ياااااااااااناس ابي احد يساعدني

[مهــــاوي qatar]

السلام عليكم

شخباركم ياملكات

انا جايه استشريكم في مشكله مضايقتني وايد هو ان متملكه وزوجي ماكان يشتغل وانا صابره المهم زوجي هالحين اشتغل وراتبه مايتجاوز6000 ريال يعني قليل جدا بالنسبه لارواتب اهل قطر المهم رضيت قلت الله المستعان هالحين يقول اولا مااخذ الراتب راح اقدم على سلفيه عشان الزواج قلت اوكيه قال شورايج احط عرسج يالخيمه ملكيه انا هنيه عصبت وقلت اسفه انا ماراح اتزوج بالخيمه ؟ تبي تفشلني جدام ربعي قال يعني ماراح ترحميني من هالديون قلت والله الديون بتاخذه بتاخذه حق العرس يعني 40 الف مال القاعه ماراح تخسرك شي؟ تم ساكت وبعد ايام دقيت عليه وقال بعصبيه خلاص بحط عرسج بالقاعه <<< احس انه يقص عليه



ملاحظه : ترى اقل قاعات الدوحه بثلاثين الف ريال وهو ابوه متوفي واكبر اخوانه وماعنده احد:sadwalk:

شورايكم يابنات ترى انا ابي شوركم ونصايحكم

 

[أحلى عيون دلوعة]

الله يوفقك يارب ويحل مشكلتك على خير

لاني مو من قطر من كذه مااعرف القاعات اللي فيها

الريال القطري كم يصير بالسعودي؟

 

[مهــــاوي qatar]

مشكوره اختي بس الريال القطري نفس العمله السعوديه والااماراتيه بالضبط

 

[بنت الاصول]

ماعندكم استراحه يعني قاعة عرس صغيره يمكن الرجال ظروفه صعبه وله تحمليه لين يجمع الـ40 الف وبعدين تزوجو وبعدين لاتحطمينه تراه يمكن مايقدر اتحمليه هذا زوجج المستقبل مع ان انا سعوديه وعندنا قاعات عرس رخيصه ليش غاليه القاعات عندكم كذا ..؟؟ ماعندكم على 20 الف او 17 او اقل؟؟؟

 

[عفة]

نصيحتي لك انك تخليه يدور علي قاعة صغيرة باحد الأوتيلات
و تشوفون ايش عندهم من عروض . احياناً يقدمون اسعار مناسبة .
حاولي يكون الفرح شوي مقتصر بس مرتب .
كثرة الديون راح ترهق حياتكم بعد الزواج .
تمنياتي لك بحياة كلها سعادة

 

[دمعه منسيه]

شو فيها الخيمه؟ اسفه يا حبيبتي بس لاتصيرين سطحيه كذا واللي مابيحظر عرسج عشان خيمه مب لازم ايي وصديقاتج مابيفيدونج

انتي ماتعرفين عندنا بالامارات اللي يسوون فالخيمه هم اللي جخ اكثر؟
لان الخيمه عندنا تكلف

خيمتي بنت عمي ب 90 الف!!!! وهي تعتبر خيمه جدا عاديه يعني ممب ذاااااااااااااااااك الزود


اكسبي زوجج وخليج من هالشكليات

 

[lo0llee]

نصيحتي بما انك لسا على البر وحاسه من الاول ان مستواه المادي مو مناسب لك انك تفكين إذا هذا من الأول كذا انا ماحكي اني سطحيه او شي لا بس انا داااائماً انصح ان الوحده دامها بالبر وماعندها عيال و مو مقتنعه باللي راح تاخذه من اي ناحيه انها تاخذ القرار من الأول هذي نقطة النقطة الثانيه اذا انتي حابته هو كشخص وتبينه أجلي الزواج على اساس يكون نفسه مع اني ضد مبدأ الزواج الكبير يعني ليه تبسطين الناس على حساب نفسك وزوجك من باب اولى فلوس الزواج تأثثون فيها وتسافرون شهر عسل حلو ولا تبدأون حياتكم بقروض ومشاكل وصدقيني اذا ضغطتي عليه راح يكرهكي لأنك انتي حتكونين السبب في ديونه.. راجعي نفسك وشوفي وش انتي تبين واللي يرضيك انتي بس وتذكري ان إرضاء الناس غاية لا تدرك مهما سويتي ماحيعجبهم.. تمنياتي لك بالتوفيق

 

[أ. باسمه الكوس]

السلام عليكم ورحمة الله

أهلا بالعروسة المحتاسة :bye1:

