هلا سوسو
كيفك يارب تكوني بخير
شوفي حبيبتي في طرق كثيره للملوخيه
ناس يسوها بكشنه بس تكون زيتها كثيرلانك راح تسوي في النهايه كشنة الثوم وهنا راح يكون الزيت كثير
وناس لا
وانا طريقتي بالملوخيه
احط اللحمه او الدجاج وهو مقطع صغار مع نزع جلد الدجاج لأني ماأحبه واحط عليه المويه
وبعد رفع الريمه اكون مجهزه في صحن حبه طماطم صغيره ومقطعه مكعبات صغيره وقرن بصل كمان مقطع صغير
وملعقة اكل ثوم مفروم ناعم بمكينة البصل
وحطيه عليه فلفل اسود وكمون وكزبره ناشفه مطحونه ورشة قرفه ناعمه رشه فقط مو تكثرين
ومكعبين ماجي واخلطيهم زيييييييين مع البصل والطماطم
وحطيه على الدجاج او اللحم
وخليهم يطبخوا على نار هاديه
لحد مايستوي وبعدين تكوني مقطفه الملوخيه ومغسلتها وفارمتها ناعم انا افرمها في فرامة البصل او فرامة الملوخيه نفسها
وبس بعدين حطيهم على المرق مع وزن مويه المرق يعني عشان ماتصير ثقيله او خفيفه وخليهم يغلوا لمدة اربع دقايق الى خمس دقائق عشان ماينقطع عرقها لانه في ناس يحبوها بعرق وناس لا مايحبوها يعني حسب الرغبه
وعلى نار هاديه دون ماتغطي القدر عشان ماتسود
في هذي الاثناء تكوني مجهزه راس ثوم مطحون ناعم وحطيه في الطاوه مع الزيت والثوم وحمريهم على نار هاديه وبعدين حطي معاهم كزبره ناشفه واذا صفر الثوم حطيه على الملوخيه وغطي القدر على طول طبعا هنا تكوني خلاص طفيتي النار عليه
وبس
طبعا في ناس تحب تحط كزبره خضراة مع الملوخيه يعني مع كشنة الثوم
وناس تحبها ثقيله يعني تخلي مرقة اللحم او الدجاج قليله وناس تحبها خفيفه شوي
يعني كل واحد وذوقه انا بصراحه ماأحبها ثقيله يعني وسط عشان ماتلبد على المعده
واغرفيها وقدميها مع خبز بر وليمون ورز ابيض وبالعافيه
ان شاء الله اذا لقيت وقت صورة الطبخه كامله ونزلتها لكم