قصتى مع الحبيب؟؟

[دمع السحاب.]

السلام عليكم

والشهر عليكم مبارك يارب

اخياتى الغاليات بشكيلكم الحال واتمنى تساعدونى على حل مشكلتى والله العضيم انه يتقطع قلبى على حبيباتى الى يشكون من ازواجهم الى بارد والى شمالى والى جنوبى الى يخونها والى يقهرها

والله قهر ملينا ومتنا قهر واهم ولا هم حاسين وذابحين انفسنا واذا دخلنا النت هات ياخلطات >>:2:
وهات ياطبخات وهات ياليلات ملونه وكيف اخليه يحبنى وكيف مايشوف الا انا وشلون ارضيه وشلون اخليه اسعد زوج<<<<<

اااااااااااه ه ه ه ه ه
يالقهر واهم والله مودارين ولا حاسين اننا نقطع انفسنا علشانهم وعلشان نكون اسره سعيده:32:

زىى انا اقرب مثال احب الكشخه واحب الذوق فى كل شى:1:
الحمد لله طباخه درجه اولى ومهتمه بعيالى وبحياتى وبيتى على اكمل وجه ورومنسيه موت>>>بس اكيد رومنسيه منسيه اهى اهى اهى

وابو الشباب مرتاح ومبسوط انا احس كذا طبعا بدون اهو مايقول لانه مستحيل يمدح او يتكلم صامت من الدرجه الاولى

بس مع العشره عرفت اسايره واعرف الكم القليل عن طبعه

غموض وصمت

وقدرت اعيش معه والشكوى لله وش نسوى هاذى النصيب صبر جميل والله المستعان


>>>>>>>>>>>>ايه نكمل القصه امممم قصدى الروايه يووووووووه قصدى الموضوع خخخخخخ

حاولت بجميع الطرق الحلوه والمره اللين والقسوه الزعل والدلع

كل شى جربته احسه اذا كان مروق مره طلع هالكلمه الى ذابحته انا فيها ا>>احبك<< بدون اى تعليق يعنى كانه يادى واجب وبس

ياكل وينام اربع ساعات والعشرين الباقيه فى الموت الحمر>>>>>الاستراحه

بيته الثانى الله لا يحلل من طيحه فيها
فى البدايه كان بلاى ستيشن وقلنا كيفه خليه يغير جو يمكن يشتاق ويرجع ولهان

الاربعاء والخميس بس

وبعدين صارت بلايستيشن وبلوت و>>>>قلنا اهون من غيره


مادريت الا الرجال داخل على بلاب توب ومسوى ايميل بعد <<<<<واهو ماجابلى الاب توب من اربع سنوات الا بالواسطه وعلشان اخته مسويه منتدى عائلى ويبينى انا وبناته نشارك وعيب ان بنات اخوانه كلهم عندهم وبناته لا

وعمره ماحط ايده فيه ولا حتى يعرف يفتحه

وقنبله نوويه فى وجهى يوم شفته داخل ويقول بالحرف الواحد هاذا خاص فينى لا اشوف احد لامسه ولا مقرب عنده

>>>>>>>>>>>>هنا بدى الشيطان يوسوس لى وبديت مشوار الشك والعذاب >>>>ايه نسيت اقولكم اننا متزوجين عن حب بحكم اننا قرايب وانخطبنا سنتين كلها حب ورومنسيه >>>طبعا رسايل وحركات بالخفيه طبعا لان الى نسويه فيها قبايل لو احد عرف

موتلفون ولا مقابلات زى الحين

بس ياليتنا زى هالزمن كان اقل شى عرفت طبعه
>>>>>>>>>>>>

شكلكم تعبتو من روايتى بس شسوى حبيت اقولكم القصه من بدايتها لانى صارلى شهر وانا كاتمه فى نفسى ولا لقيت بعد ربى الا حياتى وغلاى اخياتى البلقيسيات

اشكيلهم الحال

باقى القصه بكتبها لكم بكرى ان اراد ربى لى لقا ءمعكم

سى يو

 

[فقط انثى]

بانتظارك

 

[جراءةامل]

ياحليلك

 

[دمع السحاب.]

