تقولين انه دايما يهددج بالطلاق تدرين ليش لان يدري انج خايفه من الطلاق قولي له اذا تبي اطلقني طلقني
المفروض من البدايه اذا قالج بوديج بيت ابوج تقولين له يالله ودني
وليش انتي تدفعين راتب الخدامه عيل هو شنو وظيفته المفروض من البدايه ماتعودينه انج تشيلين عنه كل شي خليه يتحمل كل شي بنفسه ولا تشيلين عنه شي واحد
شلون ماتبين يكون عنده رصيد وانتي قاعده تصرفين ع البيت المفروض تعودينه من البدايه انه يتحمل حتى صرفج
اهم شي لاتتنازلين عن حقج ولاتحسسينه انج بتموتين من غيره عيشي حياتج حق نفسج وولدج
استخيري وشوفي والله يكتبلج اللي فيه الخير
ولو تبين رايي
المفروض بعد الكلام اللي سمعتي منه تشيلين اغراضج وتروحين بيت هلج وتقولين له طلقني ولاتقولين اخاف من الطلاق لانج اذا تبين تتنازلين عن كل شي معاه الله يعينج
توني من فتره بسيطه سامعه قصة وحده تزوجت ماصارلها 5 اشهر بطيبتها وتضحياتها صار زوجها ماخذ راحته معاها ويسبها عادي ويقولها انا بس جي ماخذج ومب مرتاح معاج ومااحبج وكله يهددها بالطلاق واختها دايما كانت تنصحها انها تقوي شخصيتها واذا سبها ماتسكت وتزعل وتعصب وهي ماتسمع الكلام كانت تخاف يطلقها المهم اخر شي كانت في بيت ابوها وخواتها انصحوها وبالفعل اتصل ماردت عليه وتم يحاول يتصل لين كلم اخوها وطبعا اخوها كان يدري قاله تفاهم مع زوجتك وانا مالي خص اخر شي كلمها ورفضت ترجع له وتم يحاول ويحاول لين اخرشي رجعت بشروطها والحين قالتلي اختها انه يخاف حتى يقولها روحي بيت هلي مع انه قبل كان يغصبها تروح ويمنعها من بيت اهلها والحين الوضع تغير لانها قوة شخصيتها
والله يصلح حالج ويهدي زوجج ويسخره لج كما سخر البحر لموسى اللهم امين
وسامحيني اذا ضايقتج باسلوبي ترى والله ابي مصلحتج وخايفه عليج لان ترى الدنيا الحين تغيرت اول لين تضحين عشان احد الكل يقدرج الحين اذا ضحيتي عشان احد يدوسج ولايفكر فيج خلي نفسج عزيزه ولاترضين حد يهينها وتأكدي طول ماانتي تقدرين ذاتج ونفسج الكل بيقدرج
