زوجتي العزيزة وجودج غير حياتي (واقعية)

[محبة الطاعات]

بسم الله الرحمن الرحيم

السلام عليكم و رحمة الله و بركاتة

زوجي قرة عيني

الله يسلمج عزيزتي و ان شاء الله بحاول انزل البارت الأخير الحين

مشكورة على المرور :5:

حلا شرقي

مشكورة حبيبتي على متابعج لي و على ردودج الكشوخية بس لا تسين ترى للحين في بارت اخير للقصة لا يطوفج ترى حدة اكشن ههههههههههه

و مشكورة على الدعوة الحلوة الله يستجيب منج يرزقج بمثل اللي دعيتي لي فيه :5:

آميييييييييييين

ههههههههههه غيرهم كلهم ايه عليج

الصراحة اني ما بنساج و لا بنسى ردودج الحلوة اللي كانت دوم ترسم البسمة على شفاهي بس بقول لج شي ترى البارت الأخير طويل + اكشن يعني لايطوفج و الصراحة مستعجله ابي انزله عشان اشوف ردج عليه فديتج

مشكورة على المرور الرووعة:5:

+ شكرا على الطاقة الأيجابية الي عطيتيني اياها يوم تقولين لي انج ادمنتي كتابتي الصراحة احرجتيني فديتج :5:

نبراس الشرق

عزيزتي حبيت اشكرج من كل قلبي على دعاويج الحلوة لي بردودج اللي كانت تفرح قلبي

صحيح وصلنا لنهاية المطاف لكن للحين باقي الجزء الأخير اللي بتكون فيه الصدمة الأخيرة

مشكورة على ردج المشجع لي الصراحة كلمة مشكورة شوية في حقج لأني يوم قريت ردج حسيت عطيتيني طاقة اجابية اني اكمل كاتبة اشكرج عزيزتي :5:

فداااك الروح

الله يسلمج يا الغاليه و ان شاء الله الحين بنزل البارت الأخير بس بيكون على اجزاء

و خلج على حماسج ترى البارت الجاي ابووو الحماس كله هههههههه :31:

شاكرة لج مرورج عزيزتي

اولاً حابة اشكر كل الأخوات اللي ردوا علي و اللي كانو متابعين بصمت لأن بصراحة ما توقعت ان عدد المشاهدات يوصل ال 2000 بس انصدمت يوم شفته عدا هالرقم و فرحت وايد وايد من جي حبيت اشكركم

ثانياً حابه اقول لكم شي مهم انا في البارت قبل الأخير مشيت بسرعه لاني كنت ابيكم تعرفون حال حمد و هو بطل القصة

لكن الحين بنتقل فيكم لزاوية ثانية زاويه انتو ما شفتوها من قبل نظرة اخرى نظرة بتبرر لكم تصرفات و اشياء وايد صارت قبل عشان جي الحين بنرجع بالزمن ورا شوي و البارت بيكون طويل شوي السموحة منكم بتعبكم وياي

بس ان شاء الله يعجبكم البارت :37: ​

 

[محبة الطاعات]

بسم الله الرحمن الرحيم​

هالبارت بقسمه على اجزاء و كل شوي بنزل جزء لأنه طويل شوي​

​

مثل ما قلت بالرد الي قبل الحين احنا بنرجع شوي بالتاريخ لغاية ما نوصل للأيام الأولى اللي حمد تاب فيها و قبل ما يتقدم حق اماني​

في هذا اليوم كان حمد زاير عمر في بيتهم و كانو قاعدين في المجلس يتقهون و يسولفون عن حياتهم اللي تغيرت و كيف انهم يبغون يطورون من نفسهم و من هالكلام​

* حمد: آآآآآآآآه يا عمر, تدري انا حاس اني متندم على كل لحظة قضيتها و انا بعيد عن ربي, ما كنت ادري ان طاعة رب العالمين حلوة جذي.
* عمر: اي و الله و انت الصاج, تدري حمود انا شنو اتمنى الحين؟؟؟
* حمد: خير .. شنو تتمنى؟
* عمر: اتمنى ان تكون عندي محاية و امحي فيها كل تاريخي اللي قبل و ابدا من جديد حياة جديدة بأسلوب جديد.
* حمد(يبتسم و هو مهموم و يفكر في حاله): جان زين على الأقل كنت انا مسحت تاريخي اللي ممكن يأثر على مستقبلي.
* عمر: شنو غصدك؟
* حمد: يعني خايف اهل البنت ما يقبلون فيني و انت عارف تاريخي المشرف, يعني لو سألوا عني اكيد ما بيوافقون لا سمح الله.
* عمر: حمد توكل على ربك و تذكر كلام سعد البنت لو ما وافقت بتلاقي اللي احسن منها.
* حمد: اي و الله الحمد لله على كل حال.
* عمر: حمد الا على طاري الماضي و المستقبل تتوقع شنو بتكون ردة فعل الشله يعني مرة وحدة احنا الأثنين بننقطع عنهم.
* حمد: اي و الله .. تصدق تذكرت ريم, انا كنت واعدها بالزواج و مع السفر و التوبة و انا اساساً ما كنت اكلمها وايد قبل ما اسافر نسيتها, تصدق انها للحين ما اتصلت علي؟
* عمر: اكيد ما بتتصل لأنك قلت لها انك ما تدري متى بترجع و انك لما ترجع بتكلمها و له نسيت؟
* حمد: اي صح و انا ما اتصلت فأكيد ما تدري اني رجعت.
* عمر: انزين .. شنو بتسوي الحين؟
* حمد: طبعاً بكلمها.
* عمر: و شنو بتقول لها؟
* حمد: بنهي علاقتي فيها و هي اصلاً قالت لي من قبل انها ما تحبني و ان لو ما تزوجنا عادي لأنها ما تحبني و انا الحين خلاص الحمد لله ما ابي غير اللي في بالي.
* عمر: ههههههههههه غصدك على البنت اللي في المطار.
* حمد: اكـــــــيد .. عمر طلبتك يا اخوي لا تردني.
* عمر: امر؟؟؟
* حمد: انا ابي اتصل عليها الحين و انا وياك عشان لما اشوفك اتذكر اني خلاص صرت انسان ثاني و اتقوى اني اقول لها كل الي في قلبي.
* عمر(بمزح): لأ .. لأ ما اقدر مستحيل .. استغفر الله, هههههههههههه .. تصدق حسبتك بتطلب شي قوي مع ويهك.
* حمد: هههههههههههههه لا لا صج عمر انا من صجي, ها اتصل عليهااااا؟؟؟؟؟؟؟
* عمر: توكل على الله و انا وياك.​

