ليش قاعدين ننفخ في قربه مخروووومه ؟؟؟

[نبع الحنين]

اهليـــــــــــــــــن اخواتي ..​

باختصارشديــــــــــــد ​

انا ابغى اخذ رايكم في اللي صار لي اليوم .. ​

قمت من النوم وبعد ماصليت قلت اخذ اللاب توب اتصفح جرايد​

وانا قاعده اقرا الا اذكر موقع ارسلته لي وحده قلت اتصفحه فتحت المحفوظات والا وش لقيت !!!!!​

زوجي العزيز باحث عن ممثله ...... بغيت اموووت من القهر المشكله انه باحث عنها في جهازي ​

ولاحتى راعى مشاعري اني يمكن اشوفه ااااااه.​

احس اني باستفرغ من القهر ليش الرجاجيل كذا ؟؟ ليش يحسسون المراه انها مهما سوت ​

ماينفع ولا يجيب نتايج ليش يحسسونا اننا قاعدين ننفخ بقربه مخرومه ​

احس اني مليييييت طفشت .​

وش بيكون شعوره لو لقاني باحثه عن ممثل حلو !!!!!​

بيقوم الدنيا وبيقعدها ​

بيقول انتي حرمه موعاقله ....... ومن هالكلام ​

طيب وهو وش يحق لي اقول عنه بعد اللي شفته ؟​

والله اني قاعده اكتب وانا احس اني بانفجر ..احس اني ما ابغى اطالع وجهه ..​

وش بقى ماسوينا عشانهم !!! وش يبون مننا اكثر ؟؟؟​

ابغى رايكم ؟ خففوا عني ولو بالدعاء لي تكفوووون الله يجزاكم خير ​

 

[الميهاف]

للاسف هذ الحاصل في المجتمع العربي انا دائما اقول الغرب يستخدمون التكنلوجيا في الافكار والاختراعات والابحاث عكس المجتمع العربي كل ما زاد التقدم في علم التكنلوجيا زادت شراسة الذئاب البشريه
حتى الجوالات في المعاكسات الواحد مايرحم جيبو يالطيف ا
نسي ان الله يسئل عن ماله فيما افناه وعمره ايضا فيما افناه
كل واحد ياخذ عملو وهو المحاسب مو انتي ولاتنكدين على نفسك
اذا الرب ماياخذ غلط انسا بأنسان تجي انتي تحاسبي
وترا عادي جدا الي سارلك هذا اتفه شي من الي يسونه الرجال هو المحاسب مو انتي
الله يوفقك ولاتخلي تفاهات زي هذي تأثر على حياتك
بالتوفيق

 

[ثقتي عاليه]

هلا حبيبتي الرياييل كلهم جي بس هم شي ان مايخوووونج
يعني ان يطالع ممثلات افضل من ان يخونج ولا تلومينه هي شهوته اللي تحركه ... اي غريزته
بس اذا هو يحبج ويموت عليج وانتي كل دنيته ممكن تتغاضين عن هالطرف لان حتى لو مابحث باللاب توب راح يشووفهم في المولات والاماكن العامه.. يمكن من باب التغيير او مدري شقول لج بس هذا رجال وهم جي يبون التغيير وخصوصا ان حنا في زمن يخوف مفاصيييييخ وبنات مايعات والاغرائات في كل مكان
الله يوفقج حياتي ويبعد زوجج عن بنات الحرام

 

[نبع الحنين]

مشكورين خواتي ..

كلامكم يوسع الصدر ويخفف عني شوي مررره متضايقه .

الله يعننا يالحريم كثير مانتحمل ونضغط على انفسنا .

 

[ريانيه قطر]

للأسف هؤلاء عندنا الرجاجيل الجوال كله مغازله والنت مواقع وبلاوي والحمدلله والشكر كن البيت اللي هم فيه بيت عزابي ماكن عندنه شوفه ويخاف الله فيها واذا اسئلته او حققت معه قام وقوم الدنيا عليها والنهايه يكون الحق معه :no:

 

[لارسيا]

