انا والصبر

[بعثرة حكي]

السلام عليكم


كيفكم صبايا المنتدى


اليوم و بعد تفكير عميق و لف و دوران قررت
اكتب قصتي هنا في هاذا المنتى الي حبيته و ارتحت له
و بعد ما اخلص قصتي انتو احكمو و بئيش تنصحوني


قصتي ممكن تكون طويله لذا راح اجزئها


راح اسميها انا والصبر


لان من يوم خطوبتي الى هاذا اليوم وانا صابره
و لكل انسان طاقه وبعدها ينفجر
وانا ماعندي حد اشتكي له و افض فض له الا انتم

بدايت قصتي بتحسونها عاديه
نبداء
انا متزوجه و عمري 17 سنه و الحين عمري 23 سنه
وعندي بنتين ولله الحمد وحده عمرها 6 و الثانيه 5 ربي يحفظهم لي هم كل شي بحياتي


بدت قصتي وانا في عمر ال 16 انخطبت من ولد عمتي
طبعا هو كان يحبني بس انا ما كنت اعرفه كويس كل الي اعرفه انه يعشق الدراسه و الاجهزه
و بنات عماته و عمامه يموتون فيه
وانا وقتها يشهد علي الله اني ما كنت افهم ايش يعني زواج كنت اضن فستان و بس ووناسه
محد فهمني شي يعني زواج وايش يصير
ف رجعت من المدرسه قالت لي امي فلان خطبك
قلت لها عادي قالت نقول لهم ايه قلت اوك


تمت الخطوبه و سوينا حفله صغيره بعد ما طلعو الاهل من البيت جانا اتصال من خواته ان بنت بنت عمته تهددني وانها بترسل لي رجال وخواته يقولون اتركيه الخ من هاذا الكلام والتهديدات
ف امي وابوي كلموه و هو اصر اني ما ارجع الخاتم و يستمر الزواج


يعني من البدايه عمتي و بناتها ما يبوني بس ولدهم يبيني
تمينا فترت الخطوبه ب مشاكل بنت بنت عمته الي دايم ترسل تهديدات مع ذالك علاقتي معه حلوه
و تم الزواج و سكنا في شقه بنفس بيت ابوه و علاقتي مع زوجي جداً حلوه و صرت احبه
بس امه و خواته مو مخلييني بحالي
تخيلو عروس اول يوم لي قمت من النوم و نزلت لها اساعدها بشغل البيت و المطبخ


و صارت كل ما ابي اطلع مع زوجي تتحلطم طلعو و تتشكا ل ولدها قالي اذا بتطلعين قولي لها
مع ان مالها دخل وانا ما اروح الا من شقتي الى امي ف صرت اذا بطلع اقول لها و امر من قدامها عشان ما تقول اني اتسحب


خلصنا من هاذا الموضوع اجى موضوع ثاني
زوجي ابتداء شغل في الخبر يغيب طول الاسبوع
و يجي الخميس و الجمعه
يجي ليلة الخميس و يجلس معي فيها و ب النهار يقضي وقته مع اهله و اليوم الي بعده مع اصحابه
انا ما يجلس معي في ذا اليومين الا ب الليل
وقلت عادي مراعيه ضروفه وقته برا و جاي يبي يشوف اهله واصحابه
اتفاجى ان امه تتكلم علي قدام الحريم و قدام امي و زوجة عمي
و تقول لهم اني انا سارقه ولدهم منهم واني مانعته يجلس معهم بلعتها وسكت قلت مو مشكله


طبعا انا من عشاق المنتديات و الفوتشوب
و الوقت الي زوجي مو موجود اجلس على النت
احيان خواته ثنتين يجون جنبي
ف مره كنت رايه بيت اهلي و جالسين نتعشى
ورن جوال ابوي و اذا هو ابو زوجي
وقفل ابوي و طالعني وقالي بنات عمتك ما ابيك تكلمينهم
قلت له ليش ايش صاير
قالي ابوهم يقول انك انتي معلمتهم على دردشات و يكلمون شباب
وانا والله مالي في هاذي السوالف
قالي ابوي انا اعرفك و واثق فيك ... الحمد لله ان اهلي يعرفوني


