وش اسوي مع زوجي وضرتي

[فراولة7]

حبيبتي اهتم بنفسك اي كان عمرك ولاتقولي عيالي كبار موعلشان زوجك علشانك انتي عيشي حياتك واستمتعي بحياتك والحمدلله الي عندك عيال يوسعون صدرك واكثري من الاستغفار

 

[بسمة حزنّ]

صدقيني الرجاااااااااااااااااال مالهم الا ((التطنيــــــــــــــــــــــش))وعيشي حياتك وانسيهم والله يسخرلك زوجك ويسخر لي زوجي قولي امييييييييييييييييييييييين

 

[زوجه اولى مهوره]

الله يعطيكم العافيه ويسخر لكم ازواجكم
كان بودي ارد على كل وحده لكن وقتي مو مساعدني انا ماقصدت بالعمر الاهتمام بجسمي انا قصدت اللبس يعني خلوكم معي ولدي على وشك تخرج وانا البس قصير وشورتات وعاري وبعدين اسم الله عليهم كثير وحاكميني وتعودت وجودهم جنبي واذا دخلت غرفتي افقدوني وانا مااقدر اطول
وزوجته على مافهمت ماتقصر على عمرها من لبس ودلع وامور انا شخصيتي ماتتقبلها هي عادي انه يدخل وصديقاتها موجودين بحكم ان امها اجنبيه وهو منهبل على مجتمعها ابوها سعودي صحيح بس عاداتهم مثل عادات كل شي عادي غيرنا تماما واحنا من قبيله متشدده بكل شي وكانت افكاره غريبه لكن ماابي اظلمه معطيني حريتي بالطلعات والزيارات
لدرجة انه مره شفناه انا وعيالي في السوبر ماركت يقضى اغراض وهي كاشفه تقريبا مابقى شي الا ويبان وجهها وهو متشقق معها ويدلع فيها ويشيل اغراضها الخاصه اللي تخص دوره الله يعزكم وهو ما يشيل الورده من الارض عندي وينافخ وينتقد و مع بنتي شديد رغم صغر سنها وهي تروح به عند صديقاتها استراحات وطلعات مع انسابه مختلطه الرجل يقعدون بالحجاب فقط انقلب مره حتى الفاظه صار احيانا يزل ويتكلم بلهجة امها واطالع فيه واسكت عارف اني مستحقرته يقوم يقلبها علي يقول نكديه ما يمزح معك وش معنى هاللهجه صار يتكلم بها الحين وما يبيني ازعل شي يقهر انهبل الشايب
ثانيا انا مهما اسوي انا احسه مايل لها وهذا اللي يحبطني
مايحب الفراش الا معها ويتهرب واطنش ويجي من عندها مهدود ومواصل ينافخ علينا ويقول ابي انام لا احد يزعجني ماعاد تقبلت منه اي شي حتى عيالي كرهوا وجوده ويومها يكون يوم مفتوح عند عيالي
كيف اغير الشعور هذا تعبت منه يعني كل اللي فيني غيره منها عشان سرقته مني والا ماصار حب شعور غريب بس هذا اللي مسيطر علي

 

[ألأميره ساره]

معليش يالغاليه لاتزعلين من كلامي انتي السبب اللي خلا زوجك يلجاء لزوجه ثانيه بس الحين المهم انك ترضين بالأمر الواقع وتبدين حياه احسن من قبل مع زوجك لاتقولين كرهته خلاص بامكانك تسحبينه لطرفك واهم شي اول شي انتي لازم تتغيرين للأحسن
تقبلي مروري

 

[زوجه اولى مهوره]

معليش يالغاليه لاتزعلين من كلامي انتي السبب اللي خلا زوجك يلجاء لزوجه ثانيه بس الحين المهم انك ترضين بالأمر الواقع وتبدين حياه احسن من قبل مع زوجك لاتقولين كرهته خلاص بامكانك تسحبينه لطرفك واهم شي اول شي انتي لازم تتغيرين للأحسن
تقبلي مروري

انا اعترف اني قصرت في نفسي وفيه بس والله ماكان متحمل اي مسئوليه العيال ومدارسهم ولبسهم واغراضهم علي مااقصد الفلوس لا اقصد الروجه والجيه والمذاكره
جالسه عنده امه من تزوجته واقوم بخدمتها وابو زوجي متوفي
خواته يتنفسون عندي لأن هذا بيت الاب واحنا جالسين فيه وانا من اقوم بخدمتهم علما بان اخوانه كلهم متزوجين ومستقلين ويجوني كل جمعه كل وحده منهم يتغدون عندنا وايدهم فاضيه مافيه وحده قالت بساعدها
ارهاق وتعب مااصدق انام وماعمره تحمل جزء من المسئوليه حتى لما قلت له نبي نسافر ودي امك عندها لين نرجع هب فيني وقال تطردين امي هذا بيتها مفتوح وخواتي موجودين ومالك الا غرفه تقفلينها وغصب عليك امي بتجي معنا وهي حرمه كبيره يبي لها مراعاه ومن حقي ارتاح لو سفره بالعمر قال الثانيه مو ملزومه فيها هي مشغوله مع اهلها ومع ذلك يوم بغى اخذ امه وخلاها تزور ضرتي وجابت لها هدايا يوم تزوجها ويوم ولدت وخواته كلهم وحريم اخوانه الصغار تنكروا لطيبي وتقبلوها

