اليوم و لأول مرة طلبت من زوجي الطلاق ...

[الشريرة2]

أعرف أن الكثيرمنكن يتضايقن من الموضوع و لكن ...


أنا بالفعل أريد آرائكن في الموضوع


مر على زواجنا 5 سنوات و شهران

لنا 3 أطفال الكبير 4 سنوات و الصغير 4 أشهر



بداية حياتنا كانت سعيدة جدا كالعادة
و بعد مرور الأيام قل اهتمام زوجي بي
لدرجة أننا وصلنا الى أن لا نقول لبعضنا كلمة أحبك
و مع مرور الوقت اتضح لي أننا غير متفاهمين و نختلف
في أبسط الأمور و الأمور الكبيرة ..
هو يعتقد اني أعانده و أعتقد أنه يعاندني
حتى في تربية أطفالنا نختلف




لدرجة أننا اليوم اختلفنا في كيفية التعامل مع الشغالة
حيث كشفت معها هاتف بدون علمي و بدون علمه
مع أننا اتفقنا معها بأن لا تحمل معها هاتف و أعطيها هاتفي للتواصل مع أولادها


بعد أن كشفت عن الموضوع هددتها بأن أخبر زوجي كي تفزع
ولكنه لم يبدي أي اهتمام و كأنني كنت أصرخ على الفاضي و أحسست بالإهانة أمام الشغالة و قررت ترك البيت إن لم يكلمها في الموضوع ..
ولكنه فضل تركي للبيت بدل أن يكلمها و نعتني بالمجنونة و أن الموضوع لا يستاهل و أنني أريد أن .... و و و
وتركت البيت و رسلت له رسالة بما أن موضوع عدم تفاهمنا وصل لدرجة أن شغالة تدخل بيننا فأحسن أن نتطلق .


مرات كثيرة كنت أعصب و أفكر أن أطلب الطلاق و أتراجع و لكن هذه المرة فعلتها ..

اتصل و لم أرد عليه و أغلقت الهاتف ..

أفيدوني الله يخليكم

 

[مستعدة لرحيل]

الشريره اولا شوه هالنك ظالمه نفسج ليش؟؟


بعدين هدي السالفه ماتسوى مب على كل سالفه تفكرين و تطلبين الطلاق هدي و الخدامه انتي اتصرفي اخذي الجوال عنها غصب عنها مب طيب و بعدين ريلج ما اخطا الا في قوله انج مجنونه اتفاهمي معه بكلام طيب و بهدوء

 

[الشريرة2]

أختي مستعدة لرحيل .. أشكرج على النصيحة
لكن شو الحل إذا ظلينا طول العمر ما متفاهمين و نختلف في ابسط الأمور ؟؟

 

[مَلآمِحْ حُلمْ]

هونيها تهون
ما يصير تطلبين طلااااق عشااان (( خدااااامـــــه ))
تفاهمي معاها مولازم تدخلي زوجك في أمر الخدامه
تصرفي إنتي معااااها و مصيرها السفر أما أنتي لو تتطلقين راح تتشتتين​

 

[مستعدة لرحيل]

حبيبتي مب متفاهمين اطلاقي منه _ بتفكرين بتقولين لا او مترردده انتي تحبينه_ مب متفاهمين عادي احيانا ما تكونون نفس التفكير بس تقدرين بطريقة تندمجين نفس ايدينج يختلف و وضع الاصابع بس ما يستغنون عن بعض ( يعني لما تحطي ايدج فوق ايدج الثانية)

انا اعتقد اي انسانه تسال احد اطلق او لا يكون في خاطرها ما تبي يمكن تحبه بس تريد فعه للامام او تبي نصيحه لها و لزوجهاا

بااالتوووفيق

 

[نــور2010]

بعض الازواج ما يرضون يتدخلون في امور الشغالات
ياليت انتي قمتي بالواجب واخذتي الجوال منها وتصرفتي بحكمة

نصيحة : اذا اتصل فيج ردي عليه وكلميه وردي بيتج
وهناك انتي عاقبي الخدامة ولا تخلينها تتصرف على هواها
صيري الكل بالكل ولا تعتمدي عليه بعفابها
خليها تخاف منج ولاتهددينها فيه مستقبلا حتى ماتتعرضين لموقف ما يسر
الله يوفقكم ويسعدكم

 

[ملاذ الخواطر]

الله يهدي سركم وترجعون لبعض انشاءالله

 

[الشريرة2]

بالفعل ما يهون علي و أحبه كثير ..
في الحقيقة ما طلبت الطلاق بسبب الشغالة .
و إنما حسيت إني مو مهمة عند زوجي و يحس أن تفكيري غلط
و هو كثير كوووول و متساهل
بس دلوني كيف أسيطر على عصبيتي ؟

 

[(حورية)]

انت معذورة لأنك كنت معصبة

يا اختي لااتدخلين الخدامة بعلاقتج بريلج ابدا ، مثل ما قالوا الأخوات انت اتصرفي معاها ، اتصلي بالمكتب وخليهم يفهمونها

تفاهمي مع ريلج بالكلمة الطيبة وبالحكمة ، كل زوج له مفتاحه ، هدي شوي واكيد بتلقين الطريقة المثلى في التفاهم معاه ،ادرسي نمطه هل هو شمالي او شرقي او....، لاتهدمين بيتج

ربي يسعدج

 

[تعبت حبيبي]

الموضوع لا يستاهل الطلاق كثير من الازواج يختلفون وبالحوار وبداية صفحة جديدة تعود المياه لمجاريها

 

[الشريرة2]

أختي نورة .. نصيحتج في محلها
أنا تهوشت معها و هددتها لدرجة أني رحمتها بعدين
مثلت و كأني ما أريدها بس عشان تخاف ..
لكن هو حتى ما عجبه تصرفي معها و هذا الشئ ايللي ضايقني ..

