قصتي من بداية حياتي الى حبي الخالد

[( ريانة العود )]

مشاء الله
الله يسعدك ويهنيك دنيا واخره
ننتظرك تكملين باقي القصه

 

[(قصة حب)]

ما شاء الله
قصة راقية فعلا وسامية المعاني
بانتظار البقية وعساها خير يا رب
​

 

[نظرةعيوني ذلتهم]

وااااااااو
ما شاءالله تبارك الله الحفلة تجنن الله يدوم عليج الفرح
كملي يا الغالية

 

[أم حنان 2009]

وينك اختي شوقتيني اعرف باقي قصتك
كمليها الله يسعدك انتي وزوجك وبنتك

 

[حنونه وايد]

:no:ننتظرك غاليتي:bye1:​

 

[..عيوون الكون..]

ننتظــــــرك على احر من الجمر
بليز لاتطولين​

 

[وردة الحنون]

وينج عسى المانع خير
ننتظرررج

 

[نظرةعيوني ذلتهم]

وينج تأخرتي
لا تطولين علينا ننتظرج

 

[ms-reem]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[حبيبة الغالي143]

باك صباح الخير ...

السموحة بس والله بنتي فديتها ما تحسنت الا هاليومين ... ومشكورين كلكم على طلتكم وعلى مروركم وقراءة قصتي ودعواتكم لي ولزوجي حبيبي ولبنوتي فديتها ...

بقولكم على شي ... خذوها نصيحة ترى كله ولا بر الوالدين ورضاهم وخاصة الام ... صدقوني انا اقول هذا جزاة اللي يزرع خير اكيد بيحصد خير ... واللي زاد فرحتي من يومين طلعت نتائج اخوي في الجامعة وطلع ناجح في كل المواد واول وحدة بشرني انا فديته باقي له سنة ونص وافرح فيه واشوفه منهدس الحمدلله يارب ...

الحين بكمل لكم القصة ان شاء الله ...

 

[حبيبة الغالي143]

طبعا ونحن في الطريق والزفة شو طولها واهلي حوالينا ... واخوي طالع من السيار يصور بكاميرة فيديو ... والسيارة محد فيها الا انا وزوجي ...

تم يسولف شوي شوي عندي ... وانا هني بديت ارتجف واخاف خخخخخخخخخ ... وخاصة اول ما سحب ايدي وباسها ... قلتله عيب مو هني ترى الكل عينه علينا ... قالي احلفي قلتله والله .. قالي يا عيارة السيارة مخفي حتى من قدام ومن ورى ... احترق ويهي خخخخخخخخخخخخخخخ...

المهم اول ما وصلنا ... دخلونا الجناح ... ودخلوا اخواني وبنات العيلة عندنا ... وياتني بنت عمي ... تقولي فديتج الف مبروك شفتي انخطبت قبلج بس عرستي قبلي ... قلتلها النصيب سبحان الله قالتي وما احلاه من نصيب مع ابو خشم وضحكنا خخخخخخخخخخخخخخخ ...

وريلي شوي ويصفعهم وخاصة الشباب داشين طالعين واللي قهر ريلي قاملج يفتحون الثلاجة وياخذون الكاكاوا والعصاير وشافوا العشاء محطينه بطريقة رومانسية قاملج اخوي ينط يبغي ياكل والثاني انسدح على السرير ما لقوا غير ريلي يسحبهم واحد واحد يقولهم هوووونا يالله الساعة 2 عاد ورانا قومة من الصبح ... وطلعم واحد واحد خخخخخخخخخخخخخخ ...

وانصك علينا الباب ... وهني بديت اخاف ... ياني عدالي ويقولي تصدقين مهاري طالعة ملاك تجنين ... وبدا يسولف عشان يخفف علي التوتر وقلتله احس بموت من البرد ... فديته قالي تعالي ادفيج لانه المكيف اصلا مصكر ... قلتله لا خلاص مشكور ... وياب الكاميرا وتم يصورني ويصورني يقولي طالعة تجنني والمكياج عليج وايد روعة ... وتم يصور تعبني تصوير ... قلتله بس تراني تعبت ...

شوي وشلني انا والفستان وتم يدور فيني في الغرفة بكاملها وانا من خوفي تعلقت فيه وما لقيت الا عيني في عينه وكنت قريب وايد منه واستحيت ... قالي فديت اللي تستحي ...بعدين نزلني ...
قالي اساعدج تبدلين قلتله لا بس خلينا نصلي وندعي بالاول ... قالي زين بدلي فستانج قلتله بصلي بفستاني ... قالي من صدقج قلتله هيه ...