 

[أم الأقمـــــار]

اجل وش مقعدك عنده

اطرديه من حياتك هو واهله وعيشي انتي وعيالك

 

[o.o]

اففففف يقهر الله يعينج عليه .. بس الدلع مب شرط يكون شورتات وقصير ممكن جلابيات موديلات جديده
التغير في القصه والمكياج و خلاص حطي في مخج انه هالشي مب له تخيلي نفسج مب متزوجه او خليها في اليوم اللي لها عشان تقنعين نفسج انه لج وما تنتظرين ملاحظاته .. انا لاحظت اللي معاي في الدوام المتزوجات يجيونا حالتهم حاله والغير متزوجات مكياج وسشوار ولا تقولين صغار الا عياييز لكن مهتمين بنفسهم لنفسهم واكيد الفراغه لها دور بس بعد مافيه حد يتعدلون عشانه خاصه انه دوامنا غير مختلط لكن حلو الوحده تهتم فقط لنفسها انا كنت مستغربه منهم لكن تذكرت نفسي قبل ما اتزوج لو الموت ماطلعت الدوام من دون ماسكارا ولو نسيت البس اقراط ودي ارجع البيت البسهم ومرات اوصي حد من الجايين يجيب معاه والله لما اتذكر احس بتفاهه الموضوع ..انا الحين متنت مع الحمل ولاحظت انه فيه ملابس معينه تنفر وتطلع البلاوي والكرشه وفيه ملابس حلوه ممكن تغطي .. يعني لو حسيتي انه يدك مليانه لا تلبسين نص كم لبسي 3 ارباع واذا كرشتك كبيره فيه قمصان موديلاتها تغطي خاصه المزمومه من جه الصدر وهم شي الالوان تكون غامقه حتى ملابس النوم لانها تنحف بعكس البيضاء اللي حتى الضعيفه تطلع فيها دبه ..
اما الرياضه عااادي لصحتج شيلي هالتفكير من مخج والله ذكرتيني بامي وخالتي الدكاتره ينصحونهم يشتركون في جم عشان صحتهم محتاجه لكن مستحييييين !!!! زيين لي متى ؟!! جربي تشتركين في جم ترى الرياضه تغير النفسيه وتحسنها وتنشط الانسان

لاحظي كل الردود تقول اهتمي بنفسج عشااانج ،عشان راحتج ، مب عشانه والله لو عليه اكيد ما يستاهل بس على الاقل تنشغلين عنه وتتغير نفسيتج
​

 

[زوجه اولى مهوره]

ياليت اقدر اطلعه من حياتي هو واهله بس وين اروح
امي متوفيه وابوي رجال كبير وحريم اخواني مايبون وحده منه الا زياره فقط ومستحيل اتخلى عن عيالي مع رجال اناني وعندي بنات اخا ف عليهم
تكفون ماابي الا الدعوات وبحاول اسوي كل اللي قلتوا لي عليه يمكن يتعدل شوي

 

[ورد الجــوري]

لاحول ولاقوة الا باالله

 

[ههااي]

