زوجي مطوع وانا فري

[رينــــاد]

السلام عليكم
كيفكم
اول مشاركه لي بالمنتدى لاني قريت مشاركاتكم واعجبتني ارائكم فحبيت اسدح قضيتي

انا متملكه لي تقريبا 3 شهور زوجي مطوع بس في البدايه احسه فري مدري اذا كان يسايسني هو يدري وسامع عني ان مو ملتزمه واصلن ماشترط على اهله لما كان بيتزوج انه يبي ملتزمه

في البدايه هو يتابع برامج بالتلفزيون وكذا مره اكلمه بموضوع اللبس واقوله انا احب اللبس المشخلع ويقولي اذا لبسك داخل نطاق حريم عاتي لبسي اللي تبين وبزواج اخوي كان فستاني مره عاري الظهر والصدر والفتحه لنص الفخذ وشاف فستاني ومانتقد علي ابد ولا قال شئ بالعكس اعجبه الفستان وبالملكه بعد كان ثوبي عاري يعني بلبسي الى الان مريحني وتناقشنا بموضوع العباه وقالي انا ماحب اللي تلبس عباه على الكتف وانا وافقته الراي وماعندنا اي مشاكل

الوضع بالاول تمام
بس هالفتره حسيته بدا يكش عن انيابه وبدا يتامر علي وانا ديني ودين اللي يفرض علي سوي كذا ومن بكرا ابيك تصيرين كذا الــه انا مو ادميه ولي كياني

مره حطيت صوره بنت لابسه عاري بالبلاك <<على فكره معي باللسته اخوي <نشبه

فتح لي محاضره وغيرها وهذي صوره ماتحطها وحده متربيه زيك ومن بكرا ابيك تكونين طالبه علم وام فاضله لاولادك وابيك تكونين حافظه القران >>سلامات ليش مادور هالبنت لما جا يخطب

انا ماناقشته سايسته كله اقول اوك ماشي بس بيني وبينكم شايله عليه بهالسبب انا لما بتغير اتغير علشان ربي مو بهالاسلوب كاني عسكري واخذ اوامر مابي اتغير على شان احد

شكلي بتعب معه بحياتي كثير
قولولي ايش الاسلوب اللي ابي اتعامل مع هالادمي فيه؟​

 

[أم ميسوـوـو]

ليش وافقتي عليه من البدايه داامك فررررري

!!!!!!!!!!​

 

[مدمنة صبر]

اول شي تلبسين لبس الى الفخذ وفي زواج !!! وين تقوى الله والخوووف منه
وليه الفخذ يعني انتي تبين الناس يقولون يازين فخذها !!
معليش بصير معك صريحه انا اذا شفت البنت هذا لبسها اعطيها اكس فما بالك بزوجك ويشوفك تبينين فخذك لحريم وش بيسوي اكيد بغار وبياخذ عنك فكره ما ادخل انا بالنوايا من يوم عصب هو من هذا الاسلوب

ووصورة اللي في البلاك بيري ما تخافين يشوفها ويحبها ويغير راييه فيك !! البنات يتعبون اذا زوجها شاف صورة بنت

اما عن تحفيظ القران هو حافظ !! ؟ قولي له ان شاء الله تحفظني انت واضحكي

الله يسخره لك

 

[خلود بكر]

الله يصلح الجميع اختي سؤال ام ميسو صح ليش وافقتي بالمتلزم دام انتي غير ......وعذرا على الكلام الي بقوله الي جالسه توصفيه انه فري هذا ياعسل مو فري مااعرف اصلا اش يعني فري هذا اسمه شئ مخالف للفطره يعني مخالف للحياء طريقة فستانك ولبسك خطأ ممكن انتي اخلاق بس الحياء لازم منه اشوي وغير كذا العين حق وطريقة لبسك تجلب لك العين ممكن هذا اللبس يكون له حظ في الحشمه شوفي مابقول حرام ومااعرف اش لان ماابغى ادخل بلاحكام بس بقولك الحياء شعبه من الايمان اصلح الله الجميع ومن ناحية زوجك صدقيني مو المقصد انه يفرض او يؤمر بس لانك زوجته ومن المحبه بيغير عليك لاتخلي الشيطان يدخل من باب ان والله مااسمع كلامه عشان هو عارف انا كذا وانا ماحد يفرض رأي علي لا ياقلبي قولي لنفسك الحمدلله رزقني ربي بواحد يعيني على الخير ويساعدني عليه ولا جاني واحد مايخاف الله فيني

