قلبي ينزف ثمن اغلاطه قبل الزواج

[كنت"أتمنى]

السلام عليكم ورحمة الله

بداية انا سعيدة لوجود جو التعاون والتفاعل في المنتدى
الكل يفزع لمشكلة اخته وحتى لو مالقت حل تلقى جو يحتويها

عزيزاتي ...

انا مشكلتي المرة مع زوجي انه " يخون " ، ما اقصد الزنا والعياذ بالله لكن .. الكلمات القادمة رح توضح لكم معنى الخيانة..

لما تقدم لي الكل مدح فيه ، واتضح انه شاب نظيف لا قدامه ولا وراه ..
بعد العقد ..في فترة الخطوبة اكتشفت رسايل في جواله تدل على وجود علاقات مع بنات ، جلسنا تصارحنا وقال انها كانت لعب عيال ، وماعند شي جدي ، والعلاقات مجرد مكالمات في التلفون، ووعدني انه مايرجع بدليل انه بدل رقم جواله... واغلق الخط السابق..

لما حسيت بصدقه ، غفرت له وواصلنا المشوار

في فترة العسل تفاجئت ببروده وخجله ، وعديتها قلت الرجال توه على هالسوالف ، ويمكن خجلان مني بالاضافة انه يمكن هذي هي قدراته وهذي هي احتياجاته فعيب علي اتسائل .. ( كان يكفي مرة مثلا بالاسبوع وهو معرس جديد)

يمكن في الشهر الثالث من بعد الزواج اكتشفت انه عنده ايميل ثاني ، طبعا ماكنت اعرف ليش هالايميل لكن لقيت محادثة فيها كلام حلو ( وحشتني ووينج ) وهم جلسنا وتصارحنا وقال انه هالايميل عنده من قبل الزواج ووعدني مايدشه مرة ثانية .. حاولت اصدقه واعديها..

طافت الايام حملت وولدت .. بعد النفاس اكتشفت الطامة الكبرى
ايميله الثاني كان مخصص لاستقبال وارسال الايميلات الاباحية ، وكان عنده في قائمة المسنجر بنات كثار اسماؤهن كلها تدل على الاباحية !!!

الي جرحني اكثر ، اني لقيت انه يمارس هوايته لما اكون مو في البيت ، في الدوام مثلا او حتى نايمة ، وانه ياخذ لاب توب اخوه الي معانا في العمارة مش اللاب توب الي بشقتنا ..
هم جلسنا وتصارحنا الخ ، ووعدني لكن .. هالمرة ماقدرت اصدقه...

يابنات خصوصا الي عاشت وضعي..
انا ماقصرت معاه لبس وتكشخ ودلع وحركات ، وكنت وقتها عروس!! بس مرات احس اني تزوجت اكبر مغازلجي بالدنيا..

ولا ازال بين فترة والثانية اكتشف امور يا انه يقول انها من الماضي او اني اسكت حفاظا على بيتي..

المشكلة الحين اني مقهورة واحس اني واقفة على زجاج
واحس ان علاقتنا الخاصة صارت بايخه خصوصا بعد الي شفته عنده من افلام
يااااه ، ما افظع الالم الي تحسينه لما زوجك يشوف جسم غير جسمك
لما تحسين انه فيه مصرف اخر لحاجته غيرك وانتي الي ماترفعين عينك في رجال غريب

حاليا انا مو قادرة ابعد الشك مني ، اشك في كل تصرفاته مع اني اتعوذ من ابليس
بالنسبة للعلاقة الخاصة صرت فيها مثل الممثلة اصطنع السعادة وانا اعيش الالم ..
لما اتذكر احس بحرقة في قلبي
ومافيه اي جواب لسؤالي ليش؟ انا اشسويت حتى يكافئني بالطريقة ،
وهو مو راضي يجاوب انا شنو ناقصني!!دايما يقول ما ناقصك شي الخ

انا اعرف ان الهداية من الله
بس ابي اهونها على نفسي ومو قادرة
وخوفي من الأسوأ
ومن عقاب الله على العايلة كلها يذبحني..

نصحوني

 

[روتـــانا]

والله خبرتي بهده الامور قليله .. وما اقول غير الله يفرجها عليك ياااارب ..

يمكن لو بينتيله انه انك ما تقدري تعيشي مع انسان تشكي في تصرفاته وانك لساكي صغيره والفرص قدامك كثيره .. وانك حابه تعيشي حياتك بسلااام مع انسان يقدرك لشخصك .. وانك قررتي انك تستقلي بحياتك عنه .. وبكدا معناته لازم اهلك حيعرفوا ممكن يخاف على نفسه وعلى سمعته ويفوق لنفسه ..


