حبيبي يبغا يتزوجني بالسر؟؟

[أميرة حتووم]

مابني على باطل فهم باطل

تعوذي من الشيطان وانسي علاقتك الباطله

لانك بتسعدي شهر اثنين او يمكن ثلاثه والباقي انتي عارفه

استغفري ربك

لانك ختني ربك ثم اهلك 5 سنوات وتبي ربي يبارك لك في حياتك

والله اني خايفه عليك وابي اوعيك

لاتزعلي علي فديتك

ابي مصلحتك

 

[لحظه انوثه]

انا براي ان الي يحب يقووول حق الكل هذي زوجتي و افتخر

لااازم يقووول حق الكل لان اذا مااا قااال بعد فتره راااح يقوول لج انا راااح اتزوووج بنت عمي او عمتي و ما يقدر يرفض

في هالحزه انتي شنو راااح تسوووين

لااازم الكل يدري بزواااجكم

 

[almzyona]

السلام عليكم ورحمة الله وبركاته

اقولك عن تجربه شخصية 6 سنوات ضاعت من عمري ومع ذلك ازوج ع حسب اختيار اهله وقالي خليج معاي اللي صار غصب عني .
اختي محد طلع خسران من هذي القصه غيري هوه الحين عنده زوجه وعيال وانا طلعت مجروحه وعانس فاتت السنين وانتي تعرفي مجتمعاتنا بعد ما تعدي البنت سن معين خلاص تنتهي صلاحيتها
لا تخسري نفسج مشان واحد ما عنده شخصية وممكن في اي لحظه يقولج اهلي ما اقدر ع زعلهم ومع السلامه

 

[خفايا العمر]

السلام عليكم يا غاليتي واختي العزيزه وكل من شاركن في موضوع الأخت أنتو تعبتو نفسكم والأخت طلبت مشورتكم وتقول أستخارت بعد بس تخيلو انه الموضوع عباره عن لوحه برواز انتو خارج الصوره وهيه الي داخل وعايشه فيها لفتره طويله فمن المستحيل من ردين او ثلاثه او اكثر تقتنع

ولكن اختي الغاليه الأستخاره ليست معناها الأجابه ولله قال ما خاب من استخار واستشار بعد وانا ما الومك وانا اعرف عن اي حب تتكلمين

بعد فتره من الأن بتدخلين او بتذكرين كلام كل الاخوات الي خايفين عليج وعن تجربه انا تزوجت مثلج بالضبط ومن دون علم اهله ولكن ولكن ولكن بتيج فتره بتحنين انه يكون لج اهل زوج وجد وجده لعيالج من صوب الأب وكثير من الأمور

والسموحه

أختي الغاليه لا تعتقدين انه الزوجه اغلى عند الرجل من اهله ولله مهمن سويتيه له اهله هم في المرتبه الأولى واذا انتي بيعطيج 50 الف عشان ديونه المسكين فأنا عطاني نص مليون تعرفين شوه يعني نص مليون ولكن كانت نهايه غير مرضيه صح انا على ذمته ولكن مب عايشه مثل الناس

باجر بيقولك انا ما اقدر ايلس عندك كثير عشان اهلي ما يحسون والريال يوم يتزوج وده يتفاخر كدام الناس بزواجه وكدام اهله والعالم ولكن الي بياخذه بالدس معناته مستحي منه وما يشرفه كثير ولو كنتي بنت فلان ولا غيره

لو عرفتي الرجل كيف يفكر لفكرتي مليون مره قبل ان تجني على نفسك وانا اعرف انك تقولي انا غير بس انتي تضحكين على نفسك بسبب الحب الي ظيع نص بنات خليجنا ففي المحرمات وغيره وانتي باين عليكي انسانه جريئه من عنوان موضوعك

انا ما اعرفك شخصيا ولا اعرفه ولكن الأنسان العاقل البيب بالأشاره يفهمو وانا برع الصوره وعارفه هذا الرجل كيف يفكر اختي

