قلت لزوجي انقلع من البيت....

[الخط الفاصل]

السلام عليكم ورحمة الله وبركاته
أنا متزوجة مطلق ..عنده عيال..مشكلتي مع زوجي ع الفلوس
واللي تحب تشوف مواضيعي..

المهم
فلوس زوجي كلها لنفسه وعياله وأهله وأنا إذا طلبت شي قال ماعندي
مسلسل البخل علي مستمر لحد مميت قاتل

ما انكر صار يصرف ع البيت مو كل شي بس أحسن من أول

لكن مايسدد كهرباء إلا بعد مايقتلني من البكاء والإيجار توني مسلمة 6 شهور لصاحب البيت هو ماعنده وقال بيدفع الـ 6 الشهور الباقية وانا أشك بصدقه..
أنا قلت يابنت منتي مجبورة تتحملين غثاه طول عمرك لا صرف ولا رجال زي كل الحريم

قلت له مرارا وتكرارا خلينا نبعد عن بعض 6 شهور وهذه الفترة كل واحد منا يراجع حساباته نقدر نكمل مع بعض ولا لأ...رفض بحجة مايقدر يبعد عني والشوق لي يذبحه :10:
وربي يتمسخر بي :30: يحسبني بقرة ما أفهم

لما شافني مصرة قال نبعد يومين وأنا رفضت قلت يومين ما أقدر اتخذ فيها قرار..ومرت الأيام واحنا كل يوم نتهاوش ونتصالح..
المشكلة الأخيرة حصلت بالليل..

كان باقي يعطيني لمصروف البيت 200 وقيمة فاتورة الجوال 200 بحكم إني جالسة بالبيت حاليا وماعندي فلوس (عادة أنا أسدد وما أطلبه)..أمس لما جا من العمل اتغدى وارتاح بعدين قلت له جبت لي فلوس المصروف والجوال..قال إيه
فتحت محفظته مالقيت فيها غير 350 اخذتها وقلت باقيلي 50 ..سحب من يدي الـ 150 مني وقال فلوس الجوال بعدين...
قلت له ليش؟ قال عشان ماعندي..

أنا صراحة انفجررررررررررررررررت قلت له ما أبغى منك شي إنت ماعلى لسانك غير ماعندي..ربنا قال ولئن شكرتم لأزيدنكم ..إنت ماتشكر الله ولا تحمد فضله ..يا أخي احمد ربك واشكره ليش تبخل علي وإنت عندك...أنا عطيتك اللي وراي واللي قدامي وماشفت منك غير الجحود والنكران..

لا عطيتني مهر زي الحريم ولا أثثت لي بيت ولا تدفع كهربا ولا إيجار .. مع ذلك كل ما طلبتك شي قلت ماعندي..

هذا وانا مراعية ظروفك وأحوالك ولا أطلبك إلا بالفعل لما أكون محتاجة ..
إنت مو فاهم من الدنيا غير شي واحد إني لازم أراعي وأقدر ظروفك لكن منت فاهم أنا انسانة زي ماعلي واجبات لي حقوق..

غلطي إني تنازلت عن حقوقي من البداية عشان أقدر ظروفك وصار مالي كرامة..

مثالي ماشاء الله عليك تعطي عيالك وطليقتك وأنا زوجتك ماتعطيني خلك مثالي مع زوجتك مو مع طليقتك (مخصص لهم 2000 شهريا الين يتوظفوا كل العيال)
أنا كنت في يوم مطلقة ولا في يوم طليقي حط بيدي ريال
شوف حولك المطلقات من فيهم طليقها يصرف عليها..
إذا إنت ميت فيها روح ارجع لها غاصب نفسك علي ليش منت مجبور علي ولا انا مجبورة اعيش العيشة هذه..
روح لعيالك اللي مايعطوك خليهم ينفعوك ..روح لأهلك اللي مايعطوك خليهم يحتووك ماديا ومعنويا (يرسل لأهله من ورايا يحسبني هبلة ما أدري) أنا اللي عطيتك ووقفت معاك هذا جزائي

انقلع من البيت ماانخلقت عشان أصرف عليك...
طول ما انا أبرر زوجي ساكت وشكله منها ومنتهي من كلامي..

