ساعدووووووووني حساسيتي راح تموتني

[دانـــة]

السلام عليكم ورحمة الله وبركاته

اشحالكم ياصبايا .. عساكم بخير

اول شي ابيكم تسامحوني لاني متابعة لكم من الطراز الاول .. ولكن بالقراءة فقط ...

لاني صرت احس اني ما اعرف اعبر ولا اكتب وصرت ما اعرف احكي كلمتين على بعض مادري ليش

راح الابداع بالكتابة وراحت الافكار وراح كل شي فجأة !!! بس اوعدكم بالتواصل المستمر والمشاركة ان شاء الله

الحين جايتكم وابي مشورتكم ...

كتبت لكم مشكلتي قبل هالمرة وللحين اعاني منها ..

وهي اني اقارن نفسي وتصرفاتي بتصرفات زوجي .. واذا ماسوى نفس اللي انا اسويه علشانه افكر انه مايحبني مثل ما احبه

احس ان هالفكرة صحيحة رغم ان كثير قالولي انها غلط .. ومو عارفة شلون اتجاوزها

ابيه يعاملني نفس ما اعامله

اهو يحبني ومو مقصرويبان هالشي بكثير من تصرفاته بس بعد في مواقف اقلبها وافكر انها لو كانت بالعكس كنت راح اتصرف بالطريقة الفلانية ليش اهو مايسوي جذي ؟؟

يعني مثلا (( وطبعا غيره كثير ))

اليوم اهو متضايق .. وقال لي نفسيته تعبانه ومزاجه متعكر ومخنوق

وانا طبعا قعدت اسأله ليش وويقول مايعرف ليش .. بعدين قلتله لو تبي تطلع تغير جو وتغير نفسيتك عادي

قال لي افا عليج اذا معاج ماتحسنت ماراح اتحسن لا بجو ولا بغيره .. تدرون عاد ارتفعت معنوياتي وانبسطت حيل خخخخخ

والحين احنا نتكلم بالمسنجر لانه بمكان ثاني

المهم قلتله اني مو نايمة عدل وقال خلاص اطلعي نامي علشان تصحصحي وانا بكون تحسنت ونتكلم بالليل قلتله اوكي

ولما صحيت ارسلتله مسج قال انه لسا متضايق وماطلع من الغرفة .. وانا للحين ما اعرف شو اللي مضايقه شوفوا القهر

المهم قلتله اذا ماعندك شي الحين ادخل المسنجر وانا قاعده افكر شلون اخفف عنه واسليه وانسيه الضيقة

ولا رد علي يقول اقولج متضايق وماطلعت من الغرفة تقولين ادخل ؟؟؟؟؟

تضايقت حييييل .. طيب دامك ماتبي ليش قبل تقول اني راحتك وبتتحسن اذا كنت معاي ؟ يعني يقص علي صح؟

المهم رديت عليه وبصراحة ما اهتميت انه متضايق وراح يتضايق اكثر من المسج .. لاني كنت مقهورة منه

قلتله علبالي راح تجي ركض لاني غير وراحتك معاي على العموم براحتك

وبعد شوي اتصل وتهاوشنا شوي

وانا مقهورة وقاعدة افكر اني انا لما اتضايق من شي لو تافه على طول اروح له واشكيله وما ارتاح غير لما يكون معاي .. واني لو عندي هموم الدنيا انساها وهو معاي لاني احبه

ودامه ماسوى مثلي يعني مايحبني

شو رايكم .. يمكن انتوا تشوفوا الموضوع بسيط وتافه وانا متأكده من هالشي بس بالنسية لي متعبني حيل

وبعد مو عارفة شلون اخلص من الحساسية ..

كل مرة اقول ابي اتلعم اطنش وما اهتم ولا ادقق ولا اعاتب ولا اتضايق

بس ماااااااااااا اقدر هالطبع مسيطر علي

الله يعين

ومشكورين مقدما ربي يحفظكم

 

[عنقود عنب]

دانه شلونك عمري

وانت للحين على حساسيتك ؟؟؟

دندونه حساسيتك مأذيتك انت قبل اي احد ثاني

وانت سألتي وانت جاوبتي

انت عارفة المشكلة وعندك الحل

تدرين ...ليش ما تجيبين لك بيبي يسليك

انت الظاهر الفراغ هو اللي مخليك تتصرفين كذا

جالسة تشتغلين بزوجك بسبب الفراغ

البيبي راح ياخذ وقتك كلة وما راح تفكرين في زوجك ابدا

ربي يوفقك

 

[دانـــة]