و اتصل حمد على غنيمة​

* غنيمة: يا هلا و الله بالغلا كله.
* حمد: اهلاً اختي غنيمة.
* غنيمة(باستغراب و دهشه): اختي غنيمة!!
* حمد: اي انتي مو اختي بالأسلام وله شرايج؟
* غنيمة: ههههههههه بيبي عليك حركات مو طبيعيه شلون اختك و انا بصير زوجتك عقب فترة هاااا فسر لي؟
* حمد: الصراحة انا متصل بخصوص هالموضوع.
* غنيمة(و حست ان في شي): حمد خرعتني شصاير .. شفيك .. فيك شي؟
* حمد: اي في غنيمة بقولج بصراحة ..... اممممممم انا ما اقدر اتزوجج.
*غنيمة(منصدمة): ليش!!!!!!!!!!!؟؟؟؟؟؟؟؟؟؟
* حمد: لأن الصراحة انا التزمت و ناوي اني اصير مسلم قول و فعل و الأفعال اللي كنت اسويها وياج مو افعال مسلمين.
* غنيمة: ..........
* حمد: و اذا انتي بتظلين على شروطج هذي انا ما اقدر اتزوجج اسمحي لي.
* غنيمة: اها يعني انت تبي تتهرب من شروطي و تبيني اغيرها عشان تتزوجني .. شوف يا ولد الناس انا قلت لك من اول لحظة انا عندي شروط توافق عليها تاخذني ما توافق نظل مثل ما احنا حبايب و بعدين محد طقك على ايدك و قالك تزوجني انت اللي عرضت الموضوع علي و انا متفهمه انك عرضته علي لأنك تعاطفت مع قصتي بس انا عادي عندي و الله عادي لو قلت لي ما تبي تتزوجني لأني مستانسه وياك جذي و ما بيهمني لو غيرت رايك بخصوص الزواج بتظل عندي حمد الغالي العزيز.
* حمد: غنيمة الموضوع مو جي انا ما ابي اكون زوجج و ما ابي امشي وياج انا ابيج تنسيني.
* غنيمة(منصدمة بقوة): يعني ما تبيني؟
* حمد: الصراحة انا ابيج بس في شي ثاني.
* غنيمة(ارتاحت شوي): و شنو هالشي؟
* حمد: ابي الله يهديج و تتركين الطريج اللي انتي تمشين فيه و انا مستعد اساعدج و الاقي لج شغل بالحلال و ....
* غنيمة(قاطعتة بعصبيه): محد شكى لك الحال و محد طلب مساعدتك انا سبق و قلت لك بدالك الاقي الف لا تقعد تتفلسف علي.
* حمد: يعني ما تبين الله يرضى عليج و تعيشين خالدة بالجنة, غنيمة ترى الأخرة يا جنة يا نار .. يا ابيض يا اسود و انتي قاعدة تمشين في طريج الغلط يعني انتي رايحة للنار بالطريق السريع.
* غنيمة(عصبت اكثر): حمد وله اقول اخوي حمد؟ انا قلت لك محد شكى لك الـــــــــحــــــال, و محد طلب رايك يا المطوع.
* حمد: اتشرف اكون مطوع.
* غنيمة(و اخذتها العزة بالأثم): تشرف بعيد عني يكون بعلمك يريتك تنسى هالرقم و ما تتصل عليه مرة ثانيه.
* حمد: اللي يريحج بس يا غنيمة انا كنت ابي اكون سبب في دخولج الجنة لا اكثر و لا اقل.​

طوووووووووووووووووط (سكرت التلفون بوجهه) انصدم و قام يطالع التلفون و قال حق عمر​

* حمد: تصدق سكرت التلفون بوجهي؟
* عمر: عادي عقب الكلام اللي قلته لها, شي طبيعي تكون هذي ردة فعلها.
* حمد: تدري عيل دام السالفة جي و الموضوع سهل انا بكلم الشله الحين و بقول لهم عنا وان احنا ما نبيهم و خلاص.
* عمر: يلا.​

