رحنا عمره وخربناها

[علبة ورد مجفف]

حبيبتي تبغين الحق وما تزعلين
انت الغلطانه وعيشتي نفسك وزوجك في اكبر نكد
...
حبيبتي ياعسوله ... ام الزوج عامليها مثل امك وحني عليها لانه بعد كم سنه
راح تجي مرة ولدك قرة عينك
وراح تسوي مثل ماتسوين في خالتك ام زوجك

والدنيا دوارة
.....

نصيحة لاتجفين معها ولاتظلمين نفسك عشانها
حاولي تتوسطين في التعامل
ومافيه شي اذا سافرت معكم المفروض انك تفرحين وتبرين فيها لعيون حبيبك(زوجك)
واذا كان ناوي على شي بينك وبينهم مثل ماقلتي في كلامك (((قلت له ليش مااخذت خواتك قال هذي عمره خالصه لوجهك انتي بس ؟؟؟؟؟؟؟انا هنا طرطعت قلت له لا مو خالصه لوجهي امك منعها شي اقو مني ومنك وخواتك لوك حريص قلت لهم من زمان بس انت ماتبي احد يروح معك وتهاوشنا هوشه مره كبيره )))

المفروض تبادرينه بالابتسامه والكلامات الحلوة ليش تبدين بالهوشه
الله يهديك ويهديه .. ويعينكم على طاعته وبر والديكم .. قولي امين

 

[ثقتي عاليه]

هلا حبيبتي
احنا مانعرف المشاكل اللي بينج وبين اهل زوجج..زوجج قال قاطعيهم صح..اوكي قاطعيهم في الكلام بس مو في الاكل
يعني مثلا نزلي عندهم الفطور بس لاتتكلمين ولا كلمه كوني جدا رسميه وكانج مع مديرج في الشغل ..قولي تقبل الله اعمالكم
وسوي طبق صغير وقولي يارب يعجبكم الطبق مع ابتساه صغيره جدا ولاتشاركينهم في اي موضوع يتكلمون فيه خلج في حالج كلي وقومي وخلاص .. واذا اليوم ماتبين تنزلين عندهم قولي حق زوجج حبيبي انا سويت طبق بس ما بي انزل لاني ماخذ راحتي وانا لابسه الشيله فعليكم بالعافيه ويوم ثاني سوي سحور وقوليله حبيببي تبي نتسحر تحت ولا فوق
لاتكونين في وجه نظره الزوجه النكديه مدحي هله حتى لو بس تمثيل مدحي مدحي .. صدقيني راح يتعلق فيج كل ماحبيتيهم اكثر..وفي المقابل لاتتكلمين معاهم وااااااااااااايد ... اتيكيت التعامل مع اهل الزوج يقول لاتتكلمين وتكون حياتج كالكتاب المفتوح قعدي معاهم فقط ابتسامه خفيفه ومجاملات يكون افضل..عطي زوجج الحب والحنان .. ولا تصرخين عليه هاي الاسلوب بيخليه يبتعد عنج تلقائيا
وموفقه حياتي

 

[نبع الحنين]

حبيبتي بدال جو النكد اللي انتي عايشه فيه سوي اي شي معك وانزلي افطري معهم مره او مرتين وهو بعدها راح يحس على دمه ويتسحر معك على الاقل لان اكيد والده موجود الاب يحب يشوف ولده يفطر معاه انتى في بيت معاههم انا في منطقه غير منطقة اهله وزوجوي يروح يفطر مع اهله لا تغصبينه خليه على هواه الرجال ما يحب مرته تتامر عليه احتسبي نزولك عندهم لوجه الله والله ييسر امورج ان شاء الله ويسعدك مع زوجك يارب لا تنكدين على نفسج الرجال يجي بالسياسه افهمي !! يعني شوي شوي وبهداوه مو غصب وهواش ولوي ذراع
حاولي تراضينه باي طريقه .. اعتذري منه .. موعيب الزوجه تعتذر لزوجها .. وعقب اخذي اللي تبينه بالراحه والاسلوب السنع .. تسحروا برى البيت على يوم .. عيشي اجمل لحظات حياتك مع زوجك وخلى عنك النظره المتشائمه خونه وغير هالكلام
وطمنينا عليك .......موفقه حبيبتي

كفيتي ووفيتي ..

