شوفوا ولدي وين ينام؟؟؟

[النوار]

السلام عليكم ورحمة الله........
خواتي وحشتوني وايد وحشتني مواضيع المنتدى صارلي فتره مادخلت المنتدى خبركم الحياه ومشاغلها صار اليوم مايكفي الأنسان ،وقت حق العيال ،وقت حق ابو العيال،وقت حق البيت،وقت حق الدوام .......
بس الحمدلله على كل حال ........تدرون جني طلعت عن الموضوع خبركم من زمان ماهذرت هههههههه
عندي مشكله مالها حل لأني جربت كل الطرق ولدي حبيبي عمره ثلاث سنوات ومن يوم كان صغير وهو ينام عندي لين صار مايطيق سريره انا الموضوع عندي عادي بس زوجي متملل من كثر مايرفسه ويمسك خشمه الله وكيلكم صار خشمه كأن خشم بنكيو ههههههههههه.....
مره ريله على رقبته مره في بطنه لين الأبو انهار وصار ينام في الصاله:schmoll:
جربت اني احطه في سريره اذا نام بس ان اول ماحطه يقوم مشوط:busted_red:
عالعموم السرير ماراح خساره قمت احط اخوه لصغير فيه ههههههههههه
اللي عنده حل يعطيني ولا يبخل علي بس عالأقل عشان زوجي يرجع الحجره........​

 

[مايفيد الزين]

المفروض من سنه عودتيه على النوم بروحه
عشان ماتتعبين معه
نومي معه بفراشه الين ينام واذا اضطريت نوم كل اليوم
واذا جا ارجعى معه ونومى راح تتعبين
فيه طرق كثيره وربي يعينك

 

[عذبني فراقه]

عزيزتي الطريقهانك تنامين معاه في غرفته الى ان ينام ثم تذهبين الى غرفتك
وانتبهي فصبر لبرجال قليل
حافضي على زوجك

 

[نيولوفر]

ولدك ذكرني ببنتي لكن هي عمرها سنتين ,أولا أفرشي فراش قريب من سريرك على الأرض إذا جاء وقت النوم خليه يلعب ويتحرك عشان يتعب ومايتعبك معاه وينام بسرعه وكل ماحاول أنه ينام معاك نزليه على فراشه الى أن يستسلم وينام ,ممكن تظلي على الحاله عدة أيام حسب عناد طفلك ,وخليه ينام على فراشه مده تقريبا أسبوع أو حسب تعلق طفلك حتى لايصاب بصدمه في الوقت هذا يفضل لو تخليه وقت القيلوله ينام في سريره وشجعيه على ذلك وكافئيه على ذلك وإذا لاحظتي انه بدأ يتعود على سريره خليه ينام عليه في الليل ويفضل في البدايه إنك تدسين له لعبه أو أي شي يحبه غير الحلوى طبعا في سريره وقولي له في مفاجئه في سريرك إذا نمت فيه مع الوقت راح يتعود وإذا جاء عندك في الليل خليه ينام على فراشه الموجود على الأرض راح تتعبي لكن الصبر زين وبالتوفيق.....

 

[الساجدة لله]

الله يعينك..بس لرجاجيل حدود..ما راح ازيد على الاخوات
وفوا وكفوا خاصة أختي نيو لوفر انا مجربه الطريقه بس يبيلها صبر...اعانك الله...........​

 

[أسرتي دنيتي]

عزيزتي..

هلا بك ولا تطولين الغيبات الا اذا كنتي بتجيبين الغنايم(على قولة المثل من طول الغيبات جاب الغنايم)

انا اشوف انك تأخرتي في عزل الولد عنك وقت النوم صار شايب ثلاث سنين!! بتتعبين في تعويده ابدي من الليله مع اخوه الصغير على النوم في غرفه قريبه جدا من غرفتك وحاولي تزينين غرفته باشياء تحببه بالجلوس فيها بعدين في عمره هذا خياله واسع انتبهي لاتنومينه في الظلام خلي انارة الغرفه معقوله ونامي معاه حتى يتعود على الانفراد والله يعينك على المعارك بسسسسسسسسس اهم شي ابو الشباب كلش الا نومته بالصاله ​

