السلام عليكم و رحمة الله و بركاته
اخواتي انا اول مرا اشارك في تجمعات هذا النتدى الراقي
انا جنوبية غربية زوجة شمالي غربي:5:
لي 11 سنة متزوجة و تزوجت في سن صغيرة و انخطبت في سن ال 14 سنة و زوجي حبيبي و عشيقي و كل شي احس اني تربيت على يده
كل شي فيه حلو ما عدا :4:امور تقتل ثقتي و تجرحني و تزعلني منه
اول شي مضايقني البصبصة مع اني و الله العظيم جميلةو الحمدلله و مو ناقصني شي و كثيرين يقولوا لي يا بخت زوجك فيك
و لكن نظراته تذبحني و طبعا قلت له و بينت له ان هذا الشي يضايقني و يجرحني و يطيحه من عيني و المشكلة حتى و انا جنبه ما يقدر يمسك نفسه و مرة حصل لنا موقف كنا في السوق و بصبص لوحدة ...و استغفر الله مرا وحشة صارت تلاحقه و لما شافتني معاه صارت تنظر لي من فوق لتحت و هو انتبه و بعدين اعتذر لي و قال لي و الله النظرة مو بطالة بس فيه فضول :30:
قلت له اوكي لو انا كمان بصبصت بفضول ما تزعل صح و هو عارف اني و الحمدلله دايم اهتمامي اولادي و زوجي و عمري ما اتلقف و اطالع في احد
و المشكلة الثانية ما عنده مشكلة يهزئني قدام اي احد حتى لو قدام اهلي و اهله اولادي الشغالة مع اني احترمه جدا و اقدره و دايم مخلية له قيمته و رزته قدام الصغير قبل الكبير
المشكلة الثالثة ما يحب يمدحني ابداااا بس صار موقف استغربته منه قبل فترةكنا جالسين و كنت توني ماخذة شاور و كنت اكلمه و هو مو راضي يطالع فيه قمت سألته ايش فيك ما تطالع فيه و انت تكلمني قال لي مستكثرك على نفسي انتي مرا حلوة حتى و انتي دوبك مستحمية فإيش هذا التناقض مو عارفة ؟؟؟
ياريت تعطوني حلول و خاصة للمشكلة الأولى
ما عدا كذا هو طيب و يلبي لي طلباتي في حدود مقدرته جالس كثير في البيت ما عنده سهرات و خرجات
مشكورات مقدما