 

[وداعة]

السلام عليكم
اختي اتخيلي انه ولدك مو زوجك وانه يبي ايوديك العمره بس زوجته مارضت !!!!!! شوبتسوين؟.... كما تدين تدان .... وحتى لو بينكم مشاكل شو بيصير لو راحت امه معاكم. هل بينقص من عمرج يوم؟ او هل بتطلع الشمس في الغرب .. قولي لي ؟؟!!.. بالعكس هو بيحبج اكثر وبيوقف وياج في اي موقف يصير ضدج منهم بعدين... بس انتي ضيعتي الفرصة على نفسج برفضج لامه ... حتى لو ماقدرت اتروح من نفسها لاتنسين انتي رفضتيها وهي امه.... يعني جنه وناره.... وباجر عيالج بيسوون فيج نفس الشي ... (اتخيلي)...
ياختي خيركم خيركم لاهله... وان ماكان فيه خير لاهله ماراح يصير فيه خير لج ولعيالج.....وفطوره وسحوره عند اهله من جراير ايديج صدقيني ... لانج لو كنتي راويتيه محبتج لاهله كاد شفتي محبه لج....
انا ادري اني قسيت عليج بس ماحبيت انج اتضيعين حياتج في التفاهات.... مثلج اتقولين له ان ماشالتها الارض بشيلها على راسي من فوق ... وحتى خواته نفس الشي .... وبعد ماراحو معلج وعايرتيه .... يعني شو تبين يسوي ؟؟!! يستانس ان زوجته ماتحب امه وهله والا يشجعج ويقولج صح امي تروح لوحدها وانتي لوحدج؟؟؟!!!! وهل ترضين ان زوجة اخوج اتسوي نفس الشي بأمج؟؟؟
اختي الله يرضى عليج ان الله لايغير مابقوم حتى يغيرو مابأنفسهم.....
الحين الحل... لا تزنين على اي موضوع فيه هله ... وان ما طريتيهم جدامه بخير لاتطرينهم بسوء....
قفلي موضوع العمرة نهائي وانسيه وحتى موضوع الفطور والسحور
كل يوم والثاني طرشي لاهله اكله للفطور معاه وقولي له امك تعجبها هالاكله وسويتها لها ...
ادكري امه بالطيب دااايما وحسسيه انج اتحبينها واتحبين خواته
سيري لهم في العيد وودي هديه لامه (تهادو تحابو)
واكثري من الاستغفار
شوفي نفج عدل وحاسبيها وحطي دااايما نفسج مكانه وشوبتكون ردة فعلج لاي موقف

والله يبارك لج في رمضان ويغفر لج فيه
وسااامحيني

 

[عبر الأقنعة]

سبحان الله !
أنا استغرب من المرأة التي تنصب العداء لأهل زوجها وتضعه أمام خيار صعب يا أنا يا هم
طبعا هم ولا بنت الناس مهما كانت غالية
هذي أمه يابنت الناس وش تتوقعين يعني ؟؟؟؟
أنصحك نصيحة لوجه الله ......... اندمجي مع اهله واعتبريهم أهلك لأنهم فعلا أهل أقرب الناس الى قلبك ( زوجك واولادك ) ولا عمرك تفكرين في يوم تحطينه أمام خيار صعب .
وقدمي انتي التنازلات دائما وصدقيني بتغلين عنده وبيقدر لك هالموقف.
ولا تحسدين الأم على عمرة مع ولدها .......... ولا تحملينه مالايطيق وتجبرينه يروح مرتين مرة لك ومرة لأمه . الله يهديك سوي فطورك وانزلي افطري مع اميمته وبنياتها وزوجك وعمك وعديهم أهلك.
وماسويتي بيتسوى فيك ولو بعد حين.

 

[AUDI]

انا ا حس ان مافيه مشكله . بتروحين عمره مع زوجك و دعا امه هذا بر لوالدته ولوراح وماعرض عليها تروح معه بتشره عليه ولها حق خاصه هذي عمره بس مهيب سفرة وناسه وحتى اخواته لو عرضتو عليهم هذا معروف يحسب لكم وهم بيقدرون لكم هاالشي ونصيحه خذي الموضوع ببساطه ويصير بسيط وشوفي وش سويت كبرتي الموضوع وصارت مشكله ونكد وهم وغم بهاالشهر المبارك والاهم ان في الاخير الام والاخوات ماراح يجون معكم ومع ذلك زعللللللت وتمشكلتي مع زوجك يعني لو صار الي ماتبين وجو معكم وش كنت بتسوووووين؟؟ ؟؟

 

[همس 90]