هلا فيكم مره ثانيه

واكمل لكم قصتى مع زوجى

جاب الاب توب وغثنا فيه انا وبناته وشلون افتحه وشلون اكتب ومن هالقبيل لين صار الاخ معلم من وراى طبعا

شايل هالشنطه ورايح جاى على الاستراحه اول الاربعاء والخميس والحين يوميا واحيانأ مرتين باليوم وانا ميته قهر وساكته
وفى يوم كان سهران فى البيت وجالس يطقطق ولا دريت الا ولدى يقول يمه تبين ايميل ابوى والباس ورد حقه انا شفته وحفضته

>>>>>>>سبحان الله كن احد موصيه اخذت المعلومات وحلفت اولدى انه مايقول لابوه شى

ودايركت ركض على الاب وفتحت ايميله

وانا انفجع وانصدم صدمه عمرى فى حبيبى المحافظ الى مايترك فرض وشديد على وعلى بناته لدرجه مو طبيعيه

واشوف ذيك الرسايل الى بغيت امووووووووت لمن شفتها

والله يابنات انى شفت شى ماقد شفت زيه فى حياتى مقاطع وصور سكسيه ومد ح بالمغربيات والبنانيات واجسامهم وديارهم وعزايم للمغرب وتركيا ولبنان ومصر

والله يابنات انى تمنيت الموت وقعدت اصيح لين الصبح

وجلست افكر وشلون افاتحه ولا وشلون احل الموضوع معاه مابى اخسره احس انى مانى قادره اتمالك اعصابى وابى اخرب حياتى بيدينى

فقلت بصبر شوى لحد مااهدى واكلمه
بعدها بكم يوم كان نايم وسمعت رساله جت جواله فستغربت وقمت فتحتها فلقيت رساله من رقم غريب وتقول احبك واموت فيك

وهنا انا انفجرت ومررررررره ثانيه انفجعت وجلست اصيح وانتفض من بعدها بيومين سافرت عند اهلى انا وعيالى نغير جو والسفر كنا محددينه من قبل ذاالمشاكل فقلت بروح اريح وافكر شسوى

>>>ادرى بتقولون ياصبرك ساكته للحين <<<<<وش اسوى قلت ماابى ادمر حياتى وبفكر صح

وياطويلات العمر سافرنا وانا مره نفسيتى تعبانه ولااكلت من ذاك اليوم واهو مستغرب وش فيك ليش لك كم يوم ساكته انا مسوى لك شى وقلت لا مافينى شى

ولمن وصلنا عطانا مصروف ورجع لديره واهو زعلان منى ليش مااكلمه او ارد عليه

لماارسل قال وصلت

ارسلته هاذيك المعلقه وقلت كل شى انتا تخونى تكلم وانا شفت ايميلك وعرفت كل شى كان مبعدك عنى كل ذاالايام
وانا صابرهه عليك وعلى قسوتك لارومانسيه ولا حب ولاكلام ولا سوالف ودايم طالع للاستراحه ومطنشنا ولا طلعات وحتى عمرك مافكرت تهدينى وانا الى مموته نفسى عليك ولاقصرت عليك بشى قايمه فيك وفى بيتك والله الشاهد
ومهتمه بنفسى وبعمرى ماسمعت كلمه حلوه او مدح

لاكن انا الحين عرفت قلبك مو لى واكيد فيه احد ثانى بحياتك

مشكور وماقصرت ماكان العشم فيك يابو ......

انتضرت الرد انتضرت يكلم ولا هو هنا
وجلست اسبوعين وانا مريضه واهو يكلم اعياله بس ويسأل وانا مافكر فينى او حتى فكر يدق او يعتذر

انا قام عقلى يودى ويجيب قلت ارسل يمكن يحس ولا يقول شى


ولا رد ولا هم يحزنون

يوم كملت ثلاث اسابيع عجزت اتحمل وقلت ياقاتل يامقتول
ودقيت ورد رسمى ومسوى زعلان >>>>>من زين الوجه شين وقوى عين اه ه ه ه ه يالقهر
وانا الى انفجر عليه واعيد كل كلامى معاه وكل عاده بكل بروووووووووود رد انا ماخنتك وهاذى رسايل تجينى على الجوال مادرى وش مصدرها
واذا على الايميل انا غلطان اكيد بس والله هاذى نزوه وغصب عنى قلت شف ياانا يذالوسخ الى انت تعيشه

قال اكيد انتى وانا حبك وانتى ام اعيالى ولاكن الشيطان الله يبعدنا عنه هو الى دخل بيننا

وراضانى بلكلام الى احسه مغصوب واهو يقوله

وجاء ياخذنا وانا مغيره اللوك ومشخصه على بالى بغير حياتى وبيعوضنى عن الى فات

ياالحبيبات ومن يوم رجعنا وصحا من النوم الاخ طاااااااااااااااااااااااااااااار يركض للاستراحه وانا المسكينه كنت فاهمه انه اختارنى وبيعوضنى وينسى اصحابه الى مضيعينه وحتى جواله غير رقمه السرى علشان ماافتش وراه

