ما اعرف كيف أتعامل مع بنتي :( ** تم الرد **

[:mew:]

السلام عليكم ..
أرجوكم يا جماعة الخير و المختصين أفيدوني ..

انا عندي بنتين الأولى 3 سنوات و الثانية سنه و 8 شهور ..

مشكلتي مع بنتي الكبرى ..

لا تحب ان تشارك الناس بأغراضها و لا بأكلها .. حتى أختها .. تخيلو لو فتحتلها جبس و أخذت منه حبه واحده تصيييح و تصارخ و تضرب عمرها .. و ما تسكت الا اذا عطيناها واحد جديد ..

انا دوم أحاول معاها انها تعطي اختها أو تعطيني من عندها .. و أخبرها اني أحب آكل معاها .. بس مافي فايده ..

والمشكله الثانيه انها دائمة البكاء على كل شئ تريده تصيح .. انا قريت وايد عن طرق التعامل مع الطفل .. وكنت اطنشها يوم تصيح .. لما تسكت من نفسها .. وبعدها اكلمها و اقولها انه هي ما بتدخل المدرسه و لا بتكون شاطره الا اذا ما صاحت و ما زعلت على اتفه الأمور .. بس ابدا مافي فايده ..

يوم انروح تجمعات نسائيه تيلس تصيح .. وتباني انتبهلها و أسمعها انا اقولها نعم ماما تقول طالعيني اطالعها .. واذا التفت صوب الحريم تصاااااااااااااااااااارخ و تقول طالعيني ..

والله انها تفشلني .. شو أسوي معاها ..

احنا ابدا ما نظربها و نعاملها اوكي .. ويوم تسوي شئ زين ابوها يمدحها جدام الكل .. وجدامها .. ويوم تسوي شئ هب زين ابدا ما نصارخ عليها جدام الناس ..

بس التعامل معاها جدا صعب ..

انا اشتغل و من أرجع من الشغل الإستقبال يكون بصياح .. ويدتها تقول يوم ما تكونين في البيت أحسن منها مافي بس من ادخل البيت تسوي ها الحركات و تصيح ولازم انا اسويلها كل شئ ..

انا كنت اقول انها فاقده حنان .. بس انا من أرجع من الدوام أعوضها و ايلس معاهم .. و لازم اقولهم قصه و العبهم .. وحتى في الليل .. انا ارقدهم .. وكل ويكند نطلعهم معانا و نمشيهم ..

شو اسوي أكثر عن جي .. خواتي كلهم يقولونلي بنتج كريهه وانا اكره ها الإحساس وأكره حد يقول عن بنتي جي ..

فيدوني يا أهل الخبره ارجوكم

 

[:mew:]

يا دكتوره .. حالة بنتي من سئ إلى أسوأ ..

أمس اختي كانت مشترية حق ابنها كيكة .. لعيد ميلاده .. وقالتي ييبي البنات .. أعرفهم يحبون الكيك و الشموع و البلونات .. بحكم انه بيوتنا قريبه من بعض .. وديت البنات و عند باب البيت سوولي مسرحيه تمت تصيح انا ما بدخل .. انتي شيليني و دخليني .. وانت تعالي معانا .. قلتلها انا ما بدخل .. عيب باباتهم داخل .. انت روحي شوفي الكيكه و تعالي ما رضت .. قالتلها اختي انزين تعالي معاي بعطيج بلونه .. بعد ما رضت و تمت تصيح ..

الحين كل شئ أوكي .. أختي بعد ما قصت الكيكه مع زوجها .. قررت اتي بيتنا واتيب جزء من الكيكه عسب تونس البنات .. و بالفعل أول ما شافو الكيك واااااااااااااايد فرحو .. بس دخلت أختي و تمينا نسولف .. بدت بنتي تصيح واتي تيلس في حضني .. و يوم قلتلها روحي ماما العبي مع اختج و اليهال .. دخلت تحت طاولة الطعام و تمت تصيح وتضرب عمرها ..