و يتصل حمد على واحد من الشله اسمة خليفة​

* خليفة: الووو!!
* حمد: السلام عليكم و رحمة الله و بركاتة.
* خليفة: هههههههههههههههه اهلاً اهلاً اخي المطوع.
* حمد: شدراك اني صرت مطوع؟
* خليفة(بمزح): اكيد مطوع دام انك تسلم سلام كامل و انت اول حتى السلام ما تقولها .. المهم انت و عمور وينكم احنا يوم كنا بالمطار اتفقنا نروح شقة عبيد عشان نكمل السهره هناك و لما دورناكم شفناكم طالعين مع بعض وين طسيتوا؟
* حمد: كنت تعبان و عمر رجعني البيت وله ما لاحظت اني تعبان في الطيارة؟
* خليفة: هههههههههه و انا وين الاحظك و انا اشوف هالمضيفات كل وحدة احلى من الثانية اهد المضيفات و اطالع سحنتك اللي تقطع الخميرة من البيت.
* حمد: استغفر الله خلوف شنو هالكلام.
* خليفة(حس ان الموضوع فيه غلط): لأ .. لأ مو طبيعي اقولك صاير مطوع.
* حمد: اي صاير مطوع شعندك؟
* خليفة(رجع يمزح): ههههههههه عندي الشله اليوم كلنا مجتمعين يقول عبيد بيجيب لنا صنف جديد و الربع حدهم متحمسين.
* حمد: بس انت تدري اني من قبل ما اخذ مخدرات وياكم لأني ما احبها.
* خليفة: انزين تعال تونس ويانا القعدة فيها بنات وكيف يعني بتكون وناااااااسة و صباحي بعد.
* حمد: بس انا صرت مطوع و قررت اني اتكر هالخرابيط.
*خليفة(منصدم): و الله من كلمتني و انا حاس فيك شي غير, حمود شتتطوع انت من صجك؟ انت وين و التطوع وين؟ انت راعي بنات راعي خمور بس مو راعي دين؟
* حمد(بعصبيه): ليش يعني شنو ناقصني انا؟
* خليفة: ناقصك عقل ههههههههههههههه, اقول اترك المصاخة عنك و تعال ننتظرك الليله.
* حمد: ماني جاي و انساني انا و عمر لأن عمور بعد معاي, احنا الحمد لله الله هدانا و الفال لكم.
* خليفة: بل الله لا يستجيب منك من زين الديانة عاد عشان نتطوع كل شي حرام بحرام و كل اسباب الوناسة محرمينها علينا ما تقولي على شنو نتطوع؟
* حمد: نتطوع عشان نضمن اخرتنا لعل و عسى ان ربي يغفر لنا خلوف احنا الي سويناه مو شوي عشان تقول على شنو نتطوع؟
* خليفة(بعصبيه): اقول حموووود انا الحين بسكر مالي خلق مودي يتعكر و بعد جم يوم بتصل عليك لأني ادري انك ما بتصمد هه هه هه ههههههاااااااي.
* حمد: اقول لا تفكر تتصل لاني بغير رقمي عقب اللي سمعته منك انا اسف ما ابي تكون لي علاقة فيك او في احد من الشلة.
* خليفة: ما عليه احنا بنعرف شلون نوصل لك.
* حمد: يلا مع السلامة.
* خليفة: مع السلامة بعد, اقووووول يلا بااااي.
* حمد: استغفر الله.
​

و حمد عصب على الشلة و قرر انه يتركهم و يغير رقمة لكن طبعاً الشلة ما تركوه في حاله و ظلوا يلحقونة يبغون يردونه لهم و لكنه كان يرفض و كانت عنده قوة عزيمة و ارادة و طبعاً اهم دروا انه تزوج من وحدة بنت ناس و راح معاها العمرة و عرفوا انه كان معجب فيها من المطار بالأختصار عرفوا القصة كلها و قرروا انهم يخربون عليه بس ظلوا ينتظرون الفرصة المناسبة و كانوا بين كل فتره و الثانية يحاولون معاه لغاية ما عدى على زواج حمد 6 سنوات قرروا انهم ينتقمون منه.​

 

[زوجي قرة عيني]

اااااااااااااااااااااااااااه

 

[محبة الطاعات]

بسم الله الرحمن الرحيم​

و بعد 6 سنوات قرروا الشله انهم يضرون حمد
​

في يوم من الأيام حمد كان زعلان على زوجته و كانو متخانقين و حمد طلع من البيت و راح يتمشى شوي بالسيارة عشان يغير جو و لما رجع دخل البيت و شاف ظرف موجود على الطاوله اللي جنب الباب استغرب حمد من شكل الظرف يعني من اللي بيرسل لهم رسايل؟ و من اللي جابه ؟ و شنو في داخله؟ و ليش شكله مفتوح بس اللي فتحة رجع سكره؟ و ما كثر اسأله على طول فتح الظرف و قرا الرساله اللي فيه و انصدم (الرساله كان فيها نبذه عن حياة حمد السابقة قبل الزواج + الدليل صور له و هو ويه بنات)و لا ارادياً لقى نفسة دموع على خده و يصرخ على اماني "امانييييييييييييييي" "امانيييييييييييييي" و قام يركض في البيت و لما دخل غرفة النوم لقاها قاعدة على السرير و تبكي بحرقة حمد انصدم من منظرها و على طول راح و حظنها​

