لها أسبوع ونص عندنا ولا تدري وش سالفة زوجها.....

[دلع في دلع]

السلام عليكم ورحمة الله وبركاته....
أهلين يابنات أنا محتاره ما أدري وش أسوي لأختي المتعذبه.....
<<<<< قالت: لزوجها ودني بيت أهلي أنا طفشانه...
قال: لا خليها بكره أنا اليوم بوديك مشوار...
قالت: خلاص وسكتت...
هو طلع من عندها وراح...
هي قعدة تنتظره تأخر ما جاء الا بعد المغرب...
قال: يالله جهزي أغراضك بوديك بيت أهلك....
قالت: وين المشوار اللي بتوديني له....
قال: لا خلاص بوديك بيت أهلك لأني أنا بروح للبر مع أخوياي بكره الصبح....
قالت: خلاص بجهز أغراضي.....
قال: بنمر المستشفى ونسوي تحليل حمل بشوف أنتي حامل ولا لا....
قالت : أنا متأكده أني مو حامل .....
وتقول وداني المطعم وعشاني وهو ساكت ما يسولف معي......
وما تدري وش سالفته>>>>......
نزلها عندنا وراح..... لها أسبوع ونص وهي عندنا....
أكتشفت أنه يكذب عليها ما راح للبر......
لا يكلمها ولا يسأل عنها.......
وكل ما دقت عليه يصرفها يقول أنه مشغول.....
وآخر شي قفل جواله.....
هي تدق عليه وترسل له رسايل .......
تدق على دوامه مايرد عليها.......​

:in_love::sadwalk::in_love:​

وهي الحين لا تاكل ولا تشرب بس قاعده تبكي وكل ما كلمها أحد تعصب ......
وأنهارت علينا وودينها المستشفى.....
وأمي متعذبه معها لا تنام لا ليل ولا نهار.....
وأخواني ما يدرون وش يسوون
خايفين أنهم يتدخلون ويقول هو وش دخلكم.....
هذا بيني وبين زوجتي.......
وأنا ما أدري وش أسوي .........
أبي حل الله يخليكم....
هي ما تدري وش سالفته......
أنا تعبت من التفكير في أختي وزوجها اللي ما تدري عنه....:e136:..​

 

[وردة وحيدة]

حبيبتي عدي كم سؤال ولي عودة ان شاء الله

هي يوم قالتله وديني بيت اهلي .. تقصد انها زعلانة والا بس تبى تغير جو؟

وهل هذه اول مرة تيي البيت والا لا

كم سنة لهم معرسين؟

جربت تتصل عليه؟ لو اتصلت شو الرد؟

 

[دلع في دلع]

لا قصدها أنها طفشانه. وتبي تغير جو....
لا مو أول مره......
لها تسعه شهور....
أتصلت عليه كم مره.....
بس ماكو فايده......
بالبدايه يقولها أنه مشغول.....
وبعدين قفل جواله.......
مشكوره أختي على إهتمامك.....
وش الحل ألحين.....:sadwalk:​

 

[any thing]

الله يكون في عونها بس ليش وداها المستشفى تفحص ادا في حمل ولا لا

 

[الواوا]

مرحبا اختي
صراحه وضع اختك غريب وشكل زوجها ناوي على الطلاق لأنه سألها هل انت حامل
وهو الأن جالس يفكر .
اقترح عليك التالي :
اختك توقف الإتصال فيه نهائيا
تهئ نفسها لموضوع الطلاق وترى يا عيوني الطلاق مو نهايه العالم والله يختارلها اللي فيه خير لها
بعد كم يوم يكلمه واحد من اخوانك الكبار , وبدون انفعال يسأله خير انا شفت اختي وفكرت انك مسافر لاكن شفت سيارتك اليوم في الشارع الفلاني ، وعسى ما شر واذا حس انه براسه طلاق يستفسر عن السبب ويقوله اختي بعيونى وتسوى عندنا والله يساعدك .
الله يكتب لها الخيره ويربط على قلبها .

 

[تلج هش]

السلام عليكم...ارجال شكله ما يباها او هي سوت موقف يبى يأدبها بس بما انه يريد يتاكد انها مش حامل معناته في مشاكل خلته ياخذ قرار انه ما يريدها لازم تراجع نفسها اذا فيه شي ..واذا ما في بس شايف حاله عليها تخلون كبير العايله يستفسر منه بكل ذوق من باب المساعده وذا طلع الرجال بايع ....خلها تبيعه برخيص ...لانه المحترم يكون واضح مع زوجته ما يخليها نا تعرف راسها من ريولها ...والله لا يغث نساء المسلمين

 

[عطر الليل؛؛؛]

اذا هو متعود تقول له بروح اليوم بيت اهلي اغير جو .

