يوميـــــ,,,ـــــات بنـــــــ,,,ــــــات الريــــــ,,,ـــــــاض

[الدلع لايق]

مساء / صباح الخير والمسرات على قلوب كل الحبيبات..





لقد فكرت أنا وصديقتي هناء بصناعة يوميات خاصه بنا معاً ،،
وهي عن ماتعانيه البنات هنا ,,
وبالذات في منطقة الرياض بأسلوب بسيط وعفوي ( وباللهجه العاميه ) ,,
إذا كان هناك من مشجعين للأمر أرجو الرد ,,
وعلى حسب رغبتكم سوف نبدأ أو ننهي اليوميات ..



ودمـــتـم,,


مــع محبتنــا :

( هديــل & هنــاء )

 

[layani]

أهلا بكن ..

 

[بدار]

أهلا بكن هناء والدلع .. ويوميات مشرقة باذن الله !

دفاتر اليوميات مفتوحة لبوحكن ونثركن ، للفضفضة والارتقاء ..

لا أعتقد أن من ترغب بكتابة يومياتها بحاجة إلى تشجيع يا أخواتي ، والكلام موجه لكل من تكتب يومياتها ، تذكرن :

إنني أكتب لنفسي أولا ، ثم للآخرين لأشركهم تجربتي ويستفيدوا .

وفقكن الله

:cupidarrow:

 

[layani]

:bigsmile:
:bigsmile:
اهلا بكن معنا ..
.
.
أتحفونا .. أفيدونا ..
.
.
متابعين ..

 

[هنـاء]

السلام عليكم ورحمة الله حبيباتي العضوات..
عزيزتي بدار لم نرد التشجيع لكن اردنا اخذ الأذن
من باقي العضوات الاتي من مدينة الرياض
لأن الأمر يخصهن ايضا..فنحن سنتكلم بكل عفويه
عن ماتعانيه بناتنا هنا وما يمرن به..
سواء مع الأهل او الدراسه او المجتمع..
طبعا مايحتاج اكمل بعد صديقتي المقربه هديل لكن
حبيت افهمكم فكرت يومياتنا..
انا وهديل بجامعه وحده وبقسم واحد..
حبينا ننقلكم حياة بنتين من بنات الرياض..
و معاناة كل واحده وفرحها..
طبعا رح يكون لي يوم وهي لها يوم..
بحيث تكتب يومها اليوم..
واكتبه بكرا وهكذا..
والحكمه من يومياتنا عدة امور..
الأول..افراغ شحنات الغضب وعدم كبتها..
الثاني..بهدف التعبير عن باقي بناتنا بنات الرياض..
الثالثه..توصيل حس المرح بيننا وبينكم من خلال عفويه الطرح..
ولكم مني ومن هدوله جزيــــل الشكر على المرور..​

ملاحظه...
من لديها اي اعتراض على اليوميات تكتب اعتراضها لي او لهديل
على الخاص:sly: مع بيان السبب..
ونحن نرحب بجميع العضوات للتعليق والنصح والمرح والفائده..
تحياتي..

​

 

[الحلى كله]

اهلا وسهلا بالمتحدثات باسمنا ,,,,,

نرحب بكن بس هلا هلا باليوميات السنعه

 

[اليوم المنتظر]

يالله حيهم بنات الرياض يلله نبي نعرف
يوميات بنات الرياض
هديل وهناء شرفتونااااااااااااا

 

[سلة فواكه]

ناطرين على احر من الجمر

 

[الدلع لايق]

layani /
هلا فيك ..شرفتي حبيبتي

بدار /
يابعد عمري الله يوفق الجميع ..

هناء /
وفيتي وكفيتي .. بعدي والله

رغودي /
هلا فيك والله .. إنتي شوفي واحكمي

دعوه شخصيه /
الله يحييك ,, الشرف لنا بوجودك عمري

سلة فواكه /
نورتي عزيزتي ..

