ساحارب من اجله..ولكن.....

[وردة الحنون]

وينج لاتطولين الغيبات

 

[سنوات الضياع]

الله يعينك

كملي كلنا معك

 

[بنت الكـــويت ~]

الله يكون بعونج زوجج انسان لعوب ....ولو منج اشتكي على رفيجه عشان ينحرج زوجج ..وسوي نفسج ماتدرين
يارب يفك عوزج بزوجج والله صج اذا الوحده خانها زوجها قسما بالله صعب تثق فيه مره ثانيه ممكن تسامحهه بس الثقه تنعدم الله يهديه ويسخره لج وألعبي بأعصابه مثل مالعب بأعصابج

 

[عسل صافي]

وينك يامنية

 

[منية الخاطر]

السلام عليكم حبيباتي... والسموحه على التاخير الغير مقصود بس لاني شويه انشغلت.. اكمللكم حكايتي..

طبعا زوجي عرف اني اكتشفت لعبته ويا ربيعه فحب يعمل فيها سي السيد وايطلع نفسه من المشكله ويجلبها راسا على عقب عليه كالعاده.. المهم اتصلت فيه وكنت متنرفزه ومعصبه لحد انه لوكان جدامي كنت قطعته باظافري طبعا حاول ايبرر موقفه فقلتله انا ماخده عيالي ورايحه بيت اهلي وبلا هاي المهزله الي عايشتنها وياك كل يوم بمشكله وكل يوم طالعلي بوحده في شي ناقصني تشوفه فيهن ومش فيني.. طبعا بعد محاولات منه رجعت البيت ومارحت بيت اهلي على العلم اني من زواجنا لحد المشكله هاي ومافي يوم رحت اشتكي دايما احاول احل مشاكلي بروحي والحمدلله دايما انجح بس المره هاي شفت ان صوته علا وزاد في اتهاماته وانه هو ما رسل احد ايكلمني واني انا الي اتصلت على ربعه شفتو الظلم يا بنات شفتو الانانية المهم قال انا ما اقدر اتفاهم وياج بتصل على اهلج وكلميهم المهم اتصل على بيت اهلي وكل مايتصل اسكت وما اتكلم ويرجع يتصل لين في الاخر ردت علي اختي ومع كلامه كلميهم ولا تسكتين فقالت اختي اتكلمي شو فيج ليش ريلج ايصارخ المهم اتكلمت وقلت ان هو دايما ايطلعني غلطانه مع اني ماغلط ردت امي وقالت عطيه سماعه التيليفون خليه يتكلم رفض في بدايه الامر لكن امي اصرت وقالت انت يلي متصل ليش ماتتكلم فقال والله هي تتهمني اني اكلم وحده( شفتو الواحد يوم يبا ايطلع نفسه وايحط الغلط على غيره) المهم ردت الوالده وقالت احنا عارفين في هالايام ما في واحد مايكلم وحده... المهم خلص الكلام ارسلت مسج لصاحبة الرقم يلي ايكلمها وقلتله لوسمحت ماعاد تتصلين على رقمه مره ثانية ولا والله لطلع رقم زوجك(على فكره هي متزوجه) واقوله على كل يلي يحصل وصدقيني تراني قادره. ردت علي انا ما اكلمه على اساس حب وغزل ولا بيني وبينه شي بس هو بيساعدني كتبتلها لو سمحت دوري المساعده بعيد عن بيتي.( طبعا انتو بتستغربون مثلي اي مساعده .. الحبيب زوجي مسوي نفسه دكتور نفساني ومستشار) المهم مرت الايام الرقم المعهود يلي اعرفه ماعاد له وجود على موبايل زوجي بس الحبيب بعده متغير مش هو لو نكون برى ونرجع البيت يجلس شوي ويقول بروح السياره بنضفها حسباله يلي وياه غبيه ماتفهم.. المهم في رقم ثاني شد انتباهي راقبة من بعيد لي بعيد مسجات مدة المكالمه لين عرفت انها وحده واجهته نكر وظليت وراه وراه والله العظيم يابنات اني شلة عيالي بيت اهلي علشان افضى لهاي المشكله اجلس بالساعات لوحدي افكر شو الحل كيف اقدر ارجعة ضاقت فيني الدنيا لكن مايئست حسيت في قوه فيني بحارب بحارب بيرجع شو ماكلفني الامر كل مره اكلمه نطلع نتكلم فيحلف وايقول خلاص هو عاهد نفسه ان مابيرجع لهدي الامور لكن اشوف العكس ارجع اعزمه برى وفتحلة الموضوع واني انا حاسه انه هو بعده على ما هو عليه ماتغير ويرجع ويحلف وعلى ها الموال وفي مره سويتله عشا رومانسي على شموع في البيت واشتريتله باقة ورد وكتبت في البطاقه كل الكلام في قلبي.. لبسة فستان اسود كان روعه وفتحت شعري مع ميك اب.. المهم قلتله انت لسه على حالك لكن هاي اخر مره اكلمك في الموضوع وصدقني لو شفت مره ثانية اي شي ما بتكلم بس بيكون لي تصرف ثاني.. مرت الايام وانا اشوف مسجات على تلفونه(على فكره بغيت اقول هو حط رقم سري للموبايل قفل لكن اختكم قدها والله اني عرفت الرقم) لكن المسجات يلي توصل باسم ثاني مش اسم ريلي.. وحبيت ابين ان الرقم الاول يلي كان يتكلم منه قطعه عشان ايبين لي ان علاقاته انتهت وطلع رقم ثاني وعلى فكره الرقمين باسمي .. المهم مسجات باسم غير اسم ريلي شو السالفه لازم اعرف واكثر من اسم.. المهم مدكرين البنت يلي كلمها في بادء الامر رد طرشلها مسج من رقمه الثاني الحبيب يبا يرد العلاقه لكن على منو. وحنا جالسين قال تعرفين فلانه يلي كنت اكلمها اول رسلتلي مسج على رقمي الجديد ما دري كيف عرفت الرقم.. الحبيب يستغباني...المهم عرفت من المسجات انه هو مسوي نفسه شخصية كبيره لها وزنها في البلد وان هو مات والاسماء الثانيه يلي كانت في تليفونههو منتحل شخصيات ثانية(كان ايقص عليهن) فقررت اخطو الخطوه النهائية.. ماقلتلكم البنت الثانية كانت وايد واثقه لدرجت انها كانت مطرشه صورها وهي عارية( عافانا الله والله ماتستحي) المهم يبت اسمها بالكامل ورقم موبايل زوجها واخوها( الحبيبه الثانية بعد متزوجه) وبيت انا اللعبة طبعا خذيت الصور كلها عشان اعرفها مع منو تلعب في مسج من المسجات كاتبة لريلي ان زوجتك صايرتلي مثل الكابوس وانا اخاف.. المهم اتصلت من الدوام عشان كنت حاسه انها ممكن ايكون عاطنها رقم موبايلي.. اول الكلام اسمعي انت فلانه وريلج فلان ورقمه كدا كدا اسمعي يابنت الناس انا ماراح اصير لج كابوس راح اصير اخس من الكابوس بصير ديبه لو مره ثانية اتقربتي من بيتي ومن زوجي وعلى فكره صورج كلها عندي وبس مسج مني لزوجك او اخوج وشوفي شو بيصير..( واقوللكم عزيزات الاخت مدرسة رياض اطفال شو بتعلم ولا شو بتربي دام هي مش متربيه الله المستعان) المهم عرفت ان زوجي مسوي فلم هندي الها وكاذب عليها ومالف قصص المهم في الاخير عرفت كين ابعد الاولي والثانية وارجع زوجي لاحضاني .....

