مرحبآ !

من خلال التسجيل في صفحات نسوة يمكنك ذلك من المشاركه وتبادل الآفكار الأيحابيه مع زميلاتك

آشتركي معنا الآن !

مالي خبره فالحياة انقذوا فكري

ذيبه

New member
إنضم
15 نوفمبر 2009
المشاركات
10
بسم الله الرحمن الرحيم
السلام عليكم ورحمة الله وبركاته


دكتوراتي الفاضلات اخواتي العضوات

ساطرح مشكلتي فالبدايه ثم ساسرد قصتي بعدها

واتمنى منكن مساعدتي ان كنتن ترين باني احتاج للمساعده

احيانا احس بانه ليس لدي مشكله سوى اني طفله مدلله لا استطيع التعامل مع اتفه المشاكل من حولي

واحيانا اخرى احس بانني يجب ان اسارع بحل مشاكلي قبل ان تتازم ويصعب التعامل معها
 

ذيبه

New member
إنضم
15 نوفمبر 2009
المشاركات
10
قصتي


انا متزوجه من سنه وعشر شهور قبل انخطب كنت شايله فكرة الزواج من راسي لاني مو واثقه بنفسي

اني راح اقدر ادير بيت بنفسي عشت حياتي معتمده على الاخرين بكل شي وامي كانت اذا بتعاقبني

تخليني اطبخ يعني اكره الطبخ بشكل جنوني واذا دخلت المطبخ احس بضيقه وانا من النوع اللي ماحب

احد يامرني بتغيير شي من تصرفاتي من غير ما اقتنع بالاسباب

لما انخطبت حاولت ارفض وكنت متردده بقوه لكن رحمت امي لانها متحمله مسؤليتنا لوحدها حتى اخواني

الكبار مايعتمد عليهم والوالد مو موجود بحياتنا فحبيت اخفف عنها الحمل شوي وقعدت افكر كثيير انه اذا

تزوجت بقدر اساعد امي بمصاريف البيت وطلبات اختي الصغيره اللي ماتخلص واخوي الصغير خاصة ان

ابوي الله يشفيه مايصرف علينا الا بالطراره المهم اني استخرت ربي والحمد لله ارتحت وشفت ام

خطيبي واخته الكبيره وباين عليهم حبوبات وطيبات الحمد لله وارتحت اكثر كانت الايام تركض وماني

ملحقه على التجهيز للزواج وبعد الملكه اتفقت انا وزوجي اننا ناجل الحمل لين نتعرف على بعض اكثر

وننبسط بحياتنا بعد زواجنا بفتره بسييييطه قدر الله وحملت لاني ما استخدمت اي مانع للحمل كنت

خايفه من الحبوب وعلمته اني مارح اخذ حبوب كنت ابيه يستخدم حمايه او يتصرف اي تصرف ثاني بس

مستحيه اقوله يوم حملت انصدمت وضاق صدري وهو بعد بس ماحول يبين مرت ايام حملي مثل الهم

على القلب وحامي كان شديد وانا بالاساس ما اكل ونفسي دايم مسدوده ومع الحمل زادت المشكله

وكرهت شقتي واذا شفت زوجي استفرغ الله يكرمكم فكنت انام فبيت اهلي كثيييير واحيانا زوجي كان

ينام معي عندهم وانا ماودي لاني مستحيه من اهلي واستحيت اقوله لاخلال هالفتره كنا نتهاوش كثييير

على اشياء تستاهل واشياء ماتستاهل كان دايم يهاوشني يقول لاترفعين صوتك علي وانا ما احس اني

سويت هالشي لكن اللي عرفته اني انفعاليه وقت النقاشات الحاده وترتفع نبرة صوتي غصبن عني لاني

منفعله ومتحمسه مع المناقشه كل انسان كذا لكن هو مو مقتنع وحاولت افهمه انه هالشي مو بيدي وحتى

اخواتي دايم يقولون ليه معصبه وانا مو معصبه بس صوتي يرتفع شوي واني ابيه يتحملني لين اتغلب

على هالمشكله لان الانسان مستحيل يتغير بيوم وليله وجاهدت نفسي لين تخلصت من هالمشكله بمده

قياسيه وصرت ماتكلم معه باي نقاش الا اذا كنت مسيطره مره على اعصابي ومتاكده انه مابترتفع نبرة

صوتي حتى اني اضطر اسكت بين كل كلمه والثانيه عشان اسيطر على نبرة صوتي وتعبت نفسيا من

