طلقني واناحامل بالبكر بس مرتاحة ومبسوطة

[حلمي انقتل]

بالعكس انا لو بزعل ما نزلت الموضوع مع معرفتي اني راح اواجه ناس كلامهم قاسي ، انا انسانة صدري وسيع جدا تجاه الانتقادات والاراء اخذ منها المفيد و ارمي اللي مايعجبنيورى ظهري ،،

يشهد الله اني اقوله طلقني انت ماتستاهلني لاني كرهت نفسي بسبب تصرفاتي وضميري حي يؤنبني على كل كلمة صغيرة وكبيرة ،،

انا وصلت لمرحلة اليأس ،، نفسي اعيش بجزيرة لوحدي منفصلة عن العالم و الناس ،،
كنت مسافرة انا وياه وانا مرتاحة بس يوم قال بكرة بنمشي للبيت قلب مزاجي وصرت ابكي وبالطريق للرجوع جلست اقوله اكرهك اكرهك و هو يقول انا بعد اكرهك ،،
انا مو القصد مني لما اقول له اكرهك يعني ماحبه ،، ﻻ
انا قصدي انك قاهرني ماراح تلبي طلبي وتطلعني بشقة نستقل فيها مع بعض ،، ولاني عارفة انو مابيسمع لي وماراح يساعدني في حل عقدتي وهي البيت ،، ولاني في قرارة نفسي عارفة ان طلبي للاستقلالية بيخلينا ننفصل عن بعض ،،،،،
صرت اختصر كل هالكلام و اوصف كل هالمشاعر بكلمه وهي اكرهك يالشين وليس قصدي بالشين يعني القبيح ،، قصدي ياشينك ليه ماتبي تطلعنا عشان ننبسط ونرتاح من المشاكل التافهة وعور الراس ،، وربي يشهد علي ،، وانا مستحيل اعيش معاه ان كنت بنتقص الرجال او احتقره ،، لان المراه لازم يكون بينها وبينه احترام ومحبة ، بغض النظر عن الشكل واللون ،، بس انا الله يهديني عارفة الصح و اسوي الخطأ ..

 

[عبير عبوره]

حلمي انقتل

ايش سويتي

ياويلي منك :4:

لا لا تفرطين في زوجك

و الله ما تلقين احسن منه

تراه غربي جنوبي مو العكس يا قلبي

حررررام عليك

ترا كل وحده شايله في قلبها و ساكته

الرجال كلهم تعب

انتي بس من هرمونات الحمل تقولين ما تبغيه

كل شي يجي بالتفاهم

مو تطلبين الطلاق و تصرين عليه



:33: :33: : 33:

 

[kimou]

قرات موضوعك بتركيز و كررت بعض المقاطع اكثر من مرة عشان افهم المشكلة بس ما لقيت مشكلة من الاساس، و اكثر من مرة بكتب رد و بعدين ابطل لاني مو متعودة اكون قاسية بالردود لكن إنت حالة خاصة، لو هالكلام كلام وحدة ناضجة و جامعية إيش خليتي للمراهقات؟؟؟؟ إنت شايفة حالك على زوجك و معتبرة حالك هدية نزلت عليه م السماء و المفروض يحمد ربه ع النعمة و يقدملك فروض الطاعة و يكون خاتم بإصبعك. بإختصار شديد إنت المشكلة، ما تعرفي شي عن الزواج و عن المعاملات الإجتماعية و لا عن حق الزوج في الإسلام، و كمان عندك نرجسية غير طبيعية و حقيقة مو عارفة كيف زوجك المسكين إستحملك سنة كاملة. لو بدك تتصلح حياتك إقري كتب عن تطوير الذات و التنمية البشرية إضافة إلى كتب عن الحياة الزوجية...

