الفزعــــــه قبل لايجيني انهياااااااار عصبي

[كومة مشاعر]

السلام عليكم ورحمة الله وبركاته

مساؤكم ملئ بالطاعات يابنات انا صارت لي مشكله تو مع زوجي وقسم بربي مقهوره وفيني صيااااااااااااااااااح تكفوووون اللي ابي راي الحكيمات منكم لان المثل يقول ( وشاور حكيما ولاتعصه ) واللي تقولونه لي بنفذه لاني ماعندي احد للاسف اشاوره,,,
انا متزوجه من سنتين واحد يحبني واحبه ماقول يحبني لايعشقني
_ماشاء الله _ والحمدلله عوضني عن كل شي عشته في طفولتي
لاني قاسيت طفوله عساها ماتمر على اطفالكم جربت فيها كل انواع الايذاء النفسي والبدني بس الحمدلله الله عوضني بزوجي فصار لي الاب والاخ والام الحنون والصديق
لكن لللاسف هوعنده نقطة ضعف وهي المال يعني مايحب الحرمه تصير بيدها فلوس لانه يحس انها بكذا تستغني عن زوجها:15:
زوجي شمالي غربي وهو كريم ومايقصر في شي لافالبس ولافالكماليات لكن عيبه هالمبدأ .. يحس ان المره اللي عندها فلوس او اللي تمسك ادراة المال وتتصرف فيه لازم تتمنن على زوجها ... ربما لان امه مدرسه وكانت ولازالت لها القياده الماليه في التصرف فكره هالشي وحكم على كل الحريم!!

اليوم المسا جاني فرحان وقالي انه الموقع حق البطاله فتح وانهم بيعطون الجامعيات العاطلات راتب اظن 3000 وقالي حطي رقم حسابي وانا رفضت وقلتله لا ابحط رقم حسابي انا قال حطي رقم حسابي ووعد احوله على حسابك وطبعا رفضت وعصب علي وقالي انا اتعب عشان اجيب لك نت وتلفون وعشان تلبسين ماركات وماتصيرين اقل من غيرك وهو على العموم احسه مخلص معي رغم ان راتبه5000بس
انا قلتله اقنعني قالي انتي ماحد يكلمك بالفلوس وانتي تحبين الفلوس اكثر مني وانصدم طبعا برضي يوم قلتله الا بحسابي قالي والله طحتي من عيني اجل على كذا موب لازم اتعب عشان اوفرلك الكماليات اذا انتي ماتثقين بي قلتله مااقنعتني ليش تبيها بحسابك قالي انا ماابيها بس عشان لاشاف البنك الفلوس اللي بحسابي كثيره يعطوني قرض كبير بس مدام هذا ردك انا طالع انام برا للاسف ماتوقعت زوجتي وحبيبتي كذا !!!!!!!!!!!!! انا سكت ودخلت البيت والحين فيني صيحه انا امووت فيه واحسه مايستاهل لانه ماشاء الله ونعم الزوج بس اخاف ياكل حقي اوافق واكتب حسابه ولااسفهه واصر على رايي تكفوووووووووووووووووووووووون !!!!!!

 

[رنين الحياه]

انا اشوف انك لازم ماتتنازلي عن حقك لان زوجك على ماتعوديه حيزعل شويه وبعدين يرضى

 

[ليالي حزينة]

حبيبتى اذا كان ما يقصر معاك خلي الفلوس بحسابة انا مثلك تقريبا وناوية ادخل حساب زوجي هذا اقل شئ نقدمه لهم لا تكون الفلوس سبب في بعدكم عن بعض ترى هاذي وسخ دنيا عديها ومدامه مصر خليها بحسابه واذا نزلت باذن الله خذيها بالتوفيق

 

[قطـــــريه]

معليه مافيها شي انج تعطين ريلج لكن مو باسلوب لوي الذراع والزعل وانه ينام برا البيت وصحيح هو مب مقصر عليج بس هاي واجبه ويشكر عليه ورايي خليها بحسابج وقوليله حبيبي انتي تزيدني مو تاخذ مني انا بكبري لك ماجات على مبلغ تافه ابخل فيه عليك بس تمنيت انك تنطر انا اقولك ما تطلبهامني انت .. وقولي له انا بخليها في حسابي وبسوي لك تحويل شهري بالمبلغ لو انت تبي هالمبلغ ومهم عندك وزعلان عليه لاني شاريتك انت وماتهمني هالفلوس ..او لو تبين رايي لا تقدمين الحين على المبلغ ومب لازم تاخذينه وقولي له الفلوس خلتك تزعل مني وتنام برا البيت وانا مابيها وما راح اقدم عليها وخلج جاده .. بس لا تفتحين معاه الموضوع انتظري لمن هو يفتح الموضوع

 

[*حتاره*]

عادي انتي مو غلطانه

هاذا حقك وفلوسك ماله شغل فيهم

بيزعل وبعدين بيرضى

 

[توتونجد]

زوجك بكل هالصفا ت

وتخافي ياكل حقك

صراحه شي غريب منك

واذا اخذ من فلوسك عادي فدوته انسان عوضك عن كل شي شفتيه بحياتك مستكثره عليه فلوس بس تتحول بحسابه

ما اضن فيها شي ابد ​

 

[قصيميه بامريكا]

مدري

احس الموقف صعب لان زوجك طيب وشاريك

لو كان استغلالي بقولك وقفيه عندحده بس هو حبيب معك ومايقصر

فما يستاهل

وبنفس الوقت ليه هو يبغاها بحسابه شي يحير

انتي قولي له خلاص سوي اللي تبي بس كان نفسي يكون عندي بطاقتي

اذا بغبت اهديك او اسوي لك مفاجاه اسوي بدون ما اطلب منك

على الاقل انت حول بحسابس مبلغ افرح فيه كل شهر

ما تسوى علي الفرحه

لانك مومقصر بس كل انسان يحب يكون له مصدر فلوس يرجع لها

 

[أحساس امرأه]

اصري على موقفك وطنشية لاتتصلين وتلحقينة
اول ماينزل اشري له هديه يهجد شوي عنك ..
خليك على راييك وناقشية بلغه الانكسار والحزن لابالعناد والصراخ حتى لوهدد بالطلاق خليك ثابتة لاتتهتزين ترى بس كلام..

 

[غيرهم كلهم]

أول شئ انتي عارفة وجهة نظره بالموضوع من ناحية تملك المرأة المال

يعني هو بده المال مش طمع فيهم لا بس بسبب تفكيره


ثاني شئ هو يحبك ومو مقصر معاكي بشئ

فليش عملتي كل هالمشكلة كان حولتي الفلوس بحسابه وبشطارتك

سحبتيهم منه شوي شوي يعني خليه يصرفهم عليكي من غير ما يحس

وبعدين تقدرين تحطينهم بحسابه ولو شوفتيه اكلهم عليكي

بكل بساطة تروحي وتطلبي منهم يغيروا رقم الحساب وتحطي رقم حسابك

والله يوفقك انتي وجوزك وبراي تروحي تراضيه وقوليلوا مو قصدي وهي وسخ

الدنيا المصاري ومثل ما بدك يصير ​

 

[كومة مشاعر]

والله محتاره رددودكم حيرتنــــــــــــــي أصر او مااصــــــــــــــر لاحول ولاقوة الا بالله

 

[وهم79]

يالغاليه الشمالي الغربي لا تتعاملي معه غير بالحيله
يعني تعالي له بالكلام اللين والحيله
قولي له مثلا
انا ابي تنزل بحسابي عشان انت المستفيد
اولا ترتاح من مسروفاتنا وزحمتنا
واقدر اشتري اغراض للبيت بدون ما ازعجك
وغير كذا اقدر اجمع

 

[مكسرات بالعسل]

هذا والاعانات مانزلت بدت المشاكل الله يستر
هل اكيد المتزوجات لهم شي

 

[نســـرين]

ياحبيبتي اذا زوجك مامر عليه يوم وخذلك
او قصر معك في شي ،،خلاص خلي الفلوس بحسابه ،،،
حرام مهما كان زوجك ،،
وخلي هذي تجربه وامتحان له،، بس لا تكبرون الموضوع علشان فلوس ترى الفلوس تروح وتجي​

 

[كومة مشاعر]

لا بس 3000 مو شويه يعني هو كريم ومايقصر بس فيه اشيا يحس مالها داعي وغيرها اولى مثلا مااقدر اسحب ال3000 كلها منه بالشهر بطريقه ثانيه واذا خليتها راح يصرفها على البيت وانا مارح استفيد شي بنات انا احس المال هو الامان بالنسبه لي بعد الله وودي اجمعها لي واذا خليتها بحسابه 100% رح يصرفها على فواتير واشيا هو المفروض يسويها فكرت بالذهب يعني اشتري بالشهر بس هو يرفض يشتريلي بالعاده واذا بغيت يقولي عندك ذهبك كم مره اقوله ابي حلق دائري يقولي بيعي من ذهبك اذا انه قديم واشتري مشكوره لتفاعلكم ابي اراء سديده يعتمد عليها وفي وحده زوجها كذا

 

[كومة مشاعر]

حبيبتي جيته بالحيله وبالدلع واسوي نفسي باصيح قالي لا بحسابك لا انا وايك شريكين بكلش حتى بالفلوس بعدين انا محتاجها عشان ابقترض من البنك ولازم يشوفون ان المبلغ كبير عشان يعطوني فلوس اكثر وان بصراحه اخاف يسحب علي اذا حولتها بحسابه واندم قد شعر راسي لانه احيانا يتسلف من الناس ويماطلهم يسحب عليهم كم سنه ويطفشهم بس انا لا

 

[اميره بكبريائي]

خليكي مصره بدون رفع صوت جازمه وماراح تتراجعين واذا استلمتها اهديله هديه حلوه وبسعر غالي لانه ماقصر عليك


ملحوظه 00000
كيف قدمتي وهل معك شهاده وش اشروطهم
هل تنطبق على المتزوجه ومعها ثنوي بس

 

[ياغيابه]

حسيت زوجكـ مكار وفعلا استنتجت هالشي من اخر سطوركـ


قلتله مااقنعتني ليش تبيها بحسابك قالي انا ماابيها بس عشان لاشاف البنك الفلوس اللي بحسابي كثيره يعطوني قرض كبير



يعني فكر بنفسه هو بعد .. !!
وليه القرض اذا ماناقصكـ شي ..؟؟



الشي الثاني

تهاوشتو وانتم ما تدرون يجيكم شي او لا ؟؟
​

 

[الحيرااانه]

الصراحه شي غريب
العاده الشمالي الغربي عنده عزة نفس وكرامه مايرضى ينزل نفسه لراتب زوجته
لدرجة زوج اختي شمالي غربي تصدقون بنات مرات تصرف على اولادها من مالها يزعل يقول مالك شغل فيهم انا اتولى امرهم..

 

[انتظار السعد]

الله يصلح الحال انا من رايي تقولين له انا ما عندي منانع اعطيك معونه 500 والباقي لي لاني احيانا اشتهي اشتري اشيى واستحي اكلف عليك

بالله ياختي ارسلي اسم الموقع ضروري تكسيب اجر فينا انا زوجي عااااااااطل وانا كمان والظروف الله عالم فيها

 

[كومة مشاعر]

الغاليه اللي تسال عن التقديم انا لسا ماقدمت بس الموقع فتح اليوم وهو جا وبشرني وبالجريده 3000 للجامعيات و1500 للثنوي واكيد انشالله تشمل المتزوجات