أبا أتطلق خلاص

[ام سعييد]

خلاص وصلت حدي ومليت و زهقت وكرهت حياتي

يقولون : الزواج = الاستقرار <<<<<<<<<<<< كلام فاضي

الزواج = هم + غم + تعب + ملل + ضيق + تعاسة

بعد 3 أيام بكمل 7 شهور عزواجي ( مادري اذا هذا زواج واللا شو بالضبط ) وانا عقب ما كملت 3 شهور وفكرة الطلاق فراسي ..

قمت استشرت استشاريين في الامارات والكويت وكلهم نصحوني بالطلاق قبل لا يصير في عيال
قالولي لحقي عمرج وانفصلي عنه ألحين .. بس انا كان عندي أمل انه بيتحسن بس للأسف

وانا تعبت والله تعباااااااااااااااااااااااااااااااانه وحالتي النفسية زفت والحمدلله وماقدر آكل ولا أشرب
وزني في النازل .. وكآبه مو طبيعية وطفره وضيق .. والضحكة حتى نسيتها

 

[M!ss-Me]

ربي يعينج "مادري شو فيهم ريايل هالزمن"
قوي ايمانج بربج ....... والمفروض اتكونين حريصة من ناحية الحمل اذا انت فعلا ناوية على الطلاق...

 

[ام سعييد]

كنت اقول يمكن حملي بيغيره بس الحين ماظن

كل اللي يفكر فيه هو نفسه

الحمدلله اني للآن ما حملت

ابي اقولكم قصتي بس متضايقة الحين وماقدر اتكلم فيها لاني مليت منها ومن نفسي واسلوبي

 

[كفاني عذاب]

لازم باول الحياه الزوجيه تصير مشاكل بس انتي طولي بالج توكم ماكملتوا سنه احسن شي تحاولين تتفهامين مع زوجج ولاتفكرين بطلاق ترى ماله داعي السرعه بالانفصال انتي جربي وحاولي تسوين كل الي تقدرين عليه علشان ماتندمين وتقولين ياليتني حاولت وزين تسوين تأجلين موضوع الحمل والله يوفقج ويهديلكم حياتكم

 

[شمعه قطر]

قولي حبيبتي قصتج عشان نفهم ويمكن الطلاق مو حل

ننتظرج

 

[أميره]

في انتظار قصتك اختي يمكن نقدر نساعدك ...

 

[فراشة ملونه]

حبيبتي .. الله يعينج ...

هو الافضل لو نعرف شو الموضوع .. يمكن نقدر ندور لج عحلول ..
اول اشي وافضل شي للتغلب عالضيق الي انتي حاسه فيه والكآبه .. الصلاة والدعاء وذكر الله .. ادعي ربج يهدي زوجج ويسخره لج ..

والشي الثاني .. يمكن مثل ما قالت وحده من الاخوات .. لانكم توكم متزوجين .. يبالكم وقت لتفهمون بعض .. وانا عن نفسي .. احس افضل طريقه للتواصل مع الزوج .. هو مناقشته في الامور الي تخصكم .. وانتي توج متزوجه .. يعني تقدرين تكلمينه في الموضوع وتقوليله عن الاشياء الي تضايقج .. وحتى اذا هو يحس ان فيج شي غلط .. خبريه انج يايه من محيط غير المحيط الي هو عايش فيه .. يعني لازم تحتاجين وقت لما تتعودين على اطباعه .. والاشيا الي يحبها ..

وشي ثالث واخير .. ليش ما تحضريلج بعض من دورات الاستاذه ناعمة .. وان شاء الله تستفيدين .. وتتغير حياتج للاحسن ..

والله يوفج ويسخر لج زوجج .. بس دايما خلج ايجابيه ..

واسفه عالايطاله .. موفقه حبيبتي ..

 

[أميرة بأخلاقي]

و نحـــــن في انتظار قصتـــــك..





أميــرة بأخلاقـــي ​

 

[ام سعييد]

انا قبل كم شهر كتبت قصتي هني بس عقب طلبت انه يتم مسحها

برجع وبكتبها عل وعسى تساعدوني <<<<<<< وانا ادري اني محتاجة اني انا اتغير وبتعرفون ليش من قصتي


السنه الماضية كان مكتوب كتابي على واحد متقاعد بسبب حادث صارله قبل ريلي وبعد مرور شهرين تقريبا عكتب كتابنا طلبت الطلاق
لانه ما يبي يدورله على شغل و من اللي شفته منه انه يبيني اصرف عليه وأزهب نفسي بنفسي ويبيني أتسلف و أطلعله سيارة ولأني انا اللي كنت بطلع البيت باسمي كان يتدلع وين يبي البيت وشلون يبي ديكوره وأثاثه غير هذا كان وايد جنسي وكرهني فحياتي لانه كل سوالفه عن هالاشياء ويبيني أغير صوتي وأرققه وأقوله كلمات وأزقره بأسماء مادري شلون صايرة

المهم انا لاعت جبدي منه وكرهته وطلبت الطلاق وقال لي " الطلاق احلمي فيه انا ما بطلق "
رفعت قضية طلاق .. وكان فكل جلسة مايي المحكمة .. لين حولتها إلى خلع .. وهم بعد قام مايي الجلسات في المحكمة لين أجبرته المحكمة انه يحضر..

