جاني زوجي ...وريحته عطر نسائي..

[هواجسه]

السلام عليكم .. ببدا معاكم في مشكلتي .. واتمنى القى حل لهااا

انا متزوجه من 7 سنوات وعندي 3 اطفال وزوجي شمالي شرقي وانا شماليه غربيه ..

كنت القى احيانا .. في تلفون زوجي.. مسجات .. من بنات .. طبعا هو كان يمسح

كل شي.. ومسكر تلفونه برقم سري.. الموهيم في مره واجهته وكان هذا بعد 3 سنوات

من زواجنا .. واعتذر لي وقعد يحلف انها اخر مره .. بعد كم سنه .. لقيت اكثر من مسج

وهو كان في البدايه يكلم بنات .. يوم كنت اسافر عند اهلي.. لاني اهلي بديره ثانيه ..

واقعد عندهم شهر او شهر ونص.. الموهيم .. وسكت .. وبعد فتره .. كنت القى مسجات

يعني في البدايه كان يكلم يوم كنت اسافر عند اهلي.. وبعدين تطور الموضوع.. وصار وحتى

انا عنده.. طبعا هو يحسب اني انا ماادري بشي.. وانا كنت اقول في نفسي يمكن قاعد

يتسلى.. لانه ماكان يقعد مع وحده .. لان الارقام دايم تتغير.. وفي مره قبل 7 شهور

يوم كنت حامل.. قالي انا بطلع .. مع واحد .. وطبعا هالواحد هو ولد عمه .. وسمعته بالارض

وراعي بنات وشرب خمر ومعروف.. ومتزوج .. ومايدري عن حرمته.. وزوجي صار مصااحبه.. الموهيم

يوم رجع الا واشم ريحته عطر نسائي.. وقلت له من وين هالعطر اللي اشمه فيك .. وارتبك

وكلمه مني وكلمه منه ..وسمعته كم كلمه في العظم .. وتاثر كثير.. وقعدنا فتره مانكلم بعض..

بعدين كلمته.. في الموضوع.. قلتله انا اعرف انك تكلم بنات .. ومن هالكلام وانا ساكته عنك..

وانا جايتك اليوم على اساس نتفاهم ويكون الموضوع بينا .. واذا ماتبغانا نتفاهم بدخل ناس بيني وبينك
طبعا كنت اقصد حد من اهلي.. او اهله.. وانكر وقال انا ماكلم حد .. وسالته من وين ريحه العطر

ذاك اليوم قال مااعرف .. يعني انكر كل شي .. لاني ماكان عندي دليل ماادي.. وخلاص ومرت الايام

وانا ماكلمت حد.. من اهلي.. بس علاقتنا تغيرت كثير .. ومااصرنا نتكلم مع بعض زي اول ..

وصار بينا برود.. وهو خذ راحته.. مااساله وين رايح .. ولا وين جااي.. بس احسه مقهور.. في داخله

اني كيف عرفت انه يكلم.. بنات .. ومااسويت شي.. لاني قبل كنت اهدد واقوله لو عرفت انك تخوني ..

هذا يكون اخر شي بيني وبينك.. غير اني يوم ذاك اليوم جاني وريحته عطر نسائي وسمعته كلام في
العظم.. تاثر وقالي اذا تبين اريحج مني انا مستعد.. يقصد انه يطلقني.. لاني .. قلتله انا قرفانه

منك ومن الناس اللي مصااحبهم .. فيمكن فهم اني ابا اطلق.. ومادري اذا كان يبي يطلقني

من صدقه .. او بس كذا يقول.. وانا هذيك الفتره ماقدرت اقول لاهلي.. ابوي كان في العنايه

المركزه وتم فتره طويله مريض.. ومرت الايام.. انا الحين احس بغصه.. واحس ساعات ماعندي كرامه

كيف انا جاالسه معااه لين الحين ولا سويت شي.. وافكر.. واخطط.. من شهور.. اني يوم بسافر

عند اهلي .. اقوله .. انا ماابرجع.. طبعا تخويف.. لاني احس انه يخاف يفقدني ويفقد عياله..

