..الحـنونــه..
New member
- إنضم
- 19 أكتوبر 2008
- المشاركات
- 9
.
.
.
السلام عليكم
حبيباتي ابي مشورتكم لي
مالي غيركم بعد الله
انا تعبااانه ونفسيتي تسلم عليكم
مره طاقه بي الدنيا واتمنى الموت
ما ادري وش فيني مع ان مشكلتي يمكن تكون تافهه عندكم
بس والله كبيييييييييره عندي تعبت منها
انامتملكه من ولد خالتي من 3 شهور عمري 21 وهو اكبر مني بسنه ونص
طبعا انا ما ادري ليه وافقت عليه وما ادري وشلون كأن كان مغمى علي او مثل العمياء
مع اني كنت مو مرتاحه بس في النهايه وافقت وياليتني ما وافقت
في البدايه وقت الملكه مشت الامور عادي طبعا كل شي سويناه سريع
لانه يبي المكله قبل يسافر للخارج ويكمل اجراءات الزواج ويزيدون راتبه يعني اخذت بين الملكه والخطبه اسبوعين حتى اني الى الان مو مستوعبه شاللي صار
في الملكه كنت ما احس باي شي تجاهه ولا كأن جنبي رجال
وعادي مو مستحيه منه مع اني خجووله مره بس ماادري ليش حسيت اني الي جنبي ولد صغير او بنت مثلي ..يمكن يكون شكله يدل على هالشي لانه كل من شافه يقول في الثانوي ما في اي ملامح رجوليه وشكله جدا عادي
وفوق كذا طريقة كلامه واسلوبه كانه بزر حتى اول كلمه قالها لي :ترى انا اطول منك ..حتى لما قرب مني وباسني وضمني انا عاادي ما حسيت بشي وكنت اسوي نفسي يعنني خجلانه بس ابدا ما حسيت بشي حتى ما اذكر وش كان شعوري وقتها
كنت متخيله اني بتزوج رجال بمعنى الكلمه في شكله وفي تصرفاته وفي طريقة كلامه انا ما اطلب واحد يهبل ولا واحد ما يعلى عليه بس على الاقل القى فيه الي يظهر انوثتي قدامه
كنت اتوقع اني بس يقرب مني بذوب وبأصد عنه من الحيا او يجني شعور غريب بس ولا من هالاشياء حصل
وعن الكلام الحلو والرسايل والحركات ابدا ما عندك احد بس كنت عاذرته لانه خجول شوي في الكلام واول مره اتوقع يتعامل مع بنت مع ان اخته تقول انه كان يكلم بنات بس ما ادري عندي ما يتكلم ابد
في التلفون انا العاده اتكلم ولما اسكت ويكون ما عنده شي يقوله يعتذر باي شي عشان يسكر يعني المكالمه عشر دقايق بالكثير وكلام كله عااادي كأنه جالس يكلم واحد من اخوياه والمكاله في الاسبوع مره والا مرتين
عذرته قلت يمكن هو من النوع الي يعبر بالحركات اكثر او كل شي يجي بعد الزواج مشيتها وانا للحين مو حاسه باي شي تجاهه ولا كاني متملكه
ومر شهر حاولت اضغط على نفسي وارسله رسايل حب وحركات واتقبله بكل عيوبه وجى العيد طبعا ما فكر يجي يعيد علي رغم انه موجود في السعوديه بس انا في مدينه وهو في مدينه ولا فكر يكلم امي وابوي يعايدهم وانا ما كلمني الا اليوم الثاني يوم لمحت له قال والله مشغول باغراض السفر ومدري شنو ..لك شهر يالظالم ما جيت تجهز الا الحين وطول الوقت طلعات مع اصدقائه بس مشيتها له
وعذرته وبصراحه ما همني لاني جى والا ما جى كله واحد ما اشتقيت لوجهه استغفر الله بس العالم اكلت وجهي ما بقى حرمه ما سالتني لييه خطيبك ما جى يعيد عليك طبعا انا كله اصرف مشغول مسكين
وبعدها باسبوعين ما ادري وش جاني كرهته بمعنى الكلمه ما قمت اطيق كلمه منه وكل ما اتذكر شكله انفر منه زياده رغم انه مو بشع مره بس ما ادري ليه ما قدرت اتقبله جلست اضغط على نفسي احاول
ولا بينت شي لاهلي او له بس وقفت الرسايل ما عاد ارسلته عاد هو ما استغرب عادي ولا قال شي
بس اذا ارسل يسال عن احوالي جاوبت عليه برساله بس ومرت الايام وما قدرت اتحمل اكثر
تعبت نفسيتي مره وحسيت اني بختنق كل ما اشوف اسمه على الجوال او رساله منه احس مغص ببطني وغثيان ما ادري وش السبب رحت قلت لعمتي كل شي في قلبي استغربت لاني اظهر للناس غير كذا
