مشكلتي مو مثل البنات هنا بس احب انكم تساعدوني

[رحيل الوقت]

تدرون هذا اول موضوع وتعتبر اول مشاركه لي

اول شي السلام عليكم ورحمة الله وبركاته

ثانيا احس نفسي صغيرونه ومشكلتي ما لها داعي قدام بعض مشاكل البنات هنا

بقول المشكله او مو مشكله حلم اتمناه يمكن احلم بس جد انا بنت وحيده وامي بنت وحيده بعد وسط اولاد طبعا وهذا خلاني وخلا والدتي على قولة القايلين انو هي اعتبرت الزينه عيب انا اعتبر الزينه خروج عن طاعة امي
المهم اني تزوجت والله كرمني دائما دائما اطيح بمواقف احس كل البنات عندهم فكره عن التصرف مثلا طحت بمشكله وانطرحت ذي المشكله بمكان فيه بنات كل البنات عندهم ردة فعل غير ردة الفعل اللي انا سويتها نهائيا

مثل سالفه يمكن اتجرأ إذا طرحتها بس سببت لي نفور من وضعي مع زوجي

تكلموا بعض البنات عن الالعاب الزوجيه وتشجعت وجبتها زوجي ابتعد عنها وقام يتهرب منها وخلاني بعد اكبها رغم ان كل البنات يقولون انه بيبوس ايدك يوم تجيبين مثل ذي الاشياء

يتكلمون عن امور كثيره عن الحياة الزوجيه مثل ان زوجي ما خلا احد من اصحابه الا زرت مرته وانا العروس مو هم وخلاني ازور كثير من اهله على حساب اني من المفروض ما زرتهم كل هالامور اسويها وانا مثل الهبلا ما اعرف الصح من الخطا في امور بسيطه << بعدين يوم تنعرض مثل هذي الامور القا نفسي سيوت الخطا مو الصواب في موضوع الكرامه او موضوع الثقل

يعني يوم نروح بعد اسبوع من زواجنا ونسكن مع ناس قرايبه في الطايف وش تسمونها << طبعا انا قبلت ذا الموضوع على اساس انو حنا نزورهم وهم والله ولا حتى باركوا لي

كثير اطيح بمثل هذي المواقف مع ناس غير اهل زوجي عموما

على قولةالقايلين ابي اتنصح ابي زوجي يركض ورا هناي وفرحي وبس يبيني مبسوطه

لانه ببساطه على قد ما سويت له في الامور اللي مثل كذا اقله ابي اروح لصديقتي
يقول لي ناس ما اعرفهم << رغم اني ما خليت احد يبيني اتواصل معه الا وتواصلت معهم

اقله ابي انبسط مع صديقاتي في فرح لوحده منهم يرفض يقول لي اجانب ما نعرفهم وانا على تواصل معهم قبل الزواج

ابيه يحب معليش على الكلمه ابيه يحبني وما يحسسني اني انا اللي ابيه رغم والله يا بنات اني عاديه اشوف نفسي عاديه رغم هذا كله اشوف نفسي اليوم اني قليلة حيا من كثر ما اسمع بعض البنات تقول والله مجنني ومدري ايه << احس اني انا للي مجننته

يمكن في باقي الامور تطلع مشاكل لكن اعتبرها اختلاف في الشخصيات

لكن هذي المشكله خلتني احس بالنقص دوم احس انه ما يحبني يبيني بس وقت ما هو يبي

يبي يطلع الان نطلع لكن اذا ابي اطلع فيها تفكير
حتى الشاي اذا بعرضه عليه لازم يخالفني فيه يبي عصير رغم اني شبه عرفت موده

يبي يتفرج على فلم نتفرج لكن هو يدخل وانا اتفرج على فلم يقوم يغير القناة ولا حتى يشاورواذا قلت له انا متابعه يقول انا ما احب

وكلماته انا ما احب
انا ماني رايق
انا تعبان

يمكن تشعبت

اول الزواج كنت اسويله اجواء رومنسيه شموع وورود ولكن اليوم مليت لاني اقدم هو ما يقدم