انا ماابي اطلق بس ابيه يتادب.. ويحس بذنبه .. زوجي اخلاقه زينه .. طبعا محد كامل صحيح..انه عصبي.. وساعات احس اني مااخذه شايب.. (شمالي شرقي) ههه

بس طيب .. وبالحيله وبالكلمه زينه يمشي معاي.. بس له فتره تقريبا سنه او اقل مخترب علي..

طبعا ماثر عليه ولد عمه حسبي الله عليه.. احس لازم اسوي شي .. القنه درس.. عشان خاني.. اخاف يقول في باله ذي طول عمرها تهدد اذا خنتني بتطلق منك .. وفي النهايه درت اني خنتها ولا سوت شي .. بكره يمكن يتزوج علي.. ايش رايكم.. انفذ اللي في بالي.. ويوم اسافر عند اهلي.. اقوله

ماني راجعه .. او اقعد اتنااقش معاه .. او ايش اسوي .. ابي شي يرجعلي كرامتي..

وشي يخليه يعرف.. مو كل طير يتاكل لحمه.. تدرون انه مااقدر اقوله ياحبيبي.. او ياعمري..

او اقدر اتعامل معاه كزوجه عاديه حتى وقت الفراش.. مش قادره.. احس ماعندي كرامه..

كيف قاعده معاه .. ولاكان شي صار.. انا ماابي اخرب بيتي.. بس ابيه يتادب .. ابيه يخاف انه يفقدني..

اممممم ..واخاف اقوله اني ماابرجع اقصد يوم اسافر عند اهلي ويطلقني.. مااعرف افكاري متضاربه ..

ابي احد يسااعدني ويتنااقش معااي.. دلوني .. شالحل.. ومشكورين..

 

[تعلمت من الماضي]

الله يفرج همك ويكشف غمك
ويعطيك فوق ما تتمنين
إن شاء الله الأخوات يفيدونك ​

 

[نور نت]

الله يفرج همك يارب

 

[هواجسه]

انتظر ارئكم .. على احر من الجمر..

 

[أم تميم2008]

الله يفرج عليك و عليك بالدعاء والاستغفار

 

[الأميره الناعسه]

مشكله هالخيانات الجئي الى ربك بابه مفتوح تضرعي بين يديه قومي نص الليل واطلبيه فهو لالالالالالالالايرد من طلبه سبحانه

 

[@أحلى من ألحلى@]

اجلسي معه جلسة مصارحه وخيريه بينك انتي واولادك ولا الحقيرات اللي يكلمهن قولي انا ماني باقية طول عمري اراقبك وانت ولا على بالك
الشي اللي تسويه اكبر غلط وش راح تكون نظرت اهلك لما يعرفون بشي ذا
ومايهمك رضا ربك
وانتي لاتعتمدي على حلف ولا وعد خليه يحلف على المصحف
موفقة اختي ربي يسخرة لك ​

 

[هواجسه]

طيب .. اذا خيرته .. قبل مااساافر.. ومتجااوب معاي ..

ومااخلى عيالي يساافرون معاااي .. ايش اسوي.. انا مااقدر

اسافر .. واخلي عيالي.. احس بموت .. وعيالي .. بيتعقدون.. وبنفس الوقت

كرامتي ماتسممحلي استمر على هالوضع ..

 

[تشكرات]

أنت تنظرين للموقف اللي صار على أنّه كرامه ...لكن زوجك لا يعتقد

ماتعتقديه ....!!!...فتفكـــير الرجل يختلف عن تفكــير المرأه ...

زوجــك الآن ( خــائف وحريـــص ) أن يقع في المحذور مرّه أخرى

هذا مايفكّـر به ....والله أعلم ....ولكــي تقتنعـــي بهذا ( ضعـــي

نفسك الآن مكانه وحللّــي الوضع وشــوفي .....

وبالنّسبه لمكالماته السّابقه ( هو أعتذر وندم ) فأمنحــــيه الثّقه

وكونــي متسامحه معه حتى لا تفقديــــه للأبد ( لاسمح الله )

والحمد لله ( أنها مكالمات فقط ....يعني لم تصل لحد الفعل ) ....

أدعي له بالهدايه والثّبات عليها ......ولا تنسي يا أختي الكريمه

أنّنــــا في زمن الفتن والفساد ....أجارنا الله جميعآ منها .....

