السلام عليكم ورحمة الله الله وبركاته
اختي شمس بيني وبينك .. راح اذكر ايجابياته وصفاته وبعطيج شوية تفاصيل عشان تفهمين شخصيته واشكرج على وقفتج واهتمامج بموضوعي والله يعطيج على قد نياتج وصح كلامج وانا بجرب قبل ما اتخذ اي قرار وما بكون خسرانة وبعمري ماخسرت شي والخسارة هي رضا رب العالمين والجنة.. وثقتي بالله وفيج وفي نفسي كبيرة وان شاء الله بتشوفين الهمة عالية?
- اولا صفاته :
- حنون وطيب ويحب الشخص اللي يهتم فيه ويرعاه مثل الطفل.
(وانا مب مقصرة في هالشي لكن مايحب يعطيني الا بنسبة قليلة.واحس اكثر شي ان الاهتمام بنظره هو التواصل بالاتصالات والمسجات)
- كريم جدا يعطي بسخاء.
(انا اطلب منه بس بدلع وهدوء ولأني دلوعة وايد استخدم هالسلاح ولكن ما اطلب بتبذير ولا احب احن وازن اطلب وان رفض ما اطلب مرة ثانية ومب كل طلباتي مجابة واكثر طلباتي عفوية حلاوة او ايسكريم)!
- يحب مساعدة الآخرين ومشاركتهم.
(احيان يشوفني تعبانه من شغل البيت فيساعدني مثلا يدلك ايدي او ريولي او يرتب الفراش او يسويلي اكلة احبها مثلا توست جبن بعسل او كوب حليب دافي او مثلا شافني سويت كيكة يشاركني بتزيينها)
- رومنسي ويحب الغزل والكلام الحلو.
(بس مزاجيته تتحكم فيه ويكثر منه وقت اللي يبي يطلب الجنس وما يطلبه مباشرة مني والجنس عنده ادمان بس مايحب الليالي الحمراء)
- يحب التجديد والتغيير وبنفس الوقت ملول.
(وانا احب التغيير احيانا يرجع من دوامه ويلقى على الطاولة ورد وشموع او دبدوب او اغير شي بالغرفة يمدحني)
- يحب السفر.
(وما سافرنا مع بعض الا مرتين)
- يحب المرح والوناسة.
(احيان اكون ساكتة واشوف تلفزيون اتفاجئ فيه يقولي قصيدة او يغنيلي واحيان يكون يالس في صمت غريب اغير جوه بنكتة ويبدأ يضحك ويسولف وفجأة ممكن يقولي اجهزي بنطلع)
- يحب المفاجآت.
(كيكة بدون مناسبة او يحط اغنية غريبة ويقول يلا نرقص كلنا او مثلا يقول مفاجئة عند الباب ولما نفتح الباب نلاقي قطة صغيرة او ثلاجة فيها سمك اصطاده)!
- اجتماعي ودود ويحب الناس وصلة الرحم.
(يحب تجمعات الاهل والزيارات والعزايم ويفرح بشوفة الناس فرحانين ويحب المشاركة.)
- يحب النظافة والجمال والاهتمام بالجسم.
(يهتم بالرياضة ويحافظ على وزنه ورشاقته وجماله ويهتم بجسمه وايد يسوي مساج وحمام مغربي ويغير تسريحته ويسوي بوديكير.!)
- يحب ويقدر ويقدس الاعتذار.
(يعتذر بوردة او دبدوب ولكن مايعترف بالخطأ ولا يناقشه ولا يقول كلمة آسف ويكره الشخص اللي يغلط عليه او يجرحه ولا يعتذر)
- يحب التصوير والهدايا اليدوية.
(دوم افاجأه بأني خذتله صورة وهو مايدري و الهدايا اليدوية ممكن تكون كيكة او عصير او قطعة حلوة من الكروشيه لأني فنانه فيه)
- يحل المشكلات البسيطة بالصمت والتفكير العميق والجلوس بعزلة اما المشاكل الكبيرة اكثر الاحيان يحلها بالخروج مع الاصدقاء ولا يستشيرهم لأنها خصوصياته.
(خصوصا المشاكل اللي تكون بينا وبين اهله ، يطلع من البيت وياخذ وقته بالتفكير فيها واذا لقى الحل يرجع البيت واليوم الثاني يواجه اهله ويحلها باعتذار وبكلام طيب وبعدين يكلمني ترا انا سويت كذا وحليتها والحين سوي كذا واعتذري عشان ماتكبر المشكلة واكثر المشكلات تكون عالقة ومايحلها والسبب يكون انه مل من تكرار حدوثها.)
وبالنسبة للبس و الهوايات طريقة شربه واكله ..
- ثانيا اللبس :
- لبسه غريب ويحب الازياء الغريبة والغير متناسقة وماتهمه الالوان ولا يهتم بالجودة او الماركة واختياراته تعتمد على بصره ومايحب تقليد الآخرين.
(يحب يدمج الجديد مع القديم والجينز مع القمصان العملية يحب الملابس اللي فيها شعارات شبابية او صورة غريبة مثلا ديناصور او كلمات غير مفهومة.
- ثالثا هواياته :
- هواياته شبابية طبعا يحب يلعب بلاي ستيشن، وشهريا نروح قسم الالعاب ونلعب مثل الاطفال فالمولات، يحب المغامرات دراجات في البر او دراجات مائية، يحب الصيد (صيد السمك والطيور) ، يحب السيارات (وانا احب السيارات وكل مايتعلق فيها) يحب التسوق مشاهدة التلفزيون والافلام.
- رابعا للأكل والشرب :
- بطيء ويحب الأكلات الغريبة والغالية ومايحب تغيير المطاعم والاكلات والمشروبات اللي يختارها.(يحب يخلي لكل مطعم وجبة تميزه يختارها و وقت المزاج يتوجه له عشانها!)
- خامسا طريقة كلامه (بختصرها لج) :
وقت الجد جد ، وقت المزح مزح ، وقت العصبية عصبية حادة وصراخ وتجريح وانتقاد ، وقت الهدوء صمت مع ابتسامات ونظرات بريئة وممكن سوالف خفيفة عن الجنس او كلام حب وغزل.
واي شي بتقولينه بطبقه والحمدلله انا محافظة على الصلوات الخمس وبإذن الله بصلي الاستخارة. واسمحيلي شوي طولت بالتفاصيل لاني ماعرف اختصر بنقاط احب اشرح عشان اوصل الفكرة او المعلومة بوضوح اسمحيلي حبيبتي??