حتى اذا ودي شي احلم واجلس بحلمي ولا ينتبه اني مبسوطه او مهمومه

تكفون هل انا عايشه سعاده وهميه على حساب اني اذا تكلمت معه يقوم يسوي الشي بس لاني تكلمت فيه يعني
اذا قلت له في وقت صفا طبعا هو يحدده يوم يتكلم عن احلامه معي اتكلم واقوله مثل ما يقول يعني اوقات نكون بالحوش وهو يحب الزرع مره
يقول بزرع ورد حتى تحطين لي على الفطور ورد اقله والله فكره حلوه تفتح النفس شوفة الورد على الصباح واذكره بايام الملكه

بعدها بيوم يجيب الورد لي ............... اتمنى من جد اني القى الورده هذي من دون ما المح اني محتاجتها وانتم ادرى طبعا فيه امور انتي تحتاجينها مثل ضمه او او ما ابي اطلبها ابيها تجيني

انا قريت بعض من القصص هنا وشفت انقلاب حالة بعض البنات من تعاسه الى الحلم اللي تتمناه كل بنت ... السعاده << رغم اني اعرف انه مفهوم نسبي

هذا جانب من بعض الامور اللي تصادفني مع زوجي

شكلي اتوهم مشكله :sadwalk:

ساعدوني باستشفاف وين الخلل معي وارجوكم لا تجرحوني في انتقادتكم لاني اسمعها في بعض جلسات الحريم اللي عندي يوم يستتفهون اللي اسويه رغم انهم ما يعرفون مين تسوي كذا ويعتبروها مو من جنس النسا يعتبرونها بالعربي عبيطه << :tears:

 

[natalie]

والله مادري شقولج اللي سويتيه خلاص راح ما منه فايده الكلام باللي راح . . اللي جاي و من اليوم ابدي , , و قلناها وايد اهتمي بنفسج بشكلج بلبسج و بدلعج . . . انا ما اعرفج بس مادري ليش حسيت انج جامده شوي مادري والله يمكن عكس كلامي بس حسيت . . . تدلعي عليه . . صيري مثل البنات حق زوجج انتي صغيره و انثى و يصلحلج الدلع و المياعه عادي . . . و اذا شافج نعومه و كيوت و كاشخه و دلوعه بيستانس عليج . . شفتي احنا لما نتنرفز من الاطفال و يقومون يطالعونه بعيون بريئه و دلع شلون يتغير مزاجنا من نرفزة الى حب و ضم و احضان و كلام حلو !! فهمتيني

 

[مناكير وردي]

خليك مثل ما انتي حبوبه وعبيطه وخليه هو يمشي لك حياتك
لكن
بينك وبينه تشرطي في طريقة النوم تدلعي ونافخي فيه فشليه في اي موقف يسويه لك عكس اللي تبين
ووضحيله هالشيئ بس بالبيت
وقوليله برا البيت انت قرر عني وانت مشيني على كيفك
لاتدورين الزلة ترى زوجك مبين انه عاقل وقيادي ليش تبينه يصير عكس كذا
طيعيه دامه انسان محترم ومراح يضرك
اذا قالك طلعة مافي قولي اوك واذا قالك نطلع المكان الفلاني وانتي عارفة ومتأكده انه مايصلح او ممكن يقلل من قيمتك قولي مالي خلق اطلع
وعيشي وربك يحلها من عنده بلاش نكد

 

[رحيل الوقت]

ناتالي اللي راح راح مثل ما قلتي .... عن الدلع هو قال لي اول ما تزوجني قا لانا ادور على المدلعه وانا ما اعرف اتصنع كل اللي اسويه هو اللي اعرفه يعتبر عبط يعتبر دلع يعتبر هبل مدري اللي اعرفه انه هو فاهم اني احبه بس انا مو مصدقه انه يحبني لانه ما يستنتج اني احب ذا الشي لازم ادله على الشي اللي احبه , يمكن تعود اني اقوله ذا الشي احبه سوه لي.