ارسمي لحياتج مستقبل جميل ورائع وطويل وواضح ينم بالمحبه ولألفه بينج وبين زوجج واهلج واهله وعياله وصدقيني قوليله خلاص انا ماراح اخذك لين ما تقول الأهلك من باب التجربه وبس وشوفي اذا ما خلاكي بكل سهوله ما كون انا بنت ابوي اصري طبعا وبتشوفي النتيجه

من ترك شئ لله عوضه الله خيرا منه

واعانك الله على ما فيه ولكن حب من هذا النوع قصه في كتاب لا تكتمل وليست لها الا نهايه واحده واذا حابه تغامري غامري هذي حياتج مب حياتنا احنى

 

[لازورديه]

عندي احساس قوي.. انه متزوج.. عمره 38 سنه.. مب معقول..

وانتي مب مقتنعه في الردود.. ابدا.. على الاقل ناقشي..

دام انج.. اتخذتي القرار.. ليش تكتبين مشكلتج.. شوفي.ز كم رد..

جااج.. فيه رد.. من الردود.. قالج.. وافقي..؟؟؟

ولا رد.. ليش.. ماسالتي نفسج هالسؤال..

انتي هالحين في سكره الحب.. ومب حاسه بنفسج..

اذا فات الفوت مااينفع الصوت.. ترفضين خطاب.. عشانه.. هل هو يستاهل..

هل يحبج بنفس القدر اللي انتي تحبينه.. وقبل

كل شي واهم شي هل هو يحترمج.. وفخور.. فيج..؟

لانه اذا كان يحترمج وفخور فيج.. بيواجه اهله..

يمكن هو متزوج.. وانتي تدرين بهالشي.. وخبرج.. اني مااقدر اواجه اهلي.. ومن هالكلام

لانهم بيرفضون..

واذا افترضنا هالكلام صح.. كيف ترضين على نفسج .. تكلمين واحد متزوج.. ماتخاافين بكره.. اذا تزوجتي..

تجي كل وحده وببساااطه.. تكلمه.. وتقلب ليلج نهااار.. ماتقرين قصص البنات هنيه.. عوايهم

على هالبنات من هالاشكال.. اتمنى ماتكونين منهم..

بس عدم مناااقشتج.. تحسسني.. في شي بالموضوع.. فيه حلقه ناقصه.. انتي ماتدرين عنها ..

او انتي تخفينها..

اتمنى لج التوفيق من ربي.. بس ابي اذكرج بشي

تخيلي .. ابوج درى.. انج تكلمين واحد .. وخمس سنوات .. وهو ماايدري..

ابيج.. تتخيلين.. وجه.. ونظره عيونه.. كيف بيكون حالهم.. ترضين لابوج.. بالاهانه..

موفقه..

 

[Wise Woman]

لو يحبك صدق ويريدك زوجه يقنع اهله ويتقدم لك

واهلك ماراح يسألونه اهلك وين؟؟؟اهلك بايعينك يعني يزوجونك لواحد جاي لحاله ومافيه الزواج إلا هو ؟؟!!!!!!!!!!

الحب معميك حبيبتي فكري زين ربي يهدي قلبك وسنه كبير عليك 38 سنتين ويكون 40 معقوله ماتزوج؟؟؟

عفي نفسك حبيبتي بالحلال وربي يستر عليك دنيا واخره

طيب هو ماقد شافك؟؟؟يمكن ماتعجبيه؟؟؟او هو مايعجبك؟؟؟؟

الزواج مسؤوليه كبيره مو حب واشتياق وغرام وبس

 

[هاااي]