* حمد: اماني يا قطعه من قلبي تكفين لا تصيحين.
* اماني(وهي تشهق من قوة بكاها): حــ ــــ ـمــ ـــــ ـد.
* حمد: انا اسف انا اسف تكفين ما ابي اشوف دموعج.
* اماني: انت جرحتني و انا مـ مـ ما اقدر اتحممممممممل.
* حمد(وهو يطالع اماني الي تبكي بحرقة بحظنه و دموعه صارت مثل الشلال): .....
* اماني: حمد انت اول مرة تغلط علي جذي عشان شي انا ما كان غصدي ...
* حمد(قاطعها): انتي تصيحين بسبب الكلمة اللي قلت لج عليها مساعة؟
* اماني: اييييييييي عيل شنو في اكثر من جي؟
* حمد(حس روحة تايه و ببراءة سألها): و الرساله الي برا من جابها.
* اماني(حست انه مو مهتم): شرسالته؟ .. انت شنو تقول؟​

حمد عرف انها ما شافت الرساله بس قعد يهديها و يتأسف لها عشان يستفسر اكثر عن موضوع الرساله و بعد ما هدت​

* حمد: اماني حبيبتي من اللي جاب الرساله هذي؟
* اماني(مدت ايدها بتاخذ الرساله منه): اشوف شوي.
* حمد(وخر الرساله عن اماني): ماله لزوم تشوفين, انا ابي اعرف من جابها؟ و من استلمها؟ و من الي فتح الظرف؟
* اماني: ليش مهتم بموضوع هالرساله؟
* حمد: اماني ردي علي تكفين؟
* اماني: ما ادري بس اكيد عبد الرحمن هو اللي اخذها لأن انا كنت هني قاعدة اصيح.
* حمد: اهاااا يعني انتي ما شفتيها؟
* اماني: لأ .. و اكيد اللي جابها حطها من تحت الباب لأن عبد الرحمن ما طلع و انا ما سمعت الباب انفتح الا يوم تدخل انت.
* حمد: اهااااا يعني جذي السالفه.<<< و تذكر الشله و عرف ان لهم يد بالموضوع لأنهم اهم الوحيدين اللي لهم مصلحة في خراب
زواجة
* اماني: الا ما قلت لي شنو فيها هالرساله؟
* حمد: هاااااا ولا شي مهم .. الا بقول لج انا مضظر اطلع الحين تبين مني شي حياتي؟
* اماني: لا سلامتك, ابيك ترجع لي سالم غانم, حمد تكفى لا تتهور.
* حمد(مستغرب من كلمتها بس طنش): اوكي يلا مع السلامة.
* اماني: مع السلامة.​

و طلع حمد و الشر يتطاير من عيونه و قرر انه يروح يكلم الشلة بخصوص موضوع الرساله و راح عند شقة عبد الله و بالفعل لقاهم هناك متجمعين, عندهم حفلة و كان عندهم حريم + مخدرات + خمور يعني جو الخراب كله دخل و سلم و تلقاه خليفه​

* خليفة: حموود شرايك بقرصة الأذن اللي رسلناها لك؟ هههههههه. <<<< ضحكه شريرة
* حمد: يعني نفس ما توقعت انتو الي ورى قصه الرساله؟
* خليفة: اكيد و من له مصلحة في هالموضوع غيرنا؟
* حمد(بقمة العصبية): خلووووف يوزو عني احسن لكم ترى انا حذرتكم و هذي مو اول مرة.
* خليفة(بقمة البرود): هههههههههه و احنا شنو بنستفيد من بعدنا عنك احنا نبيك ويانا مشتاااااااااااااااقين لك(بهمس).
* حمد(فقد السيطرة و دفر خليفة على الجدار و مسكه من فكة): اخر مره احذركم و الله ثم و الله و انا عمري ما حلفت كذب بتشوفون شي ما شفتووة.<<<< التمو الشله على حمد و البنات اللي كانو بالشقة وقفوا مفزوعين من هالمطوع اللي دخل يصارخ عليهم
* خليفة(ببرود و أشر حق ربعه انهم يهدون): عزيز و غالي يا حمود (و يرسل له بوسة في الهوا) ابشر باللي يسعدك جريب.
* حمد(وحس روحة خلاص الدنيا سودة بوجهه): يعني ما بتيوزون؟
* خليفة(بهمس): قلت لك احنا ما نقدر على فرقاك.
* حمد(و يضحك بخبث): عيل انت اللي ابشر باللي بيجكم و ما اكون حمد ولد الـ .... ان ما راويتكم ان الله حق.
* خليفه(رسل له بوسة ثانية بالجو): بعد عسل على قلبي.​

حمد ثارة ثائرتة و حس انه خلاص بيكسر فك خليفة بين ايدينه لكنة تعوذ من بليس و تركة و توعدهم انه ما راح يخليهم​

و هو بالسيارة كان يفكر شنو يسوي مو قادر يخليهم يبعدون عنه و السر الي حافظ عليه 6 سنين بينفضح و هو يفكر جات على باله فكرة خطيرة و قرر انه ينفذها ​