الله يوفقك يااارب

 

[ice creeem]

وقفيه عند حده ما يقصر بحقوقك علشان نزواته وخرابيطه

 

[فراشة طائرة]

الله يكون معك

 

[كنت"أتمنى]

بس ابي اوضح لكم يابنات

زوجي مو سئ ، زوجي حنون طيب ويحبني وأب رائع بس هالسالفة ، ويصلي الحمدلله ، بس هالسالفة العظم في البلعوم

المشكلة ما احسه نادم او تايب ، لان التائب له علامات تبين صدقه

 

[القلب المهجور]

الله يهديه وضال المسلمين

الله يحنن قلبه عليك ويسخره لك

 

[احلىحلاوه]

حسبي الله ونعم الوكيل على كل من دخل هالافلام والمقاطع الاباحيه

 

[احلىحلاوه]

الله يهديه ويسخره لك يارب

 

[قمة افرست]

تبغي نصيحه من اخت ذكرتيني بسالفة اختي كانك كاتبه معاناة اختي مع زوجها كانت تحكيني واقولها زوجك ماينفع معاه الا انك تحسيسيه انك خلاص تعبتي معاه ومافي امل انه يبطل هذا الطريق وانك خايفه ربي يبلكم من باب من دق باب الناس دقو بابه فهديديه بالطلاق فكانت اختي تقول اخاف اهدم بيتي لان هو ((((زوجي مو سئ ، زوجي حنون طيب ويحبني وأب رائع بس هالسالفة ، ويصلي الحمدلله ))))علشان كذا اقولك ذكرتيني باختي المهم اختي
سمعت كلامي وراحت لبيت اهلي على اساس مره عايفه وكارهتو وتبغى الطلاق يعني ماقالت انا ابغى اروح عند اهل من باب التهديد وقاعدت عند اهل شهرين اذا دق ماردت واذا دق على ابوي قال بنتي تبغى الطلاق وبس لانها كذا مره اعطتك فرصه(( طبعا هذا كله تخويف وتهديد علشان يحرم ويقدر بنت الناس))وبعدين جاء البيت يترجاها وقالت هذي اخر فرصه وتوعدني قدام ابوي اذا شفت اي تصرف ماعجبني برجع بيت اهلي ورقة طلاقي توصلني قالها من عيوني وعدها قدام ابوي وذلحين ماشاء الله تبارك الله شخص ثاني خلى كل هذي الشغلات وصار محترم ولما سالته اختي لي تغيرت ايش اهم شي حثك على التغير قالها لما حسيت نفسي بخسرك وبخسر ولدي واهدم بيتي على شي حرام ومايستاهل ولما طلبتي الطلاق صحتيني من غفوتي

 

[راحةالقلوب2]

الله المستعان

 

[ضي الفجر]

الله يهديه

 

[جرحنــي حبيبي]

اسأل الله العلي العظيم في هذه الليلة ان يسخر لك زوجك ويبعد عنه بنات الحرام وان يجعله قرة عين لكي وان يجعلك قرة عين له
حبيبتي مالك الا الصبر والالحاح بالدعاء للمولى وكثرة الاستغفار
ان تقريبا زي حالتك اتوقع ان زوجي بدأ بالمعاكسات من وقت قريب لانه في بداية الزواج ماكان كذا ابدا لكن كله من رفقاء السوء اسأل العلي القدير ان يهدي زوجي ويسخره لي ويبعد عنه بنات الحرام واصدقاء السوء

 

[unknown]

فكرت مليا ياأختي بأمرك وأتتني بعض الأفكار ربما تكون مساعدة لك, هدى الله زوجك ورده إلى دينه ونفسه ولك ردا جميلا لدي بعض النصائح التي أريد أن أسديها لك والذي أراه أنه عندما يكون لديك مشكلة فعليك معالجة جذورها كي تصلي لحلول جذريه:

• عليك أختي له بالدعاء له بالهداية, الدعاء ثم الدعاء ثم الدعاء
• لاأنصحك بمناقشته لانه لايزيده ذلك إلا تبارا
• حاولي أن تفرغي مافي جعبته قبل اختلائه مثلا قبل ذهابك إلى عملك كل يوم
• اعلمي ان الفراغ هو المشجع له الاكبر في ممارسة مثل هذه العلاقات
• حاولي ان يكون الوعظ والارشاد ليس منك وان كان منك فيكون بطريقة غير مباشرة مثلا كسرد قصص تسمعينها او تقراين عنها وليست بالشرط لها بما يفعل وخاصة قصص الموت فقد قال الرسول صلى الله عليه وسلم اكثروا من ذكر هادم اللذات
• حاولي أن تجدي له صحبة خيرة من أزواج صديقاتك والالتفاف به وضمه معهم
• عوديه أن ينام معكي كل ليله ولا تسمحي له بالسهر بينما هو يرتمي في احضان اللابتوب ولكن بطريقة غير مباشرة , كأن تدعي أنه لا يأتيك النوم وهو ليس بجانبك
• عوديه بأن تنامي في حضنه كل ليله , لا تجعليه يسهل عليه التسلل من السرير ليلا