وقالي على راحتج ... دخل يتوضأ وعقبها دشيت انا ... وصلينا والحمدلله وقعدت وراه اهوا يدعي بصوت عالي وانا اردد وراه واغلبية الدعاء فيه حرف الراء وانا هالحرف عندي دلع مررررررررررة ... من خلصنا التفت صوبي وقالي فديت الراء اللي تطلع من حبيبتي ... واستحيت منه وقعد يساعدني اطلع الشباصات اللي في راسي خخخخخخخخخخخ ... قالي شو هذا ما خلوا شباصة ما سوووها في راسج ... وبعدها تبطل شعري ومن شافه لقيت عيونه طلعت قلتله علامك قال تبارك الرحمن اول مرة اشوف شعر هالطول ... يا بختي يا حظي وتم يلمس شعري وفرحان فديت عمره وقعدنا نسولف ويقولي مو يوعانة اقوله لا ابغي ارقد ...

قالي حرام عليج مسوين لنا عشاء وكيكة واستقبال قلتله مالي نفس ... ابغي ارقد ... شوي وقالي زين بدلي ملابسج قلتله زين بسير دورة المياه ابدل قالي احلى دورة المياه خخخخخخخخ قالي انا بسير دورة المياه وانتي بدلي هني ...قلتله احلف انك ما بدش علي قالي سبحان الله خخخخخخخخخخ ... دش هوا دورة المياه قمت انا سرت غرفة تغيير الثياب وبدلت ... لبست بقدر الامكان شي ناعم وشوي محتشم حلوة شوي خخخخخخخخخخ كانت خالتي ماخذتني نعومي في بوظبي وقالتلي اختاري واخترت واشترته لي على حسابها فديته اذكر قيمته كانت 1000 درهم ... بعد التنزيلات اللي عندهم ...

المهم بدلت وطلع ريلي من الحمام وقالي فديت النعومين وعلى اساس انه بنرقد تمينا نسولف ونضحك والله ما توقعته هالشكل موتني ضحك وخلاني انسى الخوف ... شوي شوي الين صار احم احم خخخخخخخخخخخخخخ .... ومن خلصنا قالي يالله نرقد ولمني في حضنه قلتله حبيبي يوووعانة ... ومات علي من الضحك قالي فديت اليوعان انا ... قومي ناكل وكلنا وسهرنا واستانسنا ورقدنا ولله الحمد ...


اللي سألت كم المهر عندنا ... على حسب مقدرة الرجال اختي وفي عوائل تفرض المهر ... بس حنا امي قالت ما نبغي على الرجال وايد اهم شي راحة بنتي وطلبت المهم انه يسعدها واللي يقدر عليه من مهر واهوا ما قصر دفع 100 الف درهم يعني يساوي مدري كم بالسعودي خخخخخخخخ واهوا بروحه يابلي الاغراض من ملابس وذهب والماس وعلب مكياج ونعل الله يعزكم وشنط وبخور وعطور وشيل ولواسي وكل شي تتوقعونه نحن ما طلبنا منه ابدا ...
​

 

[حبيبة الغالي143]

ثاني يوم قمنا وسرنا بيت اهله مسوين استقبال وغدا ولبسة لبسة تقليدية من تصميم مصممة وايد كان حلو ... وخلص هاليوم بصعوبة لاني مو راقدة عدل والحريم داشين وطالعين ...

وصار الليل ورقدنا وثاني يوم على طول سافرنا ... سرنا قطر عند اهلنا واستانسنا وايد ... وعقبها نزلنا ماليزيا وعشانا احلى ايامنا وخاصة في لانكاوي وفي جنتيغ ووواوووووووو اما مواقف وكله تصوير في تصوير ... ووصلنا تايلند وخاصة الجزر وووايد استانسنا وخاصة ركبنا بانشيات وسهرنا ورايحين ويايين ... واخر محطة كانت سنغافورة بجد استمتعنا ...

ومرت الايام سريعة عشناها بكل ما تحمله من معنى ...

اذكر في مرة ونحن في تايلند في واحد يرسم على الطريق وانا اقول حق ريلي فنان اللي قاعد يرسم ... وروحنا عنه وقعدنا على كرسي لانه خذينا نوع من الفاكهة وايد احبه يشبه الثوم ... وتمينا ناكل ونسولف وريلي ياب عصاير ونضحك وحركات وشوي قام ريلي وروح عني وياني يابلي لوحة فيها صورتي وصورته تجنن ... اقوله يالدب متى امداك تخبره قالي سر المهنة وحضنته وروحنا ...