دائمآ كونــي معه بجسدك وبروحك ولا تسمحي للشيطان أن يفسد

عليك حياتك ....أنت فقط تقرّبي منه ..وأدعــي له ...

ربي يوفقكم ويجمع بكم على خير ..

 

[هواجسه]

تشكرااات.. اشكرج على مشااركتج.. زوجي.. ماازال مستمر في فعله

الشنيع.. تلفونه ماايخليه ابد.. بس يحاول .. ماايكون قدامي.. هو عنده بلاك بيري..

وقلتله ابي بلاك بيري طبعا هالكلام من زمان.. قالي لا وانا بقطع الخدمه من تلفوني..

وهالكلام .. من عشر شهور.. ولاقطع الخدمه.. وغير اني يوم قلتله انت مضيف عندك

في البلاك بيري.. بنات .. قالي هذول بنات الدوام معاي.. عجيبه امره.. وخير اذا بنات الدوام..

عاادي.. يعني.. لازم يتعاقب.. عشان يتادب.. ولا بيعيدهاا.. لازم يحس.. انه غلطان.. لانه متماادي بهالشي..

يعني ماترك هالشي.. وانا هالشي متاكده منه.. هو الحين .. يدري اني ادري انه يكلم بنات..

واحسه متضايق.., لان فيه مره قالي.. انتي اذا حطيتي حد في راسج .. بتمين تراقبينه..

وساعات الواحد يسوي اشيااء .. بالخش والدس.. ماايبي حد يعرف عنها.. وانتي تمين ورااه

لين تعرفين.. وبعدين ماتسوين شي..

ايش معنى كلامه.. انا اشوف.. انه غلط ومستمر.. في غلطه..

لازم يتعاقب.. ويعوضني.. على اللي سواه فيني..

واتقبل النقاااش.. والارااء.. اب اوصل لحل..

انا اعترف اني غلطت يوم وااجهته .. وبعدين سكت المفروض يوم واجهته اقلب الدنيا عليه

ولا اسكت وانطم.. ولايكون حالي كذا .. على الاقل .. في نظره اني ماادري.. ولااني اددري

واقعد اتكلم معاه واعيش حياتي معاه عادي.. هالشي انا متاكده منه انه غلط..

كيف اسوي.. ؟؟

 

[داريين]

أنا أقول اذا رحتي لأهلك طنشيه
و لاتردين على مكالماته و رسايله
و اذا بيأخذك قولي مو رايحه أبغى أرتاح عند أهلي شوي
و أعطيه موعد وماطليه
خليك غامضه معاه و خليه يخاف و يقلق من اللي بتسوينه
خليه زي التايه مو عارف انتي بترجعين ولا لا
والله يسخره لك ​

 

[تشكرات]

أختي هواجسه (احساسك طبيعي حبيبتي ...وأيّ حرمه مكانك

أكيد راح تنقهـــر وتغضب .......لكن أنت ( لديك خلفيّه ) بأنّ زوجك

يصاحب ابن عمّــــه اللعوب السكّير .....ولهذا ( اصبح الخوف لديك

مضاعف أكثر ) .....

يمكن زوجك ( يمنعك من أخذ موبايله ....حتى لا تقرئين مسجّات

ابن عمّــه ( المسجات السخيفه ) ....

لكن صدّقيني أختي ( أنت شماليه وزوجك كذلك شمالي ....يعني

هو معجب بقوّة شخصيّتك وانتقــامك لكرامتك ولنفسك )

أنت كذا مكيّفته عالآخـــــر ...

فكوني دائمآ بالقرب منه أشغليه بنفسك وباحتياجاتك وبطلباتك

لا تعطــــــــــــــيه الفرصه ( أن يشغلك ) ....شغلي كيد النّساء

بالحب والكلام المعسول اللي يلين الصخر ....وعاد أنت شماليّه

وتعرفين جيّدآ للشماليين ( أحبابنا ) هههههه

 

[الحالمةبالسعادة]

الله يفرج عليكي يارب

 

[هواجسه]

تشكرات.. حبيبتي.. كيف تبيني اقوله كلام حلو .. اذا تبيني انافق بنافق..

اقدر.. على كل شي.. الفكره مو هناا..