غاليتي ..تبين تكسبين قلب زوجك احترمي واحبي امه واخواته اكثر من نفسك ومو شرط يكون صحيح مثلي عليه واحنا النسوان شاطرين في هذا الشيئ ..انا ام زوجي ساكنه معاي واسمعي هاذي النصائح على كل شيئ واذا رحنا نتمشى تقول لاتعبيه توه راجع من الدوام او اليوم اجازته خليه يرتاح ومن هذا الكلام لكن ولاعلى بالي واقول ابشري ياعمه .ومره جات اخته وجلست معانا شهر والله البيت صار مزبله ..بس انا اسوي نفسي اضحك ولاهاممني .زصح اني مقهوره بس اصبر
بعدها جا زوجي قالي والله انك طيبه ومظلومه وانا ظلمتك معاي وبعدها صار يمشيني وحدي ويشتري لي ويقولي امي دايم تحكيلي عنك ..ترى كلش ولازعل اهله انت الخسرانه لانهم يمكن يخلونه يكرهك ويتزوج غيرك والله يهدي زوجك ويخليكم لبعض

 

[*مشاعر مكتومة*]

الله يصلح حالكم ويهديكم ويخليكم البعض,,,​

حبيبتي من رأيي انك تعينينه على بر أمه وأبوه حتى يسوون عيالك فيك مثل ماتسوين فيهم وحتى لو غلطوا عليك طنشي ولاتعيدين وتزيدين بالمشاكل قدامه وياحبيبتي انا معك يمكن هم الغلطانين صحيح في ناس يغلطون ولكن خليك اعقل منهم اعفي واصفحي معليش لاتتكلمين بأمه ابدا قدامه بالعكس امدحيها ولو تغلط راح تكبرين بعينه واذا هو قالك لاتنزلين لانهم راعين مشاكل خلاص لاتنزلين اعملي لك طبقين واعطيه زوجك قبل ماينزل والله راح يخجل من نفسه وتشوفين اذا ماقالك تعالي افطري معنا او يجلس معك ..
أختي اقولك تجربتي انا كانوا خوات طليقي كانوا دفشات بالكلام ويرمون الكلام ومايحاسبون وكان يلاحظ ذلك والله كان بعض كلامهم قنابل وهو يحس لأني استحي وماأرد فكان اذا رجعنا للبيت يسألني يحاول اني اتكلم فيهم ابدا والله ولله الحمد كسبتهم لدرجة ماتتخيلينها من كثر مااتغاضى عنهم وصاروا يحبوني والله انهم يوقفن معي ضد اخوهن ولمن اطلقت كادن ينجنن وانهارن ويصيحن صياح عشاني ..
وتجربة صديقتي خوات زوجها يغلطن عليها بشكل فضيع واذا جاء يصيرن قدامه مافي احسن منهن معها واذا طلع اعطنها ظهرهن وكل مرة تشتكي له من تصرفاتهن يوقف معها شوي وبعدين ينقلب عليها وكل مرة على هالحال وانصحها لاتتكلمين بخواته قدامه بس الله يهديها ماتسمع الكلام الحين اذا طلعت من عندهم يجلس يسولف معها لمن يستدرجها وش قالن خواتي ادري انهن يغلطن ولمن تتكلم يقلب الدنيا على راسها وماهدت اوضاعها لمن صارت ماتتكلم ابد ابد حتى يجلس يستدرجها وصارت اذكى منه ماتتكلم فيهن بس الله يتمم عليها بخير..
أسأل الله لك التوفيق والسداد وان يجمع بينكم على خير ويهدي اوضاعكم يرزقك الصبر والله يسخره لك هو وأهله..​

 

[with out name]

أختي أكرمي أهله بيحطك فوق راسه
حتى لو غلطوا عليك تحملي علشان زوجك وهو بيشيلها لك جميله وراح يتغير أسلوبه معك ولاتسبي أهله قدامه وحاولي دايم تذكريهم بالخير وتحسني اليهم واذا تبغي فعلا علاقتك بزوجك تزين زيني علاقتك بأهله

نصيحة مجربه

 

[نجود1]

*******************8

 

[زارعة الريحان]

مع احترامي لك اقولك انتي الي تجيبين المشاكل والهم لنفسك يا اختي احترمي زوجك واهله والي مافيه خير لامه
واهله مافيه خيرلكي وبكره بتصيرين حماة وهدي الدنيا كما تدين تدان والله يجزاه خير الي فكرفي امه والله
يعطيه العافيه الي يفطرمع ابوه وحاولي تفهميه انك مقدره بره وحبه لاهله ولكن يعطي اهتمام الانه انتي كمان زوجته
وليكي عليه حقوق وبعض الرجال يحبون نسوانهم الي يحبون اهلهم وهذا واحد منهم

 

[اولادي حياتي]

الله يعينا على ام الزوج وخواته

 

[كموز]