هالشي واكثر الاحيان مااتكلم واحس بغصه من القهر وابكي وكان له اعتراض على البكا بعد وطلعلي

بقصه جديده يقول لاتحطين عينك بعيني وحنا نتناقش انا كل تعابيري بوجهي وممكن نظرتي تكون حاده

وحس اني اهينه او استحقره بهالنظراتحتى مره كان بيطلع عند اخوياه وانا بجلس بالبيت لحالي فطلبت

منه لابتوبه وقالي سمي طال عمرك كانه يقولها لشخص غريب وحسيت ماوده يعطيني ويجاملني

استغربت مره من رده وكانت ردة فعلي على وجهي انا اذا استغربت من شي ارفع حاجب وسكت ماقلت

ولا كلمه بغيت اهون واقول لا خلاص مابيه بس اعرفه بيسويلي سالفه احاول قد ما اقدر ابتعد عن اي

نقاش لان ادري بنتهاوش عقبها كان بس ساكت ويالله يتكلم وحاولت اساله اذا فيه شي مضايقه قال

تذكرين ذاك اليوم يوم تطلبين مني اللاب توب قلت ايه قال وش كنتي تقصدين بنظرتك لي وقتها حسيته

يدور اي شي عشان نتهاوش عليه قلتله ما اقصد شي بس انت كان ردك لي غريب ونظرتي مجرد

استغراب لا اكثر ولا اقل
 

ذيبه

New member
إنضم
15 نوفمبر 2009
المشاركات
10
ومن يومها وانا ما اطالع فيه قد ما اقدر واستمر موال الهوشات السخيفه مره على تنظيف البيت ومره على غسل

المواعين ومره على الملابس مع العلم اني قبل الزواج قيلتله تراني ما اعرف اشتغل شي ابد وياليت تصبر علي شوي

وتتحملني لين اتعلم وماكان عنده اي مانع لكنه بعد كم شهر من زواجنا قال بجيب شغاله خلاص انا طفشت من حياتنا

انتي ماتقدرين تسوين شي انا انبسطت انها جت منه ماكنت افكر اطلب شغاله عشان مايصير مشاكل بيننا سكتت وما

قلت شي عقبها هاش علي انتي ماتنضفين انتي ماترتبين انتي ماتطبخين دايم قلتله انت تدري ان شغلي على قدي

وبعدين خلاص انت مو بتجيب شغاله بتساعدني ان شاء اللهقال وليه اجيب شغاله وين اوديها قلت نحطها مع شغالت

اهلك حنا ساكنين بنفس بيت اهله بالدور اللي فوق مسوينه شقق لعيالهم قال لا انتي تدرين اني ما احب الشغالات قلت

عاد انت اللي قلت بتجيبها انت اللي مو متحمل الوضع مو انا قال لا انتي اللي قلتي تبين شغاله المهم حاولت الملم

الموضوع مابي السالفه تكبر كنت اشتغل بالبيت قد ما اقدر واضغط على نفسي مع اني حامل وبنيتي ضعيفه وماني

متعوده على الشغل ولا اعرف حتى قسما بالله اني اغسل ملابسه وارتب دولابه وانا ملابسي وصخات ودولابي معفوس

ولايمديني التفت على اغراضي لانه بنفس اليوم يحوس الدولاب والشبك يمتلي ملابس وصخه احاول اهتم بالاشياء اللي

تحت نظره عشان ما يتضايق واحيانا كل اسبوع او اسبوعين اخلي شغالة اهله تصعد وتنظف وانا مابي اطلبها كثير

منهم لاني دايم اسمع كلام الناس عن حريم العيال يدورون عليهم الزله وغير كذا ودي اتعلم اعتمد على نفسي وهو

دايم يقول خلي الشغاله تصعد واحيانا ارضا واحيانا لا وهو الله يهديه مايساعدني ابدا ولا باتفه الاشياء يقوم ويخلي

اوراق مرميه ومناديل واكواب الكوفي ويحوس مخدات المجلس والطاولات واذا شافني اشتغل يقول تبين اساعدك بشي

اقول لا صعبه بعد بقوله قم شل القراطيس والا كنس والا غسل مواعين المفروض هو يسوي اي شي بنفسه من غير

ماقول والشي الوحيد اللي اقدر اقوله يسويه انه ياخذ الزباله معه اذا جا يطلع ومايرضى يقول خليها عند الباب برا

