شات اللي ولادتها ونفاسها برمضان خلونا نستفيد ونرفع معنويات بعض..........

[يقيني بالله]

مرحبا أخواتي الكروشات الحلوات

كيف حالكم وكروشاتكم:a194:

الله يقومنا جميعا بالسلامة

ويصلح ذريتنا وذرية المسلمين

آآآمين

اللي ولادتها في شعبان وراح تكون نفاس في رمضان أو ولادتها في رمضان:surrender: تدخل
وخلونا نستفيد ونفيد
ونواسي بعض

وخاصة اللي بتولد في بيتها
وهذي حطوا عليها مية خط:e076:


متى ولادتك؟؟؟؟ كم ولد لديك؟؟؟؟؟؟؟
ماهي تجهيزاتك؟؟؟؟ هل لديك خادمة؟؟؟
وين راح يكون مكان نومك خاصة الأسبوعين الأولى؟؟؟

كيف ستتصرفين بالفطوروالسحور ووو خاصة إذا كانت الخادمة لاتجيد الطبخ؟؟؟؟؟؟؟ وكيف ستتصرفين وخاصة أن طعام رمضان لايناسب النفاس(معجنات ومقليات...)؟؟؟
وووو
بالتفصيل أرجووووو التفاعل





أرجو من المشرفة تثبيت الموضوع حتى نهاية رمضان
وجزاها الله خيرا

 

[أم فجووورة]

هلا والله بصرااااحه انا بولد في المستشفى انشالله وبعدين بقعد عند اهلي وعندي طفل واحد عمره سنه
وبالاخير برتاح عند اهلي لاني لا بطبخ ولاشي وزوجي في بيت اهله لان احنا ساكنين معاهم

 

[ام نوووف]

مـــرحبا انا ولادتي ان شاء الله في العيد :clap:يعني ان شاء الله ماافطر

بس المشكله اكوون في رمضاان بالثاامن يعنى لا صلاةولا عبادة الا بمعاناة وتعب بس الله ييسر ولانى عارفه كيف اطبخ في رمضان لهم،، وانا بكرشتى خخخ:crazy::crazy:

 

[نغم الذكرى]

انا باذن الله شهر رمضان بأكون في التاسع (يعني واصلة حدي )
متزوجه من 6 سنين عندي ولد واحد عمرة ثلاث سنوات إلا شهرين
باولد في المستشفى وارجع بيتي لان نفاسي الاول قظيته في بيتي وكان مريح واحسن من اخواتي اللي قظوه عند اهلي (اهلي الله يخليهم ما يقصرون بس ابوي رجال كبير وامي تعبانه في نفسها واخواتي اللي بالبيت كلهم تحت سن 20 يعني بعد مراهقات وانا ما بي اتعب اهلي معاي وبرضوه اهل زوجي من حقهم يزوروني وياخذو راحتهم ويشوفوا المولود وفي بيت اهلي ما بيرتاحون زي في بيت ولدهم (زوجي) ومن ناحية اخرى باضايق اهلي وبلكلف عليهم بالزوار ,,,, فهمتو علي ؟؟؟
بالنسبة للطبخ فبصراحي الله المستعان زوجي يحب يعزم اخوانه (العزاب )على الفطور وحملي وكل سنه اقول عادي هم زي اخواني بس في حملي الاول كان رمضان هو شهر ولادتي زي هالحين والعزايم شغاله وكنت اتعب في الطبخ رغم اني ما اتفنن من عندي انما اسوي المطلوب فقط (شربة +سامبوسك+مكرونه )على قهوة وعصير وكل مرة اسوي حاجه من خاطري زيادة بس والباقي على زوجي من حلى 00وغيرة يجيبه جاهز
بصراحه الطبخ مو تعب لان بس المصيبة تنظيف المطبخ بعدين تجي صلاة التراويح وانا باقي اكرف
طبعا ما عندي شغالة
ابوي مرة قال لزوجي ( انت عارف البنت في شهرها خفف عزايم وانا ابوك ) ورغم ان زوجي يحب ابوي كثير ويقول ربي رزقني باب بعد اليتم
لكن تعرفون وش رد (لان الزوج ما يحب احد يدخل في زوجته ) قال لابوي بالحرف ( والله لاعزم اخواني لو انشالله تحط (تولد ) في المطبخ
امه (خالتي )طلبته يجيب شغالة قال ( والله بحق الشغالة اتزوج حرمه ثايه احسن ) ولا عاد فتحنا معاه الموضوع
يالله ما صدقت افتح قلبي
اترك المجال لغيري

 

[اريد الرومانسيه]

