أختي أنا فاهمة اللي تقصدينه عشان فعلا الاسلوب مهم صحيح إنت ما كان المفروض تطلعين بالروب لكن كان ممكن يكون أكثر حكمة في التعامل مع الموقف فخلاص اختي افهمي غن زوجك ما يحب هذا الشئ حتى لو في نظرك عادي .مشكلة الشمالي إنه جارح جدا في كلامه لدرجة ما تقدرين تتحكمين في أعصابك وقتها حتى لو إنت فعلا غلطانة تصعب عليكي نفسك.
أنا بقولك موقف صارلي البارحة وممكن نفيد بعض فيه
زوجي من فترة صار جارح في تعليقاته وغذا بغى شئ وكإنه يأمر شغالة في البيت وحتى الشغالة تحسينه ارق معاه !!!ما أقولك هو دايما جذي بس في كثير من الأحيان يتعامل بهذا الأسلوب.
رائي وافكاري الله يحفظه,فاختي مع تقدم العمر احترام الإنسان لنفسه يزيد وما يرضى أحد يهينه حتى إن كان قبل يسكت ويتقبل .
المهم أختك صرت دايما أذكره لما يغلط علي في الكلام أقوله وليش التجريح كلمني زين أنا ما ما سويت شئ ولا قلت شئ عشان تكلمني بهذا الاسلوب وطبعا يقلبها زعلة ونتم فترة ما نكلم بعض .وطبعا اختك هي اللي تبادر بالصلح بطريقة او اخرى عشان ما أأثر على عيالي وما أتعب عقلي فأنا مريضة بالضغط الحمدلله .
قبل كم يوم شفته فجأة يحرك يده ويصارخ لانه مب شايف بنطلونه رحتله بكل حب قلتله شو تدور ممكن أساعدك عبس في وجهي وقالي ما في شئ ويسويلي حركات بوجههه ويده !!استغربت من اسلوبه فتركته ورحت أصلي عقب رحت أكمل شغلي على الكمبيوتر ، جا وقالي شكلك زعلتي قلت في خاطري الحمدلله زين حس قلتله أنا ما عرفت ليش سويتلي هذه الحركات أنا شو سويت !!!!!!؟وبعدين قلتله خلاص ما صار إلا كل خير ما في داعي نكبر الموضوع
المهم الحبيب جلبها زعلة يومين وهو زعلان وثالث يوم اللي هو امس بالليل شفته يبغي يطلع وياخذ عياله وحتى بنتي النونو بياخذها !هني حسيت إنه مصخها فقلتله شو السالفة ليش تتعامل بهذه الطريقة، وعينك ما تشوف إلا النور حبيبتي أم عبدالله والله إنه قالي كلام مثل كلام زوجك وإنه مل مني والود وده يطلقني وبيعيش مرتاح بدل النكد وقالي روحي المحكمة اطلبي الطلاق أما أنا ما بطلقك وبعذبك وبراويكي الوجه الثاني لي وإذا حصلتي على الطلاق بشوتك شوتة الكلاب آآآآآآآآآآآآآآآآآآآآآآآآآآآآآآآه يا قلبي ، هذا جزاء احترامي لك يا زوجي هو يقولي وأنا في داخلي أتذكر المنتدى وأتذكر إنه شمالي غربي وإنه لما يزعل يكون جارح وأصبر نفسي وأقول يا بنت لا تخربين بيتك اسكتي وابلعي وهو بعدين يوم بيهدأ بيتلوم وضميره بيأنبه ................. قلتله في الأخير خلاص الحل إني أبتعد عنك وأروح لحال سبيلي يوم تجرح أو تعصب علي وما انا قشك هذا اللي تباه خلاص تم أنا من اليوم وساير ما بحتك فيك عشان ما احصللي كلمتين وبكون مثل عيالي اول ما تعصب ينسحبون ويخلونك لين ما تهدأ، بس لا ترد وتعصب وتقولي إنت ما تهتمين وإنت وإنت لأني ما اعرف كيف أعيش في سلام .
ومن وقتها وأنا بعيده عنه إذا كلمني أكلمه وإذا كان مشغول أتركه ولا اروح صوبه هو شكله حس بأنه كان قاسي علي أحس من عيونه الندم لكن يكابر مب مشكلة أهم شئ أخيتي أعيش في سلام .
أنا ما قلتلك القصة هذه إلا عشان أفيد واستفيد صحيح نقول لين متى بنتم على هذه الحالة لكن طالما إنه في بصيص امل في استمرارية الحياة بين الرجل وزوجته فلازم نتمسك به عشان خاطر العيال على الاقل .
وصدقيني الطلاق مب سهل خاصة إذا كان الزوج فيه ايجابيات شوي................
الله يسخر أزواجنا لنا ويهديهم ويهدينا لأحسن الأعمال