 

[دفاا سنيني]

مع رأي البناااااات

 

[مون الليل]

اختي لما قلتي انه مطوع توقعت بيكون تصرفات كبيرة فيه بس بالعكس الرجال جدا عادي ومتوسط لان المطوع الي تقولين عنه مستحيل يقبل يتزوج اي وحدة الا اذا تاكد عن التزامها 100%

حلو تكون عندك افكارك وقناعاتك بس مو لازم تكون هي الصحيحة .. الافكار الي قد تنطرح عليج ممكن تخليج تكونين افضل فلا تظنين الموضوع هو فقط تحكم .. اخذيه من باب المنطق .. بالنسبة للبس مثلا اذا كان بهالصورة فاضح قد يعود عليج بالضرر والسالفة مو سالفة تطوع ( لاني مو مطوعة ) بس هذي مفاتن جسمج وحتى لو انتي بحفلة نسوان الا ما بيطالعون في جسمك وقد تصيبج عين وتالي تتحسري على جمال جسمك الي فرطتي فيه وكشفتيه
بعدين فعلا كلامه صحيح انج تحطي صورة بنت لبسها عاري هاي يعطي الاخرين انطباع عنج مو حلو وبيفكرون عنج افكار مو زينة
تعوذي من الشيطان واسمعي كلام زوجك لان كلامه صحيح ومايعني انج لما تسمعين كلامه تنازل منج بالعكس هذا لصالحج

 

[nona--]

بكرى لو تتزوجي واحد فري زيك
يلبس طيحني ويدخن ويحشش وما ترك بنت ماغازلها عرفتي ليه خطيبك يسوي كذا​

 

[رينــــاد]

حبيباتي القضيه الحين مو قضيه اللبس لان البس ماعارض عليه ابد صحيح ان البس عاري وربي يتوب علي ان شاء الله
انا وافقت عليه باصرار من اهلي وعلشان عمتي والا انا اصلن مابي اخذ مطوع

اللي فاقع كبدي قضيه ابيك تسوين كيت وكيت وكيت ..ماحب هالاسلوب ماصار لنا الا ثلاث شهور متملكين وكذا يعاملني لدرجة وريت وحده من صديقاتي المحادثه اللي صارت بينا قالت شفيه قالب عليك وايش هالاسلوب واذا من اولها كذا ينعاف تاليها
الحين كيف امشي معه بالمسايسه والا اقول لاتفرض علي شئ ما ابيه المصيبه اني بسكن بعييييييد عن اهلي يعني غصب علي بخضع لاوامره وهذا اللي مابيه

 

[براءه طفوله]

الله المستعااان
احمدي ربك على هالمطوع على قولتك لا يجيك واحد يوريك الـ الفري على اصولها​

 

[رينــــاد]

هههههههههههههههههههههههه ياحبي لك يا براءه

الله يسلمك على المرور

 

[shroofh]

ليش ماتبين مطوع لان ملتزم بدين الله

وبيساعدك ع التزام بدينه

خلاااص ماتبينه اتركييه ودوريلك ع واحد فري

لا تقولين يتحكم وماادري ايه

مافي رجال مايحب يتحكم ابد خصوصا بالبدايه سواء مطوع او غيره

فاذا حسيت انك مو مقتنعه اتركييه يمكن يجي وااحد يوافقك ع لبسك

وع الصور ويمكن يصير يرسلك مقاطع وتصيروا فري وتفلوها


الله يكتب لك اللي فيه الخير

 

[دلوعةزوجي]