 

[نــور2010]

بس دلوني كيف أسيطر على عصبيتي ؟

حاولي حبوبة بكثرة الاستغفار والتعوذ من الشيطان
واما ينزغنك من الشيطان نزغ فاستعذ بالله انه سميع عليم
ركزي على قراءة الرقية الشرعية يوميا في بيتج وتلاوة سورة البقرة يوميا
صدقيني لها مفعول عجيب سبحان الله
ولا تنسين الدعاء
الله يسعدكم يارب

 

[نــور2010]

أختي نورة .. نصيحتج في محلها
أنا تهوشت معها و هددتها لدرجة أني رحمتها بعدين
مثلت و كأني ما أريدها بس عشان تخاف ..
لكن هو حتى ما عجبه تصرفي معها و هذا الشئ ايللي ضايقني ..

معليش وضحي له وبهدوء ان انتي عارفة وش تسوين
ومثل هالتصرفات ما يجوز نسكت عنها
ومن البداية نوقف عند حدجها قبل لا توصل الى موقف لا يحمد عقباه

 

[زحمه جروح]

صراحه موقف بايخ منك

انا زوجي يعتقد اني اعانده دايم وانا مو عناد احاول ابدي وجهة نضري بس

لاكن لمن شفته كذا صرت ما اناقشه بكل صغيره وكل كبيره الاشيا الي اشوفها صغيره اقول الي تشوف اما الاشياء العضيمه لا ما اسكت

انتي حاولي ما تدققين عليه طنشي بعض الاشيا مو كل شي تعارضينه

غلط بيطفش منك

نصيحه مني لا تخلين هالاشيا تدمر بيتك

نقاشات بايخه وسوالف سخيفه فكري باولادك

والخدامه ليه انتي اهنتي نفسك قدامهااا ليه تقولي لهااا بعلم عليك بابا
ليه تهددينها بزوجك؟؟
المفروض ادبتيها بنفسك و نفس الوقت تحطين عنده خبر

اذا دق عليك ردي وارجعي لزوجك لا تهدم بيتك الخدامه وسالفه خربوطه مثل كذاااا

شوفي البنات شلون المشاكل الي عندهم واحمدي ربك
لاكن نصيحه
ولا تدققين على كل شي ومشي وكلمه الي تشوفه على امرك
حسسيه انه هو الي يعاند مو انتي مره ثنتين ويحس على دمه

ولله انا مجربه كل ما اقول يمين يقول يسار

وطفشششششت صرت ابكي من القهر

ولمن سويت كذا ارتحت الحمد لله

 

[الشريرة2]

و قبل أيام نص الليل شاف هندي مختبي خلف سيارته أمام بيتنا
لما سأله شو يسوي قال أنه خاف من السيارة ايللي مرت على الشارع
و مستعد توديني الشرطة أني ما عملت حاجة .. تخيلوا ويش عمل ؟؟؟!!!
تركه يمشي .

 

[الشريرة2]

مشكزرة أختي زحمة جروح
بالفعل كلامج صح
الله يقويني و يعطيني الصبر اتحمل عناده .

 

[الحنونة 1]

الله المستعان لاتدخلين خدامة بينكم وحاولي تعرفين نمط زوجك

 

[الشريرة2]

مشكورات أخواتي و الحين بالفعل حسيت أني كبرت الموضوع
أعوذ بالله من الشيطان الرجيم
فضفضت معاكن حسيت بالراحة ..

 

[عقل وقلب وروح]

اختي الخيره ان شاءالله منتي شريره هههههه بسألج سؤال هل معاملتج ريلج لج تحسينها

من قبل الخادمه والا من بعد وجود الخادمه؟؟؟

وافضل تسألين الخادمه من وين يابت جهاز الموبايل عشان نفهم شنو اللي قاعد يصير خلف الكواليس

جاوبي..........​

 

[الشريرة2]

اختي الخيره ان شاءالله منتي شريره هههههه بسألج سؤال هل معاملتج ريلج لج تحسينها​

من قبل الخادمه والا من بعد وجود الخادمه؟؟؟​

وافضل تسألين الخادمه من وين يابت جهاز الموبايل عشان نفهم شنو اللي قاعد يصير خلف الكواليس​

جاوبي..........​

لا أختي قبل الخادمة ...
هذه الخادمة معانا من 8 أشهر
و تقول هي جابت الجهاز من بلدها و السم كارد مال بلدها و أولادها يراسلوها
و شفت السم كارد صحيح مال بلدها و لكن لا يمنع ان تكون عندها بطاقة ثانية
و أكيد من شغالة أخت زوجي لأنها تطلع و فري و من نفس الجنسية و عارفين أخبار بعض و بما يلتقون إلا بالشهر مرة أة مرتين .
زوجي كثير مرتاح بوجودها لأنها على قولته شالة جزء من عمل البيت .
لأني قبل كذا ما كملت سنة مع خادمتين غيرها .. لن وحدة رفعت صوتها علي و الثانية رفعت صوتها على أمي .. فهو يفكر إني انا و أمي ما نتحمل الخادمات و لازم نتحملهن عشان يضلوا يجلسوا معنا ..
ويش رأيك ؟