انا واااااااااااااااااااااااااااااااااااااااااااااااايد زعلانه عليها .. وليلي ونهار أفكر فيها و كيف أغير من تصرفاتها دكتوره حبيبتي .. ساعديني .. مع العلم اني أشد عليها أحيانا .. و أضطر اني ارمقها بنظرات و أرفع صوتي شوي عليها ..

أبا حل .. يالله يا رب انك تساعدني

 

[أ.نجوى ناجي]

حبيبتي من الواضح جدا جدا ان الطفلة تفتقدكِ بإستمرار ولن يخف هذا الإحساس الا بعد أن تنشغل وتذهب للروضة وتتعرف على العالم الخارجي أيضا أشعر أنكِ تهتمين بالصغيرة بشكل كبير وهي تغار منها لأنها صغيره , بالنسبة للأنانية راجعي الاستشارات ستجديني أقول أنه شئ طبيعي في هذا السن فلا تقلقي معه ولا تغصبيها على العطاء ولكن بتدريبات خفيفة ادفعيها ولو مارضت اسكتي ولا تصري عليها , بالنسبة لوقت عملكِ أرى أن الأب ليس له دور يذكر فماهو دور الأب مع البنتين ؟؟ وهل تعملين وقت دوام طويل ؟

 

[:mew:]

شكرا دكتوره على ردك ..

بالنسبه لطفلتي صح هي شديدة التعلق بي بشكل كبير .. أكثر عن الصغرى .. مع انه إهتمامي الأكبر للكبرى .. وبالنسبه للروضه انا خايفه جدا .. لانها ستباشر الذهاب للروضه الشهر القادم .. وانا خايفه انها ما ترضى تروح لاني ما بكون معاها .. كيف تنصحيني يا دكتوره بهذا الخصوص .. ابوها جدا طيب الحمدلله وجدا متفهم و مثقف .. وهو اللي نصحني اني أستشيرج يا دكتوره .. أخذناها انا وابوها للروضه وقت تسجيلها و رويناها المرافق على أساس انه نهيأها .. وهي وايد متشجعه انها تروح .. بس انا خايفه انها ما تتقبل فكرة انها تكون لوحدها..

بالنسبة لبنتي الصغرى فهي متعلقه بأبوها أكثر (الحمدلله ) مخففه عني الحمل .. ومع انه الأب يحب البنت الكبرى كثيرا .. و دوم يوفرلها اللي تطلبه .. يعني بنته المدلله .. بس هي ما تحب وايد تكون مع أبوها اذا كنت انا موجوده تفضل ملازمتي ..

اشتغل من الصبح لين الساعه 4 العصر و ابوها نفس الشئ .. والبنت وايد متعقده من شغلي .. دوم تقولي انتي اتروحين الدوام و تخليني .. وقبل لا ترقد تقولي لا تروحين بكره الدوام تمي عندي ..
تقطع قلبي والله بس .. صدق ما اقدر اغير شغلي وانا في أمس الحاجه للوظيفه ..

شورج يا الدكتوره و هداية الله ..

 

[أ.نجوى ناجي]

بالعكس أنصح بذهابها إلى الروضة , طبعا ستعاني في البداية أنتِ ولكن بمرور الوقت ستعتاد وتشغل وقتها بشئ آخر غير إنتظاركِ , وأرجو منكِ أيضا تفقد وقتهم من غثرك تأكدي من أمانة من تجلس معهم لو خادمة أو ماشابه , تأكدي أنها مرتاحة وهكذا ..

 

[:mew:]

البنت تجلس مع جدتها و الخامه .. يعني ما تكون لوحدها .. وانا وايد أثق بالجده ..

وشكرا حبيبتي الدكتوره ع الرد .. وايد طمنتيني عليها .. وانشاءالله يتحسن وضعها عند ذهابها للروضه