مشكلة أعز صديقاتي مع وزجها

[الشوق وبس]

السلام عليكم ورحمة الله وبركاته..

اسمحوا لي أنقل لكم مشكلة أعز صديقاتي مع زوجها..وأطلب منكم المشورة..!!

صديقتي متزوجة من سنة ونصف..وما حملت للآن..الله يرزقها إن شاء الله في القريب العاجل..!!

المهم من 3 شهور تقريبا..صديقتي طاحت على مسجات في موبايل ريلها..موجهة لوحده..!!
ومسجات من اللي إياهن..اللي ما تنطرى..انقهرت..وكلمتني..قلت لها..كلميه..بهدوء..واعرفي من السب..وماله داعي تدخلين أهلج واهله في الموضوع..عشان ما يكبر..وما تصير الغلطه عليج إنج نشرتي الموضع وفشلتيه.. هي سكتت...لين ما يا الوقت المناسب وواجهته..وطلب منها السماح..وإنه ما يصبر عنها..ومن الكلام الحلو..وسامحته..بشرط إنه ما يعود لسوالفه..!!

بس البارحة..اكتشفت إنها ما زال يراسلها..!!هي ميتة من القهر..ومب عارفه شو تسوي..؟؟!!

أنا اقترحت إنها تكلم أمه..خصوصا وإنه أمه حرمة عاقلة..ويمكن تفهّم ولدها..بخطورة اللي يسويه..وقلت لها..ما تخبر أهلها..يمكن أمه تعقله..وعشان ما تكون فضحته عند اهلها..بس عقب قلت لها اصبري..لين ما استشير أهل الخبرة..لاني أنا بعدني مب متزوجة..وما أعرف إذا شوري كان صح وإلا غلط..

ومن غير إنه يعايرها إنها ما حملت للآن..!!

والله إني مقهورة على صديقتي..خصوصا وإنها طيوبه وعلى نياتها..وما تستحق كل هذا..:icon1366:

دخليكم ردوا عليّ بسرعة..أترياكم..!!

 

[فنر66]

لو عندها قدرة مادية خليها ادش دورة استراتيجية التعامل مع الزوج الخائن احس انها بتستفيد وايد

 

[lost women]

الله يكون في عونها بس انا اشوف انها غلطت لما واجهته لانه الاكيد راح يستسمح منها وكان في اكثر من طريقة حتى تسترد زوجها ومن الافضل كمان انها ما تخبر امه لانه مهما كان ماراح تغلط ولدها والاكيد انها راح تعاتبها وتقول وش لقفك ع جوال زوجك ومو من حقك وكمان راح يقول الرجال نفس الكلام 000
هي ممكن انها انها ترسل احد على الرقم وتهدده وهي بعيدة عن الجوال وتسوى نفسها مو دارية عن شئ 000او تخرب شريحة زوجها 00 وتمسح الرقم ومو طبعا في البيت حتى ما يقول انه منها 000او0000او00هي اذا تبي نجيب لها الافكار مو مشكلة ندور لها00انما من الافضل محد يدري مهما صار

 

[*شهد الورود*]

السلام عليكم ورحمه الله وبركاته ..
ياعزيزتي* شوق *من الافضل انها ما تكلم امه مهما كان وفكرة حرق الشريحه ما اوافق الاخت العزيزه فيها الانه مافي قلب محروق عليه غيرها فيعرف انه هي من سوى كذا لكن انا اقول بالنسبه للحمل فهو من الاحسن انها ما تحمل في هذه الحاله ومشكله التأخر الحمل الدكتور لها انشاء الله
....................................................................................
اما مشكله الخيانه فالحل عندي باذن الله:
يستحسن تكون صديقتك معنا على الخط
........

 

[الشوق وبس]

هلا بكن خواتي..

وشاكرة لكن تفاعلكن..!!

بالنسبة لصديقتي..وإنها تكون معانا على الخط..أنا عمري ما سمعتها تشبك على النت..وما أظنها تحب النت..!!
وما أعرف إذا في بيت زوجها فيه نت وإلا؟؟!!
بس أنا أعرف مشكلتها بالتفصيل..وأنا الوحيدة اللي أعرف في الدنيا..هي ما خبرت حد غيري..وما شكت من زوجها إلا لي..وأنا دايماً أطيّب خاطرها..
هي تفكر بالطلاق..بس أنا قلت لها اصبري..يمكن ريلج يعقل..<<< هذا في أول مرة خانها..!!
بس هالمرة ما عرفت شو اقول لها..!!

