قمت الفجر الساعه 4ونص صليت الفجر وجهزت فطور
زوجي طبعا انا مب كل يوم اسوي فطوره لانه يفطر في
الدوام
صحيته قام صلى وفطر واهو طالع لازم البوسه عودته
عليها حتى لو انا نايمه ماقمت يعطيني اياها ولا ارسله له
مسج ياشين الصبح بدون بوسه الحبايب
طلع وانا طار نومي قعدت عالنت اقرى موضوع عطر انثى
وعالساعه 7ونص رقدت
قمت الساعه 9 ونص سويت لي كوب حليب تغيير وفطرت
بنتي وبدلت لها وحطيت زيت لشعر بناتي
ومن الفضاوه حطيت روب بويهي خصوصا اني لقيته في
الثلاجه منتهي وهذا احلى شي للبشره تميت فيه الين
جف
وكان ياذن الظهر غسلته وغسلت جسمي لبست بجامه
نعومه احمر ورمادي
وصليت وقريت وردي وقعدت عالنت الين جيه زوجي
طبعا جازوجي على وقته واستقبلته بحضن وبوسه وطبعا
مزاجي اليوم تمام الحمدالله
وعالغدا قال لي انه لقى روايه في النت عجبته حيل
سياسيه وتفضح الليبراليه الي انتشرت الفتره الاخيره في
السعوديه وقال لازم تقرينها
قلت له اكيد تعرفني احب الروايات وعاد دام انها فيها
فكره سياسيه بستفيد اكيد منها على اني اكره السياسه
بس احاول ادخل عالمه
وطبعا انا شايله هم انه صار عنده نت في دوامه
لان يضعف حيل لكن مابينت له واحاول اكتم في
نفسي خصوصا وقت مناوباته وطول اليل بروحه
وجا وقت النوم وانا منسدحه في حضنه قال واحد
من الربع توفى شاب صغير ماكان فيه ولا شي
قلت له كنه زادت الوفيات وخصوصا الفجاه شوي
طالعته وبابتسامه قلت له تعرف وصيتي صح
ضحك عباله امزح قلت له من جد مثل ماوصيتك
بناتي ماتربيهم الا امك مايعيشون عند ابوك
واخواتك محد بيحن عليهم عقبي كثر امك قال ان
شاء الله واهو يبتسم وقلت له دوم ادعي لي
وتصدق عني
قال ان شاء الله وقلت له ذكر بناتي فيني وخلهم
يدعون لي قال ولايهمج وعساه بعد عمر طويل
ويمكن يومي قبل يومج قلت له اسم الله عليك
وانت شنو وصيتك قال اهم شي ديوني قلت له
في رقبتي لين اسددها وحضني حييييل وقلت له دور المساج
سويت له مساج لرجوله وهالشي قبل كل يوم
اسويه له بعد مايرد من الدوام لكن بعد خيانته
حرمته من دلع كل يوم ومن الليالي الرومنسيه لكن
هالفتره من ضمن التغييرات قلت برجع نفس قبل
ان شاء الله
خصلت من رجوله وانسدحت جنبه العب بشعره
لين نام ونمت انا شوي
قمت صليت العصر وجهزت بناتي لان بطلع بيت
اخوي وكلينا كيك وسويت لزوجي حبيب قلبه
الفيمتو
تمينا برى للساعه 10 ونص وجانا زوجي ومن
شوي دشينا البيت انا متعشيه وعشيت زوجي
ورقدت البنات حدهم تعبانين تاخرو عن النوم
والحين انا والجنوبي مالي بنام