صرت ما احتك فيهم كثير


المهم هم من عادتهم يجتمعون كل خميس
الكبار في الصاله الكبيره و البنات في الغرفه
طبعا البنات في منهم المتزوجات
والي ب الصاله يجلسون هم الجدات
انا انزل واسلم عليهم الي ب الصاله و ادخل المطبخ اذا فيه شي اساعدهم فيه اذا مافي اروح عند البنات


ف في يوم من الايام كنا جالسين ب بيت عمي
وجات عمتي ام زوجي وجلست تتكلم عني وانا اسمع و ساكته وفيني الصيحه و عقب ما طلعت
امي و مرت عمي طبو فيني
من ضمن كلامها قالت لهم بنتكم ما تجلس مع الحريم تروح تجلس مع العيال الصغار
قلت ل امي يعني بناتها الي اكبر مني و متزوجات بزران هاذا هم داخل ب الغرفه وجلست اشرح لهم
قالو ليش ما تتكلمين قدامها


وتعداء الموضوع على خير و ك العاده نخلص من شي يطلعون لي في شي ثاني


اذا شافوني نزلت للمطبخ كلهم يطلعون و يتركون المسئوليه علي وانا اقول عادي مافيها شي كله طباخ بس انقهر لما يقولون ان اهم الي طابخينه مو انا
وانا من طبعي ما احب اتشكا واقول ل زوجي عن اهله والي يسوون فيني
علشان لا تكبر المواضيع واسكت واسكت
على كل الي يسوون


بعدها بفتره حملت ب بنتي الولى وانا علاقتي مع زوجي جداً حلوووه و ممتازه و حملت ب بنتي الثانيه ب الغط وانهرت بسبب ان بنتي اصغيره وتعدت المرحله والحمد لله و لاكن مازالت العلاقه مع اهله مو كويسه وانا مخبيه ع زوجي
مع اني احاول اني ارضيهم بقد ما اقدر بس هم كارهيني من البدايه لانهم يبون يزوجونه وحده ثانيه مو انا
واهلي و عمامي كلهم عارفين ان السبب من عمتي و بناتها و دايم يقولون لي اصبري






نجي ل اخت زوجي الكبيره


زوجي عنده اخت اكبر منه اااه ي قلبي هاذي لو تموت الدنيا تصير بخير
والله حيه عقرب امشيه البيت كله ع كيفها
حتى امها و ابوها يخافون منها
اقسم ب ايات الله اني صادقه في كلامي جعلي اموت لو اكذب
مره قمت من نومي على صراخ رحت اركض نزلت
ولا اهي مستلمه جدتها تسب في جدتها وتلعب فيها لعب قليلة الادب
و مو بس كذا امها معها والطامه الكبرى
خلت ابوها يطرد امه من البيت وهو يخاف من بنته و طرد امه عشانها
و مو بس كذا مره تهاوشت مع اختها طلعت اختها
من البيت سحب من شعرها بدون عبايه


بتقولون شعلاقت ذا بقصتك
انا بقول لكم
كل الي صار قبل والله يهون كله يهون قدام هاذا الي بقوله
صارت تتحكم ب زوجي بعد واحيان توصلها بينا للطلاق
يعني زوجي خواف يخاف منها ويسمع كلامها بكل شي


انا وهو نكون جالسين مع بعض وحلوين رومنسيين اغيب عنه دقيقه
تفر راسه فرررر
تخيلو زوجي الي كان يحب اهلي صار يكرهم
وما يرضى ياكل من بيت اهلي شي و مايرضى
يدخله ب سببها
ومره كنت رايحه ازور اهلي و بنام عندهم
وكنت طالعه من عنده و احنا مبسوطين و نظحك
جاتني رساله منه اذا ما تحبين اهلي خلينا نتطلق
ف دقيت عليه و تفاهمت معه و عرفت ان اهي وراء
السالفه
حاولت قد ما اقدر اخلي زوجي يطيعني انا بس
مافيه فايده اخته مسيطره عليه ب الكامل