حبيبتي
قصتك مشابهه للآلاف من القصص .
بس ابغى أقولك شيء
انا احيي فيك شجاعتك وصدقك انك اعترفتي انك انتي اللي نفرتيه من ايديك بس زي مانفرتيه من ايدينك بترجعينه بنفس الايدين
اعتبريها لعبة متعة تتساين فيها لاتحطينها تنافس وضيقة خلق ومين يتحدى مين لأ لأ لأ
اول شيء تقولين انا استحي البس قصير.. ليش سيقانك مشوهه؟ أكيد لأ بس علشان أولادك ماشاء الله اولادك كبار الله يحفظهم وبعدين ما تلبسن قصير من فوق الركبة لا محد يرضاه بس البسي لنصف الساق وين المشكلة؟؟
وعلى فكرة عورة المرأة امام محارمها مثل عورة الرجل امام الرجل من السرة الى الركبة
غير كذا لاتقولين انا كبرت عالحركات هذي شوفيها هاذي عندك هيفاء وهبي كم عمرها؟؟؟
شارفت على الخمسين اذا ماكانت فعلا 53سنة عمرها وشوفي لبسها وضحكتها اللي كنها ضحكة عنز عباب المسلخ وشوفي الشباب كيف ميتين عليها ماقالت ييي شو انا كبيرة ماينفع هيك حكي.
وبعدين مهما كان تأثيرها عليه كبير انتي تتخيلين هذا التأثير والا هو لاوجود له
لمن قلتي ان زوجك تتريق عليك وقال لك يالله حسن الخاتمة على فكرة هو عجبه بس ماحب انك تتغيرين علشان مايخسر الثانية
لأنه يعرف نك لو تغيرتي مارح يكون له عذر هو يحاول يحاربك علشان ماتتغيرين علشان يكون له العذر والحجة وضميره مايأنبه فالمفروض انه لمن قال لك كذا مازعلتي بالعكس كان ضحكتي وقلتي :فديت اللي ينقد انا ...ليش ياعمري التغيير له عمر مناسب ومحدد؟ ياحبيبي انا احب اعيش حياتي بكل دقيقة فيها امتع واستمتع..
وقولي له الحمدلل الحين اولادي كبروا <<وركزي على هالكلمة وحاولي انه يفهمها وماصار لي مسؤوليه كبيرة وصرت متفرغة لعمري
والله يعين اللي عنده اطفال صغار<<وركزي على الكلمة وخليه يسمعها زين يلتهي فيهم وينسى نفسه
الحمدلله مريت وانتهيت من هالفترة .. واضحكي وتغنجي وشوفي التعامل كيف يتغير معاك بعد كم يوم.
اما بالنسبة لسؤالك وش سوتله؟ هي ماسوت له هي بس متفننة له في الفراش بس والرجال يحب الفراش كثير ..
بس انتي ابدئي اول بنفسك وخلي الفراش عالأخير خليه هو اللي يجي مو انتي اللي تروحين علشان مايقول تقلدين وماتقلدين.
وبالتوفيق
بالنسبة لأهله اسفطيهم ورى ظهرك
ويوم الجمعة من الصبح دقي على كل بيت فيهم وقولي لهم معليش يافلانة الله لايهينكم انا عندي اشغال واجد لذلك انا أفضل انه كل وحدة فيكم تسوي معاها شيء وتطبخه في بيتها وتجيبه معاها نتغداه سوى . طبعا بأسلوب مؤدب رضيوا رضيوا مارضيوا لاتتفننين في الطبخ وبيني لهم انك متضايقة من حركتهم . هذي خليهم يحسون مو ياكلون عندك ويسبونك ويمدحون غيرك لأ.
خلي لك شخصية
وأمه بعد الله يعينك معليش تحمليها كبيرة ربي يجزاك خير عن كل اللي تسوينه لها بكرة اولادك يبرون بك
بس نصيحة لاتطلعين من بيتك علشان وحدة طفله
بكرة يمل منها ومن مجتمعها المفتوح على بعضه ماعليك.
غير كذا شئ مهم جدا لاتتهورين وتقعدين كل شوية تدقين عليه ووينك وتغديت والا لأ؟ والا اذا جاء عندك تروحين طيران تحضرين له الاكل والا تسألينه اذا يبغى ياكل. لأ خليه هو يطلب لا تتفننين له لأنه يفكرك كذا انك تتقربين منه وان تبغين تكسبين رضاه علشان كذا يقول انك تقلدين.
اتركيه وعلى قولة أهل جدة :أخسوريه يابنتي^_^

 

[ههااي]

ونسيت شغلة خصوصياتك لحد يدري بها
زوجك لايعرف عنها شيء
الا اللي يشوفه وش بتسوين وش سويتم محد يدري من أهله خلي لك غموض مطلق هو أفضل لك وأكيد انتي عانيتي من انكشاف خصوصياتك عند ضرتك فحطي حد لهذا الوضع
وصلى الله وبارك.

 

[محبة مكة]

مثلما قالوا بعض الاخوات
الدعاااء

 

[هديل001]

اختي زوجة اولى إن شاء الله مو مقهورة

كيفك .. حبيبتي

اول شي انا زوجة ثانية لكن والله العظيم اخذني لا عن طريق حب ولا شي وكان كل تفكيري اني مااخذ زوج متزوج

بس هذا نصيبي واللي صار

شوفي ياقلبي انا زوجي من النوع اللي مايطلع شي بنفسه كتوم لابعد درجة لكن والله العظيم مايجيب طاريها لا

