كيف اتصرف معه لما يجلس معي في الملكه== شيروا علي

[miss.cute5]

بسم الله الرحمن الرحيم​

السلام عليكم ورحمة الله وبركاته​

حبيباتي الغاليات عضوات مملكة بلقيس​

يعلم ربي اني تركت الكتابة في المنتديات الأخرى وطلبت رايكم انتم ​

لمحبتي وثقتي بآرائكم:cupidarrow: ​

ملكتي ان شاء الله قربت وبصراحة ماادري وقت يجلس معي ايش اتصرف​

لو قال شيء كيف اتكلم وش الأسلوب الصحيح​

اخاف اصلح شيء اطيح من عينه​

وانا جدا خجوله لدرجة يوم النظرة الشرعيه ماقدرت حتى الف وجهي للجهة اللي جالس فيها:in_love: ​

واخاف اخجل بزيادة في الملكة و مايحس انه يميل لي .. اتمنى مقصودي وصلكم​

بالله ابي مشورتكم

ادعوا لي الله يخليكم لعين ترجيكم​

 

["حور الجنان"]

الحياء من الدين يعني هذا شي عادي بالعكس احلى يوم يشوف زوجته وبعده مادخل عليها مستحيه وبريئه ومب عارفه شي

اعرف وحده اخوها ملج ومن شافها وهي تسوي حركات ماصخه طلقها لأنه شك فيها وفي اخلاقها

وانا انصحج انج تستمرين بالخجل لين ان شاء الله يتمم لكم الزواج بعدين شوي شوي خلي الخجل يروح

مب مره وحده والله ييسر لج امورج ويتمم لج على خير

 

[ام شهد]

هذا يسمونه الحياء حتى لو حاولتي تتصرفين على طبيعتج جدامه ما بتقدرين بالتلفون بتلعلعين بس جدامه لا انا كنت جذه في الملجة وكنت لما اطلع وياه استحي وما اتكلم واااايد وما اكل بس شوي شوي تعودت عليه والله يتمم لج على خير.:shiny:

 

[ظلام الليل]

الحياء شعبه من شعب الإيمان والريال يحب المرأه الخجوله ، لا تستبقين الأمور هو بيعودج على الجرأه ولما بيحس أن هالشي طلع منج بعد ما هو علمج بيستانس وايد وبيقولج شوفي كيق كنتي قبل والحين كيف صرتي بس أنصحج اهتمي بمظهرج لأبعد الحدود حتي رجلج اذا تتوقعين انج خاشتها ترا احتمال ترتفع ثيابج وانتي طاشيه وهو بيدقق في هالأشياء، الأظافر مثلا ، بخري شعرج، أسنانج والتنظيف ودايا لبانه في حلجج وحاولي كل ما ايي تلبسين شي جديد و قدميله أطباق حلوه لما يزورج والله يوفقج

 

[قول & فعل]

^__________^ ياربي ذكرتيني باول ايام الملجة .. احين انا انط عليه خخخخ

خليج جي ع طبيعتج .. مستحية ومنزلة راسج .. ولو طلب انج ترفيعن راسج .. ارفعيه بس لا تحطين عينج في عينه موول

يعني شوفي راسه ولا اليدار الي وراه .. والله انج جي بتخلينه يتخبل عليج .. وعقب فترة من الملجة .. بيذكرج

وساعتها انتي ردي سوي عمرج مستحيه..

وبالنسبة للسوالف والأسلوب.. خليج نعوووومه ..و ابتسمي ابتسامه عذبه ..

عطيه المكرفون ..يعني خليه هو الي يبدا ويرمس .. ولو سألج سؤال ردي عليه بجواب يخليه يسألج مرة ثانية ..

يعني لا تعطينه جواب كامل .. خلي اجابتج تثير تساؤل عشان اتمون تسولفون ..

ولو في ايدج قلاس عصير شربي منه شوووي شووي

ودلعي بشفايفج .. واحسن لو يكون بالمصاصة (straw)

واكشخي حبيبتي ما فيها شي .. البسي بدلات مرتبة وتعطري .. واذا انتي مستحية وايد انج تطلعين يدامه

كاشخة ..لبسي شي كمه طويل.. بس طبعا وبدوون توصايه ..لازم تكونين دووم مرتبه يدامه

والله يهنييج حبيبتي..وان احتجي اي مساعدة ترانا حاضرين ^.^ .. والسموحة

 

[زهرة البوادي2006]

موفقه اختي وكوني كما انتي الرجل يحب المراة الخجولة

 

[miss.cute5]

حور الجنان
ام شهد
ظلام الليل
قول & فعل
زهرة البوادي 2006

ربي يسعدكم كلللللكم

والله قبل كنت شايله هم خجلي والحين انا افتخر فيه حييييل

وما تدرون قد ايش دعواتكم حسستني بوقفتكم معي

 

[miss.cute5]

ظلام الليل

ذكرتيني يالغاليه بشيء - ولو انه مو مهم - ربي يغفر لك

 

[miss.cute5]

قول & فعل

والله انك اسم على مسمى

ربي يجعلك قرة عين لزوجك وهو قرة عين لك

ربي يغفر لك على نصائحك الدرر - ولا يهونون البقيه -

فعلا انا محتاجه اعرف التفاصيل اللي ذكرتيها

كيف تكون نظرتي اسلوبي كلامي وردي على كلامه

اما شرب العصير فما ظنتي اقدر اشرب منه شيء

ربي يعين وييسر

 

[miss.cute5]

الله يخليكم لا تطنشوني

ابي الرد قبل العصر او المغرب

بيكون فستان الملكة ان شاء الله احمر

ومفكره اروح اليوم ان شاء الله للمشغل اصبغ شعري خصل غجري

وش رايكم ينفع او صارت موضه قديمه

انا ابيه يشوفني غير

والرجال يحبون المتجدده

انتظر الرد ضروري

ومفكرة احط ستكر احمر لماع على الصدر من فوق تحت الكتف ينفع او انها حركة جريئة

 

[ام شهد]

بصراحة حركة الاستكر جرئية وبعدج بالملجة طلعي مواهبج بعد العرس

 

[miss.cute5]

أشكرك أم شهد

ربي يغفر لك ولوالديك

طيب ما قلتوا لي عن الخصل

اخصل شعري الحين او اخليه زي لونه

لو اخصل رح اخليها بني

ان شاء الله

 

[نعومة داوني]

لا تغيرين لون شعرك خليه بعد الزواج بفتره
لان هو بيشوف كل شي فيك حلو الحين بدري على التغيير
والله يوفق إن شاء الله

 

[miss.cute5]

نعومه داوني هلا بك

بس للأسف جاء رايك متأخر

ارضية شعري خليتها على لونه

والخصل أحمر بس حلاته انه صار مو باين يعني غامق مره ومعطي للشعر شوية حيويه وحركه بس مو باين
حتى في الدوام قالوا زميلاتي شعرك زاين بس وش مسويه فيه
يعني مالاحظوا

اشكرك من كل قلبي على نصيحتك - ولو انها متأخر- بس اقلها زادت من ثقتي بلون شعري
ربي يغفر لك ولوالديك وييسر امرك