جلست تهديني وتسمي علي وتقولي وش فيه هو عشان تكرهينه كذا اعطيني سبب مقنع قلت لها والله ما ادري كله على بعضه كراهته احسه ما يناسبني مره ولا شي فيه يجذبني له
قالت اذا ما تقدرين تتحملين لا تضغطين على نفسك اكثر قولي لابوك ورحت لابوي طبعا انا اذا قابلت ابوي بس ابكي ما اقدر اتكلم وما قدرت افهمه الي بقلبي ولا لامي وقالولي استخيري معليش هذا ولد خالتك والولد ما فيه شي ينعاب عشان تتطلقين منه قولي لنا سبب واحنا اكيد ما بنوافق اذا طلع فيه شي غلط ..قلت لهم انا كارهته ما اطيق اسمع صوته ولا اتقبل منه اي شي عاد امي قامت تقول اكيد هاذي عين ومدري شنو سمي بالله وتعوذي من ابليس صعبه اننا نطلب الطلاق عشان البنت ما تحبه
الحب بجي بعد الزواج عادي
طبعا وقفت مكالمات وسكرت جوالي وصرت منعزله على نفسي وبس ابكي وابوي وامي يتالمون عشاني بس ما يدرون وش يسون كبرت السالفه وكلمت خالتي وقالت لامي وش فيها البنت وش صار
امي قالتلهم انها متضايقه شوي وشايله هم السفر وانها ما تبي تسافر وكذا قالت خالتي خير ان شاء الله نحنا متفقين من البدايه ان البنت موافقه على السفر وش مغير رايها اللحين تلعب بنا
هي طبعا السالفه طويله شوي وكبرت ووصلت لجدي وجدتي وامي مسكينه هي بوجه المدفع ما تدري وش تقول ووش السبب
وانا على حالتي بس تطري علي السالفه دموعي تنزل كان ميت علي احد متضايقه دايم وقلبي يتقطع على حالي بس والله يا بنات مو بيدي مو قادره اتكلم معاه او اسمع منه اي شي
طبعا هو بس يرسل لي ويحاول يكلمني عن طريق امي ولا ابوي وانا ما قدرت
هو متوقع ان السالفه اني زعلانه عشان ما جى العيد او اني متضايقه اني بسافر
وهو يرسل لي يعتذر ويقولي ان شاء الله اني بعوضك عن كل شي وبسعدك وانا احبك مرره
ومتمسك فيك وانا كنت ابغاك من يوم نحنا صغار وكلام مثل هذا
انا والله يا بنات متقطع قلبي ما ابي احد يتعس عشاني وما ودي بالي صار بس والله ما اقدر اضغط على نفسي وانا ما اظمن اني احبه او اعيش معاه سعيده بعد الزواج خصوصا انه ما فيه شي يحببني فيه وانا اتمنى اني اتطلق وانا بكر احسن من بعد الزواج يمكن يكون نصيبي احسن منه بعدين
بس امي واهلها شايلين فكرة الطلاق مره وامي مسكينه تعبت من كلامهم وتقولي اذا تحبيني وتبغين راحتي ارجعي له وانا مو كاسر ظهري الا هي والا انا ما اهتميت لاحد وابوي بعد يهمه راحتي عن كل الناس بس والله ما ارضها لامي
وانا من ناحيت استخاره واستغفار ودعاء والله ما اوقف استخير في اليوم مرتين واستغفر اكثر من الف مره وادعي ربي اني يشرح لي صدري بس والله للحين متضايقه ومو مرتاحه له
بس اللحين بضغط على نفسي عشان امي هي عندي بالدنيا كلها
ولا اتمنى اني اكون سبب في قطع علاقتها باهلها
برجع له وامري لله بس افكر اني اقوله بنفسي واحاول اكرهه فيني عشان يجي الطلاق منه وذيك الساع ارتاح ويزيل همي
او اكمل معاه عادي يعني اكون له جسد بس واقبل بالي يجني مهما كان واتخلى عن سعادتي وراحتي
ويمكن يكون انسان بلا اخلاق ولا تعامله سيء هذاك الوقت وش بيصير فيني
والله يا بنات محتاره وش اسوي معاه انا برجع له بس بأي طريقه وشلون اتعامل معاه
ااه ياقلبي الله يعني عليه اكرهه يا عالم اكرهه ما ادري وشلون بتحمل والله احس بغثيان اذا تذكرته
حبيباتي ساعدوني الله يرضى عليكم ما عندي احد استشيره غيركم وش اسوي ..ادري اني مشكلتي يمكن تكون تافهه بس ما يخالف خذوني على قد عقلي وارشدوني
واسفه طولت عليكم بس اعتبرتكم اخواتي وفضفضت بجزء من الي بقلبي لكم
منتظرتكم لا تخيبوني
.
.
.