بخير ولا بشر

بالرغم اني زوجة ثانية مثل ضرتك طلعات وروحات ووناسة ودلع على الآخر

بس ابي افهم شي واحد اهل زوجك علاقتك فيهم ضعيفة وحبوا الثانية ولا وش السالفة ؟

شوفي ضرتي من البداية علاقتها باهل زوجي مو بذاك الزود يعني بالعربي مالها صاحب

هذا كلام امه واخواته مو من عندي

وام زوجي انسانة كبيرة بالسن ومثل ماتعرفي الشخص الكبير داريه قد ماتقدري وكسبت زوجي من ناحية اهله

وماعمري قصرت عليه بشي لكن الاولى كانت ماهي مهتمة نهائيا نهائيا لا بلبس ولا بدلع ولا بكلمة حلوة طبعا

انا عرفت بعد سؤالي من اخواته على حد كلام زوجي لهم لمن يفضفض لهم

شوفي هية للآن ماهي ضاربة له حساب

ياغالية اهتمي فيه وتدللي له وروحي نادي وخليكي واثقة من نفسك واسمحي لي انتي اللي غلطانة مااهتميتي فيه

خليه مووية بيدك ماينكب ولاتفكري فيها نهائيا فكري في نفسك وعيالك وزوجك والله يرده لك

 

[نرام]

السلام عليكم حبيبتي ادا زوجتو الثانية ما تعملك شي عادي

لا تحطيها في بالك ولاتتعبي نفسيتك

والاخ هادا اقري هادا الموضوع


http://www.niswh.com/vb/showthread.php?t=227628

وطبعن اقري بقيت المواضيع في المنتدى

حبيبتي اهتمي بي نفسك بلبسك اتسجلي في الجم

والاخ طنشي اعطي ططنيش يعني اهتمي في يوم واتحملي انتقاداتو ويوم طنشي لا تعطي وجة

ارجو اني اكون افتك وادعيلي الدعوه بظهر غيب مستجابة

 

[يامثبت القلوب]

اولا :عليكي بادعاء اخر الليل
ثانيا: استغفري قد ماتقدري ..والله يكون بجنبك يارب
ثالثا:غيري من نفسك لاتقولي كبيره على كذا بياخذ عليكي مو بس وحده بياخذ اربعه
رابعا:تغيري لنفسك قبل مايكون له او لغيره
خامسا:خصصي وقت له لاحد يشغلك عنه عيالك مصيرهم يبعدو مايبقالك غير زوجك خليه الاول والاخير

..الله يجمع بينكم ويزيد حبه فيك يارب..​

 

[أم الأقمـــــار]

اطرديه من حياتك مو معناته تروحين بيت اهلك

عيشي لنفسك وهو ولا تطقين له خبر

يعني حتى اكلك لما تسوينه مجرد مايخلص ويجتمعون عيالك اكلوا ولاتنتظرينه قولي عندك اللي تأكلك

يعني اكس عليه

الاشياء اللي تسوينه له اول انسيهاااااااااا

عيشي لنفسك واولادك واطلعي معهم وانبسطي ولاكأنه موجود

وهو فتره وبيزهق من الجديده

 

[وليفة الحيرة]

لاتشكيلي حبيبتي ابكيلك اناكمان الموضوع ذامتعبني صاروقتي وحياتي لبناتي ان جاءزوجي له حقوقه وان راح انساه واعيش حياتي مع بناتي نطلع نتعشى براماخلي على نفسي شي حبيبتي لاتفكرين فيه عيشي وانبسطي

 

[رفيف الهمس]

الله يسخره لك يارب ويرجعلك زي اول انشالله بس عليك بالدعاء والاستغفار واهتمي بنفسك وصحتك وددللي نفسك على الاخر

 

[روتـــانا]

حاولي تتغيرين
بالنسبه لجسمك ادخلي نادي لاتقولين فشيله وعيالي بالجامعه خطاء
واهتمي بنفسك وشكلك
حاولي تطورين شخصيتك قوي ثقتك بنفسك خليك غامضه قدامه اطلعي انبسطي زوجك لاتخلينه محور حياتك وزوجته انسسسسسسسسيها
والاهم سوي كل هذا لنفسك لانك تحبين ذاتك لاتسوينه علشان زوجك لاء دللي نفسك

نفس الكلام اللي كنت بقوله ..

اهتمي بنفسك لنفسك .. ولا تحسسيه انك بتعملي شي عشانه عشان لا يقول بتقلديها ..

وصدقيني بيرجعلك.. بتجيه فترة يمل منها وبيرجع لك .. بس انتي اشتغلي على لنفسك عشان بسطي نفسك وكوني غامضه معاه ..

 

[الملكة تومة]

الله يعينك اختي عليك بالدعاء ومن ثم الاستغفار
ربي يفرج همك واهتمي في روحك وصدقيني يجيك بإذن الله