انا ولادتي ببنتي كان في رمضان عمرها اللحين في رمضان بتكمل السنتين وعندي ولد عمره كان 4سنوات وشهرين وولدته بعمليه وببنتي هم بعمليه لان هالمره عندي سكر والمفروض اولد في اخر الشهر بس تاخرت لازم اولد في نص التاسع علشان السكر مضر لي وللجنين وولدت وظليت في المستشفى 5ايام بعدين رحت عند اهلي لان اساس زوجي يشتغل بره بلدي ولاني عمليه ماقدر اتحرك بس مو حلوه ولادة رمضان المره الجايه بوقت نفسي ماتكون موعد ولادتي في رمضان لانك ماتاكلين ولاشي حالك حال الصايم

 

[يقيني بالله]

أم فجورة أهلين فيك

أم نوف إقرئي قرآن وصلي التراويح وانت جالسة وأكثري الدعاء والله يقومك بالسلامة

نغم الذكرى الحمد لله إن زوجك ما يتشرط بالأكل وأكثري من الدعاء إنه الله يحنن قلبه عليك لكن ما قلتي شلون راح تولدي بيتك من دون شغالة مين راح يأكلك وينظف ووو أرجو التوضيح
بصراحة أولدي عند أهلك مادام عندك أخوات مراهقات أيش وراهم خليهم يكسبوا فيك أجرالدنيا إجازة


أهلين أريد الرومانسية بصراحة ضحكتيني كنت أقول لقريباتي ما تعرفوا تحملوا بوقت صح وتوقتوا موعد ولادتكم وفي النهاية سويت مثلهم هههههه
بس أرجو منك التوضيح هل ولدت بيتك وكيف تصرفتي مع الأكل وووو





يابنات أنا عارفة أنكم راح تولدوا بالمستشفى أجل يعني في البر خخخخخ

بس أريد التوضيح راح تقضي النفاس عند أهلك أو في بيتك
اوخاصة اللي مثلي تجلس ببيتها كيف دبرت أمورها الأكل الأطفال أكل الأطفال والدهم وتعب النفسية وبكاااااااااااءالنفا س
والله حتى أبكي من هم وجود الشغالة على قلبي وووو

أفيدونا من تجاربكم أكرر خاصة اللي بتولد لحالها بيتها

جزاكم الله خيرا

 

[**ريما**]

أهلين أختي يقيني بالله ..


وموضوعك هون علي شوي صراااااحه


كنت شايله هم كبير بولادتي برمضان:tears:


بس زين فيه أحد مثلي :bigsmile:


انا صرااااحه ماقد جربت ولسى بكر الله يهون علي ويرزقني ..



وبما أني بكر أكيد بأذن الله بولد عند أهلي ان شاء الله ..



وماأقول إلا الله ييسر علينا ويقومنا بالسلامه ويحمينا من اكتئاب النفاس لانه من جد مخوفني


أختكم : ريمــــــــــــا:icon26:​

 

[احبه موووووت]

انا ماعندي اولاد هاذي اول حمله لي ولي سنه ونص متزوجه ولادتي بتصير بشهر رمضان بنص بتكون ونفاسي بيكون ببيتي لأن امي تعبانه ومافيني اتعبها اكثر معاي زين انها تقدر تحمل اخواني وتعب هشهر وايد فبقضي النفاس في بيتي والطبخ انا ساكنه بشقه في بيت عمي وفطوري راح يكون معاهم حتي العام جذي الأن عاده عندهم ان اهم يفطرون مع بعض وبصراحه اريح لي وبساعد بلي اقدر عليه من طباخ او تنظيف لأن ما ارتاح الا في شقتي والتجهيزات خذيت لي فراشات وبسطه وقماطات وملابس داخليه لأطفال تناسب الجنسين واكلي راح يكون خفيف بلنفاس طبعا لأني بهلفتره ابي جسم يرجع مثل قبل وطبعا راح استشير دكتوره للأطعمه الي تناسب هلفتره واذا طبعا مابكلف عمتي انها تسوي لي باخذ من بري والله يقومنا بسلامه ان شاءالله.

 

[ترانيم القلب]

هذي اول ولادة لي ان شاء الله بولد بداية رمضان
طبعا بكون عندي اهلي .. لاني عايشة بيت اهل زوجي وما حابة اتعب حماتي لانها تعبانه
واريح لي بيت امي
بنسبة للتجهيزات بعدني ما شريت شي للبيبي ... بس شريت ملابس نوم للنفاس

الله يسهل علينا ويقومنا بالسلامة

 

[يقيني بالله]

وين الباقي نريد أفكار وتجارب وخبرات

خاصة اللي تولد في بيتها وعندها أطفال

 

[Angelic Wings]

مرحبااااا بالكروشااااات الحلوات
هذي ثاني ولادة لي وانشاء الله اولد اول شهر عشر على قولت الدكتورة
بس حسابي انا طلع في رمضان ... الله يستر

وعلى طاري التجهيزات استغل فترة التنزيلات اشتري الاشياء الاساسية ..كنت حاطة امل اني اجيب بنت لاني عندي ولد بكر واشتريت كم لبس بنات بس يوم سويت السونار المرة الاولى والثانية قالولي ولد يالله الحمدالله على كل حال بس بعدني حاطة امل انو يكون بنت مادري ليش. اتخبل لما اشوف ملابس بنات يارب يرزقني اللي فبالي
والاشياء الثانيه مثل المنز والقاري والجلاسه وغيره طبعا وزعتها على خواتي كل وحدة بتشتريلي شي ( ما تستحي)!