زي ماقالت الاخت نهى خييييييييييير ان شاء الله 5 سنوات اففففففففففففففففففف والله لو انكم عدنان ولينا يابنت نصيحه لك اتركيه ولا تكلمينه بعدين انت علاقتك فيه حراااااااام لانك قاعده تكلمينه واهلك مو عارفين وبعدين انت من فين عرفتيه مو هو من مدينه غير هذا اللي عندي وسامحيني على الكلام اذا فيه غلط واخيرا لوهو يحبك يسوي اي شئ لك ويعلن زواجكم ومايرده احد ايا كان

 

[لازورديه]

انا اخوي كان يحب وحده تعرف عليها عن طريق التلفون.. كان صغير بالثانويه وهي نفس الشي

تخرج واشتغل.. وتم يجمع فلوس.. يبي يااخذها.. وابوي .. درى .. قلب الدنيا عليه.. ابوي

لوو اقولج عنه مابتصدقيني.. النااس تهاابه.. احنا عياله.. كنا نخاف منه.. شخصيه.. قويه قويه

كلامه يمشي على الكل.. وكان انسان معروف بين الناس وله قدره ومكانته الاجتماعيه.. ابوي

ضغط على اخوي.. وقال هالبنت ماتدخل بيتي.. البنت اهلها ناس طيبين وبعد معروفين.. وهم تعرفوا على

بعض.. في غتره المرااهقه.. وويم دخلو العشرين.. حسو ان اللي سووه غلط.. جات فتره قطعوا المكالمات..

لين يجي اخوي ويخطبها.. ومن هالكلام.. وابوري رافض.. واخوي شخصيته بعد قويه.. ولانه والله يحبها

ويحترمها.. ويقولي هالبنت محترمه وانا واثق فيها.. قعد 9 سنين .. ورى ابوي.. ومامل.. لين ماابوي اقتنع

وخطبها له.. وهي كانو يجونها خطاب وترفض.. عشان اخوي.. وصبرت على اخوي.. لانه كان يشتغل

بعدين طلع.. بعدين سافر.. ودرس.. وهي تنتظره.. لين .. مااخطبها.. وكان عرسهم قبل شهرين..

يعني .. هالانسان لو جاد.. ويبيج.. ويحترمج.. بيخبر اهله..

 

[سنوات الضياع]

حياتي طبعاً ارفضي

لاني كأني أشوف نهايتك مع معرفة أهله بالموضوع

قول له إذا تبيني تجون أنت وأهلك تخطبون غيره لا

وبعدين مافكرتي بأهلك كيف يستقبلونه لوحده من دون أهله

 

[2010 lulu]

والله احس الموضوع مره مو بالبساطه اللي انتي تحكي بيها ابدا فين الرجوله بجد مثل ماقالو غالياتي اذا ماواجه اهلو في بدايه اموره الا وهوا الزواج هذا من يوم يقولو له طلقها راح يرميكي ولا يساله استخيري وادعي اذا كان لك خير ربي بيسره واذا شر يصرفه عنك والله يوفقك ياقلبي

 

[مييم]

هل اهلك بايعينك لها الدرجه ؟؟ يعني ماراح يسألون عن اهله

هذا واحد متزوج ومخلص وشكله بعد عنده احفاد مو عيال بس وقاعد يعيش المراهقه المتأخره

لاحظي انتي في كلامك قلتي انه اذا تزوجك بيستأجر لك شقه لمدة سنه !!!! طيب وبعد السنه هذي وين بتروحين

بيرميك ويمكن يختفي من حياتك وتنقطع اخباره وانتي ماتعرفين ارضه من سماه خصوصا انك ماتعرفين شي عنه

قصدي سكنه وسكن اهله ومن هم اهله



وحده اعرفها شخصيا تزوجت شخص بدون علم اهله مع انها ماتعرفه من قبل يعني جاها عن طريق خطابه

بعد ماتزوجها على اساس بيخبر اهله بعدين قال والله ابوي تعبان وصعبه اقول له الحين ومادري ايش


