجون مرة ثانية عشان الشروط و طبعا ماله داعي الولد يشوف البنت لأنه اساساً شايفها من قبل و لكن لو يبي ابو محمد ما عندة مانع و لكن حمد قال ماله داعي انه يشوفها و راحوا مرة ثانية لبو محمد وشروط البنت كانت سهله و حمد وافق عليها و الحمد لله حمد خطب اماني (بنت بو محمد) و ملكوا و البنت كانت معجبة من الدرجة الأولى بحمد​

​

يوم الملكة لما كانو بالمحكمة حمد كان ملاحظ ان اماني تطالعه بس من تحت لتحت و هو بعد كان يطالعها بس من تحت لتحت و كان يتبسم لها و لما ملكوا و رجعوا البيت (بيت بو محمد) الكل دخل و بقت اماني و حمد برا الباب و كل واحد يعزم على الثاني انه يدخل قبل, بس بالأشارة طبعا لغاية ما تجرأ حمد و قال لأماني مبروك و اماني من الخجل ركضت و دخلت قبله و هني ​

*أبو محمد(يضحك و موجه كلامة لحمد): ههههههههههههه الله يعينك عليها تراها وايد خجولة.
* أبو حمد: أكيد يا بو محمد بنات الناس لازم يكونون جذي.
*أبو محمد: اكيد يا بو حمد و حمد بعد ولد ناس و احنا نتشرف فيه كفاية الكلام اللي سمعناه عنه بالمسجد و احنا مو محتاجين نسأل عن الولد اكثر دام انه ولد ناس مثلكم و هالكلام الزين ينقال عنه بالمسجد.
* حمد: يعني يا عمي انت سألتوا عني بس بالمسجد؟
* أبو محمد: اي و الشغل بعد و الصراحة مديرك مدح فيك لين ما شبعنا من الكلام الزين و يقول انك موظف كفأ و محافظ على الدوام بشكل متنظم الصراحة الكل مدحوا فيك.
* حمد(و الأفكار قامت تدور في راسة و حس انهم ما سألوا عنه بالشكل المطلوب): اييييييييي!!!!!!

​

و حمد ما قدر يستحمل اول ما وصلوا البيت (طبعا حمد كان متفق مع عايلة العروس انهم في هاليوم بيقعدون لي فترة الغدا في بيت بو محمد و بعدين بيروحون البيت بيقعدون شوي و عقب حمد بيمر على اماني بياخذها عشان يطلع يتمشى وياه) على طول راح قال لأبوة انهم ما سألوا عني بالشكل المطلوب انا خايف انهم بعدين يخلوني اطلقها لما يدرون بحقيقتي و انا ما ابي اخدعهم انا احب البنت و من هالكلام, فرد عليه ابوة قال له لا تخاف و تطمن ساعاتها لما يشوفون بنتهم تحبك و انت ما شي معاها بما يرضي الله ما بيخلونك تطلقها لا تخاف تطمن و قعد يهدي فيه, طبعاً سعد كان وياهم و تدخل و قال حق حمد ان بنات الناس مو لعبه انت المفروض ما تخاف لأنك تحبها و تبيها طول العمر و اللي يخاف هو الي يكون ناوي يلعب ببنات الناس و احنا ندري انك انصلح حالك و ما تبي تلعب فيها و تبيها لك الزوجة الصالحة و من هالكلام اللي يذكر حمد بأنة هذي بنت ناس المفروض انك مو قاعد تلعب فيها و لا هي تسلية لك تتزوجها و عقب جم شهر تطلقها و بنفس الوقت الكلام اللي يهديه و يحسسه انه صار ريال كفو و قد المسؤولية​

​

طبعاً حمد بعد هالكلام تحير و قعد يفكر يا ترى يقول حق اماني عن حقيقتة و له يسكت و يخلي الموضوع للظروف كان خايف و ما كان عارف شنو يسوي و فكرة تودية و فكرة تجيبة و ما هو عارف شنو يسوي يقول؟؟؟؟؟؟؟؟ وله ما يقول؟؟؟؟؟؟؟؟؟؟​