فمعناته مو هذي المشكلة ولا يبي يأدبها ولا شي ..

اهي جت بوقتها بنظره فقط لا غير ..

و فعلا شكله ناوي يطلق ..

لانه حتى لو كان ناوي يأدب ..

مو هذي طريقه ويحق لها تأدبه بعدها ..

لكن واضح انه يبي الانفصال ...

جايز يكون بينكم عين لانه احيانا يكون احد الطرفين يحس بضيقه و نفور فوق سيطرته ..

بسبب العين ..

يقاوم ويقاوم وفي النهاية يتعب ويقرر يبتعد ..

ولا يدري انه فيه شي اسمه رقية شرعية وقرآن .

بعض الرجال يطلقون بدون تفاهم ويكون السبب العين ...

وبعضهم تكوني مو اللي بالراسه ...

مو ذنبك طبعا انك مو اللي براسه ..

وفي كل الاحوال اهو غلطان وستين غلطان ...

و الزم ما على اختك صحتها وشبابها ..

واذا هو بايع ..

تراها توها بعدها عروس وتنشرى من جديد لواحد كفو يقدرها ..

في هذا المنتدى تأكد لكم ناعمة الهاشمي انه ما تتعلقي بالرجال لو كنتي تموتين فيه ..

وما تبينين له حتى ..

وقفي اتصالات

ورتبي امورك على الانفصال وهيئيها ...

واذا رجع بعدين ...

لازم تأدب ..

لان هذي مو طريقه ...

وبعدين لازم يتدخل احد اخوانك بالموضوع ..

وماله حق يقول بيني وبين زوجتي ..

لا

ماعاد الموضوع مشكلة خاصة ...

 

[وردة وحيدة]

الله يكون في عونها ويكتب لها الخير

الريال واضح انه ناوي يتركها فترة وما يبى حد يلومه لو حامل واستبعد شوية الطلاق لانه لو يبى يطلق طلق، لكن اسلوبه وخاصة التهرب شكله تأديب او تسلط

في بالي حلين واختج ادرى بطبيعة ريلها وظروفهم

الاول ان ابوج او كبير البيت ياخذ اختج يوديها بيتها وييلس يين ايي ريلها وما يناقشة بأي شي بس يردها ويقول عادة البعد بين الازواج مب حلوة لا تتعودون تبعدون عن بعض وايد .. وساعتها الكلام بيبين اذا الريال في خاطره شي

الحل الثاني ان بعد كبير العايلة يتصل عليه يعزمه على غدا او عشاء ويكون الوضع طبيعي جدا وبعدين يقوله شل حرمتك وسير بيتكم والمرة الياية يوم تيي بنتنا تزورنا تيي وياها ترى نستانس بشوفتك او من هالقبيل

اختج خلها تاخذ موانع حمل لين ما نشوف سالفة ريلها على شو ناوي .. وبعد حاولي تضغطين على اختج شوي .. يمكن في مشكلة بينهم وهي ما تبى تقول .. طمنيها انج بتحفظين سرها وما بتخبرين حد بس لازم تعرفين علشان تقدرين تتصرفين

واذا ردت عنده لازم تناقشه بهدوء وتقوله ان تصرفه مب حلو و حسسها انه ما يباها وفشل عمره جدام اهلها وان ما تبى تيلس مع ريل غصب عنه.. والمفروض يكون بينهم صراحة ويحلون مشاكلهم بالحوار والتفاهم ومن هالكلام ..

والله ييسر امرها ان شاء الله

 

[شمعة لا تنطفأ]

حبيبتي لييش هالحيره ...
عادي ... ابوج او اي حد نم اخوانج يدق عليه يقوله عسا ما خير يا فلان ... بنتي عندنا من اسبوع ونص ...وتراني سألتها وهي قالت لي مافيه شئ بينكم بس انااااا اخاف انها مخبيه علي شئ صاير بينكم .... فيه شئ صاير بينكم يا ولدي بس حبيت اطمن .,.,,

واذا فيه شئ بخاطرك من بنتنا تعال نتفاهم معاك واذا هي غلطانه وراها رياييل يردونها ...