المهم بعد فتره اقترح عليها تزور اهلها واشترى لها من الهدايه حق تأثيث بيت وهي فرحانه مادرت انه هذي اخر لحظه بينها وبينه وبعد ماوصلت لاهلها ارسل لها ورقة طلاقها مع انها كانت تحبه ومابينهم اي مشاكل

 

["azeeza"]

حبيبتي لااااااااااااااااااااااااااااا توافقي الا اذا جاب اهله يخطبوكي والا اقطعي العلاقه فورا وربنا راح يعوضك باحسن منه

 

[جمع الوفاء]

والله العضيم ان زوجي تزوج واحده كان يعرفهاعن طريق الجوال وكان معجب فيها ولحين مايشوفها شي ويشوفها وصخه ومتندم انه خذها وهو رجال كبير وعاقل وفاهم وهي بعد كبيره وعاقل بس عشان عارفها من قبل ما يثق فيها انصحك مثل بنتي اتركيه ويمكن تقدم لك الي احسن منه بس هوماخذ كل تفكيرك صدقيني من ترك شي الله عوضه الله خير منه راح تلاقين الفضل فكري وفكري قبل ماتندمين وبعدها ما راح ينفعك اندم

 

[فرااولة]

أختـي لاتوااافقين هذا واضح انه بيتسلى
فيك وبحلف لكـ انه متزوج او انه راعي زنا
والاشاب كيف ياصل عمره38ماتزوج؟؟؟؟
او انه يستدرجك عشان تطلعين معه

 

[#زهرة البنفسج]

هذا شكله متزوج ويبيك زواج متعه وبس

 

[彡 ﺦ’ـيـﺂڶ ••]

السلام عليكم ورحمه الله وبركاته



ولا انتي انسانه ماشفت اطهر منها


الحـين انتي عنده الطاهره العفيفه اللي تخاف ربها وكذا

بعد الزواج او قبيل انتهاء العلاقه بتتسمعـــين كلام يسم بدنك

بتبكين وبنتجرحين وبتجيك حالات نفسيه وهستيريه

انتي الان بمرحله هيام كامل بس هو لأ ولا وابصم لك بالمليون

بعدين لمن تبدـأ حياتكم الزوجيه وتطلع المشاكل والمسئوليات

بيبدأ يتكلم عليك بهالعلاقه ..



ولما اقوله فيه احد خطبني يزعل مره و يكسر الدنيا علي وارفض اللي خطبوني عشانه




من جد ترفضين اللي يجوك عششـآنه وليش يـآعسسل هذا هو الزوج

المكتوب لك وخلاص قدر ولازم تتزوجينه يـآ قمر اكيد بيرفض

ويكسر الدنيا عارفه لان ماعاد بيلقى اللي بتصبر عليه وبيروح

عمرها خمسسسس سنين عيششهـآ بأوهام وبالنهايه تروح تعيش

بحضن حلالها زوجها مايبغى كذا يبغاك على الحرام مسوي غيران

غيران وهو بعلاقه اسـآآآسها حراااااااااااااااااااااام




مشورتكم وش تسوون لو انكم مكاني

لو مكـآنك بقوله اهلك واهلي كلهم يدرون ماتبغى خلآآص كفايه الخمس سنين كفايه

عشناها حرام ولا بضيع 15 سنه قدام ابكي على وضعــي يمكن يتزوجك ويطلقك ويتزوج

غيرك وعاد دوريه ذاك الوقت وهذا وجهي اذا ما صرتي تدورينه دواره لان خلاص

مابقي لك الا هو وهو بيختار ويحتـــآر من البنات العفيفات في نظره واللي ماقد كلموا

وبينتقيهم نقــآوهـ


حرام تضيعين عمـــرك

 

[ماللك غير الصبر]