بقول لكم سوالف ب النسبه لي جلطه
بس تعبت وانا اكتب لي باك مع التكمله​

 

[رندا كووول]

عزيزتي انتي ساكنه بشقه مستقله صح
الا يوجد مطبخ بشقتك ؟ام هو مشترك بينكم وتضطري للنزول والاحتكاك بهم.
..
للاسف زوجك شخصيته ضعيفه امامهم وخاصة اخته.
الاستقلاليه هي الحل
....
متابعه معك للنهايه

 

[بعثرة حكي]

عزيزتي انتي ساكنه بشقه مستقله صح
الا يوجد مطبخ بشقتك ؟ام هو مشترك بينكم وتضطري للنزول والاحتكاك بهم.
..
للاسف زوجك شخصيته ضعيفه امامهم وخاصة اخته.
الاستقلاليه هي الحل
....
متابعه معك للنهايه

يا خيتي انا شقتي ب الطابق الثاني و مو كله لي
و عندي مطبخ

بس زوجي ما يبي يشتري لي عزبه طبخ
يقولي نزلي تحت معاهم
واذا ما نزلت امه تسوي مشاكل

تخيلي حتى الفرن يشيلون الغاز منه لان انا الفرن مسلك له و هو تحت
ف يقدرون يشيلون الغاز منه واذا قلت له ابي اسوي شي
يقول تحت خلص غازهم و اضطرو ياخذون غازنا نزلي سوي تحت
بناتي اذا جاعو اضطر انزل اسوي لهم شي تحت

وفي الفتره الاخيره امي وابوي يرسلون لي اكل انا و بناتي
لاني صرت اكره انزل لهم

 

[بعثرة حكي]

نسيت اقول لك ي خيتي ان كل شي ب شقتي تلفيق
لانهم مو راضيين يجيبون عمال يسوون الشقه
ابوه تكفل ب تسبيك و تسليك الشقه وكل دقيقه مخترب شي
ما شاء الله ع احظ الحلو

 

[بعثرة حكي]

اكمل لكم قصتي


انا و زوجي كنا مقررين نروح شهر العسل
ل ماليزيا
لاكن ب تئثير من اخته و ابوه ما رحنا
قالو له انه ماليزيا بلد كفار انقهرت انا


طبعا بعد ولادتي ب بنتي الثانيه بعدها ب كم شهر طلعت بعثه ل زوجي ل امريكا
ف هم ما اعترضو مع انها بلد كفار
بس على ماليزيا اعترضو عشانها شهر عسل


لما اجا وقت السفر ضاع مفتاح شقتي
المهم سافرنا الى امريكا
وكل اشوي تجيني اخبار ان اهله داخلين شقتي
و يلعبون فيها مع اني مقفلتها ب نفسي ب مفاتيحه تخيلو اخر مره دق علي اخوي
و يقولي ان صديقه داخل شقتي
وامي وبنات عمي دقو علي و يقولون ولد جيرانا الصغير يتكلم ويقول انه داخلين شقتك و يلعبون فيها


انا انصدمت وكنت محتاره اكلمه او لا
لاني صراحه عندي صور و ذهب الخ مابي افقدها
وهم عندهم اهل زوجي عنده عمه تتعامل ب السحر والعياذ ب الله ف خفت
ولا اخفي عليكم انه اختفا علي شريط زواجي
و ما خليت مكان ما بحثت عنه ما حصلته