هذا ماجاء في تفكيري, وأعتقد أن علاجه سيدوم طويلا ولكن وضع خطة ناجحه سوف يساعدك بإذن الله

 

[الوااااان*]

الله يسخره لك

والله مالي الا الدعاء لك

 

[ياربي انصرني]

مالك الاطريق واحد تلجأين اليه وهو ان تكثفين اتصالك باللهه تعالى في الثلث الاخير من الليل وتنطرحين بين يدي الله خاشعه باكيه واصدقي في دعوتك لهداية زوجك وان يغنيه الله بحلاله عن حرامه

واكثري من الاستغفار واصلحي مابينك وبين الله انظري لنفسك هل غفلتي ؟؟ هل فرطتي بطاعة الله؟ تذكري ذنوبك واسعي الى التوبه النصوح

صدقيني ان ذنوبنا هي سبب شقائنا مع ازواجنا وابنائنا وجميع مشاكلنا000

داومي على قيام الليل خاصة الثلث الاخير وبدون انقطاع وان كنتي تسمعين الاغاني والمسلسلات والافلام استبدليها بما هو خير من تلاوة القران بتدبر --وسماع المحاضرات والقنوات الهادفه000

وبين فتره وفتره حرري ماتسمعينه من محاضرات الى زوجك عبر رسائل الجوال اجعليها رسائل وعظيه فيها ترغيب وترهيب الى ان يمن الله عليه بالهدايه000

ولاتنسين كل يوم اذا استيقظتي من النوم الصباح ان تستودعين زوجك وابنائك الله واصدقي في دعوتك 00وسترين خيرا باذن الله000

 

[وين أروح؟؟؟]

انتي مو مقصره بشئ ولاتحملي نفسك فوق طاقتها
كل الي انتي فيه انو ماتخلص من الحياه الوسخه الي كان عايشها
لازم تتكلمين معاه وتحطون النقط على الحروف ولازم التغيير يكون عن اقتناع
لان كل شئ صار سهل هالوقت والنت بكل مكان وبكل جهاز
واذا هو نفسه ماتخلص من الماضي عمرك ماراح تقدرين تنتشلينه منه
مااقدر الا ادعيلك الله يهديه ويهدي زوجي اما يتعدل او يطلق وارتاح من الهم

 

[روتـــانا]

تبغي نصيحه من اخت ذكرتيني بسالفة اختي كانك كاتبه معاناة اختي مع زوجها كانت تحكيني واقولها زوجك ماينفع معاه الا انك تحسيسيه انك خلاص تعبتي معاه ومافي امل انه يبطل هذا الطريق وانك خايفه ربي يبلكم من باب من دق باب الناس دقو بابه فهديديه بالطلاق فكانت اختي تقول اخاف اهدم بيتي لان هو ((((زوجي مو سئ ، زوجي حنون طيب ويحبني وأب رائع بس هالسالفة ، ويصلي الحمدلله ))))علشان كذا اقولك ذكرتيني باختي المهم اختي
سمعت كلامي وراحت لبيت اهلي على اساس مره عايفه وكارهتو وتبغى الطلاق يعني ماقالت انا ابغى اروح عند اهل من باب التهديد وقاعدت عند اهل شهرين اذا دق ماردت واذا دق على ابوي قال بنتي تبغى الطلاق وبس لانها كذا مره اعطتك فرصه(( طبعا هذا كله تخويف وتهديد علشان يحرم ويقدر بنت الناس))وبعدين جاء البيت يترجاها وقالت هذي اخر فرصه وتوعدني قدام ابوي اذا شفت اي تصرف ماعجبني برجع بيت اهلي ورقة طلاقي توصلني قالها من عيوني وعدها قدام ابوي وذلحين ماشاء الله تبارك الله شخص ثاني خلى كل هذي الشغلات وصار محترم ولما سالته اختي لي تغيرت ايش اهم شي حثك على التغير قالها لما حسيت نفسي بخسرك وبخسر ولدي واهدم بيتي على شي حرام ومايستاهل ولما طلبتي الطلاق صحتيني من غفوتي

صح كلامك .. لانه الرجال لازم يحس انه في ثمن لاغلاطه ...

يعني مارح ياخد الحلال والحرام ويعيش حياته بالطول والعرض .. وانتي تاكلي الهم وتسكتي ..

بعدين حرام انك شايفه الغلط وساكته .. لازم تسوي شي تفوقيه وتوقفيه من طيشه لانه الدين النصيحه .. ..