 

[الدلع لايق]

مســـــــــــــــاء السعـــــــــــــاده علــــــــــــــى قلــــــــــــــوبكم ,,



اليــوم أول يوم لي معكم والجو حلو والسحب ورديه ( بتطلع بر ) وأتمنى تعجبكم يومياتنا /


يالله عاد نبدأ بهذا اليوم غريب الأطوار :



مع شقشقة العصافير(الله يستر منهن جابن لنا فلونزا طيور ) ليتهن مايشقشقن ..ومع تزعيق الديك وتحمس الدوافير للخروج إلى المدرسه (ياقدمي)

بدأ اليوم مثل باقي الأيام ,, قمت مثل عادتي متأخره بسم الله علي وماغير أدابتس (مصطلح قصيمي يعني أركض بحماس ) ,, المهم الله لايوريكم غرفتي الصبح تصير تقل شقة عزاب الثياب بكل مكان أطلع وأختار واللي مايعجبن أصوعه ( أرميه ) بأي مكان ..
الحمدلله أخيراً لقيت لبس يعجبن .. الحين ننتقل للتسريحه وياليتكم ماتشوفونه تقولون بسطة هندي مابقى شيء ما صار فوقه لازم أجلس أحفر وأحوس وتلقين الشيء يمر علي بس من العجله ما أشوفه يالله لاتبلانا ,,
خلصتي كشتي وشيكت على الخشه وكلو تمام وأمي واقفةً بالدرج وتقاعط ( تصارخ ) قومت الجيران الله يهديه حفضوا أسمي كل صبح يسمعونه (( هدييييييييييل الباص جا عجلي .. هديل عمى أنزلي لا يهج نبلش بتس
ترى مهنا ( مافيه) أحد يوديتس .. بتنزلين وألا أرقى .. )) عاد أنا عارفه أنه مب راقيه عشان كذا أحب ألعب عليه أقول يمه أرقي هيلب مي .. عاد تقول منهي مي أقول : يمه هيلب مي يعني ساعدين <<< تشرح والباص منطق..
المهم وأخيرا أدحدر عاد لازم تعودت أخبط على خشتي كل صبح .. شكل السواق يدعي علي صار خشمي من كثر ما أطيح عليه داخل بعيوني :1eye: .. بس ماعليه تعودت ,,
المهم ركبت الباص وعاد أنا ثاني وحده يعني ياخذن مع شقشقة العصافير..
حطيت دمجتي ونمت وماحسيت ألا بصديقتي تقول يالله وصلنا ,, أشوى مانزلو وتركون
دخلت الجامعه وأستقبلتن رائحه عطره نصيحه لا تسألونن لأني مانيب قايلتلكم أنه ريحة غنم :crazy:

حشا داخلين مزرعة جدتي وأنا مدري ..
رقيت فوق وأحتري هناء عاد هي أم النكبات الله يهديه .. تأخرت وأنا أتمصع جوعاً وأحتريه تجي,,
البنت تأخرت فأحسست بشيئاً ينغزني مع شرياني الوريدي القلبي ويقول أنه بتغيب ..
همار أطمر وأدق عليه ودار الحوار التالي :
أنا / وينتس تأخرتي ..
هناء / أنا بالبيت ..
أنا / (صمت رهيب يطبق علي ) وشووووووووووو:icon28: صادزه وألا تستهبلين
هناء/ إيه وشبتس
أنا / لا عاد تكلمي جد (( وقلبي يرمع خوفاً لأني مقدر أعيش دونه:icon26)
هناء / لا أمزح أنا تحت وين ألقاتس
أنا / روعتين وجع .. مدري اأنا بالقاعه فوق
هناء / خلاص روحي لمكاننا بالشمس
أنا / خلاص يالله
توت توت توت توت <<<هناء دائماً تقفل بسرعه ماعنده وقت الله يصلحه تعرفون سيدة أعمال..

