مشكلة ولا عرفت شو الحل الله المستعان

[خلصتوا الاسامي]

السلام عليكم ورحمة الله وبركاته،،،

هذي مشكلة ابا كل وحده عندها فكرة او طريقة او اقتراح او حل..تدلو بدلوها عسى الله ان يعجل بالفرج...

زوجي طيب وحنون ومحترم...اللهم لك الحمد والشكر..بس المشكلة ما يحب يكون معاي...بعطيكم مثال...

1. يقول قولي شو تبين تشترين وانا اجيبه...ما له داعي تروحين...وانا بصراحه اتضايق..احس ما يريد نطلع مع بعض...اقول شو ابا وخلاص...

2. تعبت وتعبت افكاري...اقول له تعال نطلع نتعشى برا...نتمشى ...دائما اعذار واهية..مشغول...مواعد واحد من الشباب..عندي اجتماع المسا...ولا مره قال زين...وساعات يطنش المسجات اذا طرشت له مسج اعزمه...زين شو الحل؟؟

3. اذا بيطلع العيال يتمشون...يعني مثلا ملاهي...يقول انتي لا تتعبين نفسك..اجلسي في البيت انا اوديهم...اول مره اشوف ريال يحب يمشي العيال بدون امهم...

4. الي اشوفه حوالي...ان الكل يطلع هو ومرته..يعزمها ...يتمشون...يعزمها على العشا برا...يمشون العيال مع بعض إلا انا ...زين وين المشكلة؟؟؟؟

بقولكم عن الوضع...هو الصراحه طيب...وكريم وكل شي...بس في مشكلة في الطلعة معاي..وانا ما ابا اصر عليه..بصراحه خاطري يطلب مره اتعشى معاه برا...

بصراحه نويت بإذن الله...اسوي العجب...واستدعي كل الطاقات الايجابية في نفسي وفي الاخير بخليه بكيفه ولامب بكيفه يتمنى طلعتي وياه...وبعد فوق هذا بقول له سوري حبيب قلبي مشغولة اليوم...نكاية فيه...

بس صدق شوروا علي شو الحل؟؟؟

 

[خلصتوا الاسامي]

نسيت اقولكم ان انا وهو شماليين غربيين..

 

[ice creeem]

هههههههههههه كأنك تتكلمين عني انا وزوجي وهو شمالي غربي وانا غربيه لقيت حل جزئي صرت اطلع بروحي او مع خواتي واستانس وخلاص ما افرض نفسي عليه وانا اسمع وعود بهالطلعه اللي عيت تجي

 

[وردة ذبلااانة]

زوجك غريب جدا !!!:33:
مالي الا ادعيلك ياقلبي
الله يسخره لك ويوفق مابينكم ويهديه ويخليه لك ولعيالك وجعله يصير خاااتم بيدك :1:​

 

[القلب الحاني]

انا زوجي كان كده وبعدين اتغير مع الغشره والايام واولادهكبروا ويقولون نبي ماما معانا

 

[Sقلبي كبيرS]

ا

نا زوجى جنوبي مايحب اروح معاه نقضى للبيت اخر الشهر مرة يقول زحمة ومرة يقول يالله بتروحين كانه بيشيلنى ههههههه وبصراحة سرت ما احب اروح اذ فيه اغراض للبيت بيجيبها تعرفوا الجنوبي كسول لابعد حد واذ رحت معاه وصلنا للبيت يقول يالله بانزل الاغراض كلها ويعصب ويقول يالتني عزوبي انقهر واضحك في نفس الوقت واذ بنسافر نفس الشئ يشيل الشنط ويقول لو عزوبي كان اخذت ملابسي في كيس ههههههههههه​

 

[coffee]

عزيزتي اعرفي السبببببببببببببببببببب ؟؟؟؟
ليش ما يحب يطلع معاك؟؟؟؟؟؟؟؟؟؟؟؟؟؟؟؟؟؟؟
خاصه انه بكل مكان حتى الملاهي للاولاد يعني غريبه....
انا كان زوجي ما يحب ياخذني اماكن معينه وكنت استغرب بس لمن عرفت السبب تصرفت على اساسه يعني ما يحب اروح معاه الشوبينح(نقضي اغراض البيت)لانه يغار لاني كاشفه وجهي ويحس ان الكل يناظرلي(عاد جينفير لوبيز الي معاه)بعدها صرت اروح وياه واغطي وجهي خاصه بالسوق..خلاص صار ياخذني الا يشد علي اروح..انا اعطيك مثل....مو اكثر...
بعدين يا اختي انت ليك حق تطلعين وتروحين مع زوجك وهو لازم يفهم هذا الشي بسسسسسسسسسسس اختري الوقت المناسب واطرحي عليه الفكره لا وحدديله المكان بعد يعني مثلا:
اختي وزوجها راحو المكان الفلاني وقالت انه رووووووعه بنستانس فيه لو حنا سوا انا قلتلها عاد بروحه مع زوجي يوم الخميس ها وش رايك؟
اوووووووووووووو
عزمتني اختي على المكان الفلاني او صديقتي بس انا رفضت لاني استمتع بالطلعه معاك وقلتلها لا بروح هذا المكان مع زوجي ...كذا يعني.....ومره على مره ان شاء الله بيتغير...

