فرط الحركة ..الدوبامين ..قمة الجبل

[راجيه الرضا]

اتمام المهمة
تخيلو كدة معايا
شخص طالع جبل عالي زي ايفرست
والشخص دا فضل طالع طالع بسرعة لحد قبل القمة ب100 متر بس
وقرر فجأة يقف يرتاح
أصل اللي جاي حبة قليلين أريح شوية واكمل
والشوية جابو شوية
وهو عمال يقول لنفسه عاااش يا بطل انت عملت انجاز كبير مجتش على الحبة دول ريح يا راجل دا حقك
معانا أكل وشرب يكفينا متقلقش
ويفضل يأجل في ال 100 متر دول
لحد ما يلاقي الأكل والشرب اللي معاه قربو يخلصو
يترعب
ويقلق
ويلاقي نفسه بيفكر
أنا لو كملت ال 100 متر دول ممكن معرفش انزل من الجبل لان أكلي وشربي بيخلصو
انا هانزل من هنا
ويبدأ ينزل تااني
ويجي في نقطة أكله وشربه يخلصو
فيبقى قدامه مصيرين
✓إما إنه هايموت على الجبل لوحده
✓أو هاينزل بس يدوب عايش

السيناريو اللي فوق دا شبه أي مهمة الشخص الفرط حركاوي بيحاول يكملها
البداية زي الفل والدوبامين مشحون على اخره من التحدي
لكن نيجي عند تقفيل المهمة والمخ يتربس
يعني قبل النهاية بخطوة المخ يفصل ويشد الفيشة

الدوبامين شطب
يقوم المخ يعمل ايه
يريح ويقول
مجتش على دي
ويبدأ الشخص يحاول ويجاهد بس بردو المخ مصمم
مجتش على دي
لحد ما الشخص يقرر يسيب الموضوع خالص ويتجاهل تعبه فيه
ويبدأ في حاجة تانية تحفز الدوبامين من جديد
ويتمحي التعب اللي تعبه في الحاجة الاولانية اللي فاضل فيها تكة 🥹
لو كان في السيناريو الاولاني مع الشخص اللي طالع الجبل حد يقوله
احنا مش هانقف هنا
كان كمل بشكل مثالي
✓حد بس يقوله متضيعش تعبك وانا معاك ،يلا شد حيلك
✓حد يفكره بالمكافأة اللي هايلاقيها بعد ما يتمم مهمته
✓حد مؤمن بيه وعارف انه مميز واللي عمله دا محدش غيره يقدر يعمله🤍
كان وصل لقمة الجبل وخلص مهمته ببساطة
كان معكم
#علياء_عون
#فرط_الحركة
#ADHD

منقول عن صفحة فرط حركة