مناكير وردي الله يصلحك انا ما ابيه قيادي >>>>

لاتدورين الزلة ترى زوجك مبين انه عاقل وقيادي ليش تبينه يصير عكس كذا

اجمل مافي الرجل قوامته على المرأه انا شرحت انو اذا ابي شي يسعدني ما يكون مستعد يكون مشغول او مو فايق واذا جاملني يقعد يقول ترا مجاملك وترا انا تعبان بس لو مو خاطرك ما جيت والله ان المكان يغث وما يصلح ويقعد كارب بوزه معي اتمنى وقتها انه ما طاعني ....
يعني انا ما سويت فيه كذا وتفضلت عليه يوم يطلبني اي شي

تدرين الحين صرت على قولتك عايشه وش بسوي بخرب بيتي بارده بلا مشاعر ان عطاني وجه ما ابتسم اقرص نفسي اذا انا بحلم او حقيقه

 

[ana wow]

نصيحتيي لك اقري في مواضيع البوصلة الشخصية عشان تعرفي شخصيتك وشخصية زوجك ماتتخيلي قد ايش تتفتح لك ابواب كثيرة لطرق التعامل مع الزوج وحل مشاكلك معه لانك راح تفهمي شخصيته وبالتالي تعرفي مفاتيحها واخيرا راح تعرفي اشلون تتصرفي معه وكيف تقنعية ..... وهذا كل الي اقدر افيدك فيه

 

[أحاسيس طفله]

حبيبتي إنتي غلطانه عيشي حياتكـ ؛؛ ونسي نفسكـ ؛؛ سوي أشياء لكـ أنتي مو توضحين إنها لزوجكـ ؛؛
من كلامكـ إنكـ تزينين له أجواء رومنسيه وتهتمين فيه >> مع الوقت إهو بيمل وبطفش <<وإذا طلعتوا مع بعض
وعلى قولتكـ يتمنن عليكـ >> جاريه بالمنه والله بعضهم إذا جاريتيه بكلامهم اللي ماله دآآآآآآعي يسكت << عاد إنتي
يوم تجارينه عطيه الكلام بضحكه مع تعقيدة حواجب مع ميلة كتف تميعي تدلعي وشوفي النتيجه

 

[رحيل الوقت]

انا وو عطيني الرابط حق معرفة الشخصيه دورت في البحث ما عرفت القاه انا توني جديده بالمنتدى احسني حست

احاسيس طفلة ما عنه الدلع بس اشوف شخصيتي وشخصية زوجي لان احس انو هنا الغالبيه يفهمون عليها ويمكن افهم زوجي اكثر وافهم انا ايش كمان

 

[أحبه ولكن]

الله يسخر لج زوجج ياااارب

 

[ملكة اسطورية]

حبيبتي شكلج عروس يديده وبعدج ما عرفتي طبع ريلج عدل ذكرتيني بأول زواجي كل شي عكس ماابغي
شوفي حبيبتي مثل ما قالت اختي (أنا واو) ادخلي بوصلة الشخصيه بتحصلينها بقسم مقالات ناعمه وشوفي ريلج من اي فئه وعقب دوري مواضيع تخص هالفئه
وثانيا انصحج تسيرين دورات ناعمه حاولي تدخلين كل الدورات لإنها بتساااعدج بنسبه 80% وحاولي تدخلين دوراتها اللي في المنتدى بعد
والله يسخره لك انشالله

 

[مامت ريون]

بأختصار عاملية بالمثل لاكن بدها يعني موتبينين انك قاعدة تحطين راسك براسة وانتي وشطارتك ياحلوة انتي انثى وهالنوعية مايجيب راسهم الا المعاملة بالمثل وبدون ماتعايرية او تنافرية او حتى تكشرين بوجهه واهم شي قبل اي موقف بتسوينة معاة كثري استغفارررررررررر وعليك بالدعاء

 

[اميره بلا تاج]

ياعزيزتي الانسان لازم يعطي عشان ياخذ اعطيه الحنان حسسيه بحاجتك له اقتربي منه عشان يقرب منك سالفة التلفزيون والفيلم هذي مدري ليش ضحكتني عليك تدقيق عادي ياقلبي تلقيه يغار عليك مايبيك تتفرجين الا تحت عيونه وادارته خليك فرفوشه شوي واضحك للدنيا تضحكلك وانتي اكسبي زوجك بالدلع تدلعي عليه لاتطلبين كل شي منه بجمود تدلعي عليه تملكينه

 

[رحيل الوقت]

احبه ولكن تسلمين عزيزتي
أميره بلا تاج ومامت ريون حبيباتي انتم تذكرون الدلع كثير تدرون شكلي ذبحته من الدلع عشان كذا نفر مني

ملكة اسطوريه ان شاء الله اتابع الدورات هنا فيه شي كثير هنا يبيله اني اقراه

 

[سندريلا الخليج]

السلام عليكم

لا بأس حبيبتي ،،،،، لا توجد مشكله على الاطلاق في ما كتبته

كل ما في الأمر انك تميلين للجنوبيه ،،،،" إما انك جنوبيه ،،،او نمطك الغير غالب جنوبي " بمعنى

انك تحبين الاهتمام والمشاركه ،،،والحظن الدافئ والاسترخاء...الخ.

