معلقة في بيت اهلي.. وهذه قصة معناتي.. ارجوكم انصحوني وادعوا لي..

[فتاة الأمل]

السلام عليكم ورحمة الله وبركاتة​

كيف حالكم.. اتمنى انكم تكونوا بخير..
اشكركم على مروركم

وحبيت اقولكم عن مااستجد في معاناتي..

اتصل اخوي على زوجي علشان يعرف وش سالفته ليش مااتصل ولا سأل عني ولا عن ابنه.. فرد زوجي علي اخوي باسلوب هجومي وقال له انت اختك ((يقصد انا)) كذابة وهي ارتكبت خطأ كبير في حقي.. قال له اخوي وش هالخطأ؟؟ قال زوجي اسألها وخلها هي تقول لك وش سوت!!! ((يعني زوجي اتهمني اتهام كبير في حقي وكان غامض في كلامه ومتهجم مع اخوي))
قال له اخوي طيب خلاص اذا هي غلطانة عطها ورقة طلاقها.. قال لا ماراح اطلق!!
قال له اخوي طيب ليش ماتجي تشوف ولدك ولاتصرف عليه.. قال زوجي اخاف اذا جيت تردوني وماتفتحون لي الباب!!!! وانت السبب ((يقصد اخوي)) اللي مايخلي زوجتي ترد علي ((وهو اصلا ماتصل غير مره وحدة فقط مثل ماذكرت بموضوعي..وانا مستغربة منه كيف يقول هالكلام عني وعن اهلي))!!!
طيب ليش هو مايشوف نفسه وش سوى فيني.. مايكفي انه اللحين طاردني من بيتي ومعلقني عند اهلي من خمس شهور..

والله اني تعبت نفسيا عقب هالسالفة..
انصحوني يا اخواتي..
ربي يجزاكم الجنة ويسعدكم دنيا واخرة..​

​

​

 

[Miss cute]

السلام عليكم ورحمة الله وبركاته​

انا عضوة جديدة في هذا المنتدى الرائع الذي سمعت عنه كثيرا وقرأت عنه كثيرا​

واتمنى ان تقبلوني اخت لكم​

فانا اخترت هذا المنتدى ليكون ملاذي بعد الله​

انا الان امر بفتره عسيرة وصعبة جدا من حياتي​

ماتخيلت امر فيها في يوم من الايام​

ولا اعرف من اين أبدأ قصة معاناتي مع زوجي​

تزوجت منذ سنتين ونصف من رجل من عائلة معروفة ويحافظ على الصلاة ويحبني وانا احبه.. ومايقصر معي ماديا ويلبي كل طلباتي.. ولا يحب الطلعات والسهرات حتى التدخين ما يدخن..​

ورزقني الله بولد عمره سنه ونصف​

ولكن مع الاسف زوجي ((اشــــك)) انه يعاني من ((مشاكل وعقد نفسية صعبة جدا))​

وانا اعيش معه حياه كلها تناقض.. يوم حب ودلال.. ويوم اهانة واذلال​

وهو نفسه اعترف بهالشي انه انسان متناقض بتعامله معي كزوجة​

وانا الضحية.. فهذة المشاكل دمرت حياتي معه​

ودمرت صحتي ونفسيتي​

المشكلة الاولى:​

في البداية لما خطبني زوجي قال له ابوي عن شروطي ((سكن خاص.. الوظيفة.. اكمال الدراسة))​

ووافق عليها.. بس في يوم الملكة طلب ابوي من الشيخ انه يكتب الشروط في عقد النكاح.. وفعلا كتبها وتم التوقيع عليها.. بس بعد الزواج قام زوجي يهزئني بكتابه الشروط ويسب ابوي.. ويقول انه زعلان ((ليش تكتبون الشروط مادام ابوك من البدايه واثق مني وموافق يسلمني بنته ليش يطلب كتابة الشروط)) بزعم ان ابوي جرح رجولته..​

وانا اقول له هذا شرع الله ومافيها شي البنت تضمن حقوقها وتكتب الشروط​

وتخيلوا يا بنات استمرت عقدة كتابه الشروط طول فترة زواجنا ختى بعد ما جبت له ولد.. كل ما بين فترة والثانية يهزئني ويلعني ويلعن ابوي ويسبه ويشتمه ويجرحني تجريح عظيم بالكلام​

تخيلوا يا بنات يوم الملكة اللي تحلم فيه اي بنت بكل عفوية ورمانسية.. تحول الى كابوس مؤلم يعايرني فيه طول عمري​

ووصل لدرجه انه مايعبر ابوي ولا اهلي ولايسأل عنهم ولايمر يسلم عليهم حتى بالعيد!!!!​

وانا الحمدلله واصله مع اهله ومعتبرتهم مثل اهلي​

دايما ازورهم واقوم بالواجب معهم​

واستقبلهم احسن استقبال في بيتي​

ودايما اهله واصدقائه يمدحوني ويشكروني عنده..

زوجك من النوع اللي ما ينسى و لا يقدر المعروف ​

المشكلة الثانية:​

بالاضافة الى انتقاده وتجريحه لي بالكلام.. زوجي عصبي جدا جدا.. واكثر من مره يمد يده علي ويحط حرته فيني لاتفهه الاسباب.. اكثر من مره يضربني ويشق ملابسي.. وانا مااحس بالالم قد ما احس بالقهر والاهانه الكبيرة بحقي!!!!!!​

وربي يشهد علي يا بنات ان انا انسانه هادئة ومسالمة ومحترمة من الجميع.. واحب زوجي وقايمة بشؤون بيتي وزوجي وولدي خير قيام.. وقسم بالله ما استاهل هالمعاملة!!!!!!​

وانا من منطلق حبي له ومحاولتي لحماية بيتي صبرت كثييييير وسامحته كثييييييير​

وكنت دايم اصبر نفسي واقول انه فيه ايام حلوة عشناها مع بعض وهذا زوجي وابو ولدي ولازم اصبر عليه ويمكن ربي يصلحه مع الوقت​

وما حبيت اتنكر للحظات الجميلة حتى لو كانت قليلة​

ودعيت ربي يهديه... ولكن طفح الكيييييييل!!!!!!!!!


زوجك عنده مشاكل نفسيه !! مد يده عليك كم مره و يفش خلقه فيك !! أبدا مو طبيعي ​

المشكلة الثالثة ((الادهى والامر))!!!!!!!​

زوجي اكثر من مردة يهددني بالطلاق والطرد من البيت..​

بزعم انه يبي يأدبني.. وانا الحمدلله مؤدبة ومتربية احسن تربية بشهادة الجميع​

وماله داعي يستخدم معي هالاساليب علشان يحقق اللي يبيه من توافه الامور​

واغلب التهديدات تكون بسبب انه يلعن ابوي او يشتمه او يسبه (( بدون مبرر وبدون مناسبة)) قدامي وانا ما اتحمل​

فاذا زعلت ورديت عليه وقلت له انا ما اسمح لك​

يقوم يهددني بالطرد من البيت​

ونفذ تهديده اكثر من مرده وطردني من البيت ورماني على اهلي​

وانا كنت اذا رحت لاهلي امثل عليهم اني جايه زياره.. ومن بكره اركب مع اخوي بسيارته وارجع لبيتي..​

وانا دائما من من حبي لزوجي ومن منطلق تربية اهلي والمجتمع من حولي ((ان البنت السنعه هي اللي تحب زوجها وتدللـه وتصبر عليه وماتطلع اسرارها برا بيتها))​

كنت قدام اهلي ابين لهم حبي لزوجي وحب زوجي لي.. وامدحه عندهم واذكر محاسنه واطمنهم اني مرتاحة ومبسوطة معه.. علشان يتطمنون علي ويحبون زوجي ويحترمونه.. مثل ما انا احبه​

والباقي (مساوئه) كنت اخبيها عنهم واكتمها بقلبي.. عسى ربي يهديه ويصلح حاله..​

وقبل ست شهور نفذ تهديده وطلقني طلقه واحدة.. بسبب عصبيته نطق بالكلمة ((انتي طالق))!!!​

وبسبب اني انا كنت زعلانه وكان يسب ويشتم بي وباهلي ومد يده علي.. وبعد صبر طويل ماحسيت بنفسي الا وانا طايحة ومنهاره نفسيا واصيح واصارخ وادعي عليه لاول مره.. فماتحمل وطلقني!!!!!​

وجلست شهر مصدومة ومكسور خاطري في بيت اهلي.. وماصدقت ان هالانسان اللي يحبني يرمني برصاصة قتلتني ((انتي طالق))​

واهلي انصدموا!!! فكيف بعد هالصورة الجميلة اللي انا رسمتها لهم عن بيتي وحياتي مع زوجي ارجع لهم فجأة مطلقة ويكتشفون المشااااااااكل كلها دفعة واحدة!!!!!!!​

اهلي لاموني وزعلوا علي ليش اصبر واسكت.. ولا افضفض لهم ولا استشيرهم...​

وكان اخوه الكبير ((بمنزلة ابوه لان ابوه متوفي من زمان الله يرحمه)) يتردد علي بيت اهلي ويحاول يصلح الامور مع ابوي.. اما صاحب الشأن اللي هو زوجي وابو ولدي مااتصل ولا جاء ولامره!!!!!!! لانه يكره ابوي ولا يبي يقابله!!! تخيلوا لدرجة انه مايتنازل يجي ياخذني وقال لاخوه انت رجعها معك!!!!!!!!! وطبعا انا وابوي رفضنا رفض تام​

وقال ابوي اذا يبي يرجع بنتي يرجعها حسب الاصول​

يجي للبيت ويدخل ويتفاهم معي​

انا ابوها من حقي اتطمن عليها واحميها​

وفعلا جاء بس مغصوب مع اخوه الكبير ودخلوا عند ابوي وجلس ابوي يتفاهم معهم​

وسأل زوجي ((انت وش جايك مني علشان تهزيء بنتي وتهزيء اهلها؟؟؟!!! هذا انا وياك جالسين مع بعض تكلم قل اللي بقلبك وفش خلقك))​

يعني ابوي ماقصر مع زوجي جلس معه وحاول يفهم منه سبب معاداته له​

وزوجي مالقى رد مقنع غير ((ليش تكتبون هالشروط يوم الملكة وتجرحون رجولتي؟؟))​

قال ابوي ((هذا شرع الله ومالك حق تزعل.. طيب ليش مااعترضت بنفس اليوم وطلعت.. بدل ماتاخذ بنتي وتعذبها!!!!!!!!))​

قال ((لو ما احبها وابيها ماتزوجتها))​

وقبل ما يجي هو واخوه كلمني على جوالي قبلها بكل يوم بناء على طلب من اخوه.. وقلت له انا موافقه ارجع لك بس بشرط.. ما نرجع لنفس حياتنا الاولى.. نرجع علشان نبدأ صفحة جديدة وحياه جديده افضل من اللي قبلها​

واتفقت معه على ثلاث امور:​

1. يحترمني ويحترم ابوي وهلي ومانتكلم بالماضي.​

2. عدم التجريح بالكلام او مد اليد.​

3. يحسسني بالامان ومايهددني بالطلاق او بالطرد من بيتي.​

ورجعنا لبعض.. انا رجعت له فرحانه وعروس جديدة متزينه له وناويه ابدا حياه جديدة.. وهو من اول يوم نقض كل الامور الثلاثة وعاقبني وهزأني وسب ابوي وشتمه ليش يدخل غصب لبيت اهلي!!!!!!!!!​

قتلني مرة ثانيه ((برصاصة الكذب))​

ومرة ثانية انهار نفسيا وطحت مغشي علي من الصدمة.. وبعدين صحاني وهدأني وقال انه يحبني ومشتاق لي ((بس انتي السبب اجبرتيني ادخل بيت اهلك وتحملي النتائج!!!!)) ​

جلست ابكي وقلت له ما ابيك هذي اولها ينعاف تاليها رجعني لبيت واهلي.. بس هدأني.. ويوم هديت قلت باصبر وهذي اخر فرصة لك..​

وعشت معه وحاولت اكون احسن منه.. رجعت اقوم بشؤون بيتي وزوجي وولدي خير قيام وبصورة طبيعية.. حتى اهله رجعت ازورهم كالعادة ولا كأن فيه شي صار..​

بس قلبي كان ينزف دم وكنت اتصبر وادعي ربي يصلح زوجي واعيش حياه مستقرة امنه سعيدة حالي حال صديقاتي وبنات عمي..​

كنت دايما اجلس معه واتكلم معه عن حياتنا واحاول اصلحها.. وكنت شرهانه عليه ليش بعد مارجعني مالتزم بالاتفاقات اللي بيننا.. ليش ما جبر خاطري المكسور ونفسيتي التعبانه بكلمة طيبة او ليش مايراضيني ويفرحني بهديه بسيطة تسعدني.. ليش يبخل علي ومايطلعني اتمشى واغير جو!!!!​

وكان دايما يتهرب مني.. مرة يقول ((انا ماابغى افرحك لان بنفسي شي عليك!!!!!)) يعني شايل علي ومستكثر علي يفرحني.. مرة يقول ((عندي ديون))!!! ليش جبر الخاطر والمعاملة الطيبة تحتاج فلوس!!!!! انا ماطلبت شي منه.. بالعكس المفروض هو يجبر خاطري ويحسسني بالراحة والامان بدون ما اطلب منه..​

بس مع الاسف بعد شهر ونص من رجعتنا لبعض طردني من البيت ورماني على بيت اهلي انا وولده بزعمه اني انا احتاج الى تأديب!!!! وقال ((باوديك لأهلك واذا عقلتي تعالي))!!!​

وبعدها بعشر ايام كتبت له رسالة بالجوال وطلبت فيها ورقة الطلاق والخلاص منه مع شرح الاسباب​

وابسط هذي الاسباب اني صبرت عليه وحاولت اتفاهم معه بس مافيه فايدة​

حاولت اعيش حياة امنه مستقرة وسعيدة بس ما فيه فايدة​

واهم الاسباب ان بنات الناس ((مو لعبة)) كل شوي تطردني وتبيني ارجع لك​

واذا سامحتك مرات ومرات فخلاص طفح الكيل!!!!​

ومارد علي ولاجاب خبري ولا جاب ورقة طلاقي.. حتى ولده مامر يشوفه او ارسل له مصروف ولا سأل عنه..​

وبعدها بشهر اتصل على جوالي ((مره واحده فقط)) ومارديت عليه.. وراح وقال لاهله ان ابوها مانعها تكلمني!!!! اتهم ابوي!!! وقال ان ابوها مسكر جميع الابواب بوجهي!!!​

فراح اخوه الكبير واتصل على ابوي واخوي وجاء لبيت اهلي وقال لهم ليش انتم واقفين بطريق اخوي وزوجته!!!!​

قال ابوي اخوك كذاب بس اتصل عليها مره وحده وماردت عليه وبعدها ما اتصل على اي احد فينا... حتى اصلا ماجاء وطق الباب علشان نرده..​

والان انا صار لي اربع شهور معلقة في بيت اهلي انتظر مباردة صلح من زوجي دون جدوى!!! انتظر ورقة الطلاق دون جدوى!!!​

وولدي المسكين ابوه ماسأل عنه..​

حتى أم زوجي اللي كانت تقول لي ((انا احبك مثل بنتي)) مااتصلت تسأل عني ولا عن ولدي اللي هو حفيدها من لحمها ودمها.. وخوات زوجي نفس الشي ماسألوا عني واللي كانوا يقولون ((انتي اختنا وحبيبتنا))​

حتى لو كان قصدهم مايبون يتدخلون بمشكلتني مع زوجي.. بس على الاقل يسألون عني وعن ولد اخوهم بعد هالغيبة.. انا ياما اعتبرتهم اهل لي..​

بس اللحين انا مصدومه منهم ومن ولدهم اللي هو زوجي!!! ​

الحمدلله اهلي عايشين بعز وبخير وماخلوني احتاج اي شي انا وولدي..​

بس انا متضايقة ونفسيتي تعبانه من وضعي ((معلقة)) لامتزوجة ولا مطلقة​

هذا غير الذكريات الاليمة اللي عشتها مع زوجي واللي يوميا تمر قدام عيوني!!​

دعــــــــــــــواتكم لي ربــي يختــــــار لــي الخيـــــــرة​

ارجـــــوكـــم انصـــــــــحوني..​

اختــــكم..​

فتــــاة الأمـــل..​

واضح إن زوجك عنده مشاكل نفسيه !! و صبرك هذا كافي !! انصحك إنك تستخيرين ربك اليوم قبل بكرى بمسألة تركك لزوجك و لا الرجعه له استخيري ربك والطلاق مو عيب
و اعتبري زوجك عقبة و بتتخطينها و كملي دراستك و ربي ولدك على طاعة ربه
و ربي يعوضك بالزوج الصالح و أهم شيء الشخص يعيش حيااة آمنه بزوج و لا بدونه

و أكثري من قراءة القرآن و تدبري آيات ربك و شغلي البقرة و أكثري الدعاء
و لا تنسين الاستخارة اليوم و بعد الاستخارة اتخذي قرارك
و تذكري ( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ )
و الله الموفق

 

[الاميرة الحسناء]

الله يختارلك اللي فيه الخير

 

[اااهات]

مدري وش اقول بصصراحه حسبي الله ونعم الوكيل على كل رجال ياخذ بنات الناس ويلعب فيهم ويتسلى الله ياخذ حقك منه وياخذ حق كل مظلومه

 

[اغلى دنيتيA]

والله عورتي قلبي الله يصبرك ويعينك ياحبيبتي انا اشوف الحل انك ترفعي دعوة طلاق بس لا تستعجلي عليكي بالاستخارة والدعاء وخلي ابوك يتفاهم مع اخوه ويشوف ايش ناوي عليه زوجك..والله يسهلك و يقدر لك الخير

 

[مجنونة ميدو]

الله يفرجها عليك ياقلبي ويسر امورك وكثري استغفار والله يفتحها عليكي يااااااربويكتب الي فيه الخيره واذا مانفع معاه الكلام كلمو احد من المشايخ يكلمونه ويتفاهموون معاه والله يعينك​

 

[ياربي انصرني]

من وجهة نظري ان اخوك يذهب لااحد مكاتب الاستشارات الزوجيه ----اذا كنتي في الرياض

مكتب الشيخ عبد الرحمن المحرج ---او مكتب الشيخ عبد العزيز المقبل -- او الاتصال على
مؤسسة الشيخ بن باز الخيريه000واستعيني بالله والله المستعااان00000

 

[أحلام باردة]

زوجك يحتاج لأستشارة نفسية
غير طبيعي أبدا و لا يحس بالندم , طيب اختي
هل هو يحبك فعلا و قاعد يكابر!!
يعني بلحظات الصفا لما يكون مو معصب , كيف يكون تعامله معاك
لأنه إذا كان يحبك و يغليك لابد يصحى مما هو فيه

اختي نصيحة ,...
الحل
زوجك يحتاج لوقفة مع رجال
فمسجك او كلامك معه لن ينفع..مانفع بالأول ماراح ينفع الحين
سوي مثل المرة اللي فاتت خلي الكلام بين ابوك و اخوه و خلي ابوك ياخذ موقف جاد و باصرار انه
يجي للمقابلة مع والدك , للتفاهم مثل الرجال , و الظاهر هو خايف لأن ما عنده حجة و كلامه عاطفي و غير منطقي..
الرجال تتفاهم معاه و تاخذ حقك
ثانيا اختي كيف ساكتة عن النفقة 4 شهور حتى لو اهلك مكرمينك
لازم يحس بواجبه اتجاه ابنه
من حقكم تطالبونه بما تستحقي من نفقة من المحكمة
و كذلك بتعديل سلوكه لو عندك شيء يدينه

الله يكون بعونك

 

[فتاة الأمل]

معكم حق في كل كلمة قلتوها
اشكركم على مروركم

والله مع الاسف احس ان زوجي حالته مستعصية
عناد ومكاااابرة وصل لدرجة انه يهين زوجته ويقسي على ولده

والله اني طابت نفسي منه
وحسبي الله ونعم الوكيل..


​

 

[زوجة خاين]

حبيبتي الله يفرج همك
لكن لا تفكرين في الرجوع
والله بيعوض لاتخافين

 

[شوشو سعود]

الله يفرج كربتك ويختارلك اللي فيه خير لك
ويا اختي لا تشغلين نفسك بالدنيا .. اشغليها بالآخرة من صيام وقيام وحفظ قرآن واكثري من الاستغفار

 

[huda khalifa]

الله يعينج

 

[ّصراحتي راحتيّّ]

الله يكتبلك الي فيه خير​

 

[مجنونه زعلاته]

الله يريح قلبك وقلب اهلك باللي فيه الخير يارب .............. لاحول ولا قوه الا بالله

 

[إحساس وردة]

الله يفرج همكِ ويكتب لكِ مافيه خير وصلاح

يارب العالمين.


​

 

[ارنوبة زوجي]

ياحياتي الله يعينك تعتقدين ان الابواب سدت في وجهك لالالالالالالالالاوالف لالالالالالالا نسيتي الباب الي مايتسكر نسيت من بيده ملكوت السموات والارض الذي من دعاه لن يخذله ووووالله اني مريت باصعب من حالتك والتجئت الى الله اشكي له همومي قد تشكين همومكي لاحد لكن لن تجدي من يسمع ويحل سواه جل جلاله.

 

[روضه الرحمن]

لوسمحتي ممكن تحكيلي وصلتي لايه مع زوجك الان ياريت تطمنينا