هلااا والله حبيبتي عنقود عنب

منورة بهالطلة الحلوة ... اي مثل ماقلتي بعدني على حساسيتي هههههههههههه

بالنسبة للبيبي موضوع الدراسة معطله شوي

بس احس اني لو يكون عندي عشر عيال مشكلتي راح تبقى مثل ماهي

ابي اتغير من داخلي .. ابي طريقة تفكيري تتغير مو عارفة شلون

خاطري اطنشه وما اعاتبه على شي ولا اهتم علشان يحس بقيمتي .. هالفكرة كثير تجي ببالي

أشكرج يالغالية على مرورج

ربي يوفقج ويسعدج دنيا وآخرة

 

[تاج الوقار]

أقرأي كتاب النساء من الزهرة والرجال من المريخ من جرير 30 ريال رائع بيع منه 14مليون نسخة
يقول المؤلغ جون غراي أن الرجل عندما يتضايق يدخل ‘إلى كهفه يعني يفضل الانعزال والجلوس لوحده ولا يبوح بالسبب اللي مضايقه وينصح المرأة بتركه حتى يخرج من عزلته وعد مضايقته لأنه بعدها سوف يقدر لك موقفك أما المرأة من طبعها إذا تضايقت تبحث عمن تتحدث معه وتفضفض له وبعدها تحس بالراحة والله نصيحةاشتري الكتاب

 

[دانـــة]

غاليتي المبتهلة إلى الله

اسمج وايد حلو ربي يرزقج الجنة قولي آمين

فعلا سمعت كثير عن الكتاب وحملته من النت وقريت شوي منه وان شاء الله بكمله

تسلمين يالغالية على المرور الطيب

ودمتي بحمى الرحمن

 

[موزة خلفان]

يالله كيف انتي شخص نكدي
يعني الريال يقول لج متضايق وانتي تزعلين وتقلبينها هواش
اختي الغاليه من الصعب ان تجدي شخصا يشبهك في الافكار والميول والتصرفات بدرجة 100%
لكل انسان نقاط ضعف وعيوب
وهو معه حق لو متضايق ما راح يدخل يدردش كتابه في الماسنجر الموضوع سيكون متعب ومضجر
بدل ذلك كان عليك سؤاله هاتفيا وان لم يجب اتركيه فقط ارلي له مسج ربي يفرج همك حبيبي تراني موجوده متى ما بغيتني وبس
ما تزعلين من سبب تافهه وتحملين رجلك فوق طاقته
انتي لستي حساسه انتي دلاعه ومازلتي طفله
اعتذر عن الصراحه لكنه الواقع كبري عقلك وحاولي ان تتخلصي من هذا التفكير الطفولي افهمي زوجك كرجل واستوعبيه كمراه

 

[دانـــة]

الغالية موزة

أشكرج من كل قلبي على تواصلج الرائع .. الله يكملج بعقلج

ومعاج حق بكل كلمة قلتيها .. وما ازعل بالعكس لاني ابي اللي ينصحني

وانا اعرف اني كثير اوقات انفعل بسرعة وافكر تفكير غلط بس مو عارفة شلون احل هالمشكلة

ولما وحدة من صاحباتي تستشيرني بمواقف مثل جذي اقول نفس كلامكم واحس اني اوزع عقل على الناس .. بس لما السالفة تصير معاي يصير عقلي صغير وافكر مية فكرة سودا والشيطان يلعب فيني

وعندي مشكلة ثانية بصراحة ودي اقولها واتمنى تساعديني انتي وباقي الاخوات

من كثر ما اسمع عن فتور العلاقات بعد سنة وسنتين صارت هالفكرة دايما في بالي وخايفة منها

لدرجة وصلت اني احسها فعلاً .. ما اعرف اهي موجودة او من كثر الوسواس

خايفة يمل مني ويبعد عني مع الوقت .. مع اني اشوفه مثل ماهو ماتغير بس انا اللي هالفكرة مسيطرة علي

وصرت من كثر ما افكر شو كنا نتكلم ونسولف قبل وبشو كنا نضيع وقت نتسلى

اخاف اني ما اقدر استمر بهالشي واصير مملة

ومرات لما اشك بإنه متغير واقول له انت بديت تمل يقول من وين تجيبين هالافكار وليش مو واثقة بنفسج وعندج شعور انج مو كفو علشان امل منج ؟؟؟ يعني احس اني انا اللي قاعدة افتح عيونه على الملل

وهالتفكير بعد مسويلي احباط وكآبة

صرت ما اعرف اعبر ولا اعرف اسولف واحكي ..