وكل ما في الأمر ايضا ان زوجك فيه من سمات الشمالي " فهو قيادي ،،،لا يظهر مشاعره،،، ذو مبدأ وذو هدف ،،، وهو ايضا لا يحب الالعاب الزوجيه :surrender:" ( لمعرفة ما اتحدث عنه اقرأئي لطفا هذا الموضوع : اختبار البوصله )

فإن كنا يا عزيزتي نختلف مع صديقاتنا ،،،،اخواتنا ،،،زملاء العمل ،،، فكيف لنا أن لا نختلف مع
شخص اصبح شريكنا في الحياه ،،،،ولا أقصد الاختلاف السلبي وانما الاختلاف في ما نحب ومتى وكيف ،،.؟؟و فيما نكره ومتى وكيف ...؟؟؟ اختلاف طبيعي نتيجة الجينات والتركيب الفسيولوجي
والبايولوجي في الانسان...

فليس الذكر كالانثى ،،،
لا في أحاسيسه ولا في تفكيره ،،،والعكس صحيح ،،،،أفهمي ما يحب وكيف يفكر ،،،من طريقة كتابتك للموضوع ،،،اعتقد انك انسانه واعيه ،،،تريدين التغيير ،،،اذن فلتبحثي عنه بالطريقه الصحيحه ،،،،

لا تبحثي عنه من خلال جلسات النساء ،،،فأغلبهن يتحدثن عن تجربة شخصيه ،،،فزوجك لا يشبه ازواجهم ،،،،فمن نصحتك بالألعاب الزوجيه كان زوجها جنوبي ،،،فبالتالي تقبل هذه الحركه ،،،،

ان كنت تريدين فهم زوجك افهمي قبلا تفكير الرجال بشكل عام وانصحك بقوه بقراءة كتاب الرجال من المريخ والنساء من الزهره ( توجد نسخة منه في المنتدى )

اقرأيه فتمهل وادراك واعي ،،،،

ومن ثم اقرئي عن نمط الشخصيات ،،،حللي سلوك زوجك واعرفي شخصيته ..

ومن خلال هذا ستعرفين وتفهمين لم يقوم بهذا وستتوقعين ايضا تفكيره...

لا تجعلي كلام الناس واذواقهم تسيّرك ،،،

وهبك الله نعمة الستر والزوج ،،،

حافظي عليها ،،،لا تبحثي عن الزلات ،،،ولا عن الاختلافات ،،،

انظري اليه وتذكري لحظات صفوّه معك ،،،

صوني نفسك وارتقي بفكرك وابدي رأيك باسلوب ،،،فالشمالي يحب الانسانه ذات الشخصيه

الواعيه والطموح الفذ ،،،

يحبها صديقة له تشاركه افكاره اهتماماته ،،،تجاربه

تبدي له نصيحة صادقه واعيه ،،،لاحتياجاته وقدراته ...

انسانه ،،،وانثى فاتنه ...

اهتمي به ،،،بصدق ،،،واجعلي ما تقومين به من باب الاحسان لزوجك

وابتغاءا لمرضاة ربك ،،،

فما كان لله يبقى ،،،وحتى لا تشعري بضيق ،،،فان كنت تعملين وتقومين بالاحسان

لرغبة منك في الاحسان ،،،فزوجك بالتأكيد سيشعر وسيفهم ،،،انك لا تقومين بذلك الا لمقابل ...

اذن اخلصي نيتك وابدلي ما تريدينه واجعليه خالصا لوجه الله وليس لهدف دنيوي...

وسترين زوجك باذن الله يلتفت اليك مقدرا محبا ،،، معطاءا ...

فالشمالي كريم ،،،قد لا يظهر مشاعره لكنه في اعماقه انسان متفهم كريم

محب بالفعل وليس بالكلام

اسأل الله العظيم ان يجعلك لزوجك كما يحب ويجعلك له كما يحب

ويجعلكما لربكما كما يحب ويرضى...