يا ترى بيقول وله مو قايل اووووووووووووف ​

ههههههههههههه اقولكم البارت الياي ​

يلا مع السلامة:37:​

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

لغاية هني و انتهت علاقة غنيمة بحمد و راحت لحالها و اخر خبر وصلنا عنها انها للحين على حالها

مثل ما قلت لكم من قبل انا كنت اقدر اكتب الأجزاء اللي فيها قصة غنيمة بملاحظة و لكن انا ارجع و اقول انا حبيت اذكر قصة غنيمة عشان ابيكم تتعرفون عليها و تتعرفون على قصتها و عشان تعرفون ان في امهات للأسف ما يستحقون انهم يكونون امهات و في ناس ما عندهم ارادة و قوه عزيمة انهم يغيرون المعصيه مثل غنيمة و ترى البنات اللي مثل غنيمة وايد مب شرط انهم بنات ليل بس كفاية انه يكلمون صبيان لأن هذي بحد ذاتها معصية و أحد الأسباب اللي خلتني اطول شوي في الأجزاء اللي قبل اني ابي ابين لكم ان ام حمد كانت تدعي لولدها كل يوم في قيام الليل ما وقفت و لا قالت ان خلاص ربي ما استجاب لي يعني ما بيستجيب لي لأ استمرت و استمرت و استمرت لغاية ما ربي حقق لها الي تبيه و الحمد لله ولدها الله هداه

اختي ام همس اتوقع الحين انتي عرفتي ليش انا طولت في الأجزاء الي قبل

و سوري توني اكمل ردي عليج بس اضطريت اني اكمل الجزء اللي ابيه من القصة عشان اكمل ردي و السموحة منكم :37:​

 

[غيرهم كلهم]

والله يسعدك انتي كمان وان شاء الله دايما مبسوطة

البارت الاخير يجنن ومن الاخر :clap:

هلأ بدت الرومانسيات من حق :cupidarrow::cupidarrow:

شكلوا بقولها كل شئ انا هيك حاسة :7:

وهي بتنصدم :4: بس بتكمل معاه

وبتعتني فيه اكتر عشان تنسيه كل نسوان الي عرفها :16:

خربتلك النهاية اكيد هههههههههههه :24:

وهي بالاحمر كتبت عشان تركزيلنا على رومانسيات والحب :36:​

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

هع هع هع غيرهم كلهم يسلمو حبيبتي

بس انا عندي لج شي بيخرب لج كل تخيالتج المزعومه

ترى البارت الجاي مو الأخير للحين للرواية بقية

و توقعاتج غلط هع هع هارد لك

و انا بعد كتبت لج بالاحمر عشان الرومنسية

هههههههههههههه​

 

[غيرهم كلهم]

ومين قلك بدي الرواية تنتهي

طوليها على قد ما تقدري ههههههههههه

كل يوم صبح اول ما اصحى ادخل عليها :35:

مستانسة فيها وايد :26::26: ​

 

[محبة الطاعات]

ههههههههههههههههههههههههههههههه

حسستيني انج تطلعين على البحر مو تقرين روايتي

يسلمو غيرهم كلهم بس البارت الجاي بكرة اليوم خلاص

بارت اليوم توج قاريته ما فيني طاقة انزل واحد ثاني ^,^​

 

[start change]

رووووووووووعهـ

 

[start change]

دام ربي راضي عنه كتب له القبول والراحه

 

[حلا شرقي]

الجزء هذا حلو وعجبني وعاجبتني شغله حلوة بحمد انه دايم حاس بالذنب من اللي سواه قبل وخوفه من ان اهل اماني يعرفون حقيقته واكيد مابيقدر ينسى ماضيه بهالسهوله لان اللي كان يسويه موشويه بس الحمدلله المهم ان الله هداه
وبالفعل انتي نبهتينا بالأجزاء اللي طافت عن اهميت دعاء الام لولدها وانها ماتيأس لان كثير من الامهات للاسف لمه تشوف ولدها مثل حمد تقول هذا ميؤوس منه وما تكلف على خاطرها تدعي له قصتك رائعه ونبيها كاملة وبالتفصيل ماورانا شي
وأشكرك عالمجهود اللي تبذلينه......

