ارشدوني هل تصرفي صحيح
انا شرط زواجي بيت مستقل
ولما كنت ببداية زواجي كننا بمدينه بعيده عن اهله واهلي وسكننا بشقه مفروشه بحجة ان مامعه مال يأثث ويستأجر سنوي
وبعد ماانتقلنا لمدينتنا اللي فيها اهلنا سكنني بجناح ببيت اهله فوقهم وبدون اثاث الا قطع تمشي الحال ,وفيه امكانيه ان تكون مستقله لان له باب على الشارع يعني مستقله بس امه هي صاحبة البيت وقفلت الباب ورفضت ان اكون مستقله ورفضت خروجنا ببيت مستقل , بحجة انه حالي حال زوجات عيالهم الباقين اللي ساكنين ببيتهم , لانهم من العوائل اللي مايعترفون ببيت مستقل, وهو طبعا يتعذر ان مامعه مال كافي عشان يسكنني ببيت مستقل يعني يستأجر , لاحظوا رغم انهم وافقوا ووقع زوجي على الشرط , وبعد الزواج تصرفوا مثل مايبون
وتعذبت من تدخلهم بحياتي بدخلاتي وخرجاتي وبكل شي اشتريه يزعلون من تصرفاتي اللي ماتعجبهم ويهاوشون زوجي ليش توديها وليش تجيبلها وليش تشترون وليش وليش هذا غير دخول جناحي بغيابي وغياب زوجي ولما تكلمنا انكروا وصارت براسي طلعت اكذب عليهم واتهمهم تهم باطله
وانحرجت ومااستفدت شي ,غير تكذيبهم لي وكذبهم علي ... وش اقول وش اخلي , الله يعين بس
اكره بيت الحموله ... قال ايش قال بيت الحموله بيت البركه الا والله بيت المشاكل
المهم الزبده اني اقترحت على زوجي اني اساعده بالمال ونستأجر ونخرج اول مره تردد ورفض يأخذ مني مال وبعد الحاح مني واقناع وبعد مالاحظ نفسيتي تعبت وعلى قولته صرت عصبيه ومااتحمل شي وبكايه دمعتي قريبه
وافق بس يرد لي المال يعني ماياخذ مني بس سلف المهم وبعد ماقالوا عن اعانة حافز انهم بيصرفون لي احس انه تشجع زياده انه نطلع وصار يبحث معي عن شقه مناسبه
وصار يقول انه مافيها شي المرأه تساعد زوجها بعد ماكان رافض قطعيا انه يأخذ من شي
انا الحين بين نارين بين العيشه اللي عايشتها ببيت اهله ماني متحملتها وخايفه على نفسي يصيبني ضغط او سكر او اي شي لاسمح الله
وبين انه يتعود علي اني اعطيه المال بكرى يصير يعتمد علي بكل شيء
ماني عارفه كيف اتصرف ؟ اريح نفسيتي واستقل ببيت مع زوجي وارتاح ؟ او اكسب اعتماد زوجي على نفسه بتدبير المال ؟
للعلم اني صار لي 3 سنوات زواج الى الحين ماصار لي بيت ولا اثاث مثل اي عروس مع انهم مرتاحيين ماديا بس بخلاء
