هل ظلمته؟

[عش السراب]

السلام عليكم..

خواتي أتمنى إنكم تتفاعلون معاي في مشكلتي.. وتقولون لي بكل صراحة إذا أنا أخطأت في حق زوجي..

مشكلتي بدأت من تراكم مواقف مرت علي و أنا ساكته لين ما انفجرت فوجه زوجي البارحة وقلت له بصريح العبارة إن اللي يصير مش عاجبني..

المهم السالفة وما فيها إن زوجي بشكل عام يحب ويحترم أهلي وايد ولله الحمد.. ويمدح في أمي و أخواني وهذا الشي يفرح طبعاً.. لكن لما أسمعه يمدح في أختي الوحيدة (وهي أصغر مني بثمان سنوات) ويقول لي إنها فناااانة وسوالفها حلوة.. أحس بشي غريب في داخلي... هي أختي فعلا شخصيتها وايد حلوة و الكل يحب سوالفها و هالشي خلاني يكن أغار منها لإن زوجي بعد انعجب فيها...

بديت آخذ الموضوع في خاطري من الإسبوع اللي طاف.. كنت بالليل نايمة و أختي اطرشلي مسجات عالبلاك بيري تبغي تكلمني.. المهم زوجي قرأ المسجات و رد عليها (من موبايلي) و كتب لها: لا حبيبتي هي نااااااايمة...

في اليوم الثاني لما قمت من النوم قال لي زوجي إن أختي كانت تباني و هو رد عليها.. استغربت ليش يرد عليها من موبايلي الشخصي و رحت فتحت المحادثة و انصدمت من رده لها... ليش يقولها حبيبتي؟؟ و أنا بين فترة و الثانية ويتكرم بهالكلمة حقي.. الصراحة حزنت واااااايد بس ما تكلمت..

مرت الأيام و البارحة أختي جت بيتنا و طلعت مع خوات ريلي طلعة وناسة وهناك ضيعت موبايلها.. و اللي فعلا صار إن خوات ريلي سوو فيها مقلب وخبو الموبايل.. وهي ما عرفت عن هالشي لين ما رجعت البيت و اكتشفت إن موبايلها ضايع.. زوجي عرف بالمقلب و تم متفاعل وااااااايد ويا خواته يخططون كيف يصيحونها.. وفعلا لما صاحت أشوف زوجي ناوي يطلع من غرفتنا عشان يستمتع يشوفها تصييح.. أنا هني قلت له عيييييب شو هالحركات.. المهم رجعو الموبايل لإختي.. وبعد ساعة أو أكثر أشوف زوجي مطلع لها عصاير عشان يرضيها.. أنا قلت له بضيق إنه ماله داعي بس هو راح على كل حال... وبعد شوية وصل لزوجي مسج منها تقوله: تنرفز.. في البداية كنت أفكره موبايلي لما قريت المسج (لإن موبايلاتنا متشابهة) وهني جت الصدمه لما اكتشفت إن أصلا بينهم مسجات سوالف عادية بس ضحك... لكن أنا عصصصصبت وااااااايد وفار الدم من راسي... نفس الوقت رجع زوجي من عندها ويقول لي إن أختي معصبة منه وتقول له إنت السبب كله منك.. مع إن خوات ريلي هم أصلااللي بدو في المقلب...

إنفجرت فويهه و قلت له عيب هالحركات تصير بينكم.. ولازم تحترم مشاعري لما تكتبلها حبيبتي.. وهالكلمة بس لازم يقولها لي أنا وبس مش لأختي.. وقلت له شو بيكون شعورك لو كتبت حبيبي لأخوووك هل إنت تشوف هالشي صح؟؟ وقلت له الموضوع مو موضوع غيرة الموضوع موضوع مبدأ.. و أنا واثقة منه ومن أختي مليوون فالمية.. بس قلت في نفسي إذا تمييت ساكته يمكن الموضوع يزيد عن حده وساعتها المشكلة بتكبر..

المهم هو اتأسف وقال أنه غلطان.. بس نام معطيني ظهره وزعلان.. يعني حسسني بالذنب إني تكلمت وواجهته والحين هو طلع عنده امتحان و الصبح ما ودعني اببوسه مثل ما عادة يسوي..

الله يخليكم أدري إن الموضوع يمكن يكون تافه في نظركم بس أنا فعلا أشووف الموضوع كبير.. و أحس إن زوجي ما بيكلم أختي من اليوم ورايح عشان اللي صار (وهالشي بس عشان يحسسني بالذنب)...

