لحظة المواجهة.....
قبل ثلاثة ايام قررت اني اواجه زوجي بخيانته (كنت موب متأكده اذا كان يخوني او
اتزوج علي لأني في ادلة كانت تقولي جي وادله ثانيه تقولي جي).....
طبعا انا ما قررت هاشي الا وانا متأكده باني اقدر اواجه بكل ثقة وهدوء بدون اي نرفزة وقتها كانت فيني
الدورة تمنيت اته اصلي استختاره قبل ما اتخذ هالخطوه بس هاك الوقت سبحان الله حسيت بالراحه النفسيه
والسكون بعد ما كنت اردد دوم (اللهم ارني الحق حقا وارزقني اتباعه...وارني الباطل باطلا وجنبني اتباعه)...
نسيت اخبركم انه قبل المواجهه بيومين كانت عندي فواتيرالبنك وشفت انه مشتري من محل للملابس
الحريميه في رمضان اللي طاف وفاتحته عن هالفاتورة لأني شفت فاتوره بهاالمحل في سيارته كنت وقتها
سايره عند اهلي وما حبيت افوتها له ....وسألته عن الفاتوره طبعا واقتها يابلي اعذار غبيه اونه ربيعي حط
الفاتورة بالغلط في السياره ومن هالقبيل....انا مشيتها بس ما صدقته بس حبيت ابين له اني موب غافله
عنه....وكان عندي بعد فاتورة باسمه لمحل يبيع فساتين بقيمة الفين درهم احتفظت فيها ....
المهم دقيتله وكان هو في الدوام وقلتله كيف انت تقولي انه هاك الفاتوره لربيعك وهي مسجله بالكريدت
كارد مالك (ترى مرة قالي انه في العيد ساعد واحد من ريعه كان نزنق ماديا راح فصله كمن كندوره
وخذاله غتر و وزر فقلت يمكن بعد خذا لعياله ومرته بعد...لأنه بعد كان مسجل عالكريدت انه ماخذ ثياب
من ادمس وبمكن باتش) المهم يابلي اعذار سخيفه ما تدخل المخ بس اللي غاظني انه كان يرد علي بكل برود جنه واثق من نفسه.
دخل علي الحجرة وانا كنت يالسه بكل هدوء وثقه...كيف بديت الموضوع ,,قلتله تعرف يا زوجي اني دوم
ادعيلك في صلاتي فقال شو تدعين...قلتله ادعيلك يانه الله يعصم قلبك عن المعاصي ويبعدك عن الحرام
يبعدك عنك بنات السوء ورفقاء السوء....وقتله للاسف انه خنت ثقتي واني اعرف,,,هاك الوقت قالي شو
تعرفين؟؟؟ فتحتله المسج وقتله اقرا وقراه وقتله هاه شو السالفه ومنو هاي قال ما عندي اي تعليق تم ينكر
وينكر وعشان يظيع الموضوع قالي ليش ماراويتيني هالمسج نفس الوقت قلت هالشي راجعلي (طبعا انا
طبقت كيفية التعامل مع الخائن) وقتله اذا واجهتك هاك اليوم كانت بتكون المصيبة كبيرة...وانا انسانه عاقله فكرت في عيالي والعشرة اللي بينا.
وبعد تم ينكر ويقول انا ما سويت شي انا ما سويت شي غلط....فتله خل الاستهبال مالك تراني اعرف اسمها وانها تشتغل وياك واعرف في اي منطقه تسكن حسيته انصدم شوي وقالي كيف عرفتي قتله مصادري الخاصه
(ترا كله اكتشفته لأني كنت انكش في مسجاته مع انه كان يمسحها اول باول بس ربنا حب يفظحه)
وسؤالي كان انته على علاقه بوحده والا متزوج علي تم يتهرب كان يقولي شو الفرق كنت اقوله في فرق انا ما احب لك الحرام والحرام يجر لحرام وانا الحمدلله جامده اخر شي قال انا متزوجها عاد عقبها الدموع طاحت بروحها ما قدرت اقاوم.....