والسلام عليكم






​

 

[عيون عزيز]

حبيبتي الله يهداج انتي شكلج ماشية ورا كلام البنات الي في عيلتكم؟؟؟ كل ما قالوا شي صدقتيه؟؟ باين عليج ياهل وأي حد يقدر يقص عليج,,,
ترا ثلاث أرباع حكي الحريم كذب في كذب..تحصلينهم كل وحدة مب مرتاحة مع زوجها وعندها مشاكل الدين والدنيا بس جدام الناس تتجمل وتقول ريلي مدلعني وهو ما درى عن هوى دارها.. وانتي على نياتج...الرياييل مب نفس بعض..حطي هالشي في بالج... وناعمة الهاشمي يأست وهي تعيد هاي الجملة,,, تلقين وحدة من البنات تقول أمس رحت لاسنزا وشريت قميص النوم الي طير عقل زوجي وقلبناها ليلة حمرا وتودي رفيجتها تشتري نفس القميص ولما تشتريه الثانية وتلبسه عند زوجها يقول لها بكل برود(( شلابسه؟؟؟ غيريه وألبسي شي عدل))
أعرفي نمط زوجج .... دوري فالمنتدى عن الأنماط وأنصحج تشاركين في دورات ناعمة... وااااااايد بتفيدج ...كوني سلسة لا تعقدين الأمور ...وأدرسي طبيعة ريلج... ترا الحياة الزوجية مب قميص نوم ومكياج وكم أكلة يحبها ريلج وعيال.... لاااااااااااا..... الحياة الزوجة فن بح ذاته ومب أي وحدة تتقنه... يبيله مزاج وبال طويييييييييل ..
وأسرارج مع زوجج انتبهي تتكلمين فيها مع صديقاتج أو مع أي كان.. ترا الناس ما وراها الا الحسد...

 

[رحيل الوقت]

سندريلا الخليج رديت عليك قبل كم يوم بس شطلو ما انرسل
كلامك جميل وغالبا البنات هنا كلامهم رائع يثلج الصدر اغلب ما قرات في ردودكم انو اشترك بالدورات بحاول قدر الامكان اني اسجل وغيره بتابع هنا

عيون عزيز في الغالب انا اسمع واقارن بين اللي اسمعه في الجلسات يعني تصرفاتهم وتصرفاتي في حال اي وقعت في موقف << وفي الغالب اني وقعت لكن الكل يكون فعل شي وانا النقيض اوقات اقول وش هالاهباله اللي فيني اصلا من المنطق اني ما اسوي كذا وبعدها ازعل بداخلي مو بس بحياتي مع زوجي
اول قبل لا اتزوج كانت اموري مع امي شوي فيها حده يعني ما اتقبل اي شي منها وهي نفس الشي تنتقد تصرفاتي اول كنت فعلا عنادي معميني وطلع كلام امي كله صح اولا في علاقتي ببنات عمي وقريناتي من بتات خالي وخالتي يمكن اكون تاخرت لكن انا ما كان عندي غير اني افهمها اني اابي شي غيرهي اللي تبيه

يوم قريت عن الشخصيات في البوصله اقرب ما اكون للجنوبيه باحثه عن الحب والحنان قدرت احس بحب امي لي بس بعد ما تعبت معها الوحيد اللي كان يشعرني اني مهمه هو ابوي ما كنت ارد له طلب لكن امي غير والحين انا وهي اجمل ما تكون علاقة البنت بأمها لني صرت اضمها حتى هي تضمني وصرت ابوسها حتى هي تبادلني ذا الشي لكن زوجي مهما فعل هو وده اسوي ذا الشي لكن ما يبدال معجبه اني افني عمري عشان ارضيه وهو يحب بس يخالفني اقلها في طلعه اقله ابي اروح لهلي يقول لي مو الحين اكون اشغلت عمري بشغله يوم ما احد يدق علي من اصحابه ويكون راح الوقت وقتها يقول للي يلا اوديك لامك ....... وقتها يكون مالي خاطر لانه ردني ويردني في غيرها كثير ما يحس اني ابي الشي الا اذا الحيت او زعلت

الان عندي شعور ان زوجي ما يحبني ما يشعرني اني حبيبته كثير يخالفني في اقل شي تعرفين وش في اقل شي وانتي قريتي انا وش كتبت

هو في الغالب غربي لكن اوقات ما احسه غربي بعيد اقرا زياده في البوصله الشخصيه