حبيبني أعذريني على ما سأقول لكن كل الذي كتبتيه لا أستطيع أن اعده الا الفصل الأخير من القصة مع العلم أني لا اعذر ما قام به زوجك ولا يمكن لأحد أن يعذره على ما فعل ولا اريد استباق الأمور اذ أن هناك الكثير من الأمور التي لم تذكريها و زوجك ليس بالغباء الذي يجعله يستعمل جهازك ولا يريدك أن تعلمي .
وهناك طرق أكثر من كثيييييييييييرة لاستعادة زوجك ومعرفة الأسباب التي جعلته يقوم بهذا الأمر على هذه الطريقة .
لاتفكري بهذه الطريقة لإصلاح الأمور وتصويبها "الرد بالمثل " بل ترفعي عن ذلك لأنه ما يسوى تغضبي الله عز وجل لكي تختبري ردة فعله و شعوره .
وكما ان النساء لسن سواء كذلك الرجال ليسو سواء فكما هناك الجيد هناك السيء و لا توجد تعميمات .
حبيبتي الغضب دائما يعمينا عن الكثير من الأمور ويجعلنا نتصرف وفق معاييره فنندفع وبدل ان نحل الأمور نزيدها سوءا . ما حد قلك سامحيه ولا طالعي وجهه ولا تواجهيه لأن الوقت لم يحن بعد وأنت لست مستعدة بعد .
والقربة المخروووووومة دعيها جانبا والتضحيات قد لا تكون في مكانها أحيانا
حبيبتي بعض الأمور يجب أن تنظري اليها بعين زوجك وركزي على كلمة بعض وليس جميعها والدعاء لابد منه في كل الأحوال لكن لابد من توفر الأسباب .
رسالة زوجك كانت القشة التي فصمت ظهر البعير ... نعم قشة ... وتستطيعين التغلب عليها لكن المشكلة ليست هنا اذ ان هناك الكثير من الأمور التي لابد من تقويمها واعادتها الى نصابها وهذه الأمور تعرفينها جيدا وكل ما تحتاجينه هو سرد القصة من البداية ووضع علامات على الأخطاء واختيار الطرق الصحيحة لحلها واعدك أن أساعدك في حال اخترت التواصل معي عبر هذا المنتدى .

 

[نبع الحنين]

اهلين لارسيا ... ماادري وش اقول لك زوجي من النوع اللي عيونه زاااييييغه وبقوة تخيلي اذا رحنا للسوق بكل وقاحه يقعد يطالع الحريم وانا معه ومره كنا بمطعم قاعدين في الانتظار ومرت وحده كل الرجاجيل ماطالعوا الا هو خزها الى ان تعدتنا بعدين قلت له تصدق ان كل الرجاجيل ماطالعوا الا انت وانا اقولها منقهره ابغى احسسه انه جرحني والله ولا كاني اتكلم ااااااه وش اسوي تعبت مليييت الى متى وانا قاعده اتعدل واتضبط واتفنن في ال.....
خلاص الواحد له حد وينفجر انا مدري راح انفجر ....

الله يعيــــــــــــــــــــــــــن

 

[نبع الحنين]

كتبت الرد ومدري وين رااح .. مشكوووره لارسيا على ردك المريح وبنفس الوقت يضيق الصدر .

 

[المنقبة]

و الله حبيبتي الرجل عنده حب الاستطلاع حتى لو متزوج ملكة جمال العالم دائما يحب يطالع غير زوجته الا من رحم ربي

 

[نبع الحنين]

على الاقل اللي ماتبي ترد تكتب الله يعينك الله يهديه ويسخره لك ... دعوه حلوة يمكن الله يستجيب لها .

 

[sozeeta]

مين هي الممثلة ؟ يمكن نفهم شو يحب زوجك

 

[لارسيا]

حبيبتي ... والله ما ابغى أزعلك و لا صدرك يضيق انتي لسة في المشكلة وهذا الأمر عادي لأن المشاكل في حياتنا نحن بنات حوى تستنزفنا نفسيا و عاطفيا...........

 

[نبع الحنين]

مو مهم الممثله اختي المهم الحل .... اواجهه ؟ ازعل ؟ ابغى حل جذري لاني ما اقدر على كذا عمري ماتخيل ان حياتي الزوجيه تكون كذا .

 

[تحيه للعلم]

يانبع الحنين ياحبيبتي لو ينفع المواجهه والزعل جان نفع معاه وانتي بالمطعم لما قعد يخز البنت وكأنك

مو موجوده ولا تحرين عمرج ولا تتضايقين دام هذا طبع فيه وانتي قلتي عييييييييينه زااااااايغه يعني طوفي

جنج ماتشوفين اهم شي هو يخون؟؟

وانتي عليج بالنصيحه بالمقابل استمري بكشختج ودلعج وتقربج له بس تبين نصيحتي لا تبينين له انج

متضايقه يمكن يحب يقهرج ادري صعبه بس انتي اذا تبين تردين الصاع صاعين حقري ولا جنج تشوفين

عشان يعرف انه ما يهمج اللي يسويه اللي يهمج انج انتي تكونين ونعم الزوجه ودع الخلق للخالق