استغربت منه جا جنبي بكل هدوء حضني وراضاني وحلف إذا طلبت شي مايقول ماعندي
ونمنا بس أنا طول الليل أفكر كيف هذا الرجال عدا الكلام على خير..
الصبح راح الدوام وأرسل لي رسالة ع الإيميل ملخصها..أنا ما احترمته ولا احترمت أهله صحيح أنا عطيته ووقفت معاه مافي رجال يتحمل المن .. وأي زوج مكانه مايتحمل الإهانات وإنه محتاج يفكر و ماراح يرجع البيت يومين ثلاثة وانا لا آخذ الموضوع بحساسية...

اتصلت فيه قلت له لما أنا طلبتكنبعد عن بعض رفضت والحين تقرر وحدك وتفرض قرارك علي؟؟
البيت مو فندق تهجره بكيفك وترجع بكيفك.. ارجع وخذ أغراضك وتخرج واحنا متفقين ..مو تعاملني معاملة البهائم...

المهم بعد جهد جهيد قال طيب بيجي ياخذ أغراضه ويمشي.. ولو إني شاكة بصدق كلامه..
الصدق انا جادة ومستعدة ومصرة ع الطلاق لأني خلاص صبري انتهى..وهذه بتكون الطلقة الثالثة

يعني أنا مايهمني فراقه..

يابنات هو رافض يطلق الثالثة كيف يكون التفاهم معاه بالمعروف من غير محاكم

انا ماعندي أب ولا أخ ولا خال ولا عم يوقف معاي..كلهم عيال اختي وهو شايفهم بزر..

أمي مريضة مستحيل أقول لها أخاف أقضي عليها خصوصا قريب طالعة من المستشفى ..واختي الوحيدة اللي ممكن أفتح لها قلبي مريضة مسوية عملية.

التفاهم بيننا مستحيل..

وانا قررت اعيش حرة نفسي ولا أعيش مذلولة لإنسان همه نفسه وعياله وأهله على حسابي..كيف أفتك منه بالمعروف..

أعرض عليه فلوس ؟؟ خصوصا هو طماع وبخيل..

تكفووووووون لا تخلوني انا بحالة يرثى لها

انصحوني الله يسعدكم دنيا وآخرة..الله يكتب لكم أجري

 

[تلميذة مريم]

مشكلتك معه سوء تدبيره صح ؟
إذا هذي والله تهون ومافيه رجل كامل وكلن فيه حقه

 

[عذبهم غروري]

والله ياأختي ماأدري وش اقول لك ..انشاء الله البنات الخبرة يردون عليك..
مابيدي غير اقول الله ينور طريقك ..ويفرجها عليك يارب...
والجأي الى الله ..روحي صلي ركعتين ادعي فيها ربك ..يرشدك للطريق الصحيح واستخيري اولا واخيرا..
واستشيري امك او اختك اتوقع راح تلاقين الحكمه في جوابهم...وراح تلاقين مين يواسيك..

 

[نضوج أنثى]

عزيزتي ليش تعرضين له فلوس يعني فوق ماهو مستغلك تدفعين له مو من حقه وبعدين وش يضمن لك لو دفعتي يطلقك انتي خليك حازمه معاه والزمي بمصاريفك قولي له ياترجع تصرف علي زي الناس والعالم ولا انا ماني مستعده اجلس معاك ومافي شي يجبرني وبشتكيك في المحكمه طبعا بس خوفيه بهالكلام يمكن لما يحس بجدية كلامك يتغير والله يسهل امرك

 

[سفن بااارد]

هلا اختي اول شي بسئلك عندك عيااال انا من رايي الطلاق مهو حل ولو تطلقتي بتضمنين احد يجي احسن منة اكيد لا اسمعي اجلسي معاة بعد الايام اللي تاخذونها راااااااااااحة وتكلمي معااة وشوفي نقطة ضعفة انا استغررربت من برووووودة هذا دليل انة يحبك وفية خير تكلمي معاة باسلووب وقولي هاذي مهي عيشة تصرف على طليقتك وزوجت لا ليش وش اللي جااااك مني والله يوفقك ويسخرة لك

 

[سفن بااارد]

نسيت اقولك لاتصررررررررفين علية ولاتعطينة ولا ريااااااااااااااال انتي منتي ملزززمة تصرررفين علية وين رجولتة وهو تعوووووووووود على كذا لقى وحدة تصرررررف وطليقتة لها فلوووووووووووووسة

 

[مزوح وتروح]