عزيزاتي في بادء الامر كان الامر صعب علي اني اظر حتى في ويهه تخيلي واحد غلطان وايحط الغلط عليج انتي التقولين الصدق وايطلعج غلطانه.. المهم قمنا نطلع والغى الرقم السري عن الموبايل ولحد الحين نحاول نجدد علاقتنا الزوجية ورجعلي مثل الاول واحسن ... بس في خصله (الكذب) ما احبها فيه واحاول اني اغيره هدي الصفه معاه من اول يعني قبل لا نتزوج فمن عنده حل لهاي المشكله تساعدني.....
ولي نصيحه لكل زوجه.. زوجك من حقج انت بس حاربي عشانه لاتيئسين شاوري بس خدي المشوره الحسنه لاني صراحه في المنتدى اشوف اكثر النساء هجوم علي الرجال واكثرهن مايعطن نصيحه تستفيد منها الوحده التي واقعه في مشكله... جددي حياتك معاه اكسري الروتين جددي نفسك بيتك حتى اولادج

 

[لحن المطر ~]

كنت متآبعة معأج من البداية وانتظرت تخلصين القصة عشآن ارد عليج

بصرآحة تعجبيني وتعجبني فطنتج اللي كثير للأسف من بناتنا يفتقرون لها
وتخلي مشاعرها ونيتها الصافية تغطي عيونها عن الحقائق

وانا اقول ان اللي تخاف تواجه زوجها وتحل مشاكل خياناته بطرق صحيحة وتتوهم انها تسوي جذي
لأنها تحبه فهي غلطانه لو تحبينه طلعتيه من اللي هو فيه


الله يصبرج وينولج مرادج والله معاج وبينصرج ان شاء الله
اجتهدي عليه من ناحية الدين عشان يصير دينه هو اللي يردعه
ويخليه يتخلص من الكذب

والله يوفقج ويصلحه لج طول العمر
مشكلة زوجج هو يدور عليهم وهذي النقطة يبغالج تعالجينها

 

[عزتي بإيماني]

رائعة انتي يامنية الخاطر
اسم على مسمى
اسلوبك / كلامك / تصرفاتك/ كلك على بعضك رائعة في التغلب على مشاكلك
هذا ما نبحث عنه في هذا المنتدى
من تضع المشكلة وطريقة حلها

الله يسعدك في الدارين

 

[منية الخاطر]

مشكورين عزيزاتي على اعطائي بعض من وقتكم لقرائة موضوعي.. واذا في وحده حاسه اني اقدر اساعدها في اي شي فانا على اتم الاستعداد....

 

[اغلى جواهر]

الله يسخر لك زوجك ويبعد عنه بنات الحرام اللي ما يخافون من ربهم حسبي الله عليهم ونعم الوكيل

والله يهدي زوجك ويسعدكم

 

[حب عذري]

ماشاء الله عليك