 

[الأمل دوماً]

الله يلهمك الصواب ويريح بالك
امين

 

[عيوني كحيله]

يمكن يغار عليكي مايبغي حد يشوفك
أنا زوجي مستحيل ينزل وياي السوق , بس إذا سافرنا برع البلاد عادي يروح وياي كل ماأطلع عالسوق

 

[frabitchino]

الحل.. اجلسي وياه في وقت هو مروق ومبسوط.. وبهدوء ونعومة..اعرفي .. أسباب رفضه للطلعات معكـ ..؟؟
حتى لو رفع صوته وماأعجبه الموضوع.. خليكـ هاديه ومسيطرة على نفسكـ لاتراددين .. عشآن تكسبين الحوآر لمصلحتكـ.. وبعدين..اسأليه؟؟؟
.. يستحي يطلع معكـ ؟ قولي له خير انشاءلله .. كل الناس يطلعون مع حريمهم ومحد عيب عليهم.. بالعكس
يكنون لهم الإحترام لأنهم حول أهلهم... وبعدين .. نفسي عيالي يحسون إني قريبةمنهم وقت مايلعبون .. ودي اطالعهم يضحكون ومبسوطين.. لاتحرمني هاللحظآآت..
عجآآز ويكره المطاعم.. والمتنزهآت؟؟.. قوليله.. برقة كان نفسي أجرب ولو بالعمر.مرة.. مثل باقي المتزوجات الي أعرفهم..إنكـ تعزمني على قهوة وإلا على عشاء... أو نطلع نسهر لوحدنا لو عالبحر...
ونبهيه بخصوص المطاعم إن فيها بارتشينات وأماكن مغلقة.. شوي شوي لما يستبسط الوضع.. وعالمتنزهآت والتسوق.. قوليله..وبدلع كأنكـ طفل يترجى أمه.. اتمنى ماتحطها بنفسي.يا { اسم الدلع} .. طبعآ استخدمي سحر المرأة.. بالغنج والتدلل واللمس والهمس على شان تلعبين على أوتار عوآطفه..مشتهية أطلع معكـ حبي.. فيه أغرآآض أبجيبها بس مدري بالضبط اسمها.. اخترعي لكـ.. حاجة...؟؟
بعدين لاتحسبين نفسكـ من أول مرة بتلاقينه سلكـ معاكـ لا يبيلكـ شوية صبر,, ولاتنسين سحركـ وهدوئكـ .. تراها بإذن الله مفتاح قلبه.. أنــا زوجي ش/غ.. أستخدم معه نفس ذي الطريقة .. إذا عند في أموور.. ولله الحمد يسلكـ مثل الحلاوة...
بس يبيلكـ وقت ولاتعاملينه باالند...
والله يساعدكـ وييسر أمركـ

 

[دمعه بلمعه]

الله يسخرلك زوجك

 

[راحةالقلوب2]

مادري شو اقوللك
بس الله يهديه

 

[**درب الزعل**]

اطلبي منه تطلعون لمكان معزول ما فيه إلا أنتوا.. مثلاً طلعة برية.. أو بحرية..
يمكن ما يبي يطلع معاك قدام الناس..
بعض الرجاجيل ما يحب يصادف أصحابه أو أي أحد يعرفه وهو مع زوجته وعياله..
بدون ما تفاتحينه أو تسألينه عن السبب..
بس أقترحي قولي مشتهية أسوي قهوة وشاي وكيك ومكسرات ونطلع البر أو البحر..
عاد مدري تعرفين تسوين مكسرات ولا لا.. بعلمك بعدين...هههههههه
​

 

[خلصتوا الاسامي]

الله لا يخليني منكم...تعرفون نفسيتي كيف؟؟

من كثر ما يأجل الطلعات...ويقول اما انا مسويلك طلعه كذا كذا...ولا شفت هالطلعة من سنين...سرت احس اني مملة بالنسبة له...مع اني يوم اروح معاه لا حنانه ولا زنانة ولا اطلب طلبات فوق طاقته...اسولف واضحك وايب علوم واخبار وسوالف...بس وين المشكلة؟؟؟ والله ما ادري...

ساعات اقول في خاطري وانا ليش ذاله عمري على الطلعة وياه؟؟...بروح مع اهلي واستانس وبونس عمري وخليه يولي...

بعدين اقول...يعني شو قاصر فيني عن الحريم الي ريايلهم يطلعونهم...والي ريايلهم يلحون عليهم بالطلعة...

بس مثل ما قالت وحده من الخوات يزاها الله خير...قررت افاتحه...بس مب الحين...خليه وقت مروق ومستانس....وبعطيه قنابل على راسه ...

تدرون الحين...يشوفني اطلع ويا ربعي وهلي...اروح مطاعم واسواق...ولا يقول شي..بس حاس شي متغير...بس اترياه يقول ليش تطلعين وياهم وايد...ومثل ما قلت وقررت سابقا...والله ثم والله لاخليه يتمنى الطلعة وياي وانا اقوله مب فاضية حبيبي خلها يوم ثاني... هههههه