الفكره انه مستمر بغلطه.. ويدري اني ادري بهالشي .. وساكته عنه..

هالشي انا متاكده منه انه غلط.. من حقي عليه.. انه يحترمني.. ويكون مخلص لي..

كيف تبيني .. امشي الوضع طبيعي.. لو ماكان يدري.. اني ادري عنه .. كنت مشيت الوضع طبيعي..

وجبت راسه .. زوجي واعرف له.. لان مره .. اكتشفت انه يكلم وحده .. بس مااقلت له اني ..

كشفته.. وشوي شوي.. اشتغلت على نفسي.. وجبت راسه وتركهاا.. وهالشي مو صعب ..بالنسبه لي..

الفكره .. انه كيف بينظر لي.. اعرف انه يكلم بنات.. وسااكت عنه .. لا وبعد ادلعه .. واعيش حياتي معاه

طبيعي.. بيفهم .. انه عادي عندي.. غلطتي يوم واجهته بكل اللي اعرفه عنه.. ومااسويت شي..

المفروض قلبت الدنيا على راسه.. عشان يعرف اني احبه.. ومااقدر اخليه لغيري.. بيتمسك فيني اكثر..

شمالي نفسي واعرف تفكيره ..

انا عضوه معروفه هنا.. واعرف للانمااط .. تمااام.. وكثير يشهدون بحكمتي.. بس دخلت .. بنيك نيم ثاني وجديد

عشان فيه ناس من الاهل يعرفون نكي.. القديم .. وانا ماابي احد يعرف عن خصوصياتي..

بس في مشكلتي هذي.. تلخبطت عندي الامور.. واحترت..

اللي اعرفه.. انه لازم يتادب .. ويخااف ...من فقداني.. ويندم .. على هالشي ..واني ماراح

اسكت له .. كيف..؟؟ شماااااااااااااااااااااااليه .. ههههههههههههههههه ماراح تقدرين تقنعيني..

اشكرك لتواصلك واهتمامك.. واذا عندك شي .. اسدحيه..

احب النقاشات البناااءه.. اللي تفيدني .. وتوجهني..

موفقه..

 

[صرح الأنوثه]

شوفي حبيبتي أنت قلتي شمالي شرقي يعني يموت في النظام ويكره التغيير والفوضى وشخصيته الفعل اهم من الكلام والسمعه مهمه بالنسبه له انا اقول بما انك قلتي انو اخر مابينك وبينه رحي لاهلك واجلسي عندهم بدون ماتقولين لهم شي وطنشيه اكيد طبعا بيرجع للمكالمات لكن ماراح يرتاح ماراح يكونون مثلك بالنسبه له ابدا
واذا الحل مو معجبك خوفيه بالله سبحانه وانو مايظلم احد وانك لوتدعين ان الله ينصرك عليه وخليك وااااااااااااااااااااثقه من قبول الله لدعوتك بس لا تدعين عليه بصحته او شي يضرك معه مثل ان الله مايوفقه لا انتبهي لانك خسرانه معه

 

[هواجسه]

دارين.. عجبني كلامك.. واحسه ينفع هالكلام مع زوجي..

الخوف من فقداني.. بس ايش رايك اقوله .. قبل مااساافر.. اني ماابسكت على خيانته

او .. اني مانسيت..

 

[زوجة الناظر]

الله يسخر لك الخير

 

[دمعة الغيمه]

البعض يرى أنه بمجرد حدوث الخيانة فان العلاقة قد ماتت وانتهت وعليها السلام!!

والبعض الآخر يرى أنها تحدث شرخا مؤلما في علاقته مع شريك حياته وهناك من يرى ان العلاقة قد تصبح افضل وانه تعلم درسا وكان الامر لمصلحة الطرفان.

وهنا تأتي مسألة التكيف التي بالعادة لا تكون سهلة على الطرفان. البعض يحتاج الى شهر والبعض الى أشهر والبعض الاخر الى أعوام حتى تغادر كل مشاعر الوجع والالم بفعل التدمير الذي حصل في العلاقة.