وكل يوم على ذاالحال حتى فى الشهر الفضيل نوم حتى العصر ويقوم على الجهاز علطول واهو صايم

استغفر الله العضيم ويفطر ويروح يصلى التراويح ولا نشوفه الا الفجر يدور السحور وياويلى لو يجى والسحور ماخلص

بختصار ياخياتى ابى مشورتكم حياتى صارت ملل وانا بس ساكته ولااتكلم معاه الا رسمى وحتى هذاك الشى صرت اكرهه واكره اقعد معاه ورجعت لى الحاله وصرت مااكل

دلونى ايش اسوى معاه

وكيف اتصرف والله انه حبوب ومتسامح لاكن رفقه السوء هم السبب
هم الى طيحوه فى الاستراحات والبلاوى وانا خايفه انه يطور الموضوع ويضيع منى

تكفون فى الشهر الفضيل ادعولى وساعدونى لو بكلمه وحده انا مالى الا الله ثم البلقيسات ربى يحفضكم ولا يحوجكم لاحد

 

[فرحتي]

اختي زوجك مثل زوجك بها الاستراحات مالنا وانا اختك الا الصبرررررر والدعاء

 

[صرووح المحبه]

الله يصبرناا وياااك
كل الرجال انااانيييين مايحبون الا انفسهم<<اختلفت الاسباب والموت واااحد

طنشيه وعيشي حياتك مثل ماهومسوي لكن موبالغلط

وااادعي ربك تراها فرصه بهالايام الفضيل واكثري من قولي ((اللهم اني استودعك قلب زوجي وسمعه وبصره فاحفظه ))

 

[الخط الفاصل]

الله يفرج همك ويسخره لك يارب ويجعله خاتم بإصباعك ولا يشوف في الدنيا غيرك..

 

[اسيرة فكري]

الله يصبرك على ذا الرجال ويهديه ويرده لك اختى باين عليك حليمه الله يزيدك اشتغلي عليه ورتبي حياتك بدون ثورات والله يوفقك

 

[يالله يالله]

حبيبتي زوجي كان مثل زوجك كله طلعات مع ربعه واصل ربعه فيهم سوء وانا كنت دايم ادعي وربي الشاهد ادعي وابكي من كل قلبي واقول يارب باعد بين زوجي ورفقاء السوء كما باعدت بين المشرق والمغرب يارب اهدي زوجي واصلحه والحمدلله قولووووووووووا ماشاء الله ربي استجاب لدعائي وصار زوجي متدين وترك ربعه وماعاد يشوفهم لك الحمد يارب يا اختي هذي فرصتك برمضان اشغلي نفسك مع الله عيشي لله وفي الله والى الله صلي قيام الليل وادعي قبل الفطور ادعي في وقت ادعي ان ربك يصلح زوجك رمضان فرصه لاتعوض في كل الاوقات مستجابه الدعوات

 

[دمع السحاب.]

الله يجزاكم خير وييسر اموركم ويجعلكم من كل هم فرجا ومن كل ضيق فرجا ويرزقكم من غير لاتحتسبو

امين يارب

بس تمنيت احد يقولى كيف اتصرف معاه الحين والله قهر

امس قلت له اختار ياانا ياصحابك والغلط الى قاعد تمشى فيه
انكر انه يمشى معهم بالغلط وقال انتى ضالمتنى وانتى بيضيعك الشك فينى وسوء الضن وقعد يصارخ وماتحملت رديت عليه وقلت له بكيفك انت اخترتهم خلهم ينفعونك لا تعرفنى ولا اعرفك مادامك ماشى فى هالطريق

وطلع من الغرفه ورجع لجلسته على الكمبيوتر ولا كنه صار شى ؟؟
اخذت مخدتى ورحت نمت فى المجلس وناويه اسفهه وانام فى المجلس حتى لو ضليت طول عمرى فيه

بس والله خايفه على نفسيه بناتى وولدى ماابى انكد عليهم

قهر والله الناس فى هالشهر الفضيل تتعدل وتتربط شياطينهم واحنا الشياطين متسلطه علينا والعياذ بالله

الله يصبر قلبى ويثبتنى يفرج لكل من ترد على

 

[nice mom]

ياقلبي انت عيشي حيااااااااااااتك وطنشييييييييييييييه حرااام عليك اهم شي صحتك انت عندك عيااال وهم بحااجتك الله يخليك لهم انبسطي مع عياالك وانسيه شوفيه هو عااايش حيااته ومو هاامه شي خليك مثله وعيشي حيااتك صدقيني بينقهر ويقول ذي وشفيهاا ماصرت اهمها ومطنشتني ,,,,بس كذا بيعااند زياااده تراهم مثل الاطفااال لاشديتي عليه عااندك

 

[دمع السحاب.]