قبل كنت من شي بسيط أسوي موضوع نتناقش فيه وأسأل وما اعرف شو .. الحين احس فيني جمود

ما القى اي شي ممكن اني احكي فيه يمكن انا مثل ما انا بس هالفكرة مسيطرة علي ومخليتني اشوف اني مو محصلة شي

يمكن لاني قبل ماكان هالشي ببالي وماكنت اتكلف وكنت عفوية .. بس الحين لانه شاغل بالي حاسة اني مملة

مشكلتي مع نفسي مو معاه .. لان هو يناقشني ويسولف معاي ويتكلم بأي شي ابيه وحتى لو ابي العب او اي شي

بس انا اللي مو ملاقية شي نحكي فيه او يتهيألي اني مو ملاقية

صارلي اسبوعين تقريبا هالشي شاغل بالي بشكل مو طبيعي

ممكن اللي عندها افكار وسوالف وهالشغلات تقول لي عنها

وهل الملل اكيد يصيب العلاقة بعد فترة وكل الرجال يملون بطبعهم؟؟

ولكم تحياتي

 

[ريم2007]

عزيزتي دانة... و الله تتكلمين و تذكريني بعمري لأني مريت بسيناريو مشابه تقريبا.... سمعي قصتي يالغالية...
كانت ملجتي شهر 4 سنة 2006 على و لد عمي و هو يدرس و يشتغل في أمريكا (عسى الله يرده بالسلامة) ... بعد الملجة بدينا نتعرف على بعض عبر الاتصالات و الماسنجر... شخص ما شاء الله عليه أدب و أخلاق و علم، لكن مشكلتي كانت إني ما يعبر أبد عن مشاعره (صح بعدنا ما عرسنا) لكن الواحدة تحب تسمع كلام حلو ... و كان دايما مشغول في دراسة الماجستير و العمل..مرات ما يتصل بالأيام و يطرشلي إيميل...و كنت أصبر لين ما أطفر و أطلع إللي في قلبي و نتهاوش... بعدين يهتم شوي و ترجع ريما لعاديتها القديمة... استمريت على هالحال 5 شهور و كنت دوم أرقد و أنا أصيح ...
المهم حبيبتي... بعد فترة فكرت و قلت يا بنت داويها بالتي كانت هي الداء ... الريال مشغول صيري إنت بعد مشغولة.. المهم ما يحس إنه هو حياتي كلها، لازم يحس إنه عندي اهتمامات ثانية فشو سويت؟؟
1. ما صرت أدش الماسنجر، إيميلات فقط
2. ما صرت أرد على كل اتصالاته (أول قبل ما يرن التليفون رنة إلا و أنا رديت) و قللت اتصالاتي
3. يوم نتكلم أحاول أنهي المكالمة أوني مشغولة.
4. اشتركت في نادي رياضي و كورس تعليمي (شغلت وقتي).
5. يوم نتكلم أحاول أكون المستمعة و أبدي آرائي في النهاية
6. أزور أمه كل أسبوعين
والله العظيم يادانه الريال تخبل و تغير 180 درجة ... صار ينش من الرقاد و اسمي على لسانه وما يرقد بدون ما يكلمني...كل أسراره عندي... يستشيرني في كل شي حتى شو يلبس اليوم الثاني و شو ياكل... و الكلام الحلو و الهدايا.... أتصدقين مرة تزاعلنا سافر و يا الامارات عسب يراضيني (فديته) ... المشكلة مب في الريال ..المشكلة في أسلوب التعامل معه... تعاملي معه كطفل كبير... لاتعطيه كل الاهتمام لكن في نفس الوقت لا تهمليه و دلعيه لكن بحساب، الموضوع كله شد و رخي...
أما بالنسبة للسوالف كوني ذات ثقافة واسعة،اقري كتب ناقشيها معاه تعرفي أكثر على مجال عمله، استعملي بعض المصطلحات العلمية ... ريلي يحب كرة القدم و أنا ما أدانيها لكن عشانه بحثت في النت عن فريقه المفضل تاريخهم مدربهم و جدول المباريات، و صرت أذكره بيوم المباراة و الساعة، و عقب المباراة نتناقش في الأهداف و الأخطاء، و الله قالي صرت مثل ربيعه مب حرمته... و الحمد لله..
خذي الأمور خطوة بخطوة يا دانه و إن شاء الله تحصلين كل السعادة...
كل الود

 

[دانـــة]

غاليتي ريم

فديتج والله عطيتيني امل ربي يسعدج

بس تدرين شو المشكلة .. اني اخاف اسوي جي ويصير فرصة اننا نبعد عن بعض .. يعني يشوفني طنشته يقول جذي احسن فكة وآخذ راحتي