وايد مواقف عشناها حلوة وخاصة اذا نزل المطر ننزل تحت المطر ونلعب وحركات ركض ورى بعض ... واحلى شي في الليل يوم نسير الكورنيش ونسولف ونضحك وناكل المأكولات البحرية ... كنا نختار من الاسماك والحبار والروبيان وناكل على كيفنا ...

لانكاوي لو اروح لها سنويا ما اشبع ... تجنن بمعنى الكلمة ....

رجعنا البلاد وعشنا شهر ويا بعض قضيناه بين دبي وبوظبي وصلالة والبحرين ... واما صلالة كانت فضيعة بمعنى الكلمة عشنا فيها ايام واووووووووووو تجنن ...

وعقبها ردينا البلاد وقعدنا اسبوعين ويات سفرة ريلي الى بريطانيا طبعا انا ما قدرت اسير وياه على طول الين يضبط اموره هناك ويرتبها وعقب الحقه ... لكن منو سويت له مناحة في الدرب ونحن سايرين المطار وصياح ما وقفت ابدا ... قبل لا يروح باسني على راسي وقالي احبج طول عمري اوعديني تحبيني طول العمر وهالدنيا ما تاخذج عني ... قلتله انت حبي الين اخر نفس بحياتي ... احبك طول حياتي ... وتميت اصيح وما قدر يقاوم وحضني قدام العالم واستحيت ...وقالي عشان خاطري وقفي دموع بس ...

وعشانه وقفت شوي واول ما راح تميت اصيح صياح من خاطري ... والله ما كمل اسبوعين وما قدر يقاوم وعلى طول سويت الاجراءات ولحقته ... وياهي ايام عشناها ... ما خلينا مكان ما سرناه ركبني كل شي تمنيته وداني كل المناطق اللي تمنيت اشوفها ومن كل منطقة يشتريلي شي ذكرى ... ويا حلاة العاصمة لندن كلها عرب في عرب خخخخخخخخخخ ... واستانسنا وصورنا وايد ...

اما الريف ايامه تجنن كله مزارع وناس عايشة في حالها والخيول تجنن بأشكالها المختلفة ... والمطر والبرد والثلج كان يجنن عندهم ... والا كلش ولا حدائق الورود اللي عندهم ... كنت كل ما ادش اطلع بالورووود وريلي يضحك علي يقولي شكلج تحبين الورد اكثر مني اقوله عينك انا احبك حب الله يعلم فيه انه والله ادعي لو يصير الله ياخذ من عمري ويطول في عمرك انا راضية ... ولمني بحنان قالي يا حظي كل هذا حب حقي ... قلتله واكثر فديتك ...

وخلصت فترة الدراسة وردينا البلاد ... واستانسنا عشانا في ملحقنا الخاص ... ومنها بديت اتعرف على اهله عدل وكنت احب اسير المناسبات والزيارات ويا اهله واهلي واحب اتكشخ وايد حتى في البيت ... لدرجة بديت اسمع مناهله اني دلوعة وايد وكله اكشخ طبعا مو اهله اللي في البيت اهله اللي برع ... وخاصة بنت عمه احسها تكرهني كره حتى سلام ما تسلم علي وانا على نياتي مدري ليش ... الين خبروني خواته وقالولي اصلا اهيا تموت على ريلي ولدرجة انه اخوها واختها كلموا زوجي وامه قبل لا يخطبني انه يخطبها واهوا رفض قال هذي نفس اختي ومن خطبني كرهتني ... حتى اتذكر شكلها والله انها كانت قاعده في اول طاولة عدال الكوشة يوم عرسنا وتراقبني وايد ...

ما سويت لها سالفة وتميت احضر المناسبات والعزايم وعمتي تفتخر فيني وخاصة اني اكشخ وايد واسلوبي حلو في التعامل وغير عن كذا كنت ازكرها امايه ما كنت اقوللها عمتي ولا خالتي ... وكنت وايد اهتم فيها ودايم اهديها بين فترة وفترة اهيا وخوات ريلي ولاني الاصغر في بيتهم من حريم عيالها حسيت نفسي الادلع ...

يعني نحن نزورهم بين فترة وفترة وحاطين لنا ملحق بس اول ما نزورهم ونقعد وياهم في الويكند القى الملحق مبخر ومرتب ومعدل والثلاجة فيها كل شي والمطبخ مليان اغراض ... الله لا يحرمني منهم يارب ...

وبعد سنة حملت والكل فرح لحملي وريلي من وناسته وفرحته حضني قدام الدكتورة ... وبشرت امي وصديقة عمري وفرحت وايد وخاصة انها كانت على وشك ولادة ربيعتي فديت عمرها ...