صادقه والله احسه كل يوم يزيد فى العناد
بجرب اطنشه واعيش حياتى مع اولادى وبنشوف لعل وعساء

والله حاله الله لا يشغلنا الا بطاعته
والله يجزاك خير غلاى. ويبعد عنك اللهم قولى امين

 

[مبتليه بنفسها]

بسم الله الرحمن الرحيم ​

السلام عليكم ..

في البداية اعرفي شو نمطه ،، وبعدين >> كيف تتعاملين مع نمطه ,,

شوفي خيتو انا ماعندي خبرة عن تجربه .. بس انا مواصله كل قصص الدكتورة ناعمه .. وفكل تجاربها كانت ماتخلي الحريم يصارحون ازواجهم بخيانتهم اول شي اتيمع الادله كلها .. وعقب تتصرف على حسب نمط زوجها يعني اتقربه لها واتخليه يتعلق فيها وبعدين اتصارحه واتهدده بالانفصال فهو لانه تعلق فيها ما يقدر على الانفصال بيصطلب وبيوز عن حركاته ,,
وعليج بسورة البقرة اقريها كل يوم وادعي له بالصلاح والثبات والله يسخره لج ان شاء الله ..

 

[فتو89]

شوفي تقول استاذه ناعمه احلبيه حتى ينشف الا نامي معه وتصلحي وترتبي واعملي لوكات جديده وعطيه من الكلام المعسول عشان مايدوره عند غيرك انتي ياعمري عندك عيال والله يتأثرون من علاقتكم هو ماهو حاس انتي خلك احسن منه وهذا ما يمنع انك تتزعلين وتدلعين عليه ميعي بزياده وروقيه بزياده وغيري حياة غرفة نومك انفتحي اكثر والله يذوب مع الوقت واهم شي الدعاء والاستغفار والصدقه وقيام الليل *** ومار ح ننساك من الدعاء الله يصلح حالك يارب ** وإذا تبين اتواصل معك راسليني على الخاص

 

[ادور على نفسي]

الله يسخر لك زوجك يارب ويهديه انشاء الله

 

[meme_99]

هههههه والله اضحك من القهر كانك تحكين عن زوجي صرت اطنشه زي مايطنش واعيش حياتي
الله يعيننا بس ويصبرناااااااا عليهم مايكفي شغل البيت وغثى البزران ونفسياااات تعباانه00

 

[دمع السحاب.]

والله يالغلا ماقدرت احدد نمطه الصراحه غريب ذاالانسان فيه طبائع مخلطه

ماقدرت اعرف ايش نمطه لاكن اقرب شي الشمالى الغربى

الله يجزاكم خير يارب وربى يفرج همكم و
الله يعيننا على هالرجال الى بيودونا لشهار واهم يضحكون

 

[رد الرومان]

من اليوم لا من الان الحقي على نفسك حبيبك بدا يمل منك غيري لبسك وشكلك وكل تصرفاتك زوجك الان يبحت عن شي يثوره والرسايل الي شفتي تثبت هذا الشي اجذبيه قبل غيرك واستعيني بالله لا تفسحين الطريق لبنات الحرام غازليه حاولي تحصلين على شريحه جوال وغازليه فيا بدون مايدري _بعدين انصحيه قوليله ماتخاف ان الله ياخذ هذي العيون و اليدين الي قاعد تعصيه فيها بثواني يقدر ياخذها مثل ما اخذها من غيرك_بعدين مثل ما لك اشياء خاصه راح يصير لي اشياء خاصه _ماتخاف بكرى الناس يعايرونك ببناتك ترى راح ينتقم_

 

[رد الرومان]

تر الله راح ينتقم وانا كما انتقم خليه يحس في النار الي انتي فيها خليه مكانكى

 

[وتين حبيبي]

امممم
اولا روقي
الزم ماعليك صحتـــــــــــــــــك ومن بعدها الطوفان
اهتمي بانفسك ازياده
اشغلي نفسك باي شي غيره صديقاتك منتديات طبخ قراءه حسب هواياتك المهم مااتفكرين فيه
اولادك هم احلى حاجه في الدنيا عطيهم حقوقهم وزيااااااااده
الصدقه والأستغفار اثرها عظيــــــــــــم
قيام الليل
اهله حببيهم فيك وحاولي اذبين قدامهم بين فتره وفتره من غير مايسمع وبشكل غير مباشر اتشكي بحيـــــــــله !! فهمتي
وهم بيوصلون له اشارات بطريقه غير مباشره!!

والله يفرج لك ياااااااااااارب