 

[doni]

حلللللللللللللللوه

 

[start change]

انتظرررررررررررررر الباااااااارت يا حلووووووووووووووه

 

[نبراس الشرق]

اتمنى حمد لايخبره اماني بماضيه لانه مو من صالحه

ياحمد ماضي وانتهى ادفنه وسك اكتمه لو خبرت

اماني عنه راح تشك فيك وتفقد الثقه وتكون حفرة

لنفسك حفره من تاب تاب الله عيه والتوبه تجب ما

قبلها اثبت على الطاعه واسال الله العافيه والسلامه​

 

[غيرهم كلهم]

ههههههههههه واحلى من البحر كمان

فكرتك كاتبه البارت

بس هيك شايفتك تحت

بانتظارك​

 

[حلا شرقي]

يالله نزليلنا بارت جديد بانتظارك اسمك موجود "ادري بتقولين عنا ملاقيف "

 

[start change]

نرررررريد باااااارت نيوووووووو
نرررررريد باااااارت نيوووووووو
نرررررريد باااااارت نيوووووووو

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

start change

يسلمو حبيبتي انتي الرووووعة كلها
و ان شاء الله على الساعة 12 بينزل البارت الجديد لأن الحين مشغولة شوي

شاكرة لج مرورج و متابعتج لي :5:

حلا شرقي

مشكورة حبيبتي على متابعتج الدايمة لي و الله يعافيج يا ربي و انا ذكرت هالموضوع لأني بجد وايد اشوف الحين الناس ما فيهم صبر لكن ام حمد صبرت و صبرت و الحمد لله الحين الله حقق لها اللي تبيه بسبب كثرة الدعاء و الألحاح و على فكرة في ناس يستحون انهم يطلبون وايد من ربهم و هالفئة انا استغرب منهم بصراحة يعني كيف الواحد يستحي من ربه سبحان الله

شاكرة لج مرورج حبيبتي نورتي موضوعي :5:

نبراس الشرق

ان شاء الله بتعرفين في البارت الياي شنو بيسوي حمد

عجبتني طريقتج يوم تكلمين حمد حسيتج وايد متأثرة ^,^

مشكورة على مرورج الغالية:37:
​

​

غيرهم كلهم فديتج انا و فديت اللون الأزرق اللي كاتبه فيه

على العموم السموحة على التأخير بس ان شاء الله البارت الجاي بينزل على ال 12 لأن عندي ظروف شوي :5:

مشكورة على المرور فديتج :37:



​

 

[نبراس الشرق]

شكرا غاليتي ننتظرك خذي راحتك ولا يهمك

وشكرا على سعة صدرك علينا لطرح افكارنا وتوقعتنا

لانه والله هذا من الحماس الله يعطيك العافيه​

 

[محبة الطاعات]

بسم الله الرحمن الرحيم

بعد ما حمد سمع كلام ابوه و سعد قرر انه يحاول يريح روحة من التفكير شوي و ياخذ له شور, و هو بالحمام قعد يبكي و هو يتذكر حاله و شوي شوي علا صوت نحيبه و حس بروحه معصب على نفسه و لما جا يطلع من الحمام لأنه خلص الشور شاف نفسة بالمرايه و هني حس انه بيموت من الحسرة اللي ماكلة قلبة و حس بصدرة حرارة اول مرة يحس فيها و ما ارتاح الا لما قعد يصارخ بعلو صوتة و صوتة وصل لأهله اللي متجمعين ياكلون حلا ملكته تحت في المجلس و على طول سعد و مشعل و الأب و الأم وراهم راحوا يركضون يبغون يشوفون مصدر الصراخ ولما دخلوا على حمد لقوه قاعد على الأرض و مغطي وجهه بأيدينه و وجهه صاير احمر من شدة الغضب اللي اهوه فيه و جلس الأب و سعد يقرون على حمد بعض الآيات لعل هالأيات تخفف عنه اللي اهو فية و الام كانت تحاول تهديه و مشعل كان واقف منصدم من اخوة اللي دمرتة المعصية و حاول انه يهديه لما خف تأثير الصدمة عليه, و بعد فترة هدا حمد و قال لابوة و دموعة في عينه
​