اختي ادعي ادعي لان الدعاء برمضااان مستجااااب

واستغفري كثييييييييير

 

[××بدر البدور××]

الله يعينك ويسخر لك
والله مافي بيوت مافيها ماشاكل بس للبيوت أسرار
وانتي خليك حكيمه واعرفي شلون تحلين مشاكلك بالسياسه ولهداوة(قولي لمي نفسك) ههههههههههههههه

 

[بنوتاتي غيرررر]

انتم فاهمين غلط

بنات لاحد يقول انتي الغلطانه وانتي القشرى ترى والله انكم ظالميني انا شفت منهم شي محد يصبر عليه بس اتحمل عشان تمشي الحياه وانتم تقولون خافي الله بكره بيجيك مرت ولد وبتحرمك من ولدك
انا اعرف حدود الله ماراح اتعداها
وانا ماراح احرم مرت ولدي من السعاده عشان مااغار انا وبناتي
وانقهر ليش يمشيها وحنا لا
مع ان زوجي هو الي قايم بكل مشاويرهم من دار الا سوق الا جامعه الا روحات وجمعاتهم كلها قايم فيها زوجي ومامانعت بس انا لي حق اني اعتمر على راحتى وبدون مشاكل ولا هواش هذي عباده ولازم نقوم فيها على اكمل وجه
انتم ماراح تفهموني لانكم ماعشتو الي عشته والله لو اقولكم وش يصير لي انكم لتقولون لي وش مصبرك على الحياه معهم
بنات الي ايده في المويه مو زي الي ايده في النار
بدل ماتساعدوني ضيمتو علي وقهرتوني طبعا مو كلكم اشكر الي ردت علي بكل ادب واحترام:in_love:​

 

[ملكة ببلقيس]

الله يوفقك

 

[أميرة الشرق]

تمنعي امه من العمره حرام عليج تحم ترا يمكن تاخذي اثم عظيم
شو فيها لو سارت امه تحمليها ولج اجر ..شو يعني يفطر مع اهله هذا الشئ طبيعي
ليش انتي ماتفطري ويااهم..أسمحيلي بس حسيت من كلامج انج تبين زوجج ملك لج وحدج
وماتينه يبر هله ...انتبهي تكوني من هالنوعيه ...انتبهي كما تدين تدان ...

 

[آهات الصمت]

المفروض هذا الشي يسعدك الي فيه

خير لااهله اكيد فيه خير لك ولعيالك

وحرام عليك تعصبي عشان امه بتروح عمره

كذا تكسبي ذنب المفروض انتي من بدا وقاله

وبالنسبه ليش ينزل ويفطر عند اهله ماهي مشكله

ليش مو اجتماعيه وناخذنينه بابتسامه تنزلي معاه ومعاكي

اي حاجه تقدميها على السفره ترى الرجال مايحبون حد يتكلم على اهلهم

وقلقي شكاوي وفلانه قالت وسوت بالله عليك ترضينه هو يتكلم على امك

وخواتك ويقول فيهم شي اكيد لا واحتسبي كل هذا عند الله ونصيحه مني تقربي

من اهله بابتسامه بكلمه حلووه تكبرين بعينه ومع الايام هو بيحبونك ترى يمل الرجال

منك وبعدين صعب ترجعين لوضعك لاتقولي منتم عايشين معاي والله عندنا مشاكل

محد يتصورها والحمد الله قدرت اكسب اهله بكلمه الطيبه وحتى لو زعلت اضغط على روحي

ولا كان شي ولااشكي لزوجي لان بيدينه شي والحمد الله الحين تعالي شوفي كيف الوضع

والله يفقدوني وبالنسبه لاامه لدرجه تقول انتي اغلى من بناتي لانى صبرت ونلت جزاء صبري

اعتذر للاطاله ولكن هذا الوااقع

 

[آهات الصمت]

قللي شكاوي << تعديل لرد الي فوق

بيدينه شي - مابيدينه

عذرا للاخطاء بس كنت متحمسه:flex:

 

[ودعتهم]

ليش كلكم تحاملتم عليها فعلا الرجل اناني بطبعه لو هي تاخذ امها عمره كان تضايق وعصب ولوتروح لاهلهايومين ورى بعض لاقام الدنيا عليها ليش يفطر لوحده ليش المراه مطالبه بالمثاليه والرجل لا لو اي واحده وضعت نفسها مكانها لو مره واحده لما قبلت ذلك ابدا وانا حاسه فيك واقول لا تعطينه وجه ليتمادى ومع الوقت ينسى ان له زوجه تنتظره الله يوفقك ويسعدك