* حمد (في خاطرة): الحال مستحيل يستمر على ما هو عليه و عاجلاً وله اجلاً راح انفضح و اماني راح تتركني و انا مستحيل اعيش بدونها هي سبب كل الخير اللي انا فيه و بوجدها قربي انا حاس ان ربي راضي عني انا مالي الا اني ابلغ عنهم الشرطة و اكيد لو الشرطة الحين طبت عليهم بيصيدونهم متلبسين و بعدين فرصة اني الحين اروح ابلغ لأنهم اكيد متوقعين اني ما اقدر اسوي شي لأني خايف على سمعتي و خايف ان الخبر يوصل لأماني, لكن انا بطلب من الشرطة انهم يسترون علي و بخبرهم القصه كلها و بالتفاصيل.​

و بالفعل حمد راح للشرطة و بلغ عن اصدقاء السوء اللي كانو ضارينه و كلها كم يوم الا مقبوض على الشلة, اللي قضية اداب, و الي قضيه مخدرات لا حول و لا قوة الا بالله, الشرطة تكتموا على الموضوع لأن حمد طلب منهم و قال لهم انه الحين الله هداه و انه متزوج و خايف ان زوجتة تدري يعني قال لهم القصة كلها و الشرطة تعاونوا معاه و ارتاح حمد من هالشله اللي كانو مجننينه, لكن حمد نسى شي مهم و هو ان يوم يقرا الرساله حطها في الدرج مال المكتب ماله و نسى يشيلها منه
​

​

و بعد مرور كم شهر على قصة الشله و الشرطة و في يوم من الايام حمد كان راجع من المسجد بعد صلاة العشى دخل البيت و قعد على مكتبة و طلب من اماني تسوي له قهوه و قعد يقرا و فجأة دخل عليه عبد الرحمن
​

* حمد(و هو فاتح ايدينه لعبد الرحمن): هلأ .. هلأ بالغالي و الله.
*عبد الرحمن(و هو يرمي بنفسه بين حضن ابوة): أهلين بابا.
* حمد: ها حبيبي تعشيت وله لا؟
* عبد الرحمن: ايييي لأن انت وعدتني تجيب لي شوكلاته بعد العشى.
* اماني(دخلت المكتب): لأ ما في شوكلاته الحين .. الحين في نوم.
* عبد الرحمن: بس بابا وعدني.
* حمد: امونة خليه, بعطيه قطعه صغنطوطة يستاهل اهو ما شاء الله عليه اليوم حافظ عدل و يوم سمعت له كان تمام.
* اماني: حمد لا تدلعه, بعدين بيتعود كل يوم يبي شوكلاته.
* عبد الرحمن: ماما الله يخليج.
* حمد: حرام عليج تقدرين تقاومين هالوجة البرئ, اذا انتي تقدرين انا ما اقدر.
* اماني: حمد انت على بالك في احد يقدر عليك انت و ولدك, ابد اللي براسك براسك اقول انا بقوم اسوي لي شي احسن من القعدة وياكم .
* حمد: ههههههه انزين بس بقولج انا بوكل حماني شوكلاتة و بودية يغسل اسنانة و بنومة هو و اخوانه و انتي سوي اللي بتسوينة و نطريني بالغرفة ابيج بموضوع مــــــــهــــــــم.
* اماني: خير في شي؟
* حمد(و هو يغمز لها):يعني ما تعرفين, مو مشكلة بسوي روحي مصدقج و بتعرفين لما اخلص.
* اماني(فهمت عليه): حــــــــــمــــــــــــد.
* حمد: عيون حمد.
* اماني(وجها صار احمر و مشت عنهم بخجل): يلا انا بروح مع السلامة.
* حمد: اشوفج عقب شوي حياتي.​

حمد حمل عبد الرحمن و عطاه الشوكلاتة الي وعدة فيها و غسل له اسنانة و نوم اخوانة و يوم جا ينومه, عبد الرحمن قال حق ابوة انه بيقول له شي مهم و لما حمد سألة شنو هالشي المهم​

يتبع​

 

[سنكرس]

هؤلاء هم أصحاب السوء لا يهنأ لهم بال
إلاّ بجرّ غيرهم للرذيلة !
أما قال المثل :(الصاحب ساحب)!

 

[زوجي قرة عيني]

كمليييييييييييييييييييييييييييييييييييييي

 

[محبة الطاعات]

بسم الله الرحمن الرحيم

السلام عليكم و رحمة الله و بركاتة

الصراحة ابي اعتذر منكم لأني ما بقدر اكمل

باجر ان شاء الله اكمل

السموحة منكم عذروني :37:



​

 

[نبراس الشرق]

يالله موقف جدا صعب بس الحمد لله مر على خيرررررررمتابعه

الى النهايه يعطيك العافيه​

 

[غيرهم كلهم]

اهئ اهئ اهئ

نزلت دموع يوم قريت ردك يا الغالية :8:

اقول انا تعلقت فيكي حيل وباشر اجي اطلب يدك من اهلك :5:

(عسل وانا اتكلم خليجي ههههههه )

الله يسعدك يا رب واكيد ما اجاملك يوم قلتلك ادمنت كتابتك

ما شاء الله عليكي اسلوبك حلو ومشوق

والبارت الاخير روووعة بس انا بقول شكلها قرأت رسالة بس تستهبل

عشان لو عرف انها قرأت الرسالة اكيد راح يضايق ويكون موقفه محرج وراح

يصير شرخ بينهم بسبب هالموضوع فعشان هيك سكتت

وهلأ عبد الرحمن بقوله انه اخد الظرف لامه وشافته بس قالتله لا تقول لابوك

(ذكية انا عرفت نهاية القصة :26​

 