حبيبتي خلينا نتفاهم انا معاك ( اوكيه ):flex:

انتي وافقت على هذا الزوج وكان لا يعمل تعرفين ماذا لايعمل وتعرفين ما يترتب عليه

اليس كذلك ؟؟ وتعلمين انه يتيم واهله ليسو من ذوي الأملاك

و وافقتي اذا تحملي مسئولية قرارك

والشئ الثاني انتي يا حبيبتي تعرفين مستواه المادي راتبه 6000 ريال فقط

ومن العقل والحكمه ان لا تكلفيه فوق طاقته ابدااا

ولا تدعيه يقترض ابدااا لأنك المتضررة الأولى من القرض

فأنتي زوجته وتتقاسمين معه المعيشة

واي ضرر مادي سيعاني منه ستعانينه معه

وال40000 الف كثيرة على مستواه المادي

هل تظنين انك بحاجه الى ال40000 الف فقط للحفله ؟؟؟؟

هناك مصاريف اخرى تترتب على الحفله

وستكلف ايضا ؟؟؟؟؟؟؟

طيب تعرفين كم سنه سيظل يدفع الدين ؟؟

يعني تفرحين يوم وتتعذبين سنواااااااات

والزوج عنجما يبدأ حياته بعدم تفاهم وضغط مادي يتأثر كثيرااا

ويأثر على علاقته على زوجته

ومدى حبه لها

لأنه كلما شعر بضغط الدين و تذكر ذلة الاقتراض

تجي صورتك ب باله بأنك السبب

وبالتالي ستحدث بينكم فجوه

وتتأثر علاقتك معه

مع العلم خلال السنوات الأولى تكون ناك صعوبه نظرا لتأسيس الحياة

وبدء التفاهم واختلاف البيئات

وربما ترزقين بطفل او طفلين

اضيفي الى ذلك ثقل الدين !!!!!!

واخيرا اذكرك بحديث النبي صلى الله عليه وسلم : (( خير نساء قريش احناهن على طفل في صغره وأرعاهن لزوج في ذات يده ))

كوني رحيمه ولطيفه بزوجك

وابدأي حياتك بالحب والرعاية

وانوي ذلك لوجه الله تعالى

فزوجك (( جنتك ........ ونارك ))

والناس ؟؟ ابدا لن ينفعوك سواء احتفلت او لم تحتفلين ستسمعين الانتقادات

والتعيييب فلماذا ادمر اسرتي من اجل الناس ؟؟

 

[يمانيه]

حبيبتي مهاوي
اول شي الف مبروك
وبعدين يا قلبي اسمعي كلام خواتج وخاصه زوجه حكيمه

واذا على القاعات في ارخص من ثلاثين
عندج الماريوت , الواحه , وغيرها بس انتو دوروا

حرام راتبه 6000 وبتحملين اجار قاعه فوق ال 30000
وترى هذي مظاهر وبتزول

وما يبقى غير الحب والتفاهم وصدقيني زوجج ما راح ينسى ج هالوقفه

ونصيحه لا تبدونها بقروض ربويه لان منتم مضطرين
وترى الربا وفلوسه ربي ما يبارك فيها أبداً

عالعموم الخوات كفوا ووفوا
وما حبيت أمر وما ارد عليج وخاصه أنج من هل الدوحه

دام كذا انا معزومه يعني :nosweat:

والف مبرووووووووووووووووك مقدما

 

[روعة روح]

كل ماقلت تكاليف الزواج كثرت البركه

والناس ياحبيبتي مو نافعينك

 

[زهرة البوادي2006]

اختي نصيحه لا تضغطي عليه بالديون بعدين راح تتعبي في حياتك معه راح تكون حياته ديون في ديون ولا تنظري على الاخرين لانك راح تتعبي انظري على حالة زوجك الماديه والي يقدر عليه لانك انتي بنفسك عارفه ظروفه والف مبروك وزواك سعيد

 

[المتفائلة 123]

اخواتي ما قصروا والله كفو ووفووو


والف مبروووووووووووك مقدما

 

[بنت الصيبا]

انا رأي من راي زوجه حكيمه واذا محتاره في القرار صلي صلاة الاستخاره
والله يسهل امورش​

 

[goldenhony]

الهون أبرك مايكون """"وهونيها عليه لا تصعبينها الفرحه بالقلب ،،،والله ماتستانسين وهو متضايق من الدين
أنت هم بتتضايقين والقاعه ماراح تسعدج ،،،،،،،،،،،، الف مبروووك وموفقه يالغاليه

 

[ربة بيت]