قولولي شو أسوي؟ كيف أتعامل معاه و أنا أصلا الزعلانة منه؟؟ هل أراضيه ولا أنتظر منه يكلمني فالموضوع وهالشي أنا متأكدة إنه مابيصيير؟؟؟

 

[ام معمر]

صراحه مالومك اللي فهمته ان زوجك مهتم باختك كثير وكلمي اختك بعد قاليلها لاعد تكلم زوجك ولاعد ترسلها سلامات مسوين صحبه عندي وبعدين هو مش محرم لها عشان تطيح الميانه بينهم خليكي قويه بهالشي لايتعلقون بعض اكثر

 

[MEeMEe -]

لا فهميه انو غلط

 

[thel]

اللي فهمته ان أختك صغيره بالعمر
انتبهي انتي عليها وفهميها انو هذا غلط من باب النصح وانو مهما كان هذا رجال غريب وانو من الدين انها ما تحتك فيه

وزوجك لما تكلمينه قولي له ابعد عن اختي من باب الحرام وانو ما يجوز وانك زعلتي انه المفروض انه ما تصير بينهم رسائل ولا شي وانو اصلا ليش يخبي عنك انو بينهم رسائل وان الإثم ما حاك في نفسك وكرهت ان يطلع عليه الناس

والله يوفقك​

 

[عش السراب]

مشكورين خواتي عالرد.. وفعلا أختي صغيرة وبعدها ثانوية عامة.. وبشهادة الجميع أنا جميييييلة وأجمل منها بكثيير..

بس المشكلة إن دايما زوجي يزعل لو كلمته عن أي شي ضايقني ولما يتأسف يتأسف من ورا خاطر ويتم كم من يوم ما يكلمني عدل.. هالشي حطم ثقتي فنفسي وخلاني أفووور لما شفته يبغي يراضي أختي... انزيين و أنا.. ليش ما تحسسني إنك ما تقدر على زعلي أنا... والله أمووووووت قهر كلما أفكر بهالشي... كيف أتعامل معاه؟ وكيف أخليه يحس إن الضييق مو زين حقي ويراضيني ويحسسني بغلاتي... خواتي أنا ما قلت لكم إني حامل و حمالي هذا صعب وخطر.. ولازم ما اتنرفز أو أتضايق.. وهالشي هو عارفنه زين بس دايماً كبريائه ما تسمحله إنه يراضيني..

 

[الى الله امضي]

اه ياربي لك الحمد

ما قصدي اغلط عليك يا عش السراب

بس فهمت انكم ما تتحجبون عاذرتك من ناحية القهر لو بدالك اموت من غيظي لكن اكسبي زوجك

الحمد لله اني سعوديه

عندنا البنت اذا بلغت تتغطى وما شوفها الا محارمها

الحمد لله

الله يعينكم

كذا وحده تشتكي من نفس المشكله

نصف المشاكل اللي اقرا عنها هنا ماهي عندنا في السعوديه والسبب

الحجاب ياربي لك الحمد اللهم ثبتنا

 

[ام عبادي123]

أولا ديري بالك من أختك وفهميها غلطها وثانيا والأهم ديري بالك على نفسك لي صار فيكي شي محد بينفعك لأنا صرنا بزمن اللهم ياكافي وزوجك طنشيه وحسسه أن خاطرك ثقيل عليه وموفقه حبيبتي وياشين الأخت لي ترززت عند زوج أختها

 

[عش السراب]

الحمد لله إحنا محجبات، لكن إذا قصدج تغطية الوجه ففعلا إحنا ما نغطي.. لكن نغطي لو كنا حاطين مكياج..

 

[غيرهم كلهم]

بصراحة الي عملتيه عادي ولا ظلمتيه ولا شي

حتى لو اختك الصغيرة المفروض يكون بينكم حدود والصغير يكبر

بس يفضل مافي حدود لانها تعودت تكون عادي معاه

انا اختي اصغر مني بس لو زوجي او هي مزحت معاه ما اسكت ابهدلوا

لحالها وابهدلها لحالها عشان ما اقلل من قيمة احد فيهم قدام ثاني بس لازم يكون حدود

وانتي اتصرفي عادي ولا كانك مزعلتيه ولا شي يعني الحق معك مش عليك

والمفروض تكلمين اختك بهدوء وقوليلها تكون رسمي مع زوجك

لا تمزح معاه او كملي امك وهي تكلمها بهدوء

والله يوفقك ويسخرلك زوجك​

 

[الناصحه الامينه]