بعد مرور 5 شهور على المحاكم والبهذله لأنها روحة المحكمة نفسها تييب الكآبة والضيق من البلاوي اللي تشوفينها هناك

المهم البطل يا هالمرة وانا يبت المهر اللي دفعه وطقم الذهب اللي ما يتعدا 5آلاف وهو يبي 17 ألف بداله لانه عقولته "شبيسوي بطقم الذهب" غير اني يبتله الفلوس اللي صرفها وزيادة فوقها والله تسلف عسب اعطيه ومحد ساعدني من أهلي كنت بروحي في الموضوع ..

والحبيب ما يبي يطلق يبي فلوس أكثر وما يبي الذهب يبي بدالها فلوس .. الحلو انه القاضي كان واقف وياي وكسرت خاطري وشاف هذاك شلون يالس وياي ويطلبني فلوس وانا اقوله اوكي خذ بس طلقني ولكنه كان كل مرة يطمع أكثر ويزيد المبلغ لين صارخ عليه " إنته إيييه بتستغل الموقف .. أوووم أووعد بعيد .. اوووم أوعد هناك في الكرسي البعيد هناك"

خاف وقام يلس بعيد عني .. المهم بالنهاية القاضي طلقني مب هو لانها خلع .. ويلس يدعي علي وهوطالع من المحكمة وانا مسويتله طاف وأمشي .. وهو يأشر علي ويدعي ..

عقبها بشهر خطبني ريلي المصون .. وكنت انا مابي اتزوج ابي أرتاح .. واذا فكرت اتزوج ابي اتزوج واحد اكون عارفتنه زين .. مو مني والدرب .. يتني عقدة .. المهم خطبني هذا ووافقوا عليه اهلي لانه من نفس القبيلة حتى لو ما عنده الجنسية المهم من القبيلة نفسها وخواتي يعرفون خواته ..

عقب شهرين من الخطبة انكتب كتابي عليه .. وتحدد العرس عقب شهرين بعد لانهم اخواني قاموا يخافون اسوي حركة وأفركش الموضوع شرات القبلي .. لأني أصغر اخواني يقولون انا ماعرف احكم على الاشياء وانا دومي أبالغ في الأمور
( ويمكن كلامهم صحيح مادري ) ..

خلال فترة الملكة يلست أقارن بينه وبين القبلي هذا من أولها دفع المهر كامل ودفع فلوس زهبتي غير انه حجز القاعة وكل شي عليه والبيت وأثاثه وكل شي انا بس علي أختار ..
وانا قمت وخبرت ريلي عن القبلي عسب يفهمني انا شلون .. فقال لي " معاشج اني حرة فيه حتى لو تحرقينه انتي اللي تتعبين فيه وانا واجب علي أصرف عليج وعالبيت " .. قال لي وين تبين شهر العسل .. قلتله ماليزيا لانها رخيصة وحلوه بالنسبة للبلدان الثانية بس هو قال لي انه يبي مصر قلتله بالاخير لا مصر ولا ماليزيا خلنا نسير العمره عسب نبتدي حياتنا بشي طيب .. قال لي اوكي

وانا كنت سعيدة أخيرا ربي عوضني بانسان شكثر تمنيته ..

لكن عقب شهر من ملجتي .......!!

 

[ام سعييد]

تصدقون مب قادرة اكتب قصتي ويا ريلي .. أحس بضيق

واحاول 24 ساعة اشغل نفسي بالنت ودخول المنتديات عشان يمضي الوقت ومافكر بشي

 

[بنت المطر2]

الله يصبرج

 

[ام سعييد]

المهم ملجت .. ويوم ملجتي كنت أول مرة اشوفه .. شكله طيوب ويستحي .. حتى يوم دش ما سلم علي ولا شي .. من كثر مستحي .. والشبكة خواته لبسوني لانه الريال اقولكم مستحي .. وقبل لا يروح قال لي سجلي رقمي عندج .. قلتله مب مشكلة طرش مسج وبعرف انه انت .. فسألني "كم رقمج" .. قلتله " رقمي عندك " وانا اطالعه بطرف عيني .. لانه مره دق علي بالغلط من موبايله وعرفت انه هو .. لاني سمعت صوته يسولف وعقب اخته ودقت علي من نفس الرقم ويلست تسأل عن أخباري ..