[ام اسارين]

ماشاءالله اسلوب رائع وجزاك الله خير

 

[محبة الطاعات]

بسم الله الرحمن الرحيم​

و جان يصير عندي وقت​

يلا بكمل لكم اخر جزء​

لما حمد سأل عبد الرحمن شنو الموضوع المهم​

* عبد الرحمن: بابا ابي اقولك شي.
* حمد: قول حبيبي شفيك؟
* عبد الرحمن: بابا اليوم انا كنت قاعد العب و كنت ابي ورقة عشان ابي اكتب عليها و ماما قالت لي اخذ من الدرج اللي بمكتبك و خذيت ورقة من الدرج الثالث (اللي فية الرساله) و انا اكتب عليها جات ماما تشوفني, و يوم شافتني طقتني و زفتني و قالت لي لا تلعب بأوراق بابا لأنه بيزعل منك و قعدت تصييييييح انا متضايق لأني خليت ماما تصيح.
* حمد(مو ذاكر انه الرساله للحين عنده): انزين شنو فيها الورقة بابا؟
* عبد الرحمن: ما ادري ماما ما قالت لي.
* حمد: اوكي بابا نام انت الحين و انا بتفاهم ويه ماما و بخليها ترضى عليك لا تخاف حبيبي.<<<< و يطبع بوسة على خد عبد الرحمن

​

و نام عبد الرحمن في حظن ابوة اللي كانت الرساله شاغلة باله و قاعد يتذكر لكنه مو عارف شنو السالفة, و لما نام عبد الرحمن راح حمد المكتب بيكمل قهوته و بيشوف موضوع الرساله بس بعد ما يخلص من القهوه, خلص حمد من القهوه و قام بيروح حق اماني و تذكر موضوع الرساله و فتح الدرج و قعد يدور و هو يدور شاف ورقة مقلوبة و مرسوم عليها شخابيط فخمن انها شخابيط عبد الرحمن و لما قلب الورقة انفجع بأن الورقة هي الرساله اللي الشله الفاسدة ارسلوها له, كمت صرخته و عيونه قامت تدمع بدون شعور و راح ركيض على اماني اللي كانت متشيكه على الاخر عشان حمد​

​

حمد دخل غرفة النوم و كانت الأضاءة خافته و اماني قاعدة على السرير تنتظر حمد و رجع لحمد شعورة بالذنب اللي كان يقاسي منه في اول توبتة, اماني انصدمت يوم شافته مرعوب و يبكي و قامت له تركض لأن حمد بمجرد ما شاف اماني طاح على الأرض و غطى وجهه اللي بدا يصير أحمر بأيدينة, و على صوت نحيبة اماني خافت ليصحون العيال و على طول قفلت الباب اللي حمد خلاة مفتوح و خذت حمد في حظنها​

*اماني(مصدومة مو عارفة شفيه حمد): حمد حبيبي شفيك؟ .. شصاير؟ .. خرعتني؟
* حمد(و مو قادر يرفع راسة و صوتة يعلا و يعلا بالبكاء و النحيب): .....
* اماني: حمد تكفى انطق طيحت قلبي ببطني .. شفيك؟ .. شفيك؟ .. تكفى تكلم!!!
* حمد(بصوت واطي و مبحوح): امـ ـانـ ـي انـ ـا آسـ ـف.
* اماني: ليش شصاير؟ شفيك؟
* حمد( رفع وجهه اللي صار احمممممر و عيونة في عيون اماني اللي بتموت من الخوف عليه): انا و الله ما خنتج ...(و سكت) الرساله ..
* اماني: ايييييي حمد حبيبي انت تصيح عشان الرساله؟ اكيد عبد الرحمن قال لك و انا منبهه عليه مليون مرة انه ما يتكلم.
* حمد(منصدم): يعني انتي تدرين و متماسكه جذي؟
* اماني: حمد انا ادري من قبل لا تتقدم لي.
* حمد(انصدم زيادة و حس روحة تايه و ضايع): شلووووووووون؟ .. من قال لج!!!؟؟؟؟
* اماني: تبي تسمع القصة كاملة؟
* حمد: اكييييييييد.
* اماني: طيب تعال على السرير و ريح و اشرب لك ماي و انا اقول لك على الموضوع كله.​

اماني ساعدت حمد انه يقوم و يقعد على السرير لأن ريوله ما كانت تحملة و خلته يريح و شربته ماي و قرت عليه شوية قرآن و بعدين استرسلت تقوله السالفة​