يلست اصيح شوي واهجم عليه شوي وطلعت كل اللي في خاطري الحمدلله هاك الوقت احترمني و ماسار وخلاني وعصبتم كاش على عمره ويسمعني ويجاوب اسالتي موب كلها (بس كان واثق انه موب مسوي شي غلط)..... (طبعا حطيت كل الاحتمالات واتوقعت منه كل ردود الفعل)
سألته متى تزوج عليها قالي اقل من سنه بس قتله انا اعرف عنكم من اكثر من سنه ونص يعني كانت بينكم مكالمات ولقاآت قالي كان كل شي بينا شغل وهي تمت تدق علي (عرفت انها بنت سوء لأني واثقه انه ريلي محترم وشافت انه محترم واكيد هي لفت عليه لين ما يابت راسه)
لو كان يبا يتزوج راح يدور على وحدة بنت حلال وراح يدق البيوت من ابوابها تفرق اما والله تلف عيه واتوقع وقتله انه هي عادي عندها تكون على علاقة محرمة وياك بس انت فقت شوي وقلت خلني اتزوجها احسن وكانه رد عي بالايجاب.....
لا واللي ماتستحي انها ارملة وعندها طفلين بعد يالسه اقوله تعال ربي عيالك قبل لا تربي عيال الناس...
المهم يلست اصيح وايد هاك الليله وقلت كلام وايد ومن ظمن الكلام قتله طلعني بيت بروحي لاني ساكنه
ويا اهله لتكون مسكنها في بيت بروحها قالي هي عندها بيت قلت كيف وليش عقب استدركت وقتله شو من
عله للاسف طلعت بنت البلاد قلت يالله بيتي اخترب.......
اذا هي وافقت على شروطك في البدايه في النهايه ما بترظى وشكلها بتاخذك علينا ما ارضى بغير انك تطلقها بكره وبعده بتسويلك سحر اعوذ بالله ..قالي عطيني
فرصه طبعا في البدايه قال انا متزوجها بالحلال وما بطلقها وقعدت اقارن بيني وبينها وكيف انها بنت سوء دار بينا كلام وايد ...(يعني اذا بنت البلاد ما استحت على عمرها وهي ارمله بعيال بدل ما تربي عيالها فكرت بنفسها)
هاك الليله نمت عقب ما صحت شوي وولدي الصغيرون مريض هاليومين فكان يوعيني كل شوي كل ما يوعيني ايلس اصيح عقبها وحسيت انه اتأثر...... وثاني يوم ماعرفت كيف اتصرف لأني ما عرفت شو
بيكون موقفه..... بس عالظهريه دق علي عشان يسأل علي و يطمن قلت الحمدلله بادره
طيبه,,,,, ويوم رد البيت تم يكلمني عادي و انا ما كابرت وعاندت قلت العناد ما بييب الا عناد وتميت ارد عليه يوم يسألني بس
حسيت انه قدرني وكبرت في عينه باسلوبي يوم واجهته وبعد لأني ما كبرت السالفه
وااايد وسرت عند اهلي(اصلا ليش اسير عند اهلي و اخلي للخايسه اللي ماتسوى ويطيب لهم الجو) ...
.طبعا اتظايقت يوم شفته وحاولت اني ما ايلس وياه وفي نفس الوقت ماكان لي خاطر ايلس عند اهله ........
حبيت ابين اني قويه وما صحت جدامه بس قمت عالفجر وتميت اصيح والا فجأه حصلته
عدالي (ترا خليته يرقد في الارض ما حبيت انه يرقد برع الحجرة وخاصه احنا موب في بيت بروحنا وبعد عشان ما ياخذ راحته في التليفون ويا الخايسه اللي عافانا الله ملصقه
نفسها بالقو من يوعى وهي تدق لين ما يرقد...اللهم فكني منها يارب)
ربت على راسي وكان خاطري اتكلم بس سكت وعقب قالي خلاص لا تصيحين انا ما استاهل تميت ساكته...... وقتله انا ما اصيح عليك اصيح على عمري لأني ما استاهل اللي سويته
وعقب تم يربت عاراسي وعقب قتله متى بطلقها قالي عطيني فرصه يوم قال هالكلمه نزلت مثل البرد عاقلبي وقلت الحمدلله اني واجهته .....
بنات اتمنى تخبروني شو اسوي و كيف اتصرف وياه لأني محتارة والله افيدوني الله يخليكم لأاهلكم ولا تشوفون اللي شفته