والشغاله تصعد تاخذها قسم بالله انها تخيس وتخيسنا محد شالها واذا شافني انا بشيلها انزلها قام خذاها مني ونزلها

احس تفكيره غريب مره عجزت افهمه وهو مهوب صريح ابد ابد واذا قال شي بصراحه يكون معصب وزعلان ويقوله

بطريقه تجرح وتبكيني ويقولي عشان كذا انا ما احب اقولك شي على طول تتنكدين قلت انا يمكن حساسه واتاثر باي

شي بس والله هو لو يقولي اللي يبيه باسلوب حلو عادي لكن يسكت ويجمع علي كذا غلطه ويتنكد وينفجر علي مره

وحده بعصبيه اكيد بتضايق او اصيح وكله كوم الفلوس والمصاريف كوم ثاني من اول ما ملكنا وهو يقول نبي نجمع

عشان نامن مستقبلنا وعشان وعشان وانا ماكان لي اي اعتراض والحمد لله مو مقصر علي بشي ويقولي اي شي تبينه

قوليلي يعطيني راتب كل شهر والراتب ينقص كل مره عن قبل وكنت مره متعاطفه معه لان عليه ديون عقب الزواج

واصلا الراتب اللي يعطيني ما اصرف منه على نفسي الا اشياء بسيطه والباقي يروح على مطاعم والا بانزين يصير

مامعه بالبوك شي والاسوبر ماركت وخرابيط وجاه ضرف وبعت طقم من اطقمي وعطيته فلوسها ووعدني يرجعها عقبها

بنت اخته بتتزوج واخته هذي اهدتني بزواجي شي وشويات فلازم اهدي بنتها وهو قال ماعنده فقمت تنازلت عن ساعه

من ساعاتي مالبستها ابد وشي ثاني نسيت وشو طبعا كله من اغراضي وكنت متفقه معه قبل يأمن لي مبلغ اشتري

فستان واكسسوارات الزواج ويوم قرب الزواج الفساتين طبعا مافيه باقل من الف وهو قال ماقدر ادفعلك الا خمس ميه

ورحت شريت قماش رخيص وفصلته عند خياط باكستاني وماعجبني مره بس قلت العوض ولا القطيعه وراحت

الخمسميه عليه فاضطريت البس صندل اختي وانتم بكرامه وكان قديم شوي ومتحكك والشنطه من شنطي ولبست طقم

ذهب من اطقمي اللي شافوها علي لين قالو بس وسبحان الله رحت الكوافيره وحاست شعري ومكياجي ذيك الليله

وقعدت اصيح لين تعبت وعدت ذيك الليله على خير الحمد للهبهالفتره قربت ولادتي وصار لازم اجهز للنفاس واشتري

اغراض البيبي وعشان ما اكلف عليه كنت اروح لارخص الاماكن واشتري اغراض البيبي وبقى اغراضي انا قال وش

بتشترين يعني قلتله بشتري سلة شوكولاته ومفرش لي ومفرش للبيبي وقميص النفاس قال وشوله كل هالاغراض ليه

الناس مايهمهم الا المضاهر واذا الناس مهبل ليه تصيرين زيهم ومن هالكلام طبعا ضاق صدري وتنكدت وبديت اختصر

المصاريف بقوهشريت مفرش من ايكيا ابيض ساده والقميص اخذت قميص زواجي وبطنت الروب لانه تل شفاف مع انه

شتا والمفروض البس شي يدفيني وكنت البس تحت القميص بنطلون بجامه داخليه واذا جو ناس اتغطا باللحاف عشان

محد يشوفه كان نفسي اشتري شوكولاتة باتشي بس مدري ليه هو ماخذ عنها فكره انها غاليه على غير سنع واخذت

شوكولاته اغلى منها لاني كنت مصره مابي شوكولاته خايسه بس حطيتها بصينيه من عندي وانا ماعرف انسق وصار

كل الوضع يفشل كني وحده جايبه عشرين طفل وماعادت تهتم باغراض النفاس وكنت مقهوره مره بس ماقلت شي كله

عشان ماضغط عليه مع انه اول ماحملت كان يقول بصبغ مجلس اهلك واجيب كنب جديد وازين واحط وكله طلع كلام

بس قلت اكيد هو وده بس مايقدر ووقت النفاس كان ينام عندي عند اهلي وانا مره متفشله من اهلي لانهم حاطيني

بالغرفه اللي يجلسونبها واذا صحت امي وهو عندي تجلس بالصاله او بالمطبخ وكان مره الجو بارد ودي اقوله ماينام بس