المهم ذيج الليلة يلست سهرانه اتحراه بيتصل فيني .. وهو بس مسجات ومب متواصلة .. قلت الريال متحمس وبيكلمني .. والله انه سولي طااااااااااااااااف ..

عقب يومين دقلي ويلسنا نسولف .. ويلس يقول لي " انا مالي خص بالنيات ولا عمري كلمت بنات " .. انا قلت فنفسي انا ما سألته عن هالشي بس بما انه تكلم فيه أكيد انك ما خلي ما كلمنها .. هالشي اللي لفت انتباهي غير انه يالس يقول شلون هو عصبي " يعني يبيني اخاف منه هذا قصده " ..

انا مستانسة وسعيدة رجل احلامي وصل .. غير انها ردت فعله كانت حلوه يوم قلتله قصتي ويا القبلي

عقب شهر بالاصح عقب 3 أسابيع سافر ريلي مصر يغير جو قبل العرس .. وفيوم من الأيام دزلي مسج قال لي ابي اتسلف منج 8 آلاف .. انا شفت المسج وتضااااااااااااااااااااااااااااااااااايقت من الخاطر .. قلت ها بعد طلع شرات القبلي
لكني بعد شوي قلت حرام اظلمه هو قال سلف وبيرجعهم ومستحيل كل الناس شرات بعض .. قلتله حق شو تبا الفلوس .. قال فاتورة تلفوني وبينقطع علي التلفون وانا محتاج له عشان شغلي كله بالموبايل وانا مخلي بطاقة البنك بسيارتي ومفتاح السيارة مب عند اهلي واللا انا بخليهم هم اللي يسددون الفاتورة .. قلت حليلة برئ ريلي حبيبي .. وعن طريق تلفوني شيكت على فاتورة موبايله وظهرت انها 5آلاف فسددتها وانا ذيج الفترة كانت اتزهب حق عرسي من فلوسي لانها فلوسه بس كفت الذهب وما حبيت اثقل عليه لانه مب عنده لانهم ناس عقدهم ..

كانت هذي البداية ..
وكل مرة يهددني بالتلفون انه بيضربني بالعصا اذا ما سمعت كلامه واذا سويت اي شي بدون شوره .. وانا اقول شو بلاه هذا يكلمني بهالاسلوب .. وكنت أيلس اصيح كل ليلة منه .. واقوله انا مابيك تمكلمني بهالاسلوب شو تتحراني انا .. انا بنت عرب وناس .. واهلي موجودين .. ويتراجع عن كلامه ويقول لي انه يالس يتغشمر وياي ..
بس انا اللي حسيته انه هو كان خايف مني لاني خالع واحد قبله ويخاف اسوي فيه نفس الحركة لانه كم مرة كررها وعقولة المصاروه " ادبحلها الأوطه فليلة عرسها"..

 

[nonoura]

اكملى ياعزيزتى واللة تشوقت لاعرف كمالة القصة اكملى

 

[ام سعييد]

اكملى ياعزيزتى واللة تشوقت لاعرف كمالة القصة اكملى

هههههههههههههههه فديتج والله كيف اندمجتي فيها:cupidarrow:

بس والله جد احس صعب علي ادخل اكثر فيها قصتي

بشوف نفسي اذا قدرت بكملها وبدخل فيها

 

[أميرة بأخلاقي]

هههههههههههههههه فديتج والله كيف اندمجتي فيها:cupidarrow:

بس والله جد احس صعب علي ادخل اكثر فيها قصتي

بشوف نفسي اذا قدرت بكملها وبدخل فيها

كملي عزيزتي


اكمال قصتك تفتح الباب للجميع انهم يفهمون موقفك و يساعدونك بآراء تفيدك و يشاكونك خبراتهم ..


و بالتوفيق اختي


​

 

[مييم]

كملي القصه الله يخليك عشان نفهم اسباب موقفك منه

 

[~مدمنة قهوه ~]

انتظر البقيه حياتي الله معاج واحنا معاج كملي الغاليه

 

[طيف نجد]

اكملي حبيبتي علشان نفيدك
​

 

[الملكة المتألقة]

الله يفرج همك ......... وهم جميع المسلمين والمسلمات

 

[nonoura]

على مايبدو تريدين تتسليين بحرق اعصابنا كملى وقولى وين المشكلة بالظبط والا بزعل منك