من يوم ما حملت وانا استحالة اسوي شي لا امي ولا ام ريلي يخلوني اسوي شي وريلي الله يعزكم حتى دورة المياه يشرف علي فيها هههههههههههههه ...

اللي حلو اني عودت ريلي على الرومانسية وعل ىالحب واني بين فترة وفترى اسويله ليالي رومانسية تجنن واهديه هدايا ...وافكر في افكار جنونية ... واهوا ينصدم منها ويفرح وايد ... ودايم يقولي تدرين ما ظن حد سعيد بهالدنيا شراتي ... قلتله وبتم اسويلك هالحركات الين نعجز خخخخخخخخخخخخخ ... وكان يحب هالليالي ويشتاق لها وخاصة اذا اسويله ليالي المساج بعد وتنظيف الجلد في ريوله ...

حملت ببنتي وكان يتمناها بنت ومن وصلت الشهر الرابع عرفت بجنس الجنين وفرح ريلي وخاصة اني حملت بتوأم بس الله ما كتب والثاني ما ثبت وطاح وحزنت بس قالي ريلي الحمدلله على كل حال المهم بقى لنا واحد ...ومن عرف جنس الجنين واهوا ما خلا شي ما اشتراه من ثياب واغراض والعاب وكل شي .. قلتله حرام عليك والله هالاشياء اغلبيتها تجينا هدايا ... قال ما عليه نخشها للثاني ضحكت عليه قلتله بعد في ثاني خخخخخخخخخخخ ...

هنا بدت المأساة انه كنت متفقة ويا صديقة عمري اني بسير دبي اتمشى انا وريلي ... وصديقتي نفس الشي بس اهيا سارت قبلي وانا عقبها وما تلاقينا وانقطعت عنها اسبوع لانه ريلي طلب مني نعيش بروحنا ونصك التلفونات وبالفعل عشنا احلى ايام عمرنا ... وخاصة اخر محطة كانت في جبل حفيت اخوي حجز لنا على حسابه في الفندق وكان وايد حلو ...


من رديت افتقدت ربيعتي ودقيت عليها ما ترد دقيت على امها وقالتلي انها بالمستشفى وطلع عندها حصى ... وبنتها عمرها 3 اشهر ... سرت ازورها وتميت ازورها بين فترة وفترة وفي يوم حلمت وقمت اصرخ في النوم واصيح ... قام ريلي يقرا علي ويقولي بسم اله عليج شو بلاج .. وحضني بقو اقوله ربيعتي ما بتطلع من المستشفى احسها بتروح خلاص ... قالي لا تقولين جيه ان شاء الله بتطلع وما فيها الا العافية وبتربي بنتها وان شاء الله بتطلع وبتقييم فيج من تولدين قلتله عسى ...

ويوم زرتها كانت فرحانه وكانت تقولي الكرشة بدت تظهر قلتلها وان طلعت بنوتة بسميها على اسمج قالتلي عيل بقييم فيج وبريبها ويا بنتي قلتلها ان شاء الله ...

طبعا باهمال من المستشفى حسبي الله عليهم ... مر شهر وربيعتي تدهورت حالتها ودشت العناية وتمت فترة فيها الين كملت بنتها 4 اشهر ... وفي ذيك الليلة انا سلمت على امها واختها قلتلها خالتي باجر ما بقدر امركم لانه جد ريلي تعبان وبنسير نزورهم قالتلي ما عليه ... قلتلها طمنيني بين فترة وفترة قالتلي تمام ولا يهمج الغالية ...

وطالعين انا وربيعتي الثانية من المستشفى نضحك ونكركر بشكل غريب مع انه اللي في المستشفى صديقة عمري 15 سنة انا واياها ...