* حمد(و هو يطالع ابوه): يبا انا خايف ارجع للحال اللي كنت فيه.
* ابو حمد: حمد تعوذ من بليس ترى كل هذي وساوس من الشيطان يبي يردك مثل قبل.
* حمد: استغفر الله .. استغفر الله, طيب يبا انا لو ما قلت حق اماني اخاف افعالي تفضحني او اخاف الله يبليني بوحدة من اللي اعرفهم قبل, تقول لها على كل شي و اكيد اماني بتكرهني وقتها.
* ابو حمد: حمد قلت لك تعوذ من بليس .. تدري صل لك ركعتين و صدقني اول ما بتخلص بتلاقي نفسك مرتاح و كل هالهموم اللي ببالك راحت.
* حمد: يس يا يبا .........
* سعد(قاطعه): حمد سو اللي قاله لك ابوي و صدقني .. صدقني بتشوف الدنيا غير و لو ما نفع ارجع صلي بعد ركعتين لغاية ما ترتاح عشان تروح حق اماني وله انت نسيت انها عروس و قاعده تتجهز لك الحين .. وله انت ما ودك تشوفها هاااا؟
* حمد(و هو يطالع الأرض): ......
* سعد: يعني ما تبي تشوفها؟
* حمد(تنهد و طالع سعد): ان شاء الله بحاول.
​

و طلعوا و خلوا حمد بروحة يصلي و عقب نص ساعة تقريبا و الاهل كانو بالمجلس نزل حمد و كان على اخر شياكة و كان لابس ثوب و شماغ و ساعة رجاليه ماركة و نظارة شمسية قمه في الفخامة و كان شكله وااااااااااااااااو و هذا كله غير العطر الفواااااح
​

* مشعل: اوب .. اوب, ما نقدر على معرسنا اقول حمود جنك صكيت علي و انا اصغر منك احم .. احم. <<< و هو يعدل ياقة ثوبة
* حمد: ههههههههههههه خبرك معرس لازم اصير اخر شياكة.
* ام حمد: مشعلوووو يوز عن اخوك خله يفرح وله نسيت يوم تعرس انت شنو سويت فينا هااااااا.
* مشعل: ههههههههههههه يما ما يصير جي عاد فضحتينا جدام المودام هع هع هع. <<< و وجهه صار احمر من الخجل
* حمد(يتكلم و عيونه مليانة ثقة): اي عشان تحرم تتنقرش فيني اخر لك مرة تراني حمد ال.... اللي محد يقدر عليه خصوصاً الحين. <<< و يناظر ابوة يبي يشوف شنو ردة فعله
* ابو حمد: و النعم .. و النعم و الله بولدي شيخ الشباب.
* ام حمد + سعد و زوجتة + نورة +مشعل و زوجتة: ههههههههههههههه ^,^.
​

و على طول حمد راح باس راس ابوه و سلم عليه و قال له انه بيروح لاماني و بيقعد وياها للساعة 12 و بعد موافقة الأب راح حمد

و بعد ما وصل بيت بو محمد دخل حمد و سلم على بو محمد و على اخوان اماني و شوي الا اماني جاية تمشي و من الخجل وجها صاير احمر كانت لابسة عباية وسيعه و بحجابها الشرعي الكامل (فكر حمد و قارن بينها و بين غنيمة و استغفر ربه و حاول ينسى الموضوع) دخلت و سلمت على ابوها و حبت راسه و سلمت على اخوانها و يوم جات عند حمد حاولت ترفع عيونها و ما قدرت توصل لغاية ركبته الا و شافت ايدة ممدوه لها خافت و ركضت على ابوها و الكل ضحكوا عليها المسكينه كانت محسبته بيضربها و هو كان بنيته يبغي يسلم عليها ضحك عليها حمد من قلبه و بنفس الوقت كسرت خاطرة ما هانت عليه يخرعها و بعد ما خلصوا ضحك و هي للحين جنب ابوها وقف حمد و الكل وقف له احتراماً و استأذن ابو محمد انه بياخذها و بيطلعون و طبعا الأب وافق و البنت كانت لازقة في ابوها مثل الصمغ و طلبت من الأب ان يوصلها لغاية السيارة وحمد ضحك بخجل و كان حاس انها خايفة منه ما يدري ليش بس ما اهتم للموضوع و لما ركبوا السيارة حمد و اماني ما كانو يتكلمون حمد كان مركز في السواقة او كان يتظاهر انه مركز بالسواقة و هو باله كان عند اماني اللي كانت تطالع من زجاج السيارة كأنها طفل اول مرة يشوف الدنيا لغاية ما قرر حمد انه يكلمها
​