ريناد
والله وكتاب الله انك في نعيم لو فعلاً زوجك ملتزم
خذي لفة بالمنتدى وتشوفين اثار الفري
حبيبتي توك صغيرونه ومشكلتك تبين تعيشين قصص الف ليلة وليله تبين تكونين الاميرة المدللة
وبأذن الله تعيشينها مع زوجك الملتزم
سايسيه ولو علق على شي ذكريه بقول الله تعالى انك لاتهدي من احببت
فهميه انك بتكونين العون له وبتكونين الام الواعيه ولاكن مع التعليم
حبيبتي نصيحه لاتضيعينه من يدك​

 

[المــهــا]

الله المستعاان

الوحده اذا جاها واحد فري قومت الدنيا وقعدتهاا من الغيره والضجر والنكد
وانتي الحين تقولين مافي ملتزم ضاع الحابل بالنابل
يهدينا وياك ويثبتنا على دينه الثاابت ياحي ياقيووم


سبحان الله وبحمده سبحان الله العظيم​

 

[رينــــاد]

والله انكم ريحتوني بكلامكم لو ادري كذا برتاح كان نزلت الموضوع منذ مبطي وماعشت بقلق كل هالفتره وجلست اندب على حظي
الله يوفق كل وحده ردت على الموضوع ويسلم كل وحده فيكم يارب

 

[سنكرس]

أختي ريناد :
الله أنعم عليك بنعمةٍ عظيمة وهي هذا الزوج الرائع الملتزم بتعاليم دينه فاحمدي الله واشكريه على هذه النعمة وحافظي على زوجك فهو يعتبر عملة نادرة في هذا الزمن
الغريب .
أبحري عزيزتي معنا في هذا القسم من مملكتنا مملكة بلقيس واطّلعي على مصائب الزوجات المتعددة بسبب
أزواجٍ لايحرّمون حراماً ولا يخافون الله وانظري إلى حجم الخيانات التي تتنوع مابين شرب خمر وعلاقات محرّمة
وزنا وكبائر تشيب منها ذوائب الأطفال ، حينها ستدركين انّك بنعمةٍ عظيمة اختصّك اللهُ بها دون غيرك فحريٌّ بك شكرها وذلك بالسمع والطاعة لزوجك الذي تتمنّى كلُّ
أنثى ان تقترن بمثله (ماشاء الله تبارك الرحمن)
جعله الله قرّة عين لك وجعلك سكناً له ووفقكما لكلّ مايحبُّه ويرضاه.

 

[صبا النجديه]

السلام عليكم اختي العزيزه اسمعي نصيحتي انتي في نعمه اشكري الله عليها ان رزقك بمن يملك اغلى شي في هذه الدنيا الفانيه الا وهو الديننننننننننننننننن في زمن كثر فيه الفتن خطيبك كلامه يدل على انه يغار عليك ويحبك لو مايحبك ان قال هذي البنت لاتصلح والي جابك يجيب عشره غيرك ممن تريد العفاف والستر والله اني اعرف كثير غيرك حافظات للقران ولم يتزوجن واعمارهن في الثلاثين احمدي الله وغيري من لبسك وابهري خطيبك بتغيرك لانه في النهايه لايصح الا الصحيح وفقك الله وانار بصيرتك بنور الهدايه والصلاح

 

[doonat]

ليش يابنات قمتن عليه انا فهمت وش تقصد بالضبط لان يوم من الايام كان شرطي مابي مطوع وابي عادي بالرغم انه تقدملي كثيير مطوعيين والحمدلله اخذت واحد عادي وبالنفس الوقت حافظ دينه00000الي ابي اقوله لك ياريناد مو كل ملتزم شديد او كل فري يخليك على كيفك انا اعرف واحد واحلف بالله لو اقولكم فلان كل الي بالمنتدي يعرفوونه هو امام مسجد بس تبارك الله تعالي شوفي حياته مع بناته وزوجته سفريات كل شي عادي بحدوود الدين وفيه واحد فرييييي تعالي شوفي حيااته كل شي ممنوع حتى النقاب ممنوع حتىاذا نزلت السوق لازم ماتنزل الشنطه معه تخليها بالسيااره--وبنفس الوقت اذا طلعوا لحديقه عامه وهم جالسين يتقهوون لازم العبات على الراس ممنوع تطيح على الكتف حتى لو كان مافيه رجال00000الي ابي اقولك ياريناد حاوي تعرفين طبعه زييين الرجل سواء مطوع او عادي راح تتعبين معه ببدايه الحياه بس حبه حبه راح تفهمينه وتحبييينه وتغارين عليه من نسمه الهواءخخخخخخخخخخ

