السلام عليكم ورحمة الله وبركاتة
مشكلتي اني زوجه ثانيه
تقدم لي شاب متزوج في نهايه الثلاثينيات لديه طفلين وزوجته موظفه
سئلو اهلي عنه رجال ماعليه كلام سبب زواجه الي قاله ان زوجته مشغوله مع اهلها ماتلقيه اهتمام
يعني ماسب فيها او قال عيوب عنها
بعد الزواج جلس معي 4شهرو زوجته زعلانه عند اهلها ماراح ترجع الابشروط ينفذها لها
المشكله اني حبيته
وندمت اني خذيت واحد متزوج بحكم اني سبق لي الزواج
فصار هو شغلي الشاغل صرت افتش جواله
واشوف رسايله لها وانه يحاول يرجعها
ويقولها انتي الغاليه انتي الحب الاول انتي وانتي
انا تطقني الغيره وابدا اهاوش وازعل قال ليش تفتشين الجوال تحملي ماجاك
هذي زوجتي وام عيالي قلت تحبها ليش تتزوج عليها قال مالك دخل في الاسباب
ماارح اقولك وش عيبها اذا كان فيها عيب انسي الطرف الثاني
انا ابي عيالي يستقرون في بيتهم مع ابوهم وامهم
انا ماابيه يطلقها والله ارحمها وحاسه بشعورها بس حقدي على زوجي ليش يتزوج عليها اذا كان يحبها واذا كان مايحبها هل المشاعر سهل انه ينكذب فيها؟
يقولي لاتحاسبيني على كلام تشوفينه شي طبيعي استرضيها
السبب في كتابه المشكله ان زوجي مايعرف يخبي اعرف الي وراه ودونه على طول
ومشكلتي مااسكت افضح نفسي وانهار واقوله اكرهك ليش تتزوجني ماتوقعت بحبك واغار عليك
كنت اقول اهم شي انه عاقل وولد ناس يحطلي بيت واجيب عيال هذا همي
اغــــــــار الغير ه بتذبحني ماعرفت اسيطر على نفسي نكدت على الرجال
تتوقعن يحبها ؟
اذا يحبها ليش يتزوج عليها
يقدر يحبنا مع بعض وبنفس الحب..؟
احس حياتي بتصير جحيم مع هالغيره مرات افكر اتطلق واقوله طلقني مااقدر اتحمل الوضع هذا
انحرم منك ولاااشوفك
تخيلو معي الحين هو مابعد نام عندها توها زعلانه ويحاول بشتى الطرق يسترضي
اذا رجعت وش ابسوي
بتقولون انتي متزوجه وانتي عارفه انه متزوج ؟؟!
ايه ادري بس ماتوقعت ابحبه كنت ابي الستر والعيال وبس ماهمني الحب
كلامي موب مرتب ماادري وش ابي بالظبط يمكن من خلال نصايحكم اقدر اطلع الي فيني
ابي احد يصحيني
يمكن تكون فيه اشياء ماذكرتها مهمه تفيدكم في النصيحه
ابجاوب على كل شي بس ابي شي يريحني
سؤال / هل فيه عدل في المشاعر ؟
سؤالي له من تحب اكثر انا او هي غلط ؟ يقولي مينب مجاوبك احسه موب من العدل
تحسوني اني مشتشته غريبه بس ليش المراه حياتها الرجل