المهم نزلت تحت وجت سلمنا على بعض وجلسنا بالشمس أنحمسنا شوي وأكتسبنا اللون البرونزي بعدين أنقشعنا
وتنقلنا قليلاً وقالت لي سالفة الكاديه حقه الحمدلله والشكر مروش شنطته .. البلا ماقد شفت أحد يحط قاروره مفتوحه بالشنطه:bigsmile:

صعدنا اللفت ودخلنا قاعتنا وجلسنا نذاكر ( أمحق مذاكره ) وتذكرت هناء ملزمة التفسير يوم قالت : بنات معكم ملزمة تفسير .. يوم ألتفتت وحده رافعة ضغطه ضحكة ولفت .. يارب لاتبلانا به حاله نفسيه البنت الله يعين هنونتي عليه..
المهم أمتحنا وحلينا اللي حلينا .. بعدين نزلنا وكانت على وقت البريك رحنا للكافتيريا وما أدراك ما الكافتيريا
الناس تقول بمجاعه كننا داخلين ساحة معركه وأستعراض عضلات:showoff:
طلبنا ذره وقالت تعالوا بعد نص ساعه .. يوووووه أنا نفر فيه جوعان مره ,, بس نصبر شنسوي بعد
درنا ودرنا وجلسنا وقمنا ورجعنا للذره وكان على نهاية البريك والمحاضره الثالثه بدت
عاد عندنا مشرفه متخلفه أو بمعنى آخر حقود حسود تكرهنا وتبغضنا مدري ليش:dunno: يابعدي حنا بس نسولف بهدوء بس ( يا عيني على البراءه )
خلصت المحاضره الثالثه والرابعه وطبعاً تخللتها أزمات نفسيه وتعرفون أكيد اللي مجلس بالغصب كيف تصير حالته..
هناء الله يهديه سببت لي توتر إمتحاني ( نسبه إلى التوتر المصاحب للإمتحان ) ماغير تهز برجلينه وتصقع كرسيي..
جلسنا نحتري أستاذة الفقه يوم جت وحده بالخبر السعيد وقالت : بناااااااااااااااااات أستاذة الفقه غايبه
كلنا صرخنا بصوت وطني واحد وقلنا : يااااااااااااااااااااااااااااااااااااااااااااي هيه هيه هيه ( بزران رايحين ملاهي )
دحدرنا بسرعه للأسفل وبدأنا بتمتير الساحه كالعاده ولكن هالمره بشكل مختلف ..هالمره رافعين الطبلون تقل مفحط تلحقه دوريه ..
ندور ونجلس ندور ونجلس .. وحده من البنات مليت من وجه من كثر ما أشوفه شكله هي تمتر بعد زينا ..الظاهر ناوين نعيد بناء الجامعه
طن طن طن .. رن جرس الإنذار ,, أووووه عفواً أقصد جرس البوابه معلناً إنتهاء يوم دراسي منترس ( مليان ) بالأحداث
ودعت حبيبتي هناء على وعد أننا نكمل التمتير بسوق ( ............ ) بس أنا وهي مانبي أحد ثاني
ياليت أشوفه يارب
ذهبت لبوابتها وذهبت لبوابتي ورقيت الدرج وتذكرت إني أكبر جنط ( شيء من أغراض السياره مهنا نفع للزينه بس) حيث إنني نسيت العبايه بالتحت ( بالأسفل) ودحدرت مسرعة وليتي مافعلت حيث إني وطيت تنورتي اللتي من طولها يقولون أنه شرعه فتكرفست ونهضت بسرعه قبل أحد يشوفن ويادار ما دخلتس شر
وركضت نحو عباتي خائفة عليه ووجدتها تبكي على الطاوله لحاله خائفه <<< الأخت قلبت عربي فحيص
واخذته ورجعت أدراجي وركضت ولبستها وهجيت خوفاً من وحده ترعبني دائماً
وركبت باصي الحمدلله من غير إصابات ومشينا ونزلت أول بنت وهي نازله الله يهديه من الحماس عشانه إربعاء شالت خشمي قلت لو سمحتي خشمي نشب بشنطتس وبليز أنا أحتاجه بالويك إند ..
ونزلت أنا ثاني وحده وركض على غرفتي يوم دخلت مسكت راسي قلت كل هذا بغرفتي أنا هدوله النعومه .. عاد أنا ما أرتاح وغرفتي كذا رحت كوكلي وتوضيت وصليت الظهر وزينت الغرفه ورتبته ودخلت على طول النت وهذاي أكتب لكم ماحدث في يومي الحافل بالمفاجئات ( أذكر أنه دعاية مهرجان )

.......................................