* اماني: بعد اللي صار بالمطار و بعد ما امي عطتك رقم ابوي و قبل ما تتقدم لي ابوك اتصل على ابوي بالعمرة و لان ابوك يعرف ابوي قال له كل شي عنك ما حب يخدعه و قال له عن مغامراتك اللي قبل ....
* حمد(قاطعها و هو يطالع سقف الغرفة): آآآآآآآآه حسبي الله على الشيطان اللي اغواني.
* اماني(مسكت ايد حمد اليمين بأيدها اليمين و حطت ايدها الثانيه على شعره و مسحت عليه): حمد هذا ماضي لا تعور قلبك فيه تكفى خفف على قلبك انا ما ابي افقدك بسبب ماضي و الله انا بدونك و لا شي, حبيبي انت.
* حمد(يطالعها بأستعطاف): يعني انتي مسامحتني اماني.
* اماني: لو مو مسامحتك ما وافقت عليك.
* حمد(تنهد): انزين كملي.
* اماني: لما ابوك قال حق ابوي, ابوي قال له انه لازم ياخذ رايي و ان انا اللي بتزوج مو اهو, و طبعاً ابوي قالي عشان ياخذ رايي و قال لي ان لازم ارد عليه قبل ما نرد من العمرة, انا في البداية رفضت لأن انا امنية حياتي اتزوج واحد يكون متدين و يخاف الله و يكون صوتة عذب في قراءة القرآن و كنت اسبح و استغفر باليوم اكثر من 100 مرة عشان ربي يحقق لي مرادي و انت مو متدين و لا انت على مزاجي عشان جي كنت برفضك لكن ....
* حمد(فز من الفراش و قاطعها): يعني كنتي بترفضيني؟
* اماني(و هي تسدح حمد على الفراش خايفة عليه يصيدة شي من الأنفعال): حبيبي تكفى لا تنفعل انا ما ابي افقدك خلك منسدح على الفراش عشاني تكفى.
* حمد: انزين كملي ارجوج.
* اماني: ابوي قال لي لا ترفضين او توافقين انتي الحين بمكة و على اشرف ارض بالدنيا استخيري ربج 3 مرات و شوفي شنو يصير وياج عشان تتاكدين من قرارج و ترتاح نفسيتج و ما تتندمين على هالقرار لانه قرار مصيري و بيغير حياتج.
* حمد: و استخرتي؟؟؟
* اماني: اييي الحمد لله استخرت في اول مرتين حسيت روحي مرتاحة لك و بوافق و في الثالثة حلمت فيك حلم حسسني اني لازم اوافق عليك, و وقتها حسيت روحي اني اكبر معجبة فيك و بلغت ابوي بقراري و ابوي اتصل على ابوك و قال له و ابوك استبشر خير و استانس و وعد ابوي انه ما بيخليك تطلقني او تسيئ لي او اي شي من هالقبيل.
* حمد(و هو سرحان): اكيد سعد قال حق ابوي و ابوي قال حق ابوج و الله و كانوا حابكينها علي.
* اماني: تدري انا وافقت عليك و كان قلبي ناغزني شوي و يوم تبوسني في العزيمة لا ارادياً عطيتك كف لأني كنت خايفة انك تنظر لي على اني وحدة من البنات اللي كنت تعرفهم قبلي.
* حمد(كلمت اماني صحته و التفت عليها و ضمها لصدرة): استغفر الله انتي غير يا اماني .. انتي تسوينهم كلهم, انتي اماني الغالية .. انتي الهوا اللي اتنفسة, بس تعالي و الرساله انا متاكد انها كانت مفتوحة يوم اشوفها عند الباب؟
* اماني: اي انا فتحتها و قريت الي فيها و يوم شفت الموضوع تضايقت و قلت لازم اردها مكانها و لا كأني فتحتها عشان انت ما تعرف, لأن ابوك قال لي انك لما تتذكر الموضوع تقعد تبكي و تجيك حالات اختناق و اشياء من هالنوع و الصراحة انا شفتك يوم بالعمرة قلبي كان معورني عليك بس ما اقدر اقولك اني عارفة لأني ادري انك بتزيد و يمكن تروح من ايديني و انا و الله احبك, بس تدري ما قدرت ايود دموعي يوم قريت الكلام و انصدمت يوم شفت حالة الفزع الي انت فيها يوم تقرأ الرساله اول مرة.
* حمد(بنظرة استعطاف و بحة بصوتة من كثر النحيب): يعني انتي تحبيني اماني من كل قلبج؟
* اماني: الا اموت فيك, يعلني اروح فدوة لعيونك يا الغالي يا بو عبد الرحمن.
* حمد(و يضمها لصدرة مره ثانيه): عبد الرحمن قالي انج اليوم يوم شفتي الرساله رجعتي تبكين اماني انا ادري انج متضايقة من الموضوع و لو بأيدي و الله لأمحي الماضي كله و لا اخلي منه اي ذكرى تكفين سامحيني.
* اماني: حبيبي انا مو زعلانة منك بس انا كنت اصيح لأني اتذكر انك كل ما تتذكر هالموضوع تصيح و تتعذب و اخاف ان يصير فيك شي و نفقدك انا و العيال و له و الله انا ما همني ماضيك انا كل همي انك انت ما تتضايق.<<<< و تنزل دموعها الرقيقة اللي بللت كتف حمد و هو ضامها له
* حمد(رفع راس اماني باصابعه و باسها على جبهتها): يا بعد طوايفي انتي تصيحين عشانج خايفة علي و الله ماني عارف شلون ارد عليج و له شنو اسوي لج اماني وربي جمايلج غرقتني.
* اماني: الله لا يحرمني منك يا ابو عبد الرحمن.
* حمد: اماني في قلبي جملة حارقة قلبي ودي اقولها لج.
* اماني: قول يا عمري انت؟
* حمد: زوجتي العزيزة وجودج غير حياتي :3::5:​