الله يفرج همك
وضعك معاه بالشكل هذا راح يكون زي الإنتحار البطييييييء!!
الله يدلك عالخير
بس ياليت تعوديه من اول وجديد انك ملزومه منه والريال وهوه ريال لا تدفعييييييه عشانه ابدا .... ولاتصرفي عالبيت ولا قد الشعره..حتى لو معاك !!
هذا لو قررتي تستمري معاه
اما لو اخترتي الانفصال >>فالشرع في صفك خاصة انو على كلامك بيصرف على طليقته وانتي لا !! وان شاء الله تمشي الامور زي ماتغي واكثر

 

[رازيا]

الرجال اسئليني انا عنهم
ما سكت عشان عيونك ولا لانه يحبك
سكت لانه عارف انك البنك المتحرك له
ويحاول يستغلك قد ما يقدر والممول الوحيد للعائلة الثانية
بس انتي لا تتسرعي فيه مثل يقول ظل راجل ولا ظل حيطة ممكن تتفاهمي انتي وياه في ساعة رواق وتحطي النقط على الحروووف ترى الطلاق صعب جدا خصوصا اول فترة نصيحة قبل تطلبي الطلاق حاولي صلي ركعتين وادعي دعاء الاستخارة واستغيثي بالله و

 

[هذا رأيي]

السلام عليكم

الله ييسر أمرك ويشرح صدرك..أعتقد إنك شماليه شرقيه وزوجك جنوبي غربي..

وهذا اللي مسبب لك تعب وقلق,,أنت مثاليه وتريدين كل شي يتم بهدوء وسلاسه وكما تريدين..

وهو يرغب في ذلك داخلياً لكن بروده وتسويفه تفسد الأمر في كل مره,,

عزيزتي أنا لا أنصحك بالطلاق..لماذا؟؟

لأنه قد جاءتني حالات كان يقول الزوج وبكل وقاحه لن أدفع ريالا على البيت وأنت ملزمه تدفعي لي نصف الآجار..

وتحولت العلاقه الزوجيه المبنيه على الرحمة والموده إلى حسابات وأرقام..

عزيزتي ...عليك التنازل قليلا عن مثاليتك فقد إبتليت بزوج فوضوي..

والتخفيف قليلا من صراحتك فقد جرحت زوجك في رجولته..

بتقولين يستاهل؟؟ يمكن..بس ماراح تطولين أبيض ولا أسود بهذا الأسلوب

غاليتي..أحضري قلما وورقه واحصري عيوب زوجك وميزاته..وقارني بينهما

صدقيني ستكتشفين أشياءً إيجابيه في زوجك أنساك الغضب وأغفلك الشيطان عنها..

ثم تأملي وضعك الحالي ووضعك بعد الطلاق..


القرار ليس بسهل حبيبتي ويحتاج لإلمام واسع وتأمل عميق وقدره على قيادة حياتك لوحدك دون زوجك..

إسألي نفسك هل خلافاتكم الحاليه تستاهل هذا القرار؟؟


وبالنسبة لما حصل لك البارحه كان الأولى بك لما أخرجت النقود ورأيتيها

ناقصه أخذتيها وخبأتيها كي لا يأخذها منك وقلت كثر خيرك حبيبي

لكني أنتظر منك 50 ريالا وأنت عارف هذي ماتكفي وأريدها عاجلا

عزيزي..وعطيتيه قبله هادئه على خده وأنهيت الموضوع بدون إنفعال وإهانات...

أعرف أن بروده وبخله أخرجك من طورك..لكني لا أراه سببا مقنعاً لردة فعلك

لكن طبيعتك المثاليه الصارمه لم تتحمل بروده وإتكاليته وبخله,,


وصراحتك الشماليه لم تراع حساسيته ورجولته




ولعل كونك موظفه أيضا ساهم في تعقيد المشكله..لأنك لم تتعودي أن تطلبي أكثر من مره...




نصيحة من محبه تنازلي قليلا عن شماليتك وتخلي عن صراحتك ومثاليتك قليلا




لأنها ستنتهي بك إلى الأمراض أو المشاكل والإنفصال كما تنوين حالياً..




الحياة صعبه وهاأنت قلتيها لا رجل يحميك,, ولديك زوج يحبك ولكن لا يخلو من العيوب والمثل يقول جوّد مجنونك لا يجيك أجنّ منه...!!!!



فحاولي تعديله بالكلمة الطيبه والكيد والدعاء..ولاتطري طليقته وأولاده والمال الذي يعطيهم..وتناسيه وإعتبريه صدقة ودفع بلاء عنك..