انتي كزوجه قومي بواجبج وهو كزوج فوقه رب العالمين وراه حساب وعقاب وعليج انج تذكرينه بين فتره وفتره

وقولي له من شق ثوب الناس الناس شقت ثوبه بس بدون حنه ورنه قطي الكلمه وامشي عنه

والله يسخره لج ان شاءالله ولا يجعل للشيطان طريج بينكم

تقبلي مروري

 

[نافله]

أختي نبع الحنين أمس انا في المول حق اغراض العيال خلاص بنمشي الا ذيج الفلبينيه الكبيره اشوي بس لابسه كت عطاها نظره الي عقبها سكت عنه لليوم ...... ما فيني اوبينها وجهه مقارنه الحمدلله انا احلى وهو منتهيه صلاحيته ..... لكن قلت بافرح في العيد غصبن عنه وباحقره ...... يا ختي ابتلينا الله ايعزج عليه

 

[صبر امراه]

نبع الحنين... انا مع الاخوات اللي يقولون بان تصبرين
لانه حالتج نفس حالتي بالضبط وانا اقرا مشكلتج اقووول لا اله الا الله وكاني انا اللي كاتبه
فعلا اختي بس اللي يهووون عليج انه ما يخونج ولو انها تعتبر جزء من الخيانه
فادعيله بالهدايه
مابالج لو كان زوجك من النوع والعياذ بالله اللي يسكر ولا ايييبلج بنات شوارع للبيت شو كان بيكون ردج؟
اختي احمدي الله على النعمة
من شاف بلواااا غيره هانت عليه بلوته
انا فعلا زوجي من النووع اللي عينه زايغه نفس زوجك
ولا يا اختي مب جي بس يحب يمارس الجنس الالكتروني برؤيت العاريات
اكثر مني
ولا فوق جي واقفلي على القعده والطلعه لا تروحين لاتنامين لاتتصلين وووووو .. والله وفوق هذا صابرة
لدرجه اني احس انه صبري مل مني
ههههههه
سمحيلي اختي والله لو بقعد اقولج اللي في صدري مابخلص اليوم كلن له همه واللي يميزنا نحن بنات حوااء
معروفين بالصبر والتحمل اكثر من الرجال
اللهم اشفي كل مريض
واهدي كل ضال
وعنا على صبرك وطاعتك وحسن عبادتك

 

[ارووج]

الله يصلح مابينكم ان شاء الله
والله الرجال عقلهم صغير ومهما سوت الحرمة ماينفع معهم
هذا انا تعبت وضحيت وتحملت اشياء كثيرة وعلى كذا مانفع هذا انا في بيت اهلي من غير سبب السبب ان عيونه زايغه ويبي يتزوج وانا ماقصرت ابد وهو معترف وهذا يبي يطلق وانا حامل مافكر فيني
الحمدالله على كل حال
انا ماابي اضيق صدرك والمفروض اواسيك بس اعلمك انه مايستحقون توترين نفسك وتتعبينها عشانهم انتي سوي اللى عليك وامرك لله عشان ترتاحين نفسيا لانك مو مقصرة وحطي في بالك ان صبر المراه على زوجها كالمجاهده في سبيل الله والله يكون في عونك والحمدالله ان اجرنا عندالله عظيم ...
اللــــــــــــــــــــه يسخره لك يارب ويسعدك

 

[صبر امراه]

يارب يارحيم يامجيب الدعواتي اجب دعوتي يارب

يارب تهدي زوج اختنا نبع الحنين وتجعلها مثل الجوهره في عينه وحببه فيها يارب
يارب لاتجعل عينه تنظر لامراه غيرها ولا ترتاح الا برؤيتها
يارب تهديه وتبعده عن الحرام يارب
وتهدي زوجي يارب

 

[me~4~you]

خلوهم يتنفسون شوي بسكم كتمتوهم ههههههههههههههه شوي شوي على صحتكن مايسى عليكن بتييبن لعماركن الامراض خخخخ. لا تزعلين فديتج مااستهزء بمشاعرج بس حبيت اغير عليكم الجو شوي ولا وين ريال مايطالع ولا شو نازلين فيه هالايام النظره الاوى حلال ومدتها ساعتين متواصله ولا يرمش ولا شي عشان ماتصير في نظره ثانيه خخخخخخخخخ.

 

[نبع الحنين]

تحيه للعلم ..صبر امراه..نافله .. الملكه بلقيس .. ارووج..

مشكوريين خواتي الله يجزاكم خير على تفاعلكم معي ..

خصوصا ((صبر امراه))

مشكوووره اختي على دعوتك والله يهدي ازواجنا جميعا ويسخره ويبعدهم عن الحرام .

ياااارب