تـــــــــــــمــــــــــــت بحمد الله
:37:
لا تنسوني من دعواتكم​

 

[محبة الطاعات]

بسم الله الرحمن الرحيم​

السلام عليكم و رحمة الله و بركاتة​

أخواتي العضوات اللي قريتوا روايتي​

اولاً انا اشكركم من كل قلبي اللي تابعتني و له اللي قرت روايتي على النهاية كلكم مشكورات لأنكم رفعتوا معنوياتي سواء بالردود او بعدد المشاهدات​

و انا الحين تاركة مصيري بيد الله ثم بأيديكم ​

مثل ما قريتوا في اول الرواية ان هذي اول مرة انشر فيها رواية او حتى اخلي احد يقرا شي انا كاتبته لأني بصراحة احس ان اسلوبي مو لي هناك و ما ادري شلون جاني قلب اني انشر شي انا كاتبته الصراحة انصدمت يوم شفت المشاهدات وصلت اكثر من 3000 و انصدمت يوم شفت عضوات يتابعوني و يتحروني على احر من الجمر و الحين بترك مصيري بين ايدينكم ابي رايكم ​

اولاً عجبتكم الرواية وله لا؟​

ثانياً ابي رايكم بصراحة بالأسلوب و بطريقة السرد ؟​

ثالثاً اذا عندكم شي بتضيفونه؟​

ماني طلبة من وقتكم الكثير يكفيني ان اذا عجبكم تقولون حلو بدون زيادة و اذا ما عجبكم قولوا مو حلو​

و بناءاً على الردود بيتحدد مصيري اذا برجع اكتب رواية ثانية و له لا؟​

و عشان اكون صريحة معاكم اكثر انا عندي من الروايات الواقعيه + الخياليه الكثير لأن مثل ما قلت لكم انا نت قبل 4 سنوات كنت اكتب بس بدفتر طبعاً يعني بليز طالبه رايكم بصراحة لا تجاملون و اللي عندها نقد خل تطرحة ترى بجد انا باتقبل كل اللي يطلع منكم:5:​

و في الختام اتمنى اللي بتنقل الرواية على راحتها ما بقول لها لا بس ابيها تكتب انها بقلمي و شاكرة لكم جميعا مشرفات+عضوات+ضيوف
​

و لا تنسوني من دعواتكم
أختكم محبة الطاعات :37:​

 

[محبة الطاعات]

بسم الله الرحمن الرحيم

غيرهم كلهم حرقتي علي النهايه

زعلانة منج اهئ اهئ اهئ

ههههههههههههههههه امزح

و على فكرة ترى لايق عليج الخليج :5:

نزلت دموع يوم قريت ردك يا الغالية :8:<<< ايه عليج فديتج انا

اقول انا تعلقت فيكي حيل <<< نوو كومنت ( احراااااج:5

راح توحشني البسمة لما اشوف ردودج :37:​

 

[ام اسارين]

وفقك الله اسلوب رائع وطرح مميز ياحبيل قلبك استمري بجد انتي رائعه حماك الله

 

[نبراس الشرق]

رائعه جدا استمري بارك الله فيك ولاتحرمينا من كتاباتك

وانا لست باديبه علشان اعرف قوانين كتابة القصه انا اعرف اقرا

واستفاد من العبر الموجوده ومن الحكم المتناثره في ثنايا القصه

استمري بعرض قصصك ومع الايام ومن خلال الردود ان شاء الله تحصلين على كم هائل من الخبره

وفي راي المتواضع اشوف انك في القمه حفظك الله ورعاك ​

 

[غيرهم كلهم]

أنا رأي


فلة

شمعة

منورة

طبعاً

كملي

اول سبب لانه اسلوبك رائع وحلو ومشوق


شوفتي كيف كنت انتظرك على احر من الجمر:35:

ثاني سبب عشان ما تنحرمي من ردودي الي زي العسل (ابوك يا تواضع )​

 

[جرح عميييق]

السلام عليكم .ماشاء الله على اسلوبك وتسلسل السرد والحبكة والاهم منهم كلهم الهدف من الروايه
ربى يحرم النار على الانامل والى الامام​

 

[سمراء بلادي]

حبيبتنا مشوار الالف ميل يبدا بخطوة وبهذه القصة انت مشيتي الخطوة الاولى القصة حلوة باهدافها ومعانيها وكلنا استمتعنا بقرائتها ارفدينا بالمزيد وانضمي الى قافلة القاصات البلقيسيات المبدعات وطبعا كلنا اخوات ولما يكون شي غامض او مو واضح باي قصة راح نسال ونناقش ونفيدك ونستفيد منك واولا واخيرا التوفيق والمحبة بيد رب العالمين نتمنالك التوفيق يا غالية

 

[بلقيسيه كوول]

ماشاءالله ابداع واسلوب سلس ورائع واصلي اختي ومنتظرين قصصك الجديدة

 

[فراشه2009]

السلام عليكم ورحمة الله وبركاته اختي محبة الطاعات انا متابعتك بصمت الحقيقة روايتك جميلة جدا وعندك موهبة أرجو ألا تنقطع وأهم شي في الروايات أن تكون ذا هدف ينتفع منه القراء وماشاء الله عليك أسلوبك جذاب جدا إلى الأمام أختي الغالية