طالبي بحقك كما ينبغي للأنثى الراقيه الغنوج ولا عليك من الآخرين ..




ولا بد لكل ليل من فجر وإن طال ولكل هم من فرج وإن أبكى وأحزن




لازمي الدعاء وإشكي لمن يملك خزائن السموات والأرض وكرري {رب إني لما أنزلت إلي من خير فقير}



وسترين الفرج لمن بيده مفاتيح الفرج




أصلح الله حالك ...وأزال همك وأحسن فالك....




وتقبلي ودي ,,,,




@ مروضة الشمالي @

 

[fl0o0ry]

واضح انه شاريكي ويحبك صدق

ماتخسريه وحاولي تصلحي الموضوع بدون عصبيه او اهانه له

واحاولي تتفاهموا وتجلسوا جلسة مصارحه يعني الطلاق ماهو حل ..

 

[دلوعة عمرو]

والله ما ادري وش اقولك الله يعينك انا اشوف انك ما تطلقين خصوصا ان ما وراك رجال وامك تعبانه مو ناقصه

 

[ابتـهاج]

بصراحه موقفك عجبني جدا
وأتمنى مايلعب بعواطفك بعد كذا
هذي الطلقه الثالثه حتكون
وإن شالله ينصلح حالك معاه
لاتبينين له انك ضعيفه وماوراك سند
في محاكم تاخذ حكك وحقوق إنسان ماتخلي أحد يحتاج صحيح هالجهات مقصره نوعا ما وبعد جهد جهيد تخلص المعامله
بس انفخي بالكلام
عشان تكونين قويه قدامه ولاتبينين له نقطة ضعفك
خليه يبعد فتره عشان يحس على دمه ولاتصرفي ريال واحد
امك واختك مريضه تحججي ان الفلوس هذي بتعالجينهم فيها
وإنت رجل عليك القوامه علي
ربي يفرج همك ..

 

[الخط الفاصل]

الله يسعد كل من نصح ودعا دنيا وآخرة الله يجزيكم بجنات النعيم من غير حساب ولا عقاب

الله يجعل لكم من كل هم فرج ومن كل ضيق مخرج ويرزقكم من حيث لا تحتسبون

اللي يقولون يحبني انا اختلف معهم واتفق مع الاخت رازيا ما سكت عشان سواد عيوني سكت عشاني ممول وبنك له..

نسيت أقول لكم لما حضني سلمت ع راسه قام قال حسيتي بغلطك؟؟ قلت له المفروض ما أقول لك انقلع

وانا استغربت من هدوءه الغريب لان شكله منتهي ومنهار من كلامي

أنا ترجيته اليوم مايوصلني لباب المحكمة لانه صعبة علي خصوصا بيكون في مدينة غير مدينتي

كيف انهي الموضوع بود؟؟

واللي تسأل أنا ماعندي أطفال

 

[سهم العشق]

لا تعطيه ولا تغيره ابدا بالفلوس هو من حقك عليه انو يصرف عليك زيه زي غيره لازم تدخلي احد من اهلك في الموضوع كأخ او عم واذا ما في احد من اهله هو 00 والله يعنيك 00 ​

 

[لمسه انوثه]

الله يفرج همك

 

[ام احلى بنت]

حبيبتي هدي بالك ولاتتاخذي اي قرار الا لما تهدين وتفكري
بس مدام ماعندك سند لاتتطلقي منه الرجال ضروري بحياة المراه خاصه في مجتمعنا المراه ماتقدر تسوي شي الا بوجود الرجل
اتوووقع زوجك بيفووووق ويصحى بعد كلااااااامك
ولااااازم تحطي النقط على الحروووف
الايجا ر خليه يتكفل فيييييه ونفسك اصرفي عليها من راتبك
والاكل لاتطبخي الين يجيب مقاضي قولي البيت فاضي ماطبخت
وصدقيني هالنووووع يجي بالاحتواء
احتووويه وحني عليه واغدقي عليه بالحب
وبيغرررقك بالفلوووووس
وكلميييييه بهدوووء واطلبيه بكل حب ودلع وبرضوا لحي علييييييه بكل حب الييين يمل ويعطيك
يبغالك طوووولة باااااااااال وصبر معه

 

[رازيا]