 

[السحابه الثلجيه]

الله يصبر قلبك وبكره لما يكبر ولدك حتشربين الحنضل مافي احد يصبر على الطفل مثل ابوه امك وابوك اليوم عايشين وبكره بعد عمر طويل الله يعلم اش يسير حتى لوجاك غير زوجك مايتحمل عيال الناس وابوه عايش ويمكن ابوه يشيله وتتحسرين لو انتي تحسين نفسك متضايقه من حاجه ارقي نفسك ويمكن بس تتحسسين تر الشيطان يدخل للانسان من مداخل كثيره واهمها يجعله حزين ويوسوس لدرجة ينظر بنفسه بالمرايه وير نفسه بصوره بشعه كئيبه صدقيني انتي تحتاجين تجلسين مع نفسك جلسه صريحه وتسالين نفسك بكل امانه هل الي سويتيه صح ولاغلط الله انعم عليك بنعم كثيره زوج يحبك ويطمح لبناء اسره ورزقك بمملكه خاصه فيكم وناس حواليك وان شاء الله اولاد يسعدونك الحياه مشواااار طويل ويبغالها الصبر والعزيمه لاتغرك التوافه الي تستطيعين الالتفات عنها ليش ماسفرني وليش مايهديني انتي ناضجه وعاقله خصوصا انك بديتي وحملتي الله يثبته ويصلح حالك اتمنى ماتزعلين بس فكري في حياتك والله يسعدك

 

[حلمي انقتل]

kimou

ياحبيلك صدقوني انا مستحيل ازعل ،،انا اعترفت لكم وقلت انا احط من اللاشيء مشكلة ..
انا عارفة اني اسوي حركات مافيها نضج وﻻ عقل ،،
انا عارفة الغلط واسويه عمد .
انا ببداية زواجي كان الاحترام والحب بيننا متبادل بعدين من الضغط النفسي بسبب الناس وتغير الوضع بين الزواج وبيت اهلي وماتقبلت التغييرات ،، انقلبت وصرت قاسية وافعالي مشينة ،،
انتي ﻻ تشوفين نفسك قاسية لان القسوة حتى لو ضايقتني وبكيت منها صدقيني تعلمني وتقويني ،، مابي احط يطبطب علي ..
انا دلوعة وعجازة وماحب اتحمل المسؤولية ،،
المسألة مسألة ضغط نفسي و عدم قدرة على التصرف في الازمات و سوء التدبير ...

والله عارفة اني غلط انا غلط انا غلط ..

كلامكم اللي مايمس ذاتي اتقبله ،، ويسعدني وانبسط ان فيه ناس تساعدني وتنبهني وتعطيني كفوف تقويني ..



شكرا لكم من اعماقي


قسوتكم تقويني بس حنو علي شوي ههههههههه

 

[يالوردي]

روحي لطبيب نفسي
روحي لراقي شرعي
لاتهملين نفسك
مشكلتك انك تسمعين لناس
وتقارنين بينهم وتسمحين لهم يتدخلون بحياتك
زوجك شاريك ويحبك خوذي الي يحبك مو الي تحبينه
احمدي ربك على هالزوج
ارجعي لزوجك بس قبل ترجعين صححي اغلاطك
اذا اهله يضايقونك
اتفاهمي معه لاتنزلين لهم
اعتبري نفسك ببيت بعيد عنهم
انزلي بشهر مره او مرتين
اهم شي زوجك لاتجاملين اهله او اي احد
على حساب زوجك وحساب نفسك
خلك حره متى مابغيتي تطلعين
ومتى مابغيتي تنزلين
لايهمك كلام الناس لاتركضين ورى رضاهم
اهم شي رضاك ورضا زوجك
زوجك طيب بس حاولي تكسبينه بالكلمه الطيبه
مو كلمة اكرهك وطلقني
دلعيه اهتمي فيه
مع الايام راح تأثرين عليه بكلامك

 

[ذكريات لا تغيب]

