عزيزتي صاحبة المشكله ...
قريت مشكلتك و ردود البنات و ردج الأخير و أتمنى ما اكون من إلي ردوا لمجرد الرد ...
أنا بقولج قصة وحدة أعرفها و سبحان الله كانت صديقتي لأكثر من 6 سنوات علاقة وطيدة و بعديني بعدت عنها أنا اخترت هالقرار و شفت تشابه بين قصتكم ...
شوفي الغاليه البنت كانت شاطرة و متفوقه و لها قدره عجيبه على إدارة الحوار في المجالس يعني نفس مواصفاتك بالضبط و بنظرها الناس تبهر فيها ...و علاقتها بزوجها ما تختلف عن علاقتج خصوصا الغيره أذكر إنه كنا طالعين كلنا مع بعض و مرت حرمه جمب زوجها وماكان في ممر إلا هو و مضطره الحرمه و الله إنها نكدت على زوجها و علينا كلنا الطلعه كلها و كنا عايله كبيرة ... و مواقف كثيره من هالنوع المزعج إلي فجئة تقلب على الكل بسبب غيرتها عليه ...
بس البنت هذه الموضوع تطور معاها كانت تبي تستأثر في كل شي مو بس زوجها حتى أهله تبي كل الكواكب تدور من حولها و تكون هي المركز و الشمس فهمتي علي ...
اختيارك للأسم شدني حب الزعامه اعتقد هو ذاته حب القياده و البروز و الظهور في الشخصيه إلي في الغالب عندها علم بكل الأمور و مثقفه و إلا ما شفت روحج مبهره للغير و يغبطونج على حسن إدارة أي جلسه ...
احتمال المقارنه مو صحيحه إنت بس تقدرين اتقيمين الموضوع و أنا قلت لك هالقصه على حسب ما لمسته من كلامك نتيجه غيرة البنت إنها اقطعت علاقة زوجها بأهله وذلك لسبب رفضهم لدور إلي كان المفروض يكون لهم في حياتها و رفضهم لها بهذه الشخصيه,,, و نظرا لشخصية زوجها المطواعه لها و لأنه يحبها لدرجة الجنون مشى ورا كلامهما في كل شي و الناس إلي في الخارج يطالعونه بعين القاصر لأنه في غيرتها الحاده تدخلت حتى في شؤون عمله تخيلي لأي درجه و خلته يخسر وايد ,,,
بصراحه عزيزتي انا ما شفت ثقه بكلامك شفت الغيره و شغلات وايد غيرها لكن الثقة كانت مخفيه ...
و مثل ما قلتي علاقتج برج شي خاص و ربي العالم فيه بس كل إلي بقوله لك حبوبه الثقه حلوه و التوازن في كل الأمور أحلى و أحلى و زوجج لج مو لغيرك استمتعي بعمرك و بحياتك معاه و لا تضيعين سنوات من عمرك بنقمت الغيرة ... و إذا الأمر محتاج لعلاج اسعي له لأنه الي يغار بهذه الصورة ما تكون غيره على الزوج وبس تكون جزء من الشخصيه الأساسيه ,, يعني تفوقك مو لأنك شاطره و بس لأ لأنك بعد ما تحبين أحد يكون أفضل منك أو ما تتحملين هالفكره و هذا إلي دفعك لتميز في كل شي ... يخصك ... و وصلتي لغاية زوجك مع إنك ما تشكين فيه إلا إنك منت قادره توثقين قيدج عليه أقصد تملكين كل حواسه و هذا ممكن يكون احساس عندك إنت بس و يكون الريال يحبك و يتنفسك بعد ... حبوبه في دوراة لتقويه الثقه و لثبات و إدارة المواقف اتخليج اتسيطرين على الشعور في الغيره و اتحولين مشاعرج السلبية إلى إجابيه مفيده لج و للي حولك ....
ربي يهدي لك نفسك و يصلح أمرج مع زوجك يا رب و يسعدج