* حمد: احم .. احم امممممم اماني.
* اماني(لفت راسها بفزع و هي تطالعه): نـ..ـنـ..ـنعم!!
* حمد(بخوف عليها): بسم الله الرحمن الرحيم عليج .. شفيج خايف؟؟ تراني بشر و ما بسوي لج شي.
* اماني(عدلت قعدتها و ضبطت امورها): هااااا .. لا ما فيني شي بـــــــــس .....
* حمد(قاطعها): بس شنو؟؟ انا حاسج متغيرة .. اماني اذا متضايقه من وجودنا بروحنا قولي لي انا زوجج و انا الحين اكثر واحد بيتفهمج و انا اساساً متفهم الوضع ادري انج اول مرة تكلمين واحد غريب عنج لا و فوق هذا كله تطلعين وياي صعبة و الله صعبة.
* اماني(بحماس): انزين خلنا نرجع البيت.
* حمد: هههههههههههههه يعني انا مطلعج عشان نمشي هالمسافة و عقب تقولين لي نرجع البيت؟
* اماني: حمد انا....
* حمد(قاطعها): شنو؟؟ شنو قلتي؟؟ عيدي علي مرة ثانية. <<< وكان حاط ايدة ورا اذونة
* اماني(بفزع): شنو؟؟ شنو؟؟ و الله ما قلت شي.
* حمد: هههههههههههههه و انتي كله خايفة .. انا بغيتج تعيدين اسمي لأني اول مرة ادري ان اسمي حلو لهذي الدرجة.
* اماني(نزلت راسها بالأرض و بدلع رباني): ههههه ههههه خرعتني عبالي فيك شي.
* حمد: فديت هالضحكة انا اي جذي ضحكي و ابتسمي و خلي الحياة تبتسم لج عسى ربي يخليج.
* اماني(لا ارادياً):حــــــــــمــــــــــــد. :5:
* حمد: يا قلب حمد يا حياة حمد انتي يااااااااااااه ما كنت متوقع اسمي بهالحلاوة فديتج انا.
* اماني(بقمة الدلع): حـــمـــد خلاص عـاد احرجتني. :5:
* حمد: يا عيون حمد انتي خلاص .. خلاص لأن لو كثرتي بيصدني شي انا ادري.
​

و شوي شوي بدت اماني تتكلم و تاخذ و تعطي و حمد كان ذايب على الأخر​

​

​

​

​

​

​

المهم راحوا الكافية اللي حمد اخذ له ريم اول مرة و اماني هي اللي كانت طالبه انهم يروحون هالمكان لأنه مكان اشتهر بالهدوء و الرومنسية و حمد لما قالت له اماني عن المكان حط ايدة على قلبة بس تظاهر ان ما في شي و ان الوضع عادي لكن من داخل كان في قمة الخوف و لما دخلوا طلبوا لهم 2 كوفي و قعدوا يسولفون و مع السوالف و الكلام اماني عزمت حمد على الغدا عندهم في اليوم الثاني (مثل ما وصتها امها) و حمد نسى موضوع انه يقولها عن ماضيه لأنها كانت شاغلته برقتها و دلعها اللا ارادي و اماني كانت في قمه الفرح و كانت مثل الوردة المفتحة في عيون خطيبها و حمد كان طاير فيها طير و ما كان مصدق انها صارت له و انه صار خطيبها و كلها شهرين و يصير حفل زواجهم و تكون له للأبد طبعا بعد الكوفي حمد تمشى مع خطيبته بالمجمع شوي و راحوا تعشوا و بعدين رجعها البيت

