ضااااايعه ساعدوني

[معاندة الحزن]

تاريخ الميلاد ؟
1988

مكان الميلاد ؟
السعوديه_ المنطقه الشرقيه


الحاله ؟
عازبه


الدرجه العلميه ؟
طالبه بالجامعه سنه ثانيه (منقطعه عن الدراسه)


درجة الإلتزام بالدين ؟
جيده


هل انتي مداومه على الصلاة في وقتها ؟
احيانا

المستوى المادي للأسره ؟
متوسط


الترتيب بين افراد الأسره ؟
10


عدد الأخوه والأخوات ؟
13


علاقة الوالدين ببعضهم ؟
يحبون بعض بس كله مشاكل ولما كنا صغار كان ابوي يضرب امي
والحين ابوي كبير بالسن وصحته على قده الله يخليه لنا


علاقة صاحبة المشكله ببقية الأسره ؟
سطحيه للاسف مافي احد قريب مني


هل يوجد زوج ام و زوجة اب ؟
لا الحمدلله

علاقتك مع زملاء المدرسه / العمل ؟
تعلقت بصديقتي بالجامعه لمده سنه لكنها تركتني لانها تقول ان ماعندي مشاعر
و بسبب تركها لي صرت انطوائيه ووانقطعت عن الدراسه مع اني من المتفوقات


هل تعاني من امراض عضويه او نفسيه ؟
الحمدلله لا بس انا حساااسه حيل وانسحابيه مااواجه مشاكلي

الحاله النفسيـه حاليا ً عند كتابة الإستشاره ؟
حاسه بالضياع


مدة المشكله منذ بدايتها حتى الآن ؟
سنتين على مااظن


نقاط ضعفك ؟
قلت من قبل اني حساسه وااعرف اعبر عن مشاعري ومزاجيه وانسحابيه وملوله
مااواجه مشاكلي وافضل الهروب وعصبيه وماعندي ثقه بنفسي وكل شي


نقاط قــوتك ؟
ذكيه ومثقفه ولما اهتم بشغله ابدع فيها لكني ملوله واطفش بسرعه




المشكـــــــــــــــــله ..
انا اعاني من الفراغ العاطفي وثقتي بنفسي ضعيفه جدا وهذا الشي اللي يخليني اتعلق باي احد يعطيني حب
مثلا صديقتي اللي تعرفت عليها من سنتين وتعلقت فيها بدرجه كبيره لانها كانت تعطيني الاهتمام والحب اللي ماحصلته من احد ثاني وكنت اظن انها صادقه لما قالت اني صديقتها المقربه وانها ماتستغني عني لكنها بعدين تركتني بحجة ان مشاعري بارده وزياده على كذا بسهوله بدلتني بصديقات ثانيات وتضحك وتسولف معهم ولا همها وتفوقت بدراستها يعني الوضع عااااادي عندها
انا انصدمت وين اللي تقول انها لاتركنا بعض مارح تعيش !!
اما انا كرهت الجامعه لاني كل مره اروح انقهر بتصرفاتها وتطنيشها وبنفس الوقت عزة نفسي تمنعني من اني ارجع لها وخصوصا انها خدعتني لما قالت اني شي مهم وكبييير بحياتها
المهم تركت الجامعه ولا حتى سالت عني او فكرت تخليني ارجع رغم انها عارفه اني صرت كذا بسببها
وبالاجازه بقت صديقتي توطد العلاقات من جديد وانا بعد سامحتها لكن ظل بقلبي جرح كبير
وبعد مارجعنا نكلم بعض دايما تقول انها متفوقه بدراستها وتتكلم عند صديقتها الجديده وقديش متفاهمين وكل اتصال كذا ولما اعاتبها ليش تخلت عني بعز حاجتي لها تحور الكلام وتسويني انا الغلطانه !
بصراحه انا انقهرت لاني بعد كل مكالمه ابكي ويجيني احباط وتقل ثقتي بنفسي اكثر فصرت ماارد على مكالمتها
واذا رديت اقولها سامحيني لان جرحك لي مابرى
وانا مابي اتعلق فيها من جديد ابقى انسااهااااااااااااااااااااااااااا لكن ماني قادره
وتصوروا طول رمضان وهي ماتسال عني ولا حتى بالعيد عايدتني ولما قربت الدراسه فكرتني برجع للجامعه فتبي تتلزق فيني من جديد وانا ماابيها خلاص قلبي ماعاد يرتاح لها لكن مشكلتي مو قادره انساها وخايفه ارجع للجامعه بسببها
كللي تغيرت بسبب اللي صار لي .. ثقتي بنفسي انعدمت اكثر وصرت انطوائيه بدرجه كبيييييييييره ومااطلع من البيت وكارهه نفسي كارهه شخصيتي الضعيفه
لو وحده غيري كان صارت اقوى بسبب هالشي لكن انا اااه يالقهر ضعفي زاد
واللي قاهرني مو المشكله بقدر ماقاهرتني شخصيتي
اذا الحين صديقه وخلتني اهدم مستقبلي وكل شي فكيف بعدين اذا تزوجت وصارت مشكله بيني وبين زوجي !
ياريت احد يساعدني

 

[}وردة{]

حبيبتي...