وهمسه في أذن المرأة لمعالجة هذه المواقف:

1- إحزني فليس من المعقول أن تتظاهري بالبرود أو تتمالكي نفسنك وأمر كبير كالخيانة قد حصل. إن فترة الحزن مهمة جدا والحزن الثنائي الطرف. الخائن والمخون كلاهما له حق الحزن.
إن الحزن بعد الخيانه فيه مشاعر تشبه موت إنسان عزيز عليك فيه حزن عميق وغضب وكلما أعطى الطرفان هذه المرحلة وقتها في الحداد كانت إمكانية انتقالهما لمرحلة العلاج أسهل.

2- تحلي بالصبر والهدوء والثبات فالمشاعر هنا تكون متأججه بنار الخيانة فيجب اعتماد الهدوء حتى تهدأ النفوس وتتضح الامور وتتمكني من تحديد الضرر الذي لحق بك.

3- استمعي له وتعلمي فن حسن الاستماع قولي ماعندك ودعي زوجك يقول ماعنده حتى تعرفي وجهة نظره.

4- حددي الضرر الذي حصل للعلاقة الزوجيه إن الخيانة لها ردة فعل مختلفة لكل من الزوجين.
بالطبع الحوار بين الزوجين واعادة تقييم الحدث والاهتمام بتجديد حجم التلف وكيفية اصلاحه امر مهم جدا.
لذا فهناك عودة اكيده لسؤال يفرض نفسه على الطرفين (( لماذا حصلت الخيانه .؟؟؟؟)))

فهذا التساؤل مهم للطرفين ان يفهما لماذا حصلت الخيانه ليخرج كل منهما بوجهة نظر ورأيه وتشخيصه لان في كل خيانه هناك باب او مبرر حتى وان بدا صغيرا او تافها للاخر فان يمكن ان يكون سببا وجيها لحدوثها وكلما تعمق الطرفان في تفصيل مشاعرهما الحقيقية امام بعضهما وكشف الاسباب كلما كان المجال افضل لاعادة العلاقة وبناءها من جديد.

5- تجنبي إلقاء اللوم المتبادل ولكن ليكن الحديث محاوله للتشخيص ولحل المشكلات الاساسيه وناقشي الموضوع مع زوجك بهدوء دون عصبيه حتى تتوصلي الى االاسباب التي دفعت به الى الخيانه وحاولي تفهمها وخاصه اذا ما ابدى الزوج اسفه واعتذاره عن خيانته.

6- تحدثي معه حول مستقبل العلاقة الزوجيه والافضل ان يتم اتفاق حول اهميه العلاقه وانكما معا ستحاولان جعلها تستمر ببعض التعاون وتحدثا عن الاطفال وكيف انهم صمغ هذه العلاقه.

7- ابدأي بالحديث عن كل الامكانيات والاختيارات وناقشي كل اختيار على حده ومدى فاعليته ولا يجب ان يتم الشجار في حال اختلاف وجهات النظر فالتماسك مطلوب فتذكري انها جلسه لاجل الصلح والتوافق.
وبعد تحديد الاختيارات واختبار فاعليتها يجب ترتيبها بما يتناسب مثلا :-

أن يقول لزوجته قبل خروجه أين سيذهب ومتى سيعود !!
أن يحدد وقت خروجه لمدة 3 ساعات مثلاً !!
أن تعرف من يتصل به على الهاتف النقال !!

وبالطبع هناك اتفاقات اخرى يجب أن تؤخذ بعين الاعتبار من ناحية مداراة الزوج فيها وعدم كسره بشكل اذلالي وخاصة أن الرجل الشرقي مهما كانت فداحة خيانته ولكنه لا يرضى بالانكسار والاذلال.

8- اتفقي معه على تقييم كيف سارت العلاقة بينكما وتحديد التطورات التي حصلت بعد النقطه (7).

9- سجلي كل ما حصل من تطورات واتفاق على ورقه وتابعي بناءاً على ذلك فسوف يسهل عليك ادراك المتغيرات التي حصلت وتستفيدين من النقاط التي تجاوبت مع الخطة.

اتمنى اكون افدتك لو شي بسيط

 

[استغفرالله@]

الله يفرج همك يارب ولا تطلبين الطلاق وحاولي تصلحي من زوجك وانتي عنده في البيت لان الزوج اذا كان عزابي يكون وقت فراغه كبير وربي يسخره لك يارب

 

[ملاك الاحمري]

الله يفرج همك