مستحيه مره منه وخفت يفهمها اني اطرده حتى اني ماقدرت اهتم بنفسي ولاقدرت احط كريمات ولا شي لانه دايم

عندي حتى يوم خفيت شوي صرنا نطلع انا وياه نتمشى بالسياره لاني ماقدر امشي واخلي البيبي عند امي وكنت اقول

هو زوجي ولازم ارضيه والحين مره متحسفه على اني سويت كذا المهم جمعت مبلغ من الناس اللي جو يزوروني وهو اخذ

مني كم مره لانه على نهاية الشهر ويقول مامعه شي مع اني مو بالبيت ولا يشتري مقاضي ولا نروح مطاعم زي قبل
 

ذيبه

New member
إنضم
15 نوفمبر 2009
المشاركات
10
بس كنت اعطيه ولا اناقشه قبل اولد كنا متفقين انه يشتري مقاضي لبيت اهلي لاني بقعد عندهم فتره طويله ولا اشترى وقاللي عطي امك من الفلوس اللي معك بدال المقاضي وخوذي فلوسك حقت الطقم (اللي بعته عشانه) كن الفلوس هذي فلوسه هو وقاعد يوزعها على كيفه وكالعاده سكتت وماقلت شي ولا اعترضت مع اني استنكرت هالحركه بقوه خبيت مبلغ الطقم وعطيت امي ومرت اخوي لانها على وجه ولاده والمبلغ اللي خبيته كنت ناويه اخذ فيه ليله بالفيصليه عشان نحتفل بيوم زواجنا كنا نخطط انا وياه مع بعض وش نسوي بهاليوم وماكنت ناويه اطلب منه ولا ريال كل شي مني وماكفت الفلوس فقررت انه نقعد بفندق عادي عشان اقدر اشتري الاغراض للاحتفال مر يوم زواجنا وراح وحنا ما احتفلنا كل يوم يتغير التخطيط وكل يوم نقول بكرا لين جا ذاك اليوم وكنا نسولف عادي بالسياره قام قال( اصلا ليه نحتفل بزواجنا من زين حياتنا عشان نحتفل فيها) انا على طول قعدت ابكي وحس هو انه قال شي غلط وحلفت اننا مانحتفل لاني زعلت وخلاص طابت نفسي عقب كلمته
قررنا ننتقل لدوله ثانيه عشان شغله الشاغل يبي يامن مستقبلنا واوضاع اهلي الماديه سيئه وامي عندها استراحه صغيره مهملينها فعرض انه يصلحها عشان تاجرها امي وتستفيد من اجارها امي وافقت وكلنا تحمسنا للفكره وقاللي خل نبيع طقمك الكبير واصلح فيه استراحة امك قبل نسافر ونتغرب عنها ماتدرين يمكن تحتاج شي هالاستراحه تنفعها ووافقت على طول على انه يبي يبدا بالتصليحات باسرع وقت
بعت طقمي وخذا مفتاح الاستراحه من امي وانتظرنا وانتظرنا وانشغل بدوامه ذيك الفتره صار يداوم صبح وليل عقبها خذا اجازه اسبوع وقال خل نروح نعتمر لان ما اعتمرنا من تزوجنا وقدر الله وصار علينا حادث وانعدمت السياره وكانت جديده مالها ست شهور شارينها وقاعدين نسدد باقصادها وجلسنا شهرين بدون سياره كان ياخذ سيارة ابوه احيانا وبعدين تسلف من ابوه مبلغ واشترا سياره ثانيه
ومرت الايام وسافرنا وهو ماصلح الاستراحه ولا ادري هو صرف فلوسي او لا مع العلم اني شريت بنص المبلغ طقم جديد لاني احتجته ذيك الفتره والباقي معه المهم يوم جينا للدوله الثانيه بدينا موال جديد نبي نوفر نبي نشتري اثاث بسيط للسكن اللي حنا فيه طبعا هو لاب توبه انسرق بالحادث وواحد من اصدقاه اهداه لاب توب جزاه الله خير مع اني استغفر الله ودي ادعي عليه لاننا كنا ناوين نشتري لاب توبي واحد لي وواحد له لانه مايقدر يقعد بدون جهاز المهم اني قاعده للحين بدون لاب توب وما امسك لابتوبه الا اذا تكرم وخلاه بالبيت احيانا حتى للدوام ياخذه وانا ما احب الزقله دايم واقوله ابيه لانه يحسسني انه بيخليه غصب عنه فمن الاساس ما اطلبه واحاول كثير احسسه انه ودي يخليه اقوم اساله اذا جا يطلع اذا بياخذه ويسالني تبينه؟ اكيد ابيه اجل ليه اسالك بس اقوله لا مو لازم
المهم انه الشهر اللي فات قال نفسي اشتري بلاي ستيشن ثري ساعديني ادفعي معي قلت بس حنا ورانا سفر للسعوديه وابي اشتري هدايا لاهالينا غير مصاريف السفر وغير ملابس العيد قال ماعليك عادي نقدر عليها ان شاء الله قلت اكيييد؟ مو توهقني وتقول ماعندي قال لا ماعليك عامل حسابي شرينا البلاي ستيشن وانا مررره متحسفه ماودي بس قلت مايخالف هو من زمان نفسه فيها وماراح تاثر الف وخمسمية ريال الطامه الكبرى واللي فجرتني وحاولت اتصنع الوناسه بس ما قدرت انه الشهر هذا اشترا تلفزيون ال سي دي وقدم عالانترنت وقال مو لازم هدايا غاليه انا احس اني بنفجر مدري وش اسوي وكان من زمان كل ماقلت شي وكان غلط او مافهمت اللي يقول يقولي يالغبيه اول كان عادي عندي بس الحين صارت تحز بخاطري وقلتله اكثر من مره اني ما احب يقوللي كذا ويقول خلاص اسف ياذكيه واذا كان متنرفز يقوللي هيه صديق ماتفهمين انتي مع اني اول كنت اذا مزح معي بشي كنت اقول حقير بس بدلع يعني ابينله اني امزح وكان يزعل مايبيني اقولها وبطلت اقولها بس هو ما احسه يحرص اذا طلبت منه هالشي
مدري هو يتقصد هالحركات والا من غير قصد
شلون اتعامل معاه؟
شلون اخليه يحترمني؟
وش مشاكلنا اللي ماني قادره اشوفها؟