ويفهم منه السالفه .... ويأدبه شوي على التطنيش ...
يعني يلومه انه يحط البنيه وما يتكمل يفهمه ان لو فيه شئ بخاطره ما يفرها ويروح .. لاااا يتكمل ويا اهلها ....

احسن حل هو هذا برأايي

 

[عنقود عنب]

خلي احد من اخوانك او ابوك يكلمونه او يروحن له البيت او مقر عمله

بعدين ودي اسال ..كيف كانت علاقتهم مع بعض طول الفترة السابقة ؟؟؟

 

[مثل الورد]

ليش مكبرين الموضوع وخليتوا الاحتمال الكبير الطلاق...

اعوذ بالله يمكن الريال عنده شي مشغول....

وبعدين اختج تقول كانت طفشانه وتبى تغير جو

طيب ليش الحين هي زعلانه هي روحها طلبت هذا الشي..

ولو هو حاط في باله الطلاق ماراح يوديها مطعم وويبسطها

قوليلها تخلي الموضوع عادي وهي جايه عندكم اتغير جو خليها

تنبسط وانشالله روحه راح يدق عليها بس لاتخلينها تتصل عليه

ولا اطرش مسج متى ماكنت فاضي كلمني وبس لاتتصل زيادة

وانشالله الله بيسر الامور لقوليلها لاتخافين...

 

[دلع في دلع]

مشكورات حبيباتي ما قصرتوا............
تعبتكم معاي..............
إنشا الله إذا صار شي جديد قلت لكم....

 

[nonoura]

اللة يعيننا على هالرجال واللة بيجيبوا الجلطة من عمايلهم اللة يحمل معنا

 

[حسايف السنين]

أكيد أهله يعرفون السبب أو على الأقل فيه واحد منهم قريب منه ويشتكي
الي تسويه أختك إنها تحاول تروح للبيت بعذر أنها محتاجة أغراض من غرفتها ,
ويفضل وقت ما يكون فيه
وتكون طبيعية ومتماسكة حتى تقدر تتواصل مع أحد من أهله ترتاح له وتثق فيه ممكن يكون عنده خبر عن زوجها ويكون حلقة وصل بينها وبينه
وفي خلال روحتها بتشوف وضع الغرفة وتقدر تفهم وش حاصل ​

 

[المرأه الصالحه]

اللة يكون في عون اختك بس انصحة تخلي احد اخوانة بروح يتفاهم معة عشان تعرف وش ناوي علية وعلى هالاساس تاخذ قرارة ,,

 

[&دره&]

يمكن من طلبها انها بتغير جو حس باهانه

لو كانت مسويه انها كانت عندكم وانتي وخواتج طلبتوا منها انها تتم عندهم

اهو من انها قوله بروح لهلي بغير جو

ترى شي صعب عالريال انها حسسه انه مقموه معاه

والريال سوه اللي عليه طلعها مطعم وخلاها تغير جو

لو قايلتله خلاص انا اسانست بالطلعه معاك ما ابي اروح بيت اهلي

جان غير الوضع على ما اعتقد

يمكن بأدبها ويسسها بقيمته وبخليها شتاقله

بس سالفه تحليل الحمل شنو يقصد يها ما ادري ؟؟!!؟؟

الله يهدي سرهم ويجعل بينهم موده ورحمه

 

[ALBDEWEYA]

الله يكون في عونها ويكتب لها الخير

ابوج او كبير البيت ياخذ اختج يوديها بيتها وييلس يين ايي ريلها وما يناقشة بأي شي بس يردها ويقول عادة البعد بين الازواج مب حلوة لا تتعودون تبعدون عن بعض وايد .. وساعتها الكلام بيبين اذا الريال في خاطره شي
اختج خلها تاخذ موانع حمل لين ما نشوف سالفة ريلها على شو ناوي .. وبعد حاولي تضغطين على اختج شوي .. يمكن في مشكلة بينهم وهي ما تبى تقول .. طمنيها انج بتحفظين سرها وما بتخبرين حد بس لازم تعرفين علشان تقدرين تتصرفين
واذا ردت عنده لازم تناقشه بهدوء وتقوله ان تصرفه مب حلو و حسسها انه ما يباها وفشل عمره جدام اهلها وان ما تبى تيلس مع ريل غصب عنه.. والمفروض يكون بينهم صراحة ويحلون مشاكلهم بالحوار والتفاهم ومن هالكلام ..
والله ييسر امرها ان شاء الله