حمد حب يسوي اختبار لأماني و يشوف شنو ردة فعلها, لما وصلها البيت دخل و كلم اخوها و طلب منه رقم تلفون اماني و قال له لا تقول لها اني اخذت رقمها ابي افاجأها, و لما وصل البيت و راح غرفته اتصل عليها​

* حمد: الووووو .. السلام عليكم و رحمة الله و بركاتة.
* اماني: و عليكم السلام و رحمة الله و بركاتة.
* حمد: فديت هالصوت انا.
* اماني: نعم!!!؟؟؟ .. من معاي لو سمحت؟؟؟؟؟
* حمد: اممممم .. واحد معجب فيج لأقصى درجة.
* اماني: لو سمحت سكر الخط بكرامتك لا اسكره بوجهك.
* حمد: فديت هالصوت اللي مذوبني ......
​

توووووووووووووت (سكرت الخط بوجهه)

و رجع اتصل و ما ردت و رجع اتصل تقريبا 10 مرات و كانت تسكر الخط بوجه كل مرة لغاية ما اتصل المرة الـ 13
​

* حمد: الوووووو! <<< بكل حماس و عصبية
* ____: الوووو .. حمد ؟؟؟
* حمد(انحرج بعد ما سمع صوت ابو محمد): هه هه هه .. عمي .. شفيها اماني سكرت الخط بوجهي و بعدين ما قامت ترد علي؟
* ابو محمد: ههههههههههههههههههههههههههه .. لا .. لا .. لا الله يقطع بليسج يا اماني قوية هالمرة هذا زوجج يا هبله (يكلم اماني) هههههههههههههههههه السموحة منك يا حمد و الله ما ادري بس هالبنت الخجل بيقطعها تخيل جايتني تركض تقول في واحد يغازلها بالتلفون هههههههههههههههههههه .. لحظة .. لحظة اماني معاك.
* اماني: الو! <<< بدلع مخلوط مع الخجل
* حمد: اموووووله .. شفيج علي انا حمودي جي تقولين عني مغازلجي؟
* اماني(بعد ما رجعت غرفتها): اسفة و انا شدراني انك حمد انا شفت واحد يغازل قلت اسكر الخط و ابعد عن المشاكل.
* حمد(بعد ما كبرت اماني في عينه مليون مرة): فديتج انا يا قلبي انا اخذت رقمج من اخوج و قلت اسوي لج مفاجأة جي تسوين فيني تفشليني جدام ابوج؟
* اماني: اسفة يا حمد و الله مو غــصــدي.<<<< بدلع
* حمد: لا .. لا .. لا انا ما ترضيني الا بوثه كوبييييييرة حق حمودي حبيبج.
* اماني: حمد مو كأنك اخذت علي وايد اليوم. <<<< معصبة و تتدلع عليه
* حمد: ههههههه انزين انزين خلاص بنطم(بسكت).
​

و كملوا سوالفهم لغاية اذان الفجر و بعد الأذان حمد قام يصلي الفجر بالمسجد كالعادة و لان يوم اجازة رجع البيت و نام بعدها