حبيبتي ممكن يكون ردي قاسي لكن هذه الحقيقة إللي ممكن يكون الحب عماك عنها ومانتي شايفتها
خمس سنوات وانت معاه بالجوال رغم أنه يقولك الزواج أنسي
يعني كنت مرخصة نفسك كثير عشانه وقابله بالوضع وعشان كذا حس أنك رخيصة وأتمادى يبي يتزوجك من دون ما يتعب حاله ويواجه أهله وبدون مصاريف لأنه قلك من البداية حفلة بسيطة
يعني زواجه مو خسران فيها شي يعيش معاك كم سنة ويتونس ووقت ما أهله يقرروا يزوجوه صدقيني وقتها مستعد يتخلى عنك بسهولة عشان يتزوج بنت من العيلة هو وأهله مقتنعين فيها وتشرفهم
أما أنت فبنت عرفك من خلال علاقات خاطئة ومحرمة في الدين وفي المجتمع وما راح يتقبلوكي أهله
صدقيني لو كان يحبك ويحترمك كان وقف بوجه أهله والعالم عشان ياخذك معززة ومكرمة
أنت صغيرة ليه ترضي لنفسك زواج بهذه الطريقة
الله يوفقك ويهديك ويسخر لك ابن الحلال اللي تعيشي معاه أحلى ايام عمرك واللي يتشرف بزواجه منك أمام اهله والعالم كله

لا حياتي كلامك مو بقاسي كلامك واقعي حبيبتي اللعبه ووااااااااااااضحه الرجال ما قدر يطلعك معه خلاص بيتزوجك سر عشان يلعب عليك ويرميك على طووووووول ولا يكلف عمره شي انا لو ممنك اقول لا تبيني جب ابوك وتعال اخطبني وغير كذا لا ..........فاذا كان يحبك بيغير رايه ويقول لاهله واستخيري
واذا رفض قاااااااطعيه وقولي تزوجني والا انا ابشوف عمري انتي من صجك ترفضين الخطاب عشانه هذا ذيب يضحك عليك يبي بس يتسلى واحس ان فكرة الزواج بسر حيله عشان تصدقينه واتوقع انه حتى الزواج بالسر ما راح يتجرئ ويقدم عليه والله يستر عليك

 

[سـمـو الآمـيـرة]

انا رايي غير والله
بالعكس استخيري وتوكلي على الله
لي قصه مشاااابهه
ماعليك من احد دامه يحبك وشاريك استخيري ربك وتوكلي وقولي له موووافقه
وتأكدي اهله مع الوقت واذا شاافوك وشافو طيبتك وحبوك خلاااص يروح كل شي ساابق من قوانين
بالتووووفيق لك حياتي​

 

[o.o]

والله مايسوى عليك تضيعين حياتك مع واحد عمره 38 كبيييييييييير واني صغيره توك 23 وتستاهلين احسن من هالخروف المفلس
تزوجي شاب من سناينك دام الخيارات عندك متاحه ولاترضين باللي ضيع وقتك ويمكن ضيع عليك خطاب

 

[o.o]

انا رايي غير والله
بالعكس استخيري وتوكلي على الله
لي قصه مشاااابهه
ماعليك من احد دامه يحبك وشاريك استخيري ربك وتوكلي وقولي له موووافقه
وتأكدي اهله مع الوقت واذا شاافوك وشافو طيبتك وحبوك خلاااص يروح كل شي ساابق من قوانين
بالتووووفيق لك حياتي​

الله يهديج بس وانتي شدراك انه بيحبونها انتي ماتعرفين شي عن العنصريه والله لو هي ملاك مابلعوها
اذا اصلها غير عن اصله هذا على اساس انه السبب اللي قاله حقيقي وانه اهله مب راضيين لانهم فقط يزوجون من نفس القبيله .. لانه فيه احتمال يكون متزوج والسبب في سريه الزواج انه مايبي هله = زوجته تدري انه زوجها متزوج من وراها ..
الرجل مريب 38 سنه من دون زواج وهو من مدينه ثانيه يعني عادي قاص عليها ..
اقول لصاحبه الموضوع مره ثانيه لا تضيعين وقتك معاه