أنا ما تهون عليّ صديقتي تتطلق..لأنه الطلاق وايد كبير..وما تهون عليّ بعد تعيش مع واحد خاين..!!
قلبي يتقطع عليها..لأنه وايد كاتمه في قلبها..ودايما تمثل إنها سعيدة وياه..!! وهذا الشيء متعبنها..!!

حبيباتي..قولوا لي الحلول..وأنا بنقلها لها..!!
بارك الله فيكن..وجزاكن كل خير..!!

 

[*شهد الورود*]

ياشوق ...
اذاصديقتك ما تحب النت خليها تحب معي غصب لان الطريقه ألي باعطكياه تعتمد عليه
اذازوجها يتعرف على البنات عن طريق النت فهذا شئ طيب
نخليها هي ايضا من بنات النت تدخل المواقع ألي يدخل وتحاول تضع نفسها بنت معجبه في (رقعة وجهه)
زي ما تقولون وتحاول تفهم منه الطبع ألي يحب رجلها في زوجته وتفهم لماذا يكره زوجته وعشان ما يشك
تقول (اذاقلتلي بعوضك كل شئ نقص لك)وطبعا تسب نفسها حتى يرتاح لها (زوجته يعني )ماهو العشيقه
وتبعد فترة عنه ولكن تخلي عينها مثل عين الذيب نايمه لكنها تحس بالي حولها
يعني تدخل النت بدون ماتكتب شئ فقط تراقب
______________________________________:,,

هذا كله من كمبيوتر ثاني ..هو من البيت وهي من جهازك انت ياشوق وممكن تقومين انت بالمهمه
لكن بعلمها
__________________:,,
ادري بتقولين الطريقه مشوارها طويل لكن على الاقل امن وصعب يكشفه باذن الله

ولو سمحتي اريد تفاصيل اكثرلان القضيه ايضا غامضه نوعا ما

بالتوفيق علمين بالي يصير بعد كذا

 

[ريانيه قطر]

تدرين لوانا من صديقتج و اسوي مثل ما اسوي كل مرة اكلم من موبايل مكنسل من الخدم اللي سافروا واهددها باني مرته وعارفه واحيانا اني عشيقته وابهدلها واعطي رقمها مرة ثانيه من رقم ثاني اجننها وهو اذا سأل انكر ومايدري ان العلوم كلها عندي ومعه طبيعيه وبعدين من البداية ماتسمح له انه يتمادى ويعيرها بانها ما تحمل يمكن يكون العوق منه مومنهاوعموما ماتاقف لازم تتحرك وتفتح عينها عدل و مايحس انها تراقبه

 

[الشوق وبس]

السلام عليكم ورحمة الله وبركاته,,

مشكورة حبيباتي على التفاعل..

أنا كلمت على صديقتي اليوم..وسالتها إذا تقدر تشبك على النت..قالت لي..ريلها يمنعها..ومحرّم دخول النت بيتهم..!!
بس هو الوحيد اللي عنده كمبيوتر يشبك منه..!!!! <<<< وهذه معلومة أول مرة أعرفها..ربيعتي ما قالتها من قبل..!!

وهو مانعنها تسير اي مكان..إلا آخر الأسبوع بيت أهلها ولمدة 4 ساعات تقريبا..وعقب يرجعها البيت..وما تظهر منه إلا الاسبوع اللي عقبه على بيت أهلها وبس.!!

سألتها..هو يكلّم بنت وحده..قالت لي: لا..عنده كذا وحده..!! يكلمهن..!!
وتقول هو يعبّي موبايله رصيد..ولا يكلّف نفسه يسألها تبين رصيد وإلا لأ؟؟!! كله حق ربيعاته..!!!!!

تقول خلاص مب قادرة تتحمل العيشه معاه..!!
وما تقدر تبادله أي مشاعر ..وهي تدري إنه يخونها..!!


وهي تسألكم..برايكم بهالحل ..اللي هي بتسويه..!!

هي الأسبوع الياي..يوم الخميس يوم بيوصلها بيت هلها..بتقوله ..إنها ما بترجع وياه..لانه خان العهد اللي بينهم..وفي 3 شهور وبس..!!
وإذا سالوها هلها عن الموضوع..بتخليهم يسألونه..وهي ما بتقول شيء..!!

هي بينها وبين نفسها..تفكر بالطلاق..لأنها عافته..!!
وما تقدر تجامل على حساب مشاعرها..
وإذا بترجع له..بترجع له..بشروط قاسية..تخليه يعرف منو هي..!!

الصراحة..أنا ما عرفت شو اقول لها..
هي مجروحة من الخاااااااااااااطر..وأخاف أشور عليها بشيء..يكدر عليها..!!

وأنا خبرتها..إني عرضت مشكلتها عليكم..واستانست..وهي ألحين تتريا الحلول منكم..!!