للحكيمات فقط

[الزين ولدي]

حبيباتي ابي مساعدتكم
توني تكلمت مع زوجي وصارت مشكله
بقولكم السالفه
امس بليل فتحت تليفون زوجي ورحت للاسماء وشفت ارقام مخزنه باسامي غريبه
وخزنتهم عندي واليوم الصبح دقيت عالارقام في بعضهم ارقام سعوديه وبعضهم كويتي
الارقام السعوديه ما يردون والكويتي كلمتني بنت مايعه
رجعت من الدوام وقعدت مع زوجي وولدي لي الساعه 5 عادي بعدها زوجي دش يتسبح يبي يطلع انا دخلت وراه وكنت تعبانه من قولوني قالي تبين اوديج المستشفى قلتله لا ابي اسالك عن رقم
قال شنو وقلتله رقم البنت اللي كلمتها قال ماخذته من تليفوني وطلع حافظ الرقم انا قلت اول ثلاث ارقام وهو كمل الباقي المهم قال تليفوني تحت بجيبه واجي
ونزل يعدها ب5 دقايق جاني فتح الاسماء قالي شوفي وقال يهذا رقم بنت وهذا وهذا وهذاشنو تبين تسوين كيفي
بس اللي تسوينه وقاحه تفتحين تليفوني وتاخذين الارقام قلتله وانت اللي تسويه شنو قال كيفي ونزل تحت
يابنات تعب وربي تعبت تكفون طالبتكم ساعدوني

 

[الزين ولدي]

طالبتكم خواتي وينكم

 

[الزين ولدي]

خواتي وينكم

 

[قطـــــريه]

هل تتوقعين انه بيتوب من اول مره ؟ الحين انتي واجهتيه وصار الموضوع كاش في الوجه وهاي اكبر غلط سويتيه بس دام صار خلاص لا عاد تفتحين جواله واذا سويتيها لا تقولين له واطبخي على البنات اللي يعرفهم بهدوء .. وكالمعتاد شريحه جديدة وانتظري شهر او شهرين وبعدين اشتغلي لهم .. ابدي وطرشي لهم مسجات غزل واللي تتقبل منهم استلميها مسجات وبعدين لين عرفتي قصتها واسمها ونصيحه كلميهم بالاميل لو قدرتي على انج ريال .. لين عرفتي كل شي عنهم هني اشتغلي لهم صح ولا تنسين تشتغلين على ريلج طبعا وتقولين لهم بعدين ان فلان عطاج رقمهم لانهم في نظرة ........ وحق لعبه وهم ماراح يقصرون وانتي تقدرين بعد كم شهر تطرشين له مسج ان الهيئة تراقبه لان ريحته فاحت وقرب يومك وهو بيخااف من قلب ..

 

[الزين ولدي]

بنات شدعوه بس وحده ردت علي

 

[norahmed]

غلط إنك كلمتيه وواجهتيه ياغاليه .. بس زي ماقالت لك قطريه سويه
ثاني شي لو جا لاتكلميه إحقريه بس خليكي مهتمه بنفسك ووولدك أما هو طنشيه وخليكي رسميه معاه حتى لو طالت الفتره مشان يحس إنه غلط بحقك لاتتهوري وتغلبك مشاعرك وتروحي إنتي تكلميه وتترجيه مانبي يقولك عنك ضعيفه وماتقدر تستغني عني .. ويارب يهديهم يارب ويسخرهم هالرجال لنا

 

[بهلولة]

غلطانه حبيبتي
شو تتوقعين بيقعد عند ريلج وبيصيح وبيعتذر
هالشي ما يصير الا بالنادر جداااااااااااااااااااااا
المواجهه مو الحل
الحين انتي كشفتيه, واذا عاملتيه معامله عاديه بيقول هاي عادي عندها اخونها فبيزيد
عشان جي لازم تبينيله انج مو راضيه عن اللي يالس يصير بس بدون صراخ وهواش
طنشي
وادعي ربج الغالية
عسى ربي يهديلج اياه ويسخره لج
امين يارب