 

[خلود بكر]

ياعسل لاتوري احد ايا كان كلام زوجك لك سواء نصيحه او سب او اي شئ الي يجي يحرضك على زوجك هذا ماحد يقوله شئ مااعرف انا من وجهة نظري الي يحبني اما انه ينصحني ويهدي من غضبي او يسكت افضل لايجي ويحرضني وترى الثقه الي تسويها بين صحباتك وربي خطأ الا اسرار الي بين الزوج وزوجته ماتدخلي احد نهائي

 

[boli]

حبيبتي اسمعيني وخذي تجربتي انا كنت مثلك فري زي ما تقولي تزوجت وانا برضو فري وزوجي للاسف اكتشفت انه ابدا ما يصلي حتى برمضان الله يهديه وتوالت الخيانات والافلام الاباحية وبعدين انا التزمت ولله الحمد وكل ما انظر لنفسي زمان في الصور بصراحة اتقزز من نفسي والحين انا لما اشوف رجل مقصر ثوبه وملتحي ورايح المسجد سبحان الله احسد زوجته عليه واقول ياربي اهدي زوجي واتمنى اشوفه كذه يعني بعد كنت فري الحين اتمنى تراب رجل ملتزم على الاقل يصلي ويغض بصره بكره تاخذي واحد فري يبصبص هنا وهناك ويتفرج قنوات اباحية ويعمل شات مع بنات ويطلب منهم يتعروا امامهم يعني سكس فيديو كول ومهما كنتي جميله ومهما عملتي ولا حتى طرتي المريخ ورجعتي ماراح تهزي فيه شعره وتتعب نفسيتك وتدمري وفي الاخر ما راح تلقي ملجا ولا باب ولا احد تحطي عليه حمولك الا الله وصدقيني راح تلجئي له وانتي خجلانه من نفسك وضعفك وقلت حيلتك وتتذكر كيف كنتي تجاهري بالمعصية وتقولي بكل بساطة انا فري فري يعني تجردتي من حيائك ومن فطرتك ومن حجابك وبدلتيها بالفري تبعك والله بكره تعضي اصابع الندم مثلي اقولك نصيحة الرسول صلى الله عليه وسلم قال من اتاكم ترضون دينه وخلقه فزوجوه ياريت لو عملت بنصيحة احسن الخلق ما كان هذا حالنا مهما كتبت مقالات هنا ماراح يعرف الطعم الا ذايق الكاس
اتمنى اختي انك تحكمي عقل خذي رجل يخاف الله فيك ويراعي الله في تصرفاته وياخذ بيدك للجنة ويعينك على طاعة الله وعبادته وتجيبى ذريه طيبه تحفظيهم القران وتبعثي يوم القبامة لابسة تاج لانك ام لحفظة كتاب الله اسأل الله لك ولي ولجميع بنات المسلمين الهداية الكاملة ووفقك الله لما يحب ويرضى ​

 

[أم المشائخ]

حبيبتي احمدي الله على نعمة الزوج الصالح ولا تأخذك العزة بالاثم والحلال بين والحرام بين واحيانا تكون الاسرة التي نشأ فيها هذي الأشياء من اللبس عاذي يلبسونها فاعتادها لمجرد الاعتياد وليس لحرام او حلال واعلمي يا أخيتي ان صديقتك الي قالت لك ليش قالب عليك لو خطبها ما راح ترفضه المفروض تكون مرآة لك تبن لك الصح من الخطأ لأن المؤمن مرآة أخيه هذا اذا كانت تحبك ونصيحة أخيرة لا تطلعي الصديقات على علاقتك بزوجك وحياتك الزوجية واستعيني بالله ان لم يكن لك اخت ناصحة متفهمة تثقين بحكمتها ودينها متمنية لك حياة سعيدة معمورة بطاعة الله مع زوج محب