ساعدوني بلييييز
 

مغريه

New member
إنضم
17 أكتوبر 2009
المشاركات
713
حبيبتي انتي اكبر غلطه سويتيها انج تركتيه يلعب بالفلوس وخليتيه يفهم حالة اهلج الاجتماعيه وخليتيه على راحته شخصية زوجج يبيله وحده قويه ما تخليه على كيفه بس بذكاء وحكمه وتعامل بهدوء اذا سألج عن الطقم قوليله محتاجته حتى لو اخر الشهر خليه يعتمد على نفسه مو عليج كل ماتبين شغله منه قالج من عندج فهميه انج تحتاجينه وانج انتي الانثى مو الذكر ولا تتنازلين عن احتياجاتج واقري بالمنتدى عن نمط شخصية زوجج وكيف تعاملين معاه والله يديه لج ويوفقج ولا تعلين صوتج عليه لان كل رجال مايحب احد يعلي صوته عليه
 

رياح الكفن

New member
إنضم
19 يوليو 2009
المشاركات
151
انت صغيره ومو فاهمه الحياه عدل وانا كنت مثلك واردى بس الحمدلله تداركت روحي شوفي انا بنصحك وانت كيفك الرجل لاتعطينه فلوس لو يموت الا بشي ضروري جدا ماعنده عادي خليه يصرف روحه وانت سوي ولاشي هامك اذا تعود انك تصرفين بكره يروح يدور وحده هو يصرف عليها وبالنسبه لا هلك لاتقولين له اي شي عن حياتهم مو لازم يعرف وطقمك اساليه عنه وين وداه واذا قال لك كلام مش محترم ياختي زعلي بس لاترفعين صوتك بس حقريه لين يتاسف انا من غبائي شريت له سياره بعدين اول ماطلع السياره راح يمشي فيها عشيقته والحين لو يموت ماعندي فلوس اعطيه بلا سلبيه تعبنا من هالرجال بعدين بيتك لازم تديرين بالك عليه انت ام الحين والنظافه من الايمان قومي بلا كسل وكل يوم نظفي شي بيتك هو وجهك شلون تبين وجهك وصخ خلاص زمن الدلع ولى انت وحده مسؤله
 