ف قررت اخيراً اني اكلمه
ف رحت ب هداوه لان ما ابي نتهاوش
قلت له اني سمعت ان الشقه مفتوحه والعيال تلعب فيها وولد جيرانا بنفسه قال
تخيلو بس قلت كذا طب فيني و يصرخ علي
انا قلت له. انا ما جبت شي من عندي الكل يتكلم و يقول كذا
سحب الجوال وسواء نفسه بيدق على هله وقالي ما يردون
وانا مشيت من عنده


و مازلت اسمع انهم داخلين شقتي
لما رجعت للسعوديه ب اجازت الصيف و دخلت الشقه
ااه الله لا يوريكم اقسم ب الله زباله صايره
ما خلو شي ما لعبو فيه غرفة نووم مكتب مطبخ
وصخ واوراق واكل بكل شي
المايكرويف وصخ
و شاف كل شي بنفسه وهو عارف اني ملمعه الشقه بنفسي قبل نمشي و عارف ان اهله مسويين كذا بس يسكت عنهم
ولو اتكلم يقلب الموضوع علي و يقولي نتطلق
واجا ولد عمه الصغير .. ولد عمه حيل متعلق فيني ودايم يجي يجلس عندي
قالي كل شي و قدام زوجي انهم دخلو و لعبووو الخ


قالي ابوي تكلمي معاه ب هداوه و حاولي تتفاهمين معه
جلست اتكلم معه وما زال مصر ان اهله صح و هم ما سوو شي ب الشقه
وبعد لف ودوران غير مفتاح الشقه


ولما اجى موعد سفرنا ل امريكا قالي فيه تصليحات ب التسليكات حقت الماي بخلي المفتاح عند ابوي عشان يصلح
وانا من داخل فاهمه قصده يبي اهله يدخلو الشقه
و سافرنا ل امريكا


الي ما توقعته الحقيره اخته الكبيره
جابت زوجها و سكنته في شقتي طوال الفتره الي غايبيبن فيها
جعلها ما تتوفق ادعي عليها من حرقة قلب
تخيلو احد غريب ينام ع فراشكم و يستخدم اغراضكم
حتا قمصان النوم حقتي الحقيره لابستهم
و كان عندي فستان ليلة ثانيه ساري عندي مفصلته ب 4000 ما لبسته الى مره
رجعت له و شفته مشقوق و شناطي مختربه
والاحذيه حقتي مستخدمه


ورجعنا من امريكا بعطلة الصيف الثانيه
وقمة الوقااحه فيها مسويه نفسها فاتحه الشقه بس عشان تنضفها واهي والله حيل وصخه
تخيلو اخذت المفرش حق السرير ودته المغسله
و رمت الفاتوره علينا تقول انا شفته مغبر و قلت اوديه وانا بمووت من الغيض
و دليل على انها داخله شقتي
انا مخبيه ملابس بناتي الي صغرو في الدولاب
كيف عرفت مكانهم و قالت لي يا فلانه انا ابيهم ل بنتي


و مو بس كذا في اشياء ب المطبخ فقدتها و عطورات بعد


وربي يا بنات صرت اكره الشقه اذبحوني ولا تجلسوني فيها
صرت احس بضيقه اذا دخلتها و ب ئكتئاب و ما احس براحه


و زوجي الي كنت احبه يوم عن يوم صار يقل حبي له


انا هنا وصلت حدي قررت اشوف حل
ف قالت لي امي اجمعي كل اغراضك الي من ملكك والي شاريها ابوك وانا لك و حطيهم في غرفة و غيري المفتاح و قفليها
بسرعه نفذت الفكره قبل اسافر
شلت الاطقم حقت المطبخ الي مهديني اياها جدي الله يرحمه و المايكرويف و برادت المويه و الفرن
لان كل هاذي ملكي ابوي شاريها
ما خليت شي ما شلته ما عداء الاشياء الي من ملكه اهو


جيت ل تغيير مفتاح هاذي الغرفه وكنت ماخذه اخوي الصغير معي يساعدني
والله قدام اخوي جلس يهزئني و يصرخ علي
<<< اكيد يعصب مو انا شلت كل شي مهم ب الشقه شلون يجلسون اهله فيها