لكل مشكلة حل
إنت عارفة نقاط ضعفج..وهذا شي مهم
بس الأهم أنج تتغيرين...وتغيرين من نقاط ضعفج

حبي ذاتج
حاول تكونين مستقلة عاطفياً عن الكل...يعني إنت أهم وحدة بحياتج
إذا حد مات مقرب منج أو تركج ما تنهارين وتنعزلين وتنقطعين عن الحياة والكل ماشي!!!
حاولي تكونين قوية...مستقلة ...واثقة

في هذا الحياة حبي ربج أولاً وبعدين ذاتج
إدعي بأي شي تتمنينه وبنية صااااادقة ...والله ما بيخيب ظنج
دايماً كرري في داخلج.. أنا أحب ذاتي..أنا أحب ذاتي
أهتمي بنفسج من جميــــع النواحي
تعرفي على ناس جدد
تعلمي مهارات جديدة
إنت تستحقين الأفضل!!!

وبالنسبة لصديقتج
...هي تعرف مدى حبج لها فنغرت بنفسها
تعرف أنج مالج غيرها..وأنج تحبينها كثيـــــر (والشي اللي يزيد عن حده ينقلب ضده)
فتركتج بكل بساطة...مستانسة أنج ما تقدرين تعيشين بدونها!
وكثير ناس يسوون هذي الحركة...وحتى الزوج!!!
لا تظهرين لأحد أبـــداً أنه هو الشخص الوحيد في حياتج وأنج مالج بدائل
يعني حاولي تتعرفين على أكثر من صديقة...تتقربين من خواتج وأهلج...بنات خوالج وأعمامج
حسسي الآخرين أنه لج بداااااائل..وأنه حياتج ما تتوقف هذا الشخص وبس
لأنه الإنسان حلو يكون له علاقات في حياته...حتى هو يستفيد

روحي الجامعه...وواجهيها
سلمي عليها ببرود واتركيها
تعرفي على بنات ثانيات
وأنا متأكدة أنها بتعظ أصابع الندم!!

وبالتوفيق عزيزتي

 

[ورد من الألماس]

مرحبآ عزيزتي..~
بالنسبة لصديقتكـ حسيت انهآ انسآنه مصلحجيه بدرجة كبييييره
ودليل انها طوول شهر رمضآن مآفكرت تسأل عنكـ ولا حتى عايدت عليكـ ،، ويوم جت الجامعة تقربت لكـ
ايش تسمين ذا التصرف ...؟
انصحكـ ماتتعلقين فيهآ لدرجة انكـ تنجرحين منهآ بهالشكل ،، عآدي تعودي انكـ بتصآدفين ناس كثير في حيآتكـ يمكن يجرحونكـ بكلآمهم وبتصرفاتهم،، انا ما اشين النآس في عينكـ لا بالعكس..
بس اقول حطي في بآلك هالاحتمال عشآن ماتنصدمين من اشخآص غيرها..
احس انكـ حسآسه كثيييير .. والحساسيه حلوهـ بس كثرتها تنعكس عليكـ بشكل سلبي ..
وانا مع الاخت اللي قالت : حبـي نفسك بعد حب ربكـ ،، وصدقيني يالغآلية مافيه احسن من انكـ تحبين نفسكـ وتهتمين فيها ..
طوري من شخصيتكـ ،، إذا حابه تعيشين بسلام في هالدنيآ ،، لأن شخصييتكـ ابدآ مايصلح تواجهين فيهآ الناس
وانتي قلتي بنفسكـ انكـ صرتي انطوائيه بشكل كبيييييييير
داااايم ادعي ((اللــهم ارحــم ضعفي )) ..
((ربـي لا تذرني فردآ وانت خير الوارثين )) ..
عيشي حيآتكـ بطولها وعرضهآ ،، والله مافيه شي يستاهل انكـ تحبسين نفسكـ وتحرمين من السعاده والمتعه مع النآس..
بعدين ليش تخلين صديقتكـ سبب في هدم مستقبلكـ ..؟؟
اهم شي مستقبلكـ ،، بكرهـ والا بعدو صديقتكـ رح تتخرج وتتوظف في احسن الوظايف وانتي حرمتي نفسكـ هالفرصه عشآن سوآد عيونها ..
اخيرآ اقولكـ اختي : نفسكـ ثم نفسكـ ثم نفسكـ
اصحي وشوفي ايش قاعده تسوين في نفسكـ...
سووري اختي ع الإطاله ،، وسوري اذا كنت جرحتكـ بكلآمي ،، بس انا كل قصدي اني اسآعدكـ ،، وماحبيت انكـ تستمرين في ضعفكـ اللي مو عاجبكـ ..
تقبلي مروري ...~

 

[معاندة الحزن]

خواتي وردة و ورد من الالماس مشكوريييين على ردودكم الطيبه وجعلها في ميزان حسناتكم ياااارب
وبعون الله بطبق كل اللي كتبتوه والله المستعاااان

 

[**سارونا**]

اختي الغاليه كوني قريبه من الله ...... تكوني اسعد خلق الله