 

[aldana]

حبيبتي وغذا بكى وصاح ....وين المشكلة ؟؟؟؟؟

اليوم يبكي وتسكتيه شوية وينام ...وبكرة يبكي ...وبعدين خلاص يتعود ... هذا طفل وبإمكانك تغيير عاداته بشوية صبر ... لا تسمحين له ينام معك بالغرفة وخليه يتعلم ان لكم غرفتكم الخاصة وله غرفته الخاصة مع أخوه .... أبداً لا تضعفين ...حطي قوانينك والتزمي ...ولا تستسلمي لبكاه ...كوني حازمة شوية وفهميه بهدوء

قبل موعد النوم بساعات .وشجعيه ...بس لا تيأسي ولا تحزني عليه إذا استعطفك .

 

[إكليل]

بنتي كانت مثل ولدك
مستحيل أقدر أحطها بسريرها وهي صاحية
كنت أنومها معي وبمجرد ما تنام أوديها غرفتها
لكن صراحة الحال لا يطاق .. لأن دايم يحصل اني أنام قبل ما أوديها

بديت أحكي لها قصص من تأليفي والبطلة بنت بعمرها وأدخل بالقصة كل شي أبي أغرسه فيها وأقول لها انها تنام في سرير مره حلو مثل سريرك بالضبط ، أتعمق بهالنقطة شوي وأحليه بنظرها .....
اشتغلي معاه بالإيحاء ، وحطي في بالك ان أفضل الأوقات هو ما قبل النوم مباشرة
بعدها صرت أحطها بسريرها وأقولها انتي نامي وانا راح اجيب سجادتي وأصلي عندك
أطفي النور وأشغل لها الراديو على إذاعة القران وأخفض الصوت شوي
بمجرد ما أخلص صلاة الوتر تكون البنت نامت
الآن صارت ما ترضى تنام إلا في سريرها ..

المسألة تبي شوي صبر ولين في تعاملك معاه
حاولي معاه بالإقناع مو الإجبار

الله معك يالغالية :icon26:
​

 

[النوار]

الله يعين الجميع اختي
انشالله باجرب كل الطرق لين ينام بروحه

 

[النوار]

مشكوره اختي ام ميغا مان والله يخليلك ميغا مان

 

[النوار]

جزاك الله خير اختي نيولوفر وباجرب حلج
لأن كان في بالي من زمان اني انومه جنب السرير على الأرض
يسلمووووووو

 

[النوار]

هلا بك ولا تطولين الغيبات الا اذا كنتي بتجيبين الغنايم(على قولة المثل من طول الغيبات جاب الغنايم) ​

انا اشوف انك تأخرتي في عزل الولد عنك وقت النوم صار شايب ثلاث سنين!! بتتعبين في تعويده ابدي من الليله مع اخوه الصغير على النوم في غرفه قريبه جدا من غرفتك وحاولي تزينين غرفته باشياء تحببه بالجلوس فيها بعدين في عمره هذا خياله واسع انتبهي لاتنومينه في الظلام خلي انارة الغرفه معقوله ونامي معاه حتى يتعود على الانفراد والله يعينك على المعارك بسسسسسسسسس اهم شي ابو الشباب كلش الا نومته بالصاله ​

حياتي الله يخليلج اسرتج وانتي تامرين اللي تبينه من الغنايم لج
قولي اهم شي مايصيرالضرب بين الولد وابوه
ههههههههههههه

 

[النوار]

بارك الله فيك اختي ساجده لله
والله يديم المحبه في هالمنتدى الرائع

 

[النوار]

هاذي المشكلة اختي الدانة يكسر خاطري بسرعه وساعات اكون تعبانة وابغى انام فأحطه عندي عشان انام ومايزعجني
بارك الله فيك على المرور

 

[النوار]

فديتك ياأكليل والله ريحتي قلبي انشالله في امل وطريقتك وايد حلوه والله يعين الجميع
بارك الله فيك

 

[ثموري حياتي]

انا ابغى أسأل متى افرز ولدي بغرفه لحاله ياليت تدلوني عمره سنه وتسعة شهور وشكرا لكم وجزاكم الله خيرا