سيدتي أهلاً بك كنت اريد اكمل ردي بس صارت شوي ظروف معي ، أسفت جداً لحالتك ولما وصلت إليه ، وتعجبت ما الذي يجعل امرأة في نضجك وعمرك وعملك الراقي تستسلم إلي هذه الدرجة لزوج لا يملك أي قدر من النخوة أو المروءة ، إنه لم يذكر الرجولة إلا مقترنة بالخسة فهو يريد الاستيلاء علي أموالك لأنه رجل ، ونسي أن الرجولة تعني القوامة والإنفاق وفقاً لقول الله تعالي " الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُوا مِنْ أَمْوَالِهِمْ .. إلي آخر الآية، فكيف يكون رجلاً ذا نخوة وكرامة من يقبل علي نفسه أن تنفق عليه زوجته من مالها، وإذا كان هو كذلك فما هو دوره في الحياة وما هي فائدته كزوج ؟

لن أقول أخطأت منذ البداية بتنازلك عن أبسط حقوقك وهو احتفاظك براتبك وإنفاقه، لكن المهم الآن هو أن استمرار الوضع علي ماهو عليه معناه خطأ وعدم استقامة الأمور علي هذه الحالة ، لكنني في الوقت ذاته لا أنصحك بطلب الطلاق قبل ان تستنفذي كل السبل والوسائل ، فالحياة ليست أبيض أو أسود ولكن بينهما ألوان أخري ، حاولي أن تبلوري الحياة مع زوجك بشكل يفيدك ويفيد ولدك ،حاولي أن تتفاهمي معه وتناقشيه بعقل وتلتقي معه في منطقة وسط كي تستقيم الأمور، وبالطريقة التي لا تشعرين خلالها بأنه يظلمك أو يبخسك حقك ، وامتنعي عن تسليمه راتبك واحتفظي به لنفسك وطالبيه بالإنفاق عليك وعلي ابنك لأن ذاك هو أبسط حقوقك ، إذا قتنع بكلامك وشعر بقوة شخصيتك وامتثل للحق وأمر الرسول صلي الله عليه وسلم " اتقوا الله في النساء " ، فخيراً فعل ، وإن ركب رأسه وأخذته العزة بالإثم فالجأي إلي حكم من أهلك وحكم من أهله لوضع حد للمهزلة الحياتية التي تعيشينها ، إنك حين تفعلين كل ذلك تفعلينه من أجلك ومن أجل ولدك الذي يجب أن يحيا حياة طبيعية بين أم وأب ، ولا يتعرض للتمزق النفسي وفقدان الاستقرار والأمان ، لأن والده يهددك بحرمانك منه ، لذا افعلي كل ما بوسعك أولاً لتجنبي نفسك مرارة الطلاق ، وثانياً لتجنبي ولدك أي تمزق بينك وبين والده .
هذا في حالة وجود اولاد بينكم
موفقة باذن الله

 

[ام احلى بنت]

اي محكمه ولييييه
انت ادرى بزووووجك يعني معقوووله مايحبك
لاتصيري جحووووده تذكري اللحظات الحلوه الي بينكم

 

[الناصحه الامينه]

اختى الحبيبه الحد الفااصل عندك اولااد وكم وماهى اعماارهم
البيت لك او له
اجلسى مع نفسك واحسبيها صح مامدى احتياجك له وهل تحبينه وتشعرين بالرتباط قوى به
هل والدتك تحتااجك اكثر من حاجتك انت لهذا الرجل
هل ترينه اصبح عبأ عليك يكلفك ويتعبك اكثر مما يحتويك ويسعدك ويكون ركنا تتعتمدين عليه فى الشدائد
الله ييسر لك امرك حبيبتى
هل لك اولااد منه

 

[غدا نلقى الآحبة]

الاخت ( هذا رأيي ) كفت ووفت ماشاءالله خذي برأيها ترتاحي ان شاءالله..

ونصيحة كل شي اولا بالدعاء واللجوء الى الله ثم بالتفاهم والاسلوب الحلو يجي ,, والطلاق شيليه من بالك لانه مو حل..

فكري صح ,, انت الان تكسبين زوج بلا نفقة ,,

صحيح تنفقين على نفسك ولكن عندك زوج مع الاخذ بعين الاعتبار عدم وجود اب واخ وغيره

اما اذا تطلقت لاقدرالله فستنفقي على نفسك وهكذا تكونين بلا نفقة ولا زوج او رجل يحميك ويكون معك .. يعني خسارتك اكبر ..