بنحن عليك
وراح ندعيلك من قلوبنا
وانتي كنتي محتاجه ضربه قويه تفوقك
الي عجبني فيك اعترافك بغلطك وهذي اهم خطوه وانتهينا منها
الحين لازم تتغيري وتصلحي من نفسك عشااااااانك انتي اولا وعشان تحتفظي على بيتك ثثانيا ز
زوجك قالك انا طلقتك ابغاكي تتغيري ما قال انه يكرهك او شكلك فيه شي
يا قلبي الحرمه مو كل اشوي لها رجل
لازم تحافظي على مملكتك
والشيطان يفرح انه خرب بيتك
الحين اعرفي نمطك ونمط زوجك عشان تعرفي توازني أمورك
لازم تقنعني بتغير وانك تبغي تتغيري وطوري من نفسك
وبعدين لنا كلام ثاني

 

[حلمي انقتل]

لبى قلوبكم

كلامكم على عيني وعلى راسي ..
والله حتى انا قبل ﻻيطلقني ،،
كنت اروح لاهلي واقعد عندهم اسبوع اسبوعين واتصل عليه اقوله اني اروح واطلع ومبسوطة اني طالعة من عزلتي واخالط الناس ..
وكنت والله اطالبه اقوله ساعدني اتغير ساعدني اكون اجتماعي شجعني وهو ماقصر مايجي يومين ثلاثة الا ترجع حليمة لعادتها القديمة ..
هو متحمس وانا متحمسة للتغيير بس ماعندي ثبات وﻻ اصمل هذا اللي ضيعني ،،
اتذكر بعد لما قلت لوه طلقني قال لي عندي شروط :
1/ تروحين لاستشاري اجتماعي او طبيب نفسي
2/ او ترقين على نفسك لمدة 21 يوم
ونشوف وش الله يكتب بعدها ...

طبعا انا ﻻ رضيت على نفسي بالطبيبي مع انه مو عيب بس كنت افكر بالمستشارين الاجتماعيين شفت لهم مكتب وتحمست اروح لهم وﻻرحت ..
والراقي الشرعي جربت 3 ايام متواصلة وماواصلت ، ماحب القراءة تتعبني ..

ابي شيء منكم الحين ..

اليوم الفجر بالحسرة صليت خفت يطلع وقتها من كثر ماصيح ،،
عارفة اغلاطي و عارفة نفسي بس حاسة بالضياع ماني عارفة كيف اتصرف ..

افكر ارجع او ﻻ ،، اخاف ارجع وانا مخططة على التغيير بس لما ادخل بالتجربة اخسر وافشل فخايفة من الفشل
خايفة من انجح
خايفة من كل شيء
عندي توتر وارتباك كلما فكرت في الناس و العزايم ومخالطتهم
انا ربة بيت ممتازة في الطبخ والنظافة والسنع اللهم لك الحمد بس العلاقات الاجتماعية تدمرني بلحظة فاهمل نفسي وبيتي و احبابي ،، والله احيانا اقاطع خالاتي وانا متربية معاهم ،،
صايرة ماستحمل شيء فأفضل الانسحاب والهروب والاختفاء ،، وزوجي لما كان يضغط علي .. وماقدرت اقاوم صرت هجومية و عدائية وقاسية وسيئة اخلاق ،،
احب الهدوء واحب السلام الروحي والنفسي والجسدي ..

ابيكم الحين تحطون لي النقاط للصفات اللي تبوني اتغير فيها ماعليش بتعبكم ..
وساعدوني بتوجيهاتكم بما تستطيعون تقربا لله و احتساب الاجر في قبالة هالشهرالفضيل

واكون لكم بعد الله من الشاكرين ياحبيباتي ....

