زوجي زعلان مني

[القلب الرائع]

السلام عليكم خواتي

امس فليل كنت جالسه مع زوجي ومستانسين فجأة طره على بالي احنا تونا متزوجين كم شهر فجأة طرى على بالي اقول له ليه المكيف يطلع صوت هو طبعا كان مأثث الالكترونيات بشقتي اخذهم وقت العرض قبل لا يخطبني ليش يطلع صوت انت اهم شي عندك تاخذ مكيف رخيص مو مهم الجوده وليش مفاتيح الماء الا هم الصنابير مصدين جاوبني قال طبيعي يصدون لانه قبل مده من بنيتها ركبتهم

وتالي زعل مني وقال يعني انا بنظرك بخيل لالا انا بخيل وزعل زعل مني كبير قلت له والله مو قصدي اضايقك وانت كريم وماشاءلله عليك وهو فعلا كريم

اعوذ بالله من الشيطان الرجيم خرب علينا قعدتنا


عطووني يا بنات مسج اطرشه له عشان يهدأ وابين له كرمه
​

 

[عسـэšζـــل]

قوليله حبيبي اسفه على الكلام الي بدر مني اتمنى تسامحني
وان شاء الله بيسامحك

 

[القلب الرائع]

شكرا لك عسل على الرد
تأسفت منه يااختي ولكن قال ليش تتأسفين كلامك عدل انه بخيل يعني للحين زعلان شسوووي ابي اطرش له مسج
قلت له والله اني غلطانه واسفه قال لا تتاسفين مو غلطانه
​

 

[سيده شانيل]

اعتذري له بس لاتخضعي له .. ولو برضو زعلان طنشيه .. في رجال مايحبو الاعتذار والخضوع

 

[القلب الرائع]

بس انه غلطانه يا سيده شانيل
وماحب اجوفه زعلان لانه اذا زعل يمرض اعرفه زوجي

 

[القلب الرائع]

سااااااااااااااااعدوني يا بنات

 

[أحساس امرأه]

طنشييييية دامك وضحتي وجهك نظرك
ماعليك منه لاتعودينة انتى تراضينة
هوراح يجي بس اصبري ..​

 

[أنوار الزهراء]

لا تعتذريين ولاشيء بزيد دلعه عليش

اذا رجع سولفي عادي ولا كنه شيء صاير بينكم
اعملي نفسك ناسيه سوي ليه شاي اجلسي معاه سوالف ضحك

قولي ليه سوالف سمعت قصه ابتكري شيء
وكذا راح ينسى شوي السالفه لو عادها عليك

قولي سؤالي عادي بس انت كبرته ماادري ليه اخذته بحساسيه

 

[qwereer]

لا حرااام شكله وايد حساس ارسليله انا اسفه ماعاش الي يقول عليك بخيل لسه امه ماجابته لان الرجال مثل طفل يبي الي يراضي ويدلعه وبعض الاحيان يشد عليه زجك حس انك جرحتيه فأنتي داويه ايش خسرانه حطيله رسايل اعتذار في جيبه قبل لايروح الدوام اكتبيله ع المرايا انج اسفه وكذا حيضعف وهو يجيكي والله يوفقج

 

[ليل الشتا]

بيرجع فلا ترهقي نفسك أكثر ..

دامك تأسفتي أتركيه الحين يرادع نفسه لأنك تأسفتي شو بتسوي بعد..
خلي الرجال من نفسه بيرجع لك

 

[نجدية وكلي فخر]

ماينفع كثره الاعتذار بيزيك غلط انتي ممكن تعتذرين بطريقه غير مباشرة سوى اليوم غذا مميز وسويله الاكل اللي يحبه والحلا اللي يحبه بس لاتركضين وراه بكره بيتعود

 

[انين الخريف]

قولي تبغى تتأكد انك بخيل
انت بخيل لانك مانت راضي تسامحني
لو كنت كريم كنت سامحتني ولو اني ما قلت شي
وطبع الكريم يسامح

 

[غنج العالم]

حبيبتي ماقصرتي اعتذرتي خلاص اتقولي له شي راح يرجع انشالله

 

[$بنوته فله$]

احسن حل انك تغرييييييينة
وتبيني انك مشتااااقة
وانتي فاهمه قصدي

 

[ROSES BLOOM]

حبيبتي انتي غلطانه
و الحمد الله انج شايفه نفسج غلطانه و معترفه
انتي لو كنتي سألتيه و سكتي جان ما اخذ على خاطره
بس انتي طولتيها و قلتي حق الريال انت اهم شي ماخذه رخيص بالعرض لوول يحلاتج
المهم
الحين اللي صار صار
انتي اعتذرتي بس لا تلحقينه كل شوي تراضين فيه بعدين بيحلاله الوضع نفس ريلي
و كل شوي بيزعل على اتفه شي ، حسسيه انه خلاص اوكي انا غلطت و اعتذرت
انت اختار يا ترضى يا تراضي نفسك بنفسك .

 

[ROSES BLOOM]

قولي تبغى تتأكد انك بخيل
انت بخيل لانك مانت راضي تسامحني
لو كنت كريم كنت سامحتني ولو اني ما قلت شي
وطبع الكريم يسامح

عجبني كلام الاخت

 

[روح حمدان]

حاولي تراظينه بس بدون مسجات وجه لوجه والله انا بعد زوجي زعلان وتركني عند بيت اهلي وراح لانه تاخر وهاوشته بس شكلي مصختها وتركني وراح وبعتله اكثر من عشر مسجات وقالي تربي عند اهلك وسكر الخط فوجهي بموت من القهر احبه وايد بس اليوم مااتصلت ابدا ولا طرشت شي وهو بعد لاني قعدت ساعه ونص عند بيت اهلي برا واعتذر بالمسجات ومارحمني والدنيا ليل ومارظيت ادخل الا لم فقدت الامل اتصلت لاختي جت خذتني رحت بيتها خفت ادخل عند اهلي وتخاف امي ويصير فيها شي

 

[روح حمدان]

اللي يلقالي حل جزاه الله خير نصحوني خايفه منه اخاف يطلقني او يتركني فتره كبيره عند اهلي ماقدر على بعده ساعدوني حد يخبرني شو اسوي صح انا غلطانه بس ذليت نفسي وايد وايد سكر فويهي الف مره وخلاني الساعه وحده بليل فالشارع وراح عند باب اهلي

 

[قمر نيسان]

الله يكون بعونك ...روحي لعنده وتقربي منه واعتذري وحاولي انك تراضينه قبل لايطلع أو ينام ...والله يسخره لك ...