 

[الزين ولدي]

الله يفرج كربة كل من ردت علي ويرزقها بكل اللي تبيه

 

[الزين ولدي]

خواتي وين تفاعلكم معاي

 

[أم أم]

نفس كلمهم طنشيه وهتمي بنفسك هو من نفسه بيرد لج

ورجعي مقالات الاستاده نعمه

 

[مهندسة الكلمه]

أختي الغاليه ما راح أعاتبك والا ألومك لأني حاسه فيك وهذي ردة فعل طبيعيه

لكن نصيحه من أخت محبه لكِ الخير

وعاينت تجارب كثير تشبه تجربتك

وكلهم عملوا نفس ردة فعلك لكن النتيجه لا تحمد عقباها

وراح أضرب لك بعض الأمثله وانتي شوفي بنفسك النتائج واحكمي :

هذي الله يسلمك وحده استفقدت زوجها لأنه أتأخر عليها

وطالعت من الشُباك لقته يكلم جوال بالسياره

لبست عباتها ونزلت تواجهه ايش تسوي في آخر الليل بتكلم مين بالجوال ؟؟

صار يقول لها أنا كده وإن عجبك وهذي وحده أبي أتزوجها

وراح أستأجر شقه وتركها هي وأولادها لحالهم أشهر

والبنت انقهرت من ردة فعله لأنها مالها غنى عنه

وألتجأت لربها وصارت تقوم الليل بسورة البقره إلى أن ربي هداه ورجع لها الحمد لله

واكتشفت إنه مسحور من مضيفه اندونيسيه هي اللي أغوته وصارت تخيره بينها وبين زوجته

ولما رجع لها صارت تحاول تتفهم حالته وتعامله كانه طفل صغير وتراعيه

وقلبها يعورها من الجرح لكن كله يهون علشان ترجعه لها

وقصه ثانيه لرجل زوجته في قمة الجمال والأنوثه ومو مقصره عليه بشيئ

كانت الله يصلحها لما تكتشف خياناته : تواجهه وتفضحه عند أهله

وتروح بيت أهلها بالأشهر تحسب انها بتربيه

والرجال صحيح انه يحبها وما يقدر على بعدها

لكنه ما يقدر يترك الخيانات صارت يا لطيف طبع في دمه

ويستخدم مبدأ اذا غاب القط العب يا فار

ولما راضاها ورجعت لبيتها وعدها انه ما يرجع لخرابيطه لكنه يكون أحوط من قبل

فنصيحتي الك انتبهي يا الغاليه لا تسمحي لخطافات الرجال يسرقوا زوجك منك

أجلسي مع نفسك وخططي لاسترجاعه من يدهم بالحكمه والسياسه

لأن الطير يدور يدور ومصيره يرجع لعشه

وآسفه على الاطاله لكن يعلم الله إني ما أبغى لك غير صلاح الحال وراحة البال

 

[لمسه انوثه]

الله يكون في عونا ياالحريم والله انا مساكين
الله يسخر لك زوجك

 

[3afraa_33]

قالي تبين اوديج المستشفى قلتله لا ابي اسالك عن رقم
قال شنو وقلتله رقم البنت اللي كلمتها قال ماخذته من تليفوني وطلع حافظ الرقم انا قلت اول ثلاث ارقام وهو كمل الباقي المهم قال تليفوني تحت بجيبه واجي
ونزل يعدها ب5 دقايق جاني فتح الاسماء قالي شوفي وقال يهذا رقم بنت وهذا وهذا وهذاشنو تبين تسوين كيفي

هههههههههه صراحه شر البلية ما يضحك ........ اش هذا الكلام

شوفي لو مكانك والله ما ازعل اضحكي لان هو مستهتر وبايعهم ...ردة فعله تقول انه شي رخيييص مايسوى فاهمه ....

لاتزعلين بس برطمي شوي وسوي حركات وقولي لو ادري وش ورى هالارقام ياااويلك وياسواد ليلك وبس ..... انسسسسسسسسسسيييي السالفه ..