وهـ .. أخيراً خلصت
تصدقون إني اليوم بس أراكض تذكرت حكمه قالته أستاذتي بالثانوي {{ من يستيقض متأخراً .. يقضي يومه ركضاً }} وصدقت معلمتي
الله يستر على باقي يومي..




وتوته توته خلصت الحتوته

الحين أترككم في رعاية الله وأتمنى أنكم أستمتعتوا معي في يومي ..

وأترك المجال لحبيبتي هنو لتسرد أحداث ماسوف يحصل معها.

وسوف أعود بيوم آخر وأحداث جديده لي ولهناء كفتيات سعوديات ورياضيات ( أحسبه علوم ) يعني عايشات بالرياض..





مع ألف سلامه .. فوتكم بعافيه يا بنات ( على قولة المصريين )

:bye1: :bye1: :bye1: :bye1: :bye1: :bye1: :bye1: :bye1: :bye1: :bye1: :bye1:

 

[Rouna]

سعدت بقراءة اول جزء من اليوميات ولكن لى ملاحظة اذا سمحتى .. وهى استعمال اللغة العربية الفصحى قدر الامكان حتى يمكن للجميع المتابعه.​

ومن الواضح انها ستكون يوميات مشوقة للغاية.​

 

[دانة الدنيا]

هههههههههه
فديتس
دمتس خفيف وروحتس شربات
ربي يسعدتس
وننتظر هنو
وينتس

 

[الدلع لايق]

rouna
يسعدني تواجدك معنا حبي .. ولاتشيلين هم حنا حطينا ترجمه لكل كلمه نحس أنه مبهمه

دانة الدنيا /
دوم هالضحكه يااااااارب
الخفه من طبعتس ياروحي
الله يسعد أيامتس

 

[هنـاء]

هلا ومرحب بالموجودات بيومياتنا..

ههههه ياحبيلك ياهدوله فصلتي اللي صار تفصيل..
لنا موعد معي غدا انشاءالله..
ويبدأ معكم يومي الأول..

Rouna
اما بالنسبه للغه العربيه الفصحى..
اسمحي لنا عزيزتي..
لأننا منذ البدايه..طلبنا ان تكون اليوميات
بالعاميه..وقلنا من لديها اعتراض..
تراسلنا على الخاص..
شكرا على المرور عزيزتي..

نتمنى ان تنال يومياتنا اعجابكم ..
مع تحيــــات ((هناء- هديل))

الله لا يفرقنا..
:e130:​

 

[الدلع لايق]

أعجبك أنا صح <<< يبيله كف :sly:,,

يابعد عمري والله :in_love: ,,

الله لايفرقنا آمين يارب :icon26: ,,

 

[واثقة]

رووووعه.. ودمك خفيف..


بس ترى اللهجه القصيميه صعبه على البنات..




يظل اللي كتبتي رووووعه..

 

[هنـاء]

 

[اليوم المنتظر]

هههههههههههههههههههههههههه
هديل الحمد لله على سلامتس ياخيتي
المهم خشمس ان شاء الله اخذتيه من شنطه البنت..
خاصه انك تحتاجينه بالويك اند..
هديل مو كأنك تطيحين واجد
ما ابي اضحك لاني دايما اذا ضحكت على احد طاح ما اكمل عشر دقايق الا واتكرفس..
يالله يا جميل وهناء
قصدي ياهديل وهناء..
اتحفونا .......
الله يسعدكم..
ولا عاد تتأخرون عشان ماتراكضون,,
اما تمتير الساحه يوووووووووووووووه
هذي شكلها من شروط الدراسه بالجامعه ..
ههههههههههه

 

[@ بسمة أمل @]

ههههههههههههه

تسجيل متابعه ..........ومراقبـــــــــــــــــــــــــه

هههههههههههههههههه

 

[هنـاء]

حياك الله يا حياة ... نورتي.. لكن فهمت كلمة
مسجله لكن مافهمت كلمة (مــــراقبه)>وبالمد بعد؟!