زوجك يختلط باختك بشكل عاادى؟؟؟؟

ويكلمهااا؟؟

هل زووجك محررم لاختك كى يكوون بينهما هذا التسااهل؟؟؟

لاادرى مامدى التزاام المجتمع والاسرة التى انتى فيها بتعااليم الاسلاام

كل الذي ادرية ان معاناتك وغيرها سيكوون الكثير افراازاات طبيعية لتجااوز تعااليم الاسلام ومنع الاختلاط بغير المحاارم والتسااهل في مايدعو الى افتتان الرجل بالمرااة ايا كانت علاقتة بها

اصلح الله حالنا وأعااذنا من موجباات سخطة وعقوبتة

 

[عش السراب]

أم عبادي.. أنا مو تضايقة من أختي وايد لإنها مراهقة وتحب السوالف لكن متضايقة من زوجي اللي هو فاهم وعاقل.. وفوق هذا عدم مراعاته لكرامتي اللي انجرحت..

 

[الى الله امضي]

هذي المشكله

اختي كوني انتي اول من يبدا

وماراح تحلين مشكلتك وبس الا بتحلين مشاكل كثيره وتاجرين عند الله

مو بس تغطية الوجه في حدود متخطينها كيف زوجي يمازح اختي ذنب عظيم

لو اشوف هذا المنظر يقشعر بدني بركه ما انجلط

مدري انا لو بطلع برى المملكه كيف باعيش

بعض الاخوات تشتكي كيف زوجها يناظر وحده لابسه شورت قصير لحد ما تطلع

عورتها المغلظه يالله

شي بالنسبه لي خيالي

اختي ضعي حد لما يحصل

زوجك ما يجوز له يطلع في وجهها حتى كيف يمازحها ويضيفها الله يغفر له

الله يعينكم

 

[عش السراب]

أختي الناصحة.. إحنا ماعندنا الإختلاط على انفراد.. يعني كل المواقف اللي صارت كانو خواته معاهم في الغرفة يعني مو لحالهم.. و الحمد لله إحنا أسرة ملتزمة.. عشان جذي أنا تضايقت منه.. لإني حسيت ببدايات صداقة و أنا ضد الصداقة بين أي رجل مع وحدة غير أخته و أمه وبنته..

 

[حكايا ورد]

كلمي اختك وفهميه انو الي تسويه غلط وحرام
ومن الاساس مايكون ببنهم لامسجات ولاسوالف عندها صحاباته تسولف معاهم
زوجك قولي له المبدا مفروض اناواثقه بختي لكن شرعا حرام هو لو مو حاس انو الي يسويه غلط ليش خبا عليك حسييه انه غلطان وغلطه كبير
خليكي قويه وانتي تكلميه
ولاتراضيه هو الغلطان مو انتي اهتمي بنفسك و اهم حاجه صحتك
​

 

[الى الله امضي]

الله يكتب لك الخير

ويوفقك يارب لو غيرك زعلت من نصيحتي لها

اسال الله ان يستر عليك انتي وزوجك وتعيشون في انس وسعاده مدى العمر

 

[المتغلية]

اول شيء اقرئي عن الانماط علشان تعرفي طريقة التعامل مع زوجك انا ماعرفت اتعامل مع زوجي الابعد ماعرفت نمطة ولله الحمد تعدلت حياتي حيل صار هو اللي يراضيني بعد ما كنت اراضية الحمد لله واشياء كثيرة تغيرت في حياتي

 

[ام عبادي123]

أسفه أختي الحق مو على زوجك بس حتى على أختك لو ما سمحتله بالتمادي معاها ماتمادى وبعدين تقولين مراهقه يمكن هالمراهقه تكون سبب خراب بيتك حبيبتي اصحي كم وحده خربة بيت أختها بسبب مراهقتها والرجال قلوبهم ضعيفه بسرعه يتعلقون بالمره وخاصه الى مالمسها وبعدين حطي حد لزوجك أنه مايضحك مع حرمه ما تحل له أنا زوجي كان يقعد مع حريم أخوانه ويضحك وفهمته هالشي غلط وحرام وحتى صاروا أخوان زوجي يطلبون من حريمهم انهم يتغطون مثلي بادري بالخير بارك الله فيكي

 

[محبة مكة]

ما دامك فتحتي له الموضوع وصارحتيه
لا تراضيه
خلي عشان يبعد عن اختك
او ممكن هو بيتعامل كدة مع اختك
لان المجتمع اللي انتوا فيه كشف

 

[نجدالعذية]

انتي ماغلطتي ابدا ابدا ابدا