ولاني موظفة عندي 45 يوم اجازة بجلس عند امي كم يوم وبعدين برجع بيتي عسب ما اثقل عليهم
عندي خدامه الله يصلحها بس ما تعرف تطبخ ما احب طباخهم .... الله يستر مادري شو بسوي شكلي بعلم زوجي الطبخ ههههه
وبعدين ( سويتها قصة) .. بسجل البيبي فالحضانه بعد ما اخلص الاجازة ويا اخوه الثاني لاني ما امن البشكارة والحضانة ما عليها كلام ويمكن احطة عند اختي كم يوم .
وهذي سالفتي واذا صار شي جديد بخبركم اول بأول

 

[يقيني بالله]

أهلين أختي بس شو معنى المنز والقاري

 

[أميرة ريلي..]

هلا الغاليات ..

أنا حامل بأول بيبي و بربي إن شاء الله بأول رمضان .. و ان شاء الله بتم فبيت اهلي بفترة النفاس ..

اللي عندها خبره اباها اتخبرني عن اشيا اسويها عشان اتسهل عليَّ الولاده و شي ثاني ابا اعرفه شو لازم اسوي و شو لازم اكل بفترة النفاس..

خبروني و نوروني حبايبي


و الله يقومنا بالسلامة يا رب

 

[اسووووولة]

اهلين يا كروشات وشكرا على الشات الجديد
انا حامل لاول مرة
وللاسف راح الد بعيدة عن اهلي لاني ساكنة بالرياض وهم في بلد ثاني
انا صراحة ما اعرف وش اجهز ولا ووين اشري ولا حتى شو اسوي؟
جيتوا عالجرح يعني
المهم شكرا جدا لصاحبة الموضوع تسلمولي
ونتواصل ان شاء الله

 

[يقيني بالله]

أميرة ريلي إبحثي عن موضوع للأخت شمعة الإسلام يتحدث عن ماذا تأكلين في النفاس



أم أسيل نورتي الموضوووع


وين الباقي:frown:
بس إحنا اللي نفاسنا برمضان:e076:

 

[احبه موووووت]

حبيبتي أميرة ريلي اذا دشيتي شهرج كل يوم روحي تمشي علي الأقل نص ساعه وبسرعه بتولدين وشربي كلي يوم عصير زعفران وتحطين فيه شوي قرفه بس لاتحطين سكر وصدقيني بتولدين في اليوم الي تشربينه فيه انا اول مره لي احمل علمتني امي دائما تسوي لها جذي قبل لما تدخل شهرها وبسرعه تولد وسوت لبنات الجيران وكلهم دعوا لها وانا بعد بسوي لي ان شاءالله والله يوفقج.

 

[أميرة ريلي..]

يقيني بالله .. تسلمين الغاليه و بجوف الموضوع الحينه ..

أحبه مووووت .. فديتج الغاليه اشكرج عالنصيحه ..

أنزين عصير الزعفران و القرفه شلون اسويه حطي مقاديره عشان أنا و غيري نستفيد من هالعصير .. و متى أشربه ؟؟ يعني لما احس بالطلق ؟؟

و الله يوفقنا جميع يا رب و يسهل علينا الحمل و الولاده يا رب ..

 

[اريد الرومانسيه]

انا من الثامن واشرب القرفه مع الزعفران اشربه وانا امشي بعد لحد التاسع يوميا وفي رمضان بس مافي فايده في نص التاسع سوت لي الدكتوره كشف ولقت الرحم مقفل مره وحاولت تفتحه بس مافتح ولدت بعمليه بس استفدت من القرفه اول ماولدت طبعا بعمليه نزل علي دم مو طبيعي نظف رحمي من الدم والاوساخ

 

[Angelic Wings]

المنز >>>> سرير الطفل
القاري >>>> العربة أو ٍStroller

 

[أميرة ريلي..]

هلا حبايبي كروشاااااااااات الغاليات ..

شخباركم و شلون الحمل وياكم ؟؟

تعرفون حبيبي .. هالايام وايد احس بانتقاخ فبطني و يعورني بطني و مره وحده بطني يتيبس يقولون إنها غازات و يزيد علي لما أخذ كبسوله الحديد اللي معطتني الدكتوره اسمه ( بينزي آيرون) ..يعني العوار يتم عندي تقريبا نص ساعه أو أكثر و بعدين يرد كل شي مثل ماكان عادي يرد بطني

شو اللي اقدر اسويه وشو اشرب عشان يخف ؟؟

أدري وايد اسأل اتحملوني أول حمل لي ..


وشكرااا مقدما حبايبي ..