اتقي الله في زوجج ترا هذا كله وصخ دنيا
والله هالقاعة اللي تبينها بتين يوم العرس مابتحسين فيها ولا راح تذكرينها
تعرفين شو احلى شي........... انكم تعيشون بعد الزواج و كل شايل بقلبه غلا لحبيبه خلي عنج الماديات واكبري بعينه......... وبعدين شوفيها الخيمة ترا صدق نحن عنا في الامارات اللي يسوون عرسهم في الخيمة هم الناس الراقين......
تبين الصدق انا يوم ملجت والله كنت اقول حق اهلي ليش المخاسير انا مابي عرس بروح مع ريلي بنسافر و بنفرش بيتنا بس هم ماطاعو اهلي و اهله بالذات مع ان زوجي الحمد لله مقتدر و عنده خير بس نحن باجر محاسبين جدام ربنا على كل فلس صرفناه هل في الحلال ....... هل هالقاعة تستاهل نصرف عليها هالمبالغ الخيالية عشان ساعات اذا مو دقايق
انت بتدخلين الساعة كم 10؟ 11؟ و زوجج يادوب يدخل الساعة 12 و خلص العرس مو حرام ؟ يعني هالريل المسكين يصرف الآلاف المؤلفة عشان يرضي الناس اللي مايعجبها العجب و آخرتها يطلعون من العرس الا العروس مادري شوفيها والمعرس يا طويل ولا قصير ولا اسمر و هاتي من التعليقات.....
اسمعي كلام خواتج تراهن حقانيات اذا انتي صدق تحبين ريلج ما تفكرين بشكل مادي و تأكدي ان الله يبارك في الزواج اللي يمشي حسب الشريعة وحسب اوامر رب العالمين انتو داخلين على حياة يديدة فكري فمستقبل ريلج ترا سعادتج من سعادته
الله يبارك زواجكم و يهنيكم في حياتكم

 

[دميـة]

الله يوفقك حبيبتى فى عرس و وزواجك

فقط لا تنسى

ايسرهن مهورا اكثرهن بركة

 

[ام جواهر]

اسمعى كلام البنات........... وبتكبرين بعين ريلج ...... ترا الناس ما بينفعوج ........ وهاى بداية حياتج لازم تخلين ريلج يفتخر فيج وبرايج ......... ولادخلينه متحسف على الديون......... وربي يوفقج

 

[الدكتورة نبضة قلب]

ردي تحت
-
-
-
-
-
-
-
-
-
-

 

[الدكتورة نبضة قلب]

الله يسامحج بس
صدقيني لتجنين الكلام اللي قلتيه بعد الزواج
راح يكره اليوم اللي تزوجج فيه بعد ما يقعد اول الشهر على الفين
والله عفيه عليه وافق على انه يستلف 40 الف
معناها شاريج
انا لو منج وعارفه انه ريلي شاريني ومستعد يبني وناستي على تعاسته لاتصل فيه الحين واقوله فديت عمرك لو اسوي العرس في البيت عادي بس ما احملك فوق طاقتك ابد


انا جدامج وحده حلفت على خطيبي ما يستلف من البنك درهم واحد
والحمدلله عرسنا كان بسيط...بالرغم من اني من عايله كبيره
والله الشاهد انه الكل استانس على عرسنا
حتى شهر العسل ما رحنا
والحين مستانسين براتبي وراتبه كاااامل
اخر وناسه
حتى شهر العسل عوضني عنه عقب 6 شهور
احلى الفنادق والمطاعم
ما خلينا في خاطرنا شي

خلوا فلوسكم حقكم واستانسوا فيها
الناس ما يملي عينهم الا التراب

 

[كويمسي]

شوفي حبيبتي اولا مبروك وثانيا حقك انو يحط لك عرس لازززززززم كم مره بتتزوجين لو بيروحون ربعة سفره مابيقصر بيتسلف حق روحة ..صح ولالا؟انا زوجي قبل زواجي قال طبعنا العرس عليكم راح ابوي مسكين يدور فندق قلت حرام بالله ماادخل بفندق وهو يستانس من فلوس ابوي عطيت ابوي 3500 او 4000ريال من مهري قلت محد بيسوي عرسي وعرسة الامن جيبة اما يتشرط على ابوي لا وقلت خذ يايبة استراحة وابوي جاب العشاء من عندة مسكين وزوجي للحين مايدري ولا بعلمة الابوقتها اما احد يستغل اهلي او يستغلني مسوي لي ضعيف لااااااااااااااالو مايبي يعرس يأجل او يتحمل هذا العرس مصاريف