مزازيك

New member
إنضم
2 مارس 2009
المشاركات
129
تلاحظين انك انتي الي جالسه تصرفي عليه
وانك جالسه تتدهري علشانه
وهو من جنبها؟؟
انا ماقول لك اعصيه انا اقولك اكرمي نفسك لا هو الي بيهينها لك
لانك اهنتي نفسك اكثر من الازم وكل ماقلتي له شيء او طللبتي
قالك من عندك وانتي ماصدقتي خبر
تروحي سيدا تبيعي اوكي مره اوما اكثر من مره ماخذها حلى الاخ
بصراحه انتي اسلوبك من اول غلط
على سالفة البيت تعرفي كيف ترتبي وقتك
انا كنت على الشغاله حتى المويه تجيني وانا بالسرير بس يوم اتزوجت كان الشغل صعب علي لان
البيت كبير بس كنت ارتبها اكتبها بدفتر ويوم يطلع الدوام اجلس اكرف واخلص شغلي علشان
يجي وانا جاهزه ولابسه ومتمكيجه يعني على اخر شيء\
والله الحياه بتترتب معاكي خلي يوم للغسيل الملابس والله يخلي الغسالات الاوتوماتكيه
قسميها الاولوان والبيضاء واغسليها دفعات
وكنسي البيت وعادي انتي اكتبي كل شيء يحتاج له ترتيب وتنظيف
وعلى موضوع الاخ الكريم هذا المفروض ماعاد تعطينه شيء حتى لو عندك دسيه مو لازم يشوفه
ولا لازم يعرف كم عندك وعلى سالفة الهدايا حبيبتي هو مايعطيكي مصروف خلاص
انسي موضوع الهدايا بس اذا علق عليكي وقال ليه ماتجيبي لي هدايا قولي والله
حبيبي لو عندي مصروف ابشر من عيوني كل شيء يرخص لك
وعلى سالفة الكلام كشري اذ قالها لكي مره مرتين وهو راح يفهم انه هالمزح م عاجبك مو لازم تقولينها
بالكلام
واذا على طاري المشاكل العالم كلها تمر بممشاكل وخاصه الازمه الماديه ترا صارت تلعب دور كبير
بس انتي ماعليكي اتعدلي معاه وواحترميه وغيري اسلوب العفش معاه وخليكي ناعمه ودلوعه
وانتي تبين شيء تدللي مره مرتين بعدها بيمشي معاه
ونصيحه لاعاد تعرضي له فلوسك او تعلمينه وش عندك ولا ماعندك
وربي يسر لك ويسهل دربك يارب
 

ذيبه

New member
إنضم
15 نوفمبر 2009
المشاركات
10
الله يجزاكم كل خير والله ريحتوني يابنات

انا سويت اختبار البوصله الشخصيه وهو طلع شمالي جنوبي غربي

وانا جنوبيه غربيه بس احس الصفات المتطرفه فيني اكثر

وهو لا كله تقليدي ما شاء الله

اما من ناحية شغل البيت والله اني احاول قد ما اقدر بس اني اتعب بسرعه
اول كانت معدتي دايم تعبانه وفيني فقر دم واخذت ابر حديد قبل ٣ سنوات وارتفع الدم
بس اشك انه رجعلي الحين وقبل نسافر كنت دايم اقوله ابيك توديني للدكتور عشان اكشف وهو مو مقتنع
يقول انتي مافيك شي انتي بس كسوله والدكتور اللي اخترته مو عاجبه يقول لا صديقي رايحله ما نفعه
وانا اقوله انت بس صديقك اللي راحله انا اخوي وخالتي ووحده من قرايبنا كلهم عالجو عنده وتشافوا الحمد لله
وماكان مقتنع كان بيوديني لمستشفى حكومي وانا مو راضيه لان مواعيدهم تقرف وتعقدت منه فترة الحمل والمراجعه

انا بس ابيكم تعطوني افكار كيف اتعامل معاه واوقف استغلاله لي عند حده
هو طيب ويحاول مايزعلني بس احسه مستهتر فيني ويحس اني بزر مايوثق بقراراتي ابد
وانا اعاني من هالمشكله من زمان مع اهلي اذا صار معهم شي واقترحت عليهم شلون يتصرفون
يقولون انتي وش دراك واذا احد غيري قال نفس اللي قلته اقتنعوا
 

ياربي انصرني

~◦ღ( حكيمة الإستشارات الزوجية )ღ◦
إنضم
18 يناير 2009
المشاركات
4,170
زوجك طلع شمالي اقرئي عن الشمالي في قسم الزوج والزواج فيه ملف كامل عنه ان شاء الله تستفيدين
 
أعلى