بس طنشت و ما اهتميت


خل يعطيهم مفاتيح الغرف و الشقه عادي اهم شي ممتلكاتي الخاصه ب الحفظ و الصون


و صارو كل سنه اذا بنسافر يعطي اهله مفاتيح الشقه بحجة انهم بيصلحون الحمام


خخخخخخ حتى لو بيبنون قصر مداهم يبنونه في 5 سنوات


اخر مره الصيف الي طاف انا نزلت بدري
لانه من العاده ننزل قبل رمضان ونمشي بعد عيد الفطر
بس هاذي المره اخذت بناتي و نزلت مع صديقتي قبل رمضان ب 3 شهور وهو جلس ب امريكا
و كنت جالسه في بيت اهلي
طبعا و ادري ان الشقه مفتوحه
بس للحين ما رحتها والله مالي نفس واحس انه ودي اموت لو رحتها اذا قالت لي امي روحي اتضايق
بس قبل يجي اهو و لاحظووو انه الشقه مفتوحه طول ادوقت وانا ب امريكا و انا موجوده و رحت انا في الاسبوع الي بينزل فيه زوجي و نضفتها


وقدام خواتي وابوي وبنات عمي لانهم جايين ينضفون معي
اقسم ب الله باب الشقه مفدوق << مادري اذا فهمتوها
و المكان وصخ و تلفزيوني و الطاوله حقته ما شفتها
في هدايا تماثيل عاطيتني اياها صديقتي منكسر
الجدار حق الصاله منكسر
الحمام وصخ والاهم شايلين البانيو حق الحمام الصغير و نسويين لي واحد ب البلاط و بنصه بيب طويل ما يروح منه الماي
نضفنا الشقه و رحت لهم ابي تلفزيوني
ايش قالو احنا كنا بنضف صالتك و ما عرفنا ننضفها و وخرنا التلفزيون
خخخخخخ اقولكم ايش المضحك الصاله كبيره وفاضيه و التلفزيون صغير و ع طاوله صغيره
ينحط بنص الصاله و تتنضف عادي
بس هم كانو يبونه واخذوه


نكمل الموضوع ابوي قالي صوري كل شي عشان لو تكلم تورينه
و علمني بعض الاشياء
و طبعا مستحيل نخلي باب الشقه كذا ابوي صلحه و عطاني المفتاح
و قررت اني ما اعطي زوجي المفتاح
لانه ما يقفل الشقه ابد حتى اذا يطلع لازم يخليها لهم


بعد ما رجع من امريكا و جلسنا شهر رمضان
و طبعا لا يخلو من المشاكل وانا مازلت مخبيه مفتاحي مابي اعطيه مفاتيح
ايش سوى انتضرني انام واخذ واحد من المفاتيح
انا حيل عصبت بس ما بينت له رحت اتكلم ل خواتي
و يوم بنسافر قال بيعطي اهله المفتاح عشان يصلحون الحمام وقالي انهم ما قدرو يصلحونه لاني مقفله باب الشقه


انتو ملاحضين انه طول السنه مفتوحه وبس ب الاسبوع الي بيجي اهو فيه قفلتها
ههههه يعني ما كان بيتصلح الحمام الا في ذا الاسبوع شي عجيب


المهم انا رديت عليه ب هدواء
قلت له اول شي الشقه مفتوحه طول السنه
وحتا وانا موجوده ما قفلتها والباب اساسا مفدوق
و ابوي صلحه في الاسبوع الي انت بتنزل فيه
وحتى لو كانو يبون المفتاح
هل جاو و قالو لي يا فلانه احنى نبيه عشان نصلح وانا رديتهم وقلت ما بعطيكم
هو سكت ما عرف ايش يرد و ك العاده هاذي السنه اعطاهم المفتاح الي سرقه مني
الله اعلم هاذي السنه ايش بيسون ب الشقه



طولت عليكم اكمل لكم بعدين
واسفه ع الاطاله​