حمد في اليوم الثاني كان على وعدة لاماني انه بيروح يتغدى عندهم طبعا استأذن من ابوة و تكشخ على الأخر و كان لابس بنطلون جينز كحلي روووعة و تي شيرت ماسك على جسمة لونة ازرق سماوي و فيه ارقام كبار باللون الكحلي و حزام ابيض و ساعة ماركة لوناها ذهبي و جلدها اسود و كان لابس نظارة شمسية جنان و العطر مالا داعي اقول لكم واااااااااااااو, وراح و لما وصل قعد و سولف مع ابو محمد و اخوان اماني و اماني كانت وياهم و جالسة جنب ابوها كانت لابسة فستان قصير رووووعة بكموم قصيرة لونه احمر و بنطرون سكني لونة اسود و كانت حاطه على خصرها حزام عريض لونه اسود و كانت لابسة عقد فيه كريستالات سودة كبيرة و كان العقد طويل و كانت مخليه شعرها البني الطويل اللي واصل لغاية خصرها سايب و كانت لابسة تاج اسود و فيه شريطة حمرا على جنب مزينة بفصوص بيضا و كانت مطلعة لها قصة و الميك اب كان كحل ناعم و بلاشر احمر خفييييف و قلوس احمر مخلي شفايفها روووعة و حمد كان بيكل اماني اكل بعيونه لكانه كان يحاول يصبر نفسة لغاية ما يجلسون لوحدة و اماني كانت منخشه ورا ابوها و مستحية من حمد ,طبعا اماني ما نطقت بولا حرف و حمد كان يسولف بس باله مع اماني لغاااااااااااية ما حطوا الغدا و حمد كان قاعد على السفرة جنبة ابو محمد و على جنبة الثاني محمد اما اماني فكانت جالسة جنب ابوها و حمد كان بيجن ان فترة العزومة بتخلص و هو ما قعد مع اماني لوحدهم لغاية ما خلصوا الغدا و بعد الغدا ابو محمد طلب من حمد انه يخليه بروحه بالمجلس شوي لغاية ما اماني تجيب الحلا لحمد و تجلس معاه هني حمد حس روحة بيطير من الفرحة

جات اماني و هي شايلة صينية الحلا و القهوه و على طول حمد فز و قام يبغي يساعدها و هي خجالة منه لغاية ما شالوها اهما الأثنين و حطوها على الطاولة جلست اماني تصب القهوه لحمد و تحط له حلا و خلت تلفونها جنبها و حمد كان بيجن بيها تتكلم يبها تنطق لكنها كانت ساكته و شوي شوي حاول معاها لغاية ما نطقت و بدت تسولف و تسولف و هو كان موصل حده ودة ياخذها بحظنة, و بلحظة تجرأ انه يحط ايده على خصرها و يخطف بوسه من خدودها و ما حس الا كف يطرقع على خده انصدم و شاف اماني قايمة تركض عنه :5::5::5::5: و طلعت و تركته لحاله حمد كان للحين مصدوم من ردة فعل اماني ان كيف تمد ايدها علي و انا ما في بنت تجرأت تسوي لي هالشي و هو يفكر رن جوال اماني و لما شاف الجوال لقى مكتوب فيه غنيمة يتصل بك خاف, و دقايق الا اماني داخله و تخطف التلفون من ايد حمد

* اماني: الوووووووو ريومييييييي اتصلي علي بعد شوي اكلمج اوكي حياتي.
​

* حمد(بقلبه): ريومييييييييييييييييي​

صدمممممممممممممممة غنيمة + اماني = كيفففف؟؟؟


اكمل لكم البارت الياي و السموحة منكم تأخرت في تنزيل البارت بس كانت عندي ظروف قهريه اترككم في امان الله و رعايتة:37:​

​

​

​

​

​

​

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة
​

أخواتي العزيزات اعتذر عن عدم ردي علي اي توقعات للبارت الجاي

فرجاءاً تبون تتخيلون شنو بيصير تخيلوا بس

بهالبارت بالذات اعتذر عن التعليق على اي توقع لغرض في نفسي

بتعرفونه البارت الياي ان شاء الله

أشكركم من كل قلبي ^,^

​

​

 

[محبة الطاعات]

بسم الله الرحمن الرحيم

السلام عليكم و رحمة الله وبركاتة​

هههههههههههههه حلا شرقي وايد مستعجله

السموحة منج حبيبتي كان بودي انزل البارت و انتي موجودة

بس و الله ما كنت قادرة

و على فكرة لقافتكم مثل العسل على قلبي:22:

start change

هههههههههههههههه حسستيني اني قاعدة في ثورة

مشكورة على هالحماس اللي ان شاء الله دوم

و السموحة منج طولت على ما نزلت البارت الجديد
​

نبراس الشرق

أختي الغالية بالعكس انتي ما تتصورين شكثر افرح و استانس لما اشوف افكاركم و اشوف توقعاتكم احسكم معاي بالجو

الله لا يحرمني من توقعاتكم و لا من ردودكم اللي تثلج صدري:5:​

​