في الليل حسيت نفسيتي تعبانة ومعصبة بشكل غريب ... ياتني حالة غريبة ...وريلي كان طالع ويا ربعه وما طول ساعة ورجعلي وقالي علامه الحلو ليش معصب وليش ما متعشي ... وتم يدلعني الين انفجرت من الصياح ورقدت في حضنه وقالي خلاص حبيبي فيج شي ... قلتله احس في شي بيصير .. قالي عيني من الله كل خير ان شاء الله ... وما خلاني الين عشاني وعقبها رقدنا ... قمنا نصلي الفجر .. سار ريلي المسجد وانا صليت في الغرفة ... شوي ورقدت قبل لا يرد ريلي يوم ياني مع اني متعودة اترياه .. يوم رجع لقاني راقدة ومو متغطية وغطاني .. شوي حسيت كاني سمعت صوت حد بتطلع روحه ودخل ريلي شاف جسمي كله يرتجف وصرخت صرخه ودخل بسرعة وحضني ... قالي مهاري حياتو علامج بسم الله عليج ... قلتله ابغي ادق اسأل عن حبيبتي صديقة عمري .. قالي اصبري الناس نيام والحين الفجر ... ما امداني اقوله ابغي اكلمها دق تلفوني ... شفت رقم ربيعتي وما قدرت ارد ... قام ريلي رد عليها ... قالها خبرها بس بشوي شوي ... ما امداه يقولي شي الا اشوف خالتي ام ربيعتي داقة وقبل لا يقول شي ريلي سحبت التلفون من ايده اول ما قلت السلام عليكم سمعتها تصيح تقولي انا لله وانا اليه راجعون حبيبتج وصديقة عمرج راحت ... ما حسيت الا اني اغمى علي ... ومن صحيت حسيت نفسي مو مستوعبة الموضوع ولا اصيح ولا شي ...

وروحت بيتهم وانا داشة لقيت الجنازة قدامي على اليمين والرجال يصلون عليها ... ما امداني اشوفها واودعها لاني اغمى علي وتأخرت وايد ... واصلا ام المرحومة قالتلي ما كنت بخليج تدشين تشوفيها لانج حامل في بداية حملج وخطر عليج ...

وتميت اصيح في حضنها واهيا تقولي محد يصيح ... اقروا وادعو لها ... الناس كلها تدش تعزيني انا ما تعزي اهلها ... الين مرت ثلاثة ايام وانا صابرة اسير العزاء من الصبح ما ارد الا في الليل ... وضعفت وايد وريلي اخر ليلة يكلمني يقولي خلي ايمانج بالله قوي ... ومنها انهرت مرة ثانية وطحت في حضنه واصيح من خاطري وبصوت بعد ...قلتله ما عندي ربيعات ولا خوات هذي صديقتي واختي وحبيبة قلبي ... وقعد يهديني ...

امها شو كانت تقولي ... ما هدتج ابدا لانها تعرف انج حبيبة قلبها ومالج غيرها الين زوجتك واطمن عليج ... فديت عمرج ...

كانت اصعب ايام حياتي ... كنت اقول ياليت وياليت لو ترد ذيك الايام ... وكنت ابكي عليها بكي كل ما تذكرت موقف او شفت صورنا ويا بعض او شفت صور عرسي واهيا وياي ..او مريت على المحلات والاماكن اللي كنا نتردد عليها ...

اه واه ايام كانت ياليتها ترد ...

الله يرحمها حبيبتي وخلت لنا بنتها ذكرى والين اليوم اسير عندها واشوفها واخذ بنتي عندها وامها المرحومة متعلقة فيني وايد لدرجة انها ما تهدني ودايم تسأل عني وتزورني وازورهم ...

ادعوا لها بالرحمة والمغفرة ....

من بعد هالقصة بكمل لكم قصة ولادتي ...ان شاء الله ...
​

 

[الأميرةالنائمة]

قصتك روعة حبيبتي الله يبعد عنك الحساد يا رب. موت صديقتك اثر فيني كثير.

 

[وحيده كالقمر]

الله يرحمها صديقتج,
ويونس وحدتها,
ويوسع مرقدها,
اللهم أميييييييييين,

 

[حنونه وايد]

الله يرحم صديقتك ويسكنها فسيح جناته اللهم امين ... متابعه معك غاليتي...الله يسعدك...ويكتب لك كل خير يارب.

 

[وردة الحنون]

بكيتيني

انا لله وأنا اليه راهون
لله ماأخذ وله ما اعطى وكل شي عنده بمقدار
ربي الهمك الصبر والسلوان
الملتقى في جنة الفردوس

ربي اجمعنا بمن نحب في الفردوس الاعلى من الجنان

​

 

[نظرةعيوني ذلتهم]

الله يرحمها ويغفر لها ويجعل قبرها روضة من رياض الجنة

 

[ms-reem]

الله يغفر لها ويسكنها فسيح جناته
ادعي لها يا قلبي ولا تجزعين فالحياة لا تدوم لاحد
فهي فانيه وكل من عليها فان
ربي يشرح صدرك ويعوضك عنها بصديقات اكثر واكثر
بانتظااااااااااااارك

 

[ورودة حالمة]

الله يرحمها يارب

 

[أحلى عسل]

الله يرحمهاويغفرلهاويجعل قبرهاروضه من رياض الجنه