انا ما احب اطوف شي من غير ما اعاتبه عليه علشان مايفكر انه شي عادي ويستهين فيه

مثلا على سالفة المسجات

لو طرشتله مرة ومارد علي اقلبها هواش وسالفة طويلة عريضة .. جذي مرة بعد مرة لين تعلم انه لازم يرد كل ما ارسلت

ومرات هو يعترف ويقول رديت اخاف تفضحيني !!!! رغم انه مرات يقول لي مو بهالاسلوب تطلبين شي اتكلمي باسلوب عدل واللي تبينه يصير

بس لما قال لي مرة رديت علشان ماتفضحيني قلت والله زين يعمل لي حساب لا افضحه لو اني متهاونة وسويت اللي يقول عليه واسلوب وتطنيش كان ماعبرني ولا شو رايج؟؟

وانا سالفة القعدة معاه ما اعرف ليش احسها فرض ولو ميتة من النعس اتحمل علشان اكون معاه

ولما يكون بمكان وانا بمكان ثاني طبعا المسنجر يكون شي ضروري واذا يوم تأخر او مادخل او دخل شوي وطلع ينام اسويها سالفة وليش ماتقعد معاي ومادري شو

يعني رايج اطنشه ؟؟ وشلون اطنشه وبنفس الوقت اهتم فيه ؟؟

اهو مو مقصر بس انا جذي مو عاجبني ابي اهتمام اكثر ابي اكون كل شغله الشاغل من يصحى من النوم لين ينام هالشي مايروح من بالي

هاليومين هو متضايق واحسه مو مثل قبل وسويت اليوم نكد ليوم النكد واقوله انت متغير ومادري شو

ويقول والله انتي مكبرة الموضوع ويحلف اني كل اللي اقوله ظلم ومو موجود غير براسي بس السالفة انه تعبان نفسيا هاليومين ولازم اتحمل .. الله يعين

 

[عضو سابق]

السلام عليكم ورحمة الله وبركاته



اختي الحبيبه / دانه


اتعلمين .. والله يا حبيبتي اقرأ سطورك واضحك لا اعرف لما .. الأنني عشت هذه الايام

ببداية زواجي..؟:blushing:


حقا كنت انظر الى زوجي انه يحبني ان فعلت شيء يجب ان يفعل هو ايضا ما افعله معه..

مثلا ارسلت له رساله .. ولم يرد علي باي حرف.. كنت حقا ابكي ..

واقول هذا الانسان لا يفكر بي.. ولا يحس ايضا بي.. وربما لا يحبني.. او مل مني .

او ان هناك أمراه اخرى بحياته .. (افكار غبيه حقا كانت مني).

ولكن بعد ذلك.. ادركت انه لا يحق لي ان اتحكم بزوجي بهذه الطريقه

فهو شخصيه مستقله وانا كذلك.. هو رجل وانا انثى.. هو لديه اشغال وانا هنا فالبيت فقط.

الرجل مسؤوول عن اشياء كثيره ..اولهم انا .. فأظع له اعذار كثيره .. حتى بعدها

لم افكر ابدا ان لم يرد علي ام لا. لانني ارسالها فقط لاني اريد ارسالها.


فيا حبيبتي .. هل الرجل مثل المرأه ؟؟

بالتأكيد لا.. فهناك فروق كثيره.. اولهما القلب والعقل..(واشياء أخرى بس عيب اذكرها ):nosweat:


ان فعلت شيئا اختي الحبيبه لزوجك.. افعليه لا ليقوم لك بشي يبادلك بمثله..

عمر الحياه الزوجيه لم تنبني بهذا الشكل.. وان استمريت على ذلك.. والله ستتعبين كثيرا كثيرا..

اتركي الامور تمشي بطبيعتها..

عندما ترسلين له رساله لا تفكري انه يجب عليه ان يسرل لك هو ايضا

..وارسليها له لانك فقط تريدين ان ترسليها..

وكذلك الاتصال .. اتصلي فقط لانك تريدن الاتصال ..

لا لانك تبيني له انك تحبيه وهو يجب ان يفعل ما تفعلينه..

فهذا خطأ خطأ خطأ..

صدقني الزوج يصبر سيصبر وبعدها سينفجر بوجهك.. وسيقول لك .. كم انتي صغيره العقل

ولا تقدرين الحياه الزوجيه..ولا تحترمنني كزوج ..وكفي عن هذه الهراءات . والشكوك .

وانا متأكده ان زوجك لا يفكر بهذه الطريقه ..

لