فيلة مشافتش تربية

[راجيه الرضا]

الفيلة #عديمةالرباية

شفت مع رقية فيلم وثائقي اسمه "مواجهة الفيلة"

فيه شاب بيبحث خلف السلوك العدواني القاتل للفيلة
اللي لقوها بتهاجم البشر سواء ماشيين في حالهم أو قاعدين جوا بيوتهم ودمرت قراهم
ولقوها بتهاجم وتقتل وحيد القرن بدون مايكون بينهم خلاف
وهم أصلا مش أعداء طبيعيين لبعض

ولأن المعروف عن الفيلة إنها كائنات آكلة للعشب وغير قاتلة إلا في حالة الدفاع عن النفس
فالسلوك القاتل للفيلة كان محير

خلاصة البحث
إن الفيلة أعدادها بتزيد
والبشر أعدادهم بتزيد وبيتمددوا في مساحة العيشة في أماكن الفيلة كانت متعودة تكون فيها لوحدهم
وبيبعدوها عن محاصيلهم فبيستفزوها بسلوكهم ده فبتهاجمهم

فالحل عشان ما يقتلوش الفيلة إنهم ينقلوا جزء من القطيع لمكان تاني مفيهوش بشر

وبسبب تهجير جزء من القطيع فيه فيلة صغيرة فقدت توجيه العائلة

لأن الفيلة بتعيش في مجتمع عائلي بيشارك الأم في تربية الصغار الخالات والعمات

فالفيلة الصغيرة دي اللي ما شافتش تربية بقوا يدخلوا في صراعات مع بعض
ويتفاخروا بأعمال طايشة زي قتل البشر ووحيد القرن!!!

ده فعليا اللي حاصل معانا
فقدنا المعاونات والمعاونين للوالدين في تربية الصغار
زمان كانت الأجداد وأهل الأم وأهل الأب بيشاركوا في التربية بالمعروف
وكان الجيران عارفين بعض وبيشاركوا في تربية أطفال الحتة كلهم
أما الآن....
فبقينا في جزر منعزلة الأهل مشغولين ونادر اللي عنده أسس تربوية ترضي الله ده إذا كانوا مش مقطعين أرحامهم

والجار مابيعرفش مين اللي ساكن في أول باب جنبه
فالنتيجة
جيل اتحرم من حكمة الكبار وتوجيههم وتربيتهم
إلا من رحم ربي فيه قلة بتعافر وسط مجتمع بقى حاله مقلوب
المتربي فيه بقى مادة للسخرية وللتنكيل

و لا حول ولا قوة الا بالله

‏•••═══ ༻✿༺═══ •••
د.شيما مشرف ​