البخل انواعه وعلاجة ....
هلا فيكم خواتي الغاليات بالنسبة لموضوع البخل انا طبعا عندي البخل نوعين البخل العاطفي والبخل المادي وبغض النظر عن الأسباب البيئية بشرح كل واحد على حده وعلاجاته .
أولا : البخل العاطفي :
هو بخل الرجل في كلامة واظهاره لعواطفة الجياشة للمراة وقلة مدحة وثنائة وكثرة النقد والاستهزاء والسخرية وعدم تقدير افعالها .
ويكون الحل في هذه المشكلة ان تكون المراة واثقة من نفسها وان لا تهتز ثقتها بنفسها وان لا تقلل من قدرها وتشعر بالاحباط والضعف وان تكثر هي من مدحها لنفسها ومدحها له وأن تحترمه ولا ترد على الفاظه بالفاظ مماثله له بل بالعكس تحاول ان تتجنب الرد أو تعكس الرد الى كلام ايجابي لانها اذا ردت عليه معناها انها لم تحترمة ومستحيل يتعلم هو انه يحترمها وبيصير يزيد ويعاند وبعد فترة بتفقد هي ثقتها بنفسها .
نأخذ مثال :
كانت الزوجة سمينة ولبست لبس وجاء الزوج وقال والله صايرة مثل سندويش الشاورما المرأة الذكية تحسن التصرف فتبتسم وتقوله انتظر أحلى ريال يهجم علي وياكلني من راسي لين ريولي وتضحك بيحس الرجل انها واثقة من نفسها وبنفس الوقت بيتشاقلها اكثر وبيحبها ومع الوقت بيتعلم انه يحترمها وبيحاول يتكلم بكلام لطيف ويتعلم منها .
أصلا طبيعة الرجل بخيل في عواطفة ومشاعره لانهم ما يحبون يعبرون عن كل شي بس كل شي بالتعود يعني مفروض المرأة بذكائها تخليه ينتبه لكل شي في جسمها وتكون مسويته بطريقة مميزة وملفته للنظر
وبعدين الرجال مب مثلنا دقيقين لا هو ما ينتبهون الا بعد فترة عشان تنتظرين عليه فترة لين ما يشوف ويمدح وكثير من الرجل مدحهم عبارة عن تعليق ساخر حتى لو عجبه الموضوع فلازم المرأة تتقبل اي تعليق برحابة صدر المهم انه نطق .
وبعض الرجال يعتبر عن مشاعره بالأفعال وتلبية طلبات الزوجة وهذا اكبر دليل على الحب والرضا ولو ما كان راضي ما كان لبى طلباتها ورغباتها فعلى الزوجة ان تكثر من الدعاء له وشكره وتحسسه انها فرحانه بخدمتها ومع الوقت بيصير هو يقلدها بكلامها وعلى قولتهم كثر الدق يفك اللحام .
أما بالنسبة لموضوع البخل المادي فهو بخل الرجل في المصروف والقيام بحقوق الزوجة وحقوق الأبناء وطلبات وحاجات البيت الأساسية والثانوية والكمالية وهو مقتدر وهذا اهم شرط انا استثني الانسان اللي ما عنده أو الفقير لانه الفقر مب عيب ولا حرام .
بالنسبة لموضوع بخل الزوج في الأشياء الأساسية وهو مقتدر مثل الملبس والمأكل والمسكن المناسب فهذولا فئة قليلة لأنه الشرع قال الملبس الساتر يعني مب كل عيد لبس يعني بس شي يستر وخلاص وهذا الكل قايم فيه والماكل يعني مب كل أصناف وألوان الطعام والشراب لا المهم شي يكفي ويسد الجوع والمسكن المقصود فيها المسكن اللي يأوي حتى لو كان غرفة هذا كلام الشرع يعني ما في واحد يتحجج ويقول لا اخذ من زوجي لانه ما يكفيني مصروف العيد والرسول حلل لا هذا الكلام غلط لازم نفهم الدين صح مب على كيفنا
وبالنسبة للزوج البخيل المفروض يكون عن المرأة أسلوب حلو عشان تعرف تأخذ اللي تريدة بطيب خاطر الرجل اذا عرفتي مفتاحة عرفتي توصلين للي تريدينه ولازم المرأة تكون غامضة مب كل شي تقوله للزوج وتكون تحسن ادارة البيت والأموال عشان يشعر الرجل بالأمان ويقدر يوكلها في بيته وهو مطمن ويعطيها وهو مرتاح انها ما بتلعب ولا بتبذر .
كنتي محتاجة لبس للعيد والدولاب مليان ملابس وطالعة برا الدولاب من كثرها وطلبتي من الزوج اكيد بيرفض لازم اول شي تتخلصين من الملابس اللي ما تريدينها اول بأول وبدون ما يحس عشان ما يقول والله مسرفة ومبذرة وبعدين تختارين الوقت المناسب يعني مب قبل العيد بيومين والله عطني فلوس للعيد ولا بأخر الشهر .
يعني بدون ما تصارخ بس كل ما تمسح الارض تقوله اي يا ظهري والله يا ليت لو كان عندنا مكنسة كانت سهلة المهمة والتنظيف الرجل ما يحب تحسسينه انه مقصر عليج يحب انج تمدحينه وتحتوينه بالكلمة الطيبة ويقدر الحرمة اللي تقدر اي شي لو كان بسيط تخيلي انتي تحسنين لشخص وتعطينه من مالج لو كل شهر درهمين وبعد فترة يقول يغلط عليج بتقولين هذا ناكر للمعروف كذلك الرجل
وفي نوع من الرجال يحب المحاسبة يحب يعرف كل درهم وين صرفتيه هذا عاد بكل طولت بال هاتيلة فواتير من كل مكان تروحيلة واذا قالج هذا ما له داعي بكل هدوء قوليله انشا الله وكوني اقتصادية معاه وبعد فترة بيثق فيج وما بيحاسبك على شي يعني الموضوع مثل الاختبار لج اذا نجحتي بتنالين الثقة وراحة البال واذا فشلتي وجاحدتي وناقرتية بتخسرين طول عمرج وما بيثق فيج ابدا ولا بيصرف عليج وكل مالها الا الصبر وطولت البال والكلمة الطيبة وفي مثل يقول ارضاء الناس غاية لا تدرك يعني انتي لازم تختارين ترضين الناس ويسخط الزوج ولا ترضين الزوج ويسخطون الناس وترا الناس تتكلم على الرايح والجاي ويعني شوفيها لو قالوا ما عندها لبس يا اختي يبون يعطونج من حسناتهم ليش تردينها كسبي راحة بالج ورضا زوجك واهم شي رضا ربك لانه الواحد يصبر ويحتسب مب عشان الزوج عشان الجنة وترا هاي الدنيا كلها ما تسوى وكلنا رايحين وما بناخذ منها شي فليش نتنافس فيها وهي ما تسوى جناح بعوضة .
وآسفة على الاطالة بس حبيت اوضح كل شي للفائدة وشكرا لكم اخواتي الغاليات على هذا الموضوع الرائع وجزاكم الله كل خير ووفق الجميع لما يحب ويرضا
تحياتي *..الحلوة..*