السلام عليكم ورحمة الله وبركاته
سأدخل فالموضوع مباشرة.. فأنا مستاءة كثيرا ولا اعرف كيف اتصرف .. وهل اتريث الى ان تهدأ نفسي .. واحمد الله على كل حال
عمري في بدايات العقد العشرين .. سبق وعقد قراني على احد اقاربي قبل 3 سنوات.. وتم الانفصال لعدم التوافق بيننا.. كل ما حدث قضاء وقدر .. اكملت حياتي وكبر طموحي وتخرجت واشتغلت واكملت دراستي .. تقدم لي الكثير .. لكنني لم انوي الزواج حينها ..
قبل 6 شهور .. دق بابا شابا ف بداية الثلاثين من عمره .. مطلق ولديه ابنتان اعمارهم اقل من 5 سنوات .. ونحن نعرف العائلة جيدا وسبق انه التقيت بمطلقته وكنت اعلم بوجود مشاكل مستمره بينهم وانهم ليسوا على وفاق .. بادئ الامر رفضت لأنه لديه اطفال .. وانا ابحت عن الاستقرار وليس وجع الراس مع تواصله بام بناته
بعد تفكير ونصائح من اهلي .. وافقت ان تتم الرؤية الشرعيه وكذا جلسة عشان نتفاهم وكل واحد يقول اللي عنده .. وجدت نفسي اميل له وهو ايضا ..
لقد اخبرني انه لم يكن ينوي الزواج وانه كره الحريم .. لكن والدته رشحته لي .. والان هو سعيد ومحظوظ بي
استمرت خطبتنا شهور قليله وبعدها عقب قراننا قبل شهران ... والزواج بعد 3 اشهر
كنت اطير به فرحا .. واحمد الله انه عوضني بهذا الشاب الخلوق.. احسست بالدلع والدلال معه .. لم يقصر معي معنويا او ماديا..
في خلال هذه الفترة كنا نتنااقش في امور عده .. وكم اشعر الان انني كنت غبيه وقتها لأنني اعتبرتها نقاشات عابره ولم اتجرا يوما على انه افكر فيها بطريقة اخرى
كان يقول لي اثق فيك ومستحيل في يوم اشك فيك ..
موبايلي ما احب احد يمسكه وحاط عليه رقم سري.. يقول في اسرار شبابيه بينا ونكت قويه وما احبك تطلعي عليها .. وانا بعد ما بمسك موبايلك .. وصدف كذا مره يمسكه ويشوف قائمة الاسماء والمسجات.. بس انا واثقه من عمري والحمدلله
اخبرني مره انه والدته اخبرته .. دير بالك على فدك وحطها في عيونك تراها جوهرة ,.., ولاتفكر تكلم بنات غيرها .. وهو يرد عليها انا ما اكلم بنات
سألني كذا مره احببتي قبلي احدا .. قلت له طبعا لا ولم افكر في الارتباط يوما.. وانت؟ قال اول مره اجرب طعم الحب معاك . وكاني اول مره اتزوج
ومره عاد علي كلام امه وبعدها قال ماكان عندي حب .. يمكن علاقات صداقه ومعزه وانتهت
قلت له الماضي راح ,.., وعلينا من الحاضر ومن لحظه ارتباطنا كل واحد يتحمل مسؤولية غلطته اذا لا سمح الله غلط
ومره قالي .. انا كنت اقدر اخذ مطلقه وعندها عيال .. بس ما ابي اعور راسي.. وانا روحي عندي عيال وطليقه .. واحس الوضع راح يكون صعب..
اشعر انني طيبه معه كثيرا وهذا ما يزعجني
نكمل ..
اثناء وجودي معه .. يرن هاتفه فيضعه عالصامت ويقول مالي خلق صدعة فلان
يوصله مسج .. يفتح ويرد عليه ويحاول يبعد الموبايل عني عن لا اشوف شو يسوي
مره طاحت عيني على مسج بدايته (صباح الحب والموده) وفيه تكمله .. شككت بالامر وتعوذت من ابليس .. وقلت يمكن احد من ربعه مرسلنه له .. بس غريبه ما ارسلي .. وامانه هو الصبح معظم الايام يكتب لي صباح الخير يا زوجتي ومن هالكلام .. وانا اطرش له مسجات صباحيه متنوعه وصور وادعيه وكلام حلو
هالاسبوع جلسنا مع بعض تقريبا 5 ايام ,. يعوضني فيها لأن بيسافر بكره ... اول يومين حلو معاي.. بعدين حسيته صار بسرعه يتنرفز ويرد علي ردود مب حلوه
قبل اذا نطلع يمسك ايدي واحنا نمشي.. وامس احنا طالعين ما افتكر يمسك ايدي معنى المكان زحمه .. ويمشي وهو مجدم عني.. قلت له بدلع حبيبي اترياني شوي ما قدر امشي بسرعه.. قال انتي بطيئة فالمشي حتى اليهال ما يمشون كذا .. والله حسيت حرارة الدمع في عيني بس طوفتها
فالسياره يمسك ايدي .. وامس نفس الشي لاحظته على غير عادته.. ورحت انا وحطيت ايده في ايدي .. بس ماحسيت بشوقه وحنانه وايده جدا عاديه كأنها غصب.. قلت له عمري مشتاقه تمسك ايدي.. قال وانا شو مسوي الحين ترى ايدي في ايدج!!
نرجع لورى شوي.. قبل يومين كنت في بيتهم .. وصار وقت الصلاة .. وقمت توضيت وصليت وهو كان عنده مكالمة مع صديقه واسمع صوته وهو يكلمه .. عقبها سرت ويلست في حظنه وهو يطرش مسجات .. وطاحت عيني على مسج (مشكورة يا عمري)
دارت فيني الدنيا وماقدرت اكذب عيني اللي شافته
اعتدلت في يلستي .. وقلت له حبيبي قوم صل
قام صلى وعقبها يي صوبي وحظني .. وكل ما حاول يقرب مني وانا جامده ومصدومه من اللي شفته .. تمينا فترة ع لى هالحال وهو يحاول يتودد لي بحركاته .. بعدين قال شو فيج.؟ شي مزعلنج ..؟؟ وانا ساكته .. بعد اصرار .. قلت له فلان ممكن اتيب موبايلك؟
وقف من الصدمه ... وقال انتي تشكين فيني؟ معقوله تشكين فيني؟ وليش تفتشين في موبايلي؟ انا شو سويت لج ؟ انا قصرت عليج بشي؟ انتوا الحريم صدعة راس.. كلكم نفس الشي ..
وانا منهارة من الصياح .. قلت له كيف افتش موبايلك وعليه رقم سري .. وانا مامسكته اصلا (وانا اعرف الرقم السري بس ما تجرأت ولا فكرت اني اتعبث فيه) .. وصل عالنبي يا فلان.. لهالحد انا ماسكه اعصابي
لبست عبايتي وشيلتي عشان يرجعني لبيتي .. وهو سار جدام التلفزيون قالي انتظري بعد شوي نطلع .. يلست وانا ساكته ..
قال تفضلي خذي الموبايل الرقم السري XXXX طبعا الرقم مش صحيح
بعدها قرب صوبي وحظني واعتذر مني.. وقال انا اسف وما كنت اقصد .. بس انا تنرفزت .. اذا عندج شي اختاري الوقت المناسب وتكلمي فيه .. مو وانا ياي اقرب منك ..
قلت له جزاك الله خير وانا اصلا ما مسكت تلفونك بس طاحت عيني توه عالمسج وانا يمك
قال لا تفهميني غلط حبيبتي.. يمكن المسج فيه شي غلط حرف ناقص او زايد وانتي تعرفين نوع الكلام بيني وبين اصدقائي دايما نقول فديتك وعمري وتسلملي
وانا مستحيل افكر في غيرج
وانتي الانسانه اللي تمنيتها.. وانا من اشوفج انسى كل همي وتعبي .. وانا ما بي اخسرج (يالله .. قبل هالكلام كان يدخل قلبي بس وقتها ما دخل)
حسيت كان المفروض الزم عليه راويني موبايله ومسجاته بس راحت علي
ومن طيبتي الزايده وغبائي.. طوفت الموضوع وقلت له حصل خير
بس رجعت البيت وماقدرت اصدق كلامه .. وندمت اني ماناقشته ولا قلت له افتح موبايلك جدامي
المهم هو خلى موبايله عالطاوله ودخل دورة المياه .. مادري كيف يتني الجرأة وامسك موبايله ودخلت نفس الرقم اللي اعرفه وصار .. وهو عاطني رقم ثاني الله يسامحه
يلست اتعبث في موبايله .. ومادري اللي سويته صح ولا غلط
شفت مسج مخزن وفيه صورة وحده والتاريخ قبل لا يتقدم لي بشهر
وشفت مسجات ثانيه وفيها ايميل وحده من دوامهم.. عرفت من ال address
ومن بين المسجات فهمت انها مطلقه .. ومسافره .. وتقوله انا في مشاكل مع طليقي
ومسج يقول حبيبي مادفعت فاتورتي وعليها المبلغ الفلاني
ثار جنوني ,.,. ويلست ارتجف وانا اقرى وما قدرت اكمل .. وخليت الموبايل قبل لا يطلع .. وساء حالي كثيرا ..
فاليوم الثاني خرجنا للغداء.. وطول الوقت وانا ساكته وما قدرت اكل عدل.. وهو يقولي شو فيج . عيونج فيها حزن . وبعدها غير قال فيها شوق لي وحنان وحب وانا ساكته
رجعنا العصر .. ونفس الشي حصلت فرصه اني امسك موبايله وفتشت فيه ابي اتاكد من اللي شفته امس بس ما قدرت اقبض شي زياده منه
واليوم يي عندي يودعني قبل لا يسافر ..وانا كلي الم وصدمه .. وهو ملاحظ علي .. يقولي شفيج تعبانه . اكيد عشان موعد الدورة .. ولا مو نايمه عدل
ومن داخلي احترق واحترق زياده يوم اشوفه مب حاس شو اللي فيني
جهزت له كم صورة لي معاه وكتبت وراهم كلام حلو ودعاء وغلفتهم وعطيته.. وقلت له امانه ما تفتح المظروف الا لما توصل البلد اللي ساير لها ..
قلت يمكن قلبه يعوره شوي من يشوف الصور والكلام
واليوم .. ماتخيلت في يوم اوصل لهالحال.. واقول في خاطري ليش وافقتي عالارتباط ؟ كنت عايشه حياه هاديه وحلوه وخفيفه .. والله اني مب قادره اكل شي اليوم .. وهو يتصل فيني تغديتي تعشيتي.. اقوله لا .. لأ مالي خاطر اكل شي..بس عادي عنده ما حاول يلزم علي اكل
هل اصارحه ؟ ولا احاول اجمع ادله اكثر؟ وكيف اسوي؟ وانتظر عليه اسبوع بعد ما يرجع من السفر
احس الكلام فالتلفون ما ينفع.. ما تخيل اني راح انفصل للمره الثانيه
استغفر الله .. الله يقويني واصمد في ويهه وان شاءالله يحس ويتعرف بخطأه
سامحوني على اسلوبي وترتيب الكلام الملخبط ..