 

[توفينا2]

ضعف الشخصية
د - راشد السهل
الشخص الذي يعاني ضعف في شخصيته يفقد الكثير من حقوقه ويتعرض للقلق والاضطراب في مواقف الحياة اليومية،
بالتعلم تحدد قوة أو ضعف شخصيتك

الشخص الذي شخصيته ضعيفة يعيش في ألم لا أحد يشعر به والذي شخصيته قوية يعيش في سعادة الجميع يشعر فيه،
أنت من يقول للناس ماذا تريد

صفات من شخصيته ضعيفة
• لا يرد طلب للناس
• يتجنب مواجهة الناس
• أفكاره سلبية عن نفسه
• كثير الجلوس لوحده
• متردد بطلباته
• لا تعجبه أفعاله
اسباب ضعف شخصيتك

• ترى أخطائك كبيرة
• أفكارك سلبية عن نفسك
• ليس لديك أهداف واضحة
• تعتقد بأنك أقل من غيرك
• لديك خوف شديد من النقد
عوامل تزيد من ضعف شخصيتك

• تركيزك على سلبياتك
• تساهلك بحقوقك
• تجنبك للمناسبات الاجتماعية
• اهدافك غير واضحة
• كثرة لومك لنفسك
قبول نفسك أمر هام لتقوية شخصيتك، لا تتمنى صفات شخص آخر ولا تجعل قوة شخصيتك مرتبطة بشروط صعبة،
قم بتصرفات تحبها تجد قوة في شخصيتك
حين تعتقد بأن شخصيتك ضعيفة لا تحزن ولا تيأس من تغييرها، كل الامر بيدك بعد توفيق الله،
خطط لتصرف إيجابي وقم به يتغيرشعورك
صفات شخصية قوية
• يعرف ماذا يريد
• يخالط الناس
• أفكاره واضحة
• قادر ع اتخاذ قرار
• يفكر ثم يتصرف
• يواجه نتائج تصرفاته
• حريص على حقوقه
لاءات ضرورية لتقوية شخصيتك
• لا تبالغ بنقد ذاتك
• لا تركز على سلبياتك
• لا تكن قاسيا مع نفسك
• لا تترك عمل ناقص
• لا تقارن نفسك بغيرك
تصرفات تقوّي شخصيتك
• شارك الناس بحوار
• اجعل اهدافك واضحة
• إنهاء أعمالك في وقتها
• كن خبيرا بعملك
• تكلم عن إنجازاتك
• تكلم بصوت عالي
خطوات لتقوية شخصيتك
- اكتب افكارك عن نفسك
- اكتب تصرفاتك التي لا تعجبك
- أشطب الأفكار السلبية
- خطط لتصرفات تحبها
- كافئ نفسك اذا نجحت

 

[توفينا2]

وخلي شعارك دائما ..رضا الناس غاية لاتعنيني..
لاتسمعي لكلام الناس ..
اتوقع نمطك شماليه شرقيه .غالبا هذا النمط لايحب مواجهة الاغراب لكن يستمتع مع اصدقائه المقربين..واصدقاؤه محدودين .
ياعزيزتي انتي لست مريضه .لاتتوهمي بالمرض طبعك هكذا ..ولكن تنقصك الثقه ف نفسك ..قوي شخصيتك واعتمدي ع نفسك.
وارقي نفسك بنفسك..وشغلي الرقيه الشرعيه ف البيت وسورة البقره..
واطلبي من زوجك يجيب راقي يقرا ف بيتكم قبل لاترجعي..
وخذي راحتك ف بيتك لاتتقيدي بأهله وزياراتهم...وهم مامنعوك من الخروج والتمشيات بالعكس طيبين معاك وماشفتي منهم مايسيئ اليك ..ومدام هو ولدهم الكبير ساعديه ع برهم .هو مسؤل عنهم ولازم يكون جنبهم ويقضي طلباتهم .لاتصيري انانيه وتفرضي عليه السكن بعيد عنهم.

 

[حلمي انقتل]

●○ توفينا

مشكورة يالغلا ، مداخلتك جبتيها على الجرح ،،
كلهاالصفات موجودة فيني ،، وهالشيء اتوقع سبب من اسباب طلاقي ،،

ودايما يتكرر على مسمعي من النصائح : ﻻيهموك الناس بس انا مقدر غصب عني ولكن سأقاوم واكافح بإذن الله مستعينة بالله على نفسي وعلى الناس ..

تأثير كلام الناس علي قوي جدا .. خليني اقولك ايش بيوصفوني واسمعه منهم وانا ساكتة وكابتة في قلبي وبس ابكي على الله وخلاني اكرههم وماحب الاختلاط معهم ..


■ بسبب نحافتي الزايدة يقولون لي ياربيه انتي عصلا رة ، عظام ، متى تسمنين ، زوجك ياكل منك ..
□ سبب قصر قامتي الصغار يوقفو جنبي ويتريقو ويقولون احنا اطول احنا طولك وش ذا قدام زوجي،
■ بسبب طيبتي الزايدة يقولو عني انتي صحيحة او ساذجة وينلعب عليك بسهولة ويمقلبوني بعض الاحيان من استسصغارهم لملامح وجهي واستلطافهم به يعطون انفسهم الحق في انهم يتلفظو علي الفاظ شينة مثلا ﻻيكثر ، كلي ز.... على تب،،، انقلعي بس ،، ضفي وجهك ، انطمي ، هذي من بعض الاطفال لاني لطيفة معهم وطيبة احتقروني وبنت خالتي مثلي بالجسم ومو حلوة بس ثقتها بنفسها قوية وتوقفهم عند حدهم عكسي ودايم اقارن نفسي فيها وهي دايم تغار مني ،،بس انا متواضعة لحد كبيييير ،، اما كبار السن فهم جميييعهم يحبوني والله العظيم اني اذا سلمت عليهم يحبون يدي وبعضهم راسي والحق لهم ويحرجونني لانهم يحبوني ، كبار السن ارتاح معهم وسهل التعامل معهم واحب سواليفهم ومشاركتهم عكس البزران ماحبهم لانهم وقحين وقليلين ادب وماقوى عليهم حتى لو هاوشتهم يردون علي برد اقوى مني ،، ههههه
□ لان ملامحي طفولية انحرج من الناس لما يقولو انتي متزوجة معقولة انتي جامعية ويتريقو على مقاس رجلي اعزكم الله البس 36 ويقولون انتي يالله تدورين بجزم البنوتات الصغار يمكن تلاقي قدك ،،
■ اهلي اخواني خالاتي اقرب الناس لي بيتريقون على جنيني ويتخيلو شكله بالمستقبل ،، ودايم يدعون يكون ابيض وحلو مثلهم مايصير مثل لون ابوه او شكله او يطلع على اعمامه واهل ابوه .. انا ادافع اقول عادي لو اسمر انا بحب السمران فلاوين وسيعين صدر ثقتهم بنفسهم كبيرة و مايرضون بالغلط ويوقفون الناس عند حدهم ، وتأثري بكلامهم خلاني ابكي كثير بيني وبين نفسي لما انعزل عن مخالطتهم واقول ليتني ماتزوجته ليتني ما اخذته انا شريت الرجال الطيب بس تأثير كلام الناس خلاني ابيعه واعاف جنيني اللي لسه ينبض ببطني وخايفة عليه من قسوة الناس فوالله اني تمنيت انه يسقط او يموت رحمة له وانا ابكي دم مو ذنبه ،، كلام الناس يخليني لما اروح اتمشى مع زوجي اتحاشى امشي جنبه عشان مايقولو هذي زوجته وبالسوق ماحب يكلمني او يضحك معي او شيء ،، والله اني اقاوم واروح غصب عن نفسي الصق جنب زوجي ونضحك ونفرح مابي الناس تفتكر اني شايفة نفسي على زوجي ومابيهم يحتقرونه ،، بسبب بياضي عنده ،، اكره الاحتقار والدناءة ،، صرت ادعي بس ربي يرزقني القوة في التطنيش وقوة في اللسان وقوة في البدن وقوة في القلب عشان اقدر اربي طفلي واعيش عيشة هنية مريحة مع زوجي اللي احبه ،، والله بسبب الناس صرت افكر واقول مابي احمل واجيب ولد ثاني ،، لانهم يقولون لو طلع ولد اسمر مايخالف لكن لو بنت مصييييييييبة .. بالله وتلوموني ما اكره الدنيا كلها وادعي على نفسي وطفلي بالموت لانه راحة لنا منهم ..

لكن
رغم ذلك سأقاوم ، سأضغط على نفسي مهما كان ،، قبل ﻻ
انسى على طاري الغرباء انا لما اروح اماكن عامة برتاح كثير لان مافيه احد من معارفي معنا ، مامعنا خال وﻻ عم وﻻ احد من اهالينا اهلي واهله ،، بالسوق او بالحديقة او بالمستشفى انبسط باخذ واعطي مع الغريب براحة ، بحس بثقة اكبر ، في دوامي ثقتي كانت كبيرة بس لما اجي لبيئتي ومجتمعي بنطوي وانعزل واضعف ،، انا دايما اقول ليه انا متناقضة ؟ ليه قوية برا المملكة قوية بين الغرباء ، وضعيفة وهادية ومتواضعة وخدومة مع اهلي وصديقاتي و اهل زوجي ،، تصدقون
انحرمت من احلى شيء واجمل شيء تسويه البنات لما يتزوجو ،، ماحطيت صور لزوجي بالجوال نادر اصوره عكس زوجة اخوه ماشاء الله حاطة خلفيتها زوجها وبتغار عليه وهي مثلي بيضاء وهو اسمر بس ثقتها كبيرة وطفلها طلع ابيض ،، بس انا ماقدرت اسوي كذا مع اني احب زوجي بس دايم اقول لنفسي تستاهلي تغامرين وتسوين شيء اكبر منك ،، دايم بلوم نفسي مع اني قابلته بارادتي بس كلام الناس يضايقني ..
ا
نا عارفة اني حتى وانا بقبري الناس بتنهش بلحمي ،، بس على الاقل ماسمعهم ومخليتهم عل ربهم ،،

وصلت لدرجة احيانا يتبلد احساسي واحيانا ادعي على نفسي واحيانا للاكتئاب والله يفرجها بفرجه ويعدل حالي ويحسن وضعي ويرحم ضعفي ..

 

[ذكريات لا تغيب]

ما شاء الله ابدعتي يا توفينا
حتى انت اتوقع انك شماليه واضح من اسلوبك
عشان كذا نفولك اعرفي نمطك راح تفهمي نفسك وعززي جوانب القوه فيك

 

[غصن البان00]

حبيبتي قولي اللهم لاتكلني إلى نفسي طرفة عين أو أقل من ذالك وأصلح لي شأني كله لا إله الا انت أسأل الله ان يرده لك ردا جميلا والله العظيم تربيه الطفل بدون الاب صعببببه كأبه مميته تشوفين الناس ابوانهم مهتمين اذا مرض وداه المشفى يشتري له العاب ملابس تطلعون مع بعض تتسوقون وطفلكم بينكم انصحك لاتفكرين بطلاق انا حياتي كانت اسوا من كذا وكنت ساكنه مع اهله لمده 4 سنوات وماسافرت شهر عسل رحنا جده مع انو انا واهلي نسافر براا وما اهتميت كثير وثاني اسبوع نزلني مطبخ اصلح له اكل شعبي وكنت صغيره ما اعرف كنت ادق ع امي واسألها كان عمري 17 واجلس بلبيت واهله يطلعون وكل حفلاتهم وزواجاتهم وعزايمهم احضرها غصب ما ابي مشاكب ع شي تافه مع انو انا شخصيتي قويه لما صار سبب قوي وطلعت عنه واتحملت وانزل برمضان من الساعه تسعه الصباح وما ارجع لغرفتي الا ال4 العصر والله عانيت وكنت امشيها حاولي تمشين وبعد ماتولدين خططي معاه ع سفره رومنسيه وانسي موضوع بيت اهله وبيجي يوم تستقلين ببيتك بس ارجوك لاتهدمين بينك عشان اسباب تتعدل مع الوقت شوفي انا منفصله لي سنتين ماخطيني الا متزوجين وشياب اثريا مع اني جميله وبنت ناس معروفين ولنا معارف كثير وبرضو احن لطليقي واحبه بس ما اقدر ارجع له وربي مابتلاقين مثل زوجك الاول حتى لو كان مر ارجعي وخليك ذكيه ارجعي

 

[عبير عبوره]

حبيبتي

انا بنصحك ابوك يجيب زوجك

و يقول تراها ممن الحمل متضايقه

و هرمونات الحمل فعلا يمكن لاعبه فيكي

و يصير ترجعون

لكن لو حبيتي تبقين في بيت ابوك

و هو يجيكي يطلعك و يمشيكي و يوديكي مراجعات المستشفى


لو ما حبيتي تبقين في بيت ابوكي

خلي ابوكي يتكلم معاه و يقوله ترا الوحده تتعب مع الحمل

لازم تراعيها

مو مجبوره تقابل الناس

هي تعبانه بروحها



و فعلا فعلا

فكري في ولدك مو نفسك

بيفقد ابوه

و الأب شي غالي ما يتعوض

 

[توفينا2]

حبيبتي اقصد بالاغراب من جماعة اهلك واهله اللي ماتجتمعي فيهم الا ف المناسبات (خانني التعبير باللفظ)
وبما انك في محيط عملك ماعندك مشكله ف الاختلاط بصديقاتك لانهم مايعرفوا شيئ عن حياتك الخاصه فأنتي لست مريضه ..ولكن تنقصك الثقه ف مواجهة اقاربك وجماعتك..
.....
قصر القامه ليس مشكله اعرف بنات جامعيات قصيرات ومقاس احذيتهم اكرمكم الله 24..وايضا يوجد جدات قصيرات ولم يعيقهم من الاجتماع بالناس..هذه مشكله انتي من وضعها ف عقلك ويمكنك التخلص منها
........
لدي سؤال
كيف تتعاملي مع الاطفال عندما يوجهوا لك كلام غير لائق؟؟

 

[توفينا2]

واحب اطمنك بعد الولاده حيزيد وزنك ويتغير جسمك .لاتشيلي هم الوزن .

 

[حلمي انقتل]

ان كان من اخواني فأنا أعصب منهم .. مالي ردة فعل ثابتة ،،
ان كان كلام ارد عليه ، خاصة ﻻصارت نفسيتي تعبانة .. بس اصد وابكي ، مو من كلامه ابكي من نفسي التعبانة وضعفي ،،

وان مد ايده اضربه ،،

بعض الاحيان اسفهه واقول انا مارد على البزران ،
احيانا ﻻصارت مقفلة معي اقول احترم نفسك وانتبه لالفاظك وربي تندم ،
عندي اخ عنيد الحين باولى متوسط كان يقولي على ز.... فانا سكت وقلت احترم نفسك وبلاقلة ادب ، بس هو يرادني اقول اسكتي بس على ز... وكان ابوي وامي قاعدين وساكتين ،
انا قلت لهم شوفو ولدكم خل يسكت ، قالو اسكتي عنه بس هو مستفز ، فايش صار حمقت لما طولها وقمت وضربته مع اني حامل وهو ماعنده مانع يرد علي بالضرب بس هالمرة ماضربني يمكن لاني حامل ،
عاد اسمع اهلي يقولون قومو شوفوها ﻻتضر نفسها ،،
انا قعدت اهاوشه واقول ماحب قلة الادب وقلة الاحترام انا اكبر منك ووو ..
ورحت صديت وجلست ابكي من نفسي بعد وضايق صدري قلت يمكن عورته لاني حساسة مابغى اعوره ،
ورجعت لاهلي وقالو منهبلة تضري نفسك ، قلت انا اناظركم اقول ادبو ولدكم ماسكتوه وﻻ تصرفتو ،
يوم طلعت قامو يهاوشونه بس وش عقبه ،

اما اطفال الاقارب بالبداية اسكت عشان امه ، بس انا ما انبهها واقول شوفي ولدك او بنتك واكتشفت ان هذا غلط ،
لما يتلفظ ما ارد بس اناظره ولما يكلمني او يطلب حاجة مني بعدين اسفهه بعدين اذكره بغلطه وماراح اخدمه لهالسبب فيحمل علي بقلبه زيادة ،
واذا خربها مرة وحاول يمد يده ابرمها له واخليه يبكي او اقبصه المهم ماعاد يفكر يسويها مرة ثانية وقلبي من جوا يألممني ويأنبني اني اضربهم ،

انا وحدة اسكت اسكت وان ضربت فضربتي فيها دم فلذلك اخاف اني اتهور زيادة واجرم في اللي يغلط علي فافضل الصمت او الرد او الهواش بس ، واخاف من امهاتهم ﻻ يزعلوا مني لو ضربت اوﻻدهم او هاوشتهم ،

ولذلك الخوف من الناس صرت اعلمه اخواني الصغار واخواتي واقول اللي يضربك اضربه واللي يتكلم عليك وقفه عند حده ﻻتسكت وتضعف ،،
انا الان افكر اقول يمكن لاني علمت اخواني هالشيء لاني ماحب اشوفهم ضعفاء فصارو يطبقون اللي علمتهم اياه ،
انا حساسة جدا مع اخواني واخواتي مابي احد يضربهم او يشتمهم او يتهزأ بهم او ينتقصهم في ذاتهم ،،احيانا ادافع عنهم من القهر ،،

اسفة ع الاطالة ..
اتذكر لما كنت طفلة كنت اشوف بنت اصغر مني والله بكم سنة توقف لي عند الدرج ولما اوقف تعطيني كف ،
وكبرنا بس تونا بابتدائي شافني عند خياط جنب بيتهم فكنت جالسة انتظر ابوي فجأة جت وضربتني كف ماتغير طبعها
صرت الحين اتمنى اشوفها لو تغلط بس اجرم فيها وافرغ اللي جواتي ،
وانا اسكت ما اقول لامي او ابوي وهذا اللي هشمني من صغري ،، اني كتومة وما احكي ..

 

[حزن ابدي]

لقبي سعادتي في ايماني كلام اخواتي الغاليات كلللللللله صح وحقيقة وفو وكفو بالنصائح والله احنة بهذا الزمن ما نريد غير الزوج الي يحبنة ويحترمنة وما تهم ترى الشكليات هذه السفر وغيره اتبعي نصائحهم بالحرف الواحد وان شاء الله تفرج لك ويصلح حالك مع زوجك والله يسعدك

 

[عبير عبوره]

انتي شخصيه جدا حلوه و رائعه

 

[توفينا2]

حدث معي خطأ مطبعي ف قياس الاحذيه ف ردي فوق اقصد 34...وكانت جارتي تضحك لما تشوف البنات الصغار يلبسوا حذائها ويجي مقاسهم .يعني تاخذ الموضوع بايجابيه ..
......
بالنسبه لردك ع الاطفال المفروض اخوك ماتردي عليه عشان مايتمادى كلمه منك وكلمه منه وتصل الى مد الايادي..امك وابوك ساكتين يقولوا انتي الكبيره المفروض ماتردي عليه وتنهي الخلاف ..
.....
عشان مايتمادوا عليك الاطفال تجاهلي كلامهم الغير لائق كأنك ماسمعتيه ..عندما تردي ع طفل طول لسانه عليك يراك الحاضرين بعقل طفله .وينقص قدرك واحترامك عندهم.
...
ارجو ان تبطلي الحساسيه،الزائده .ولوم نفسك وقهرها ع اشياء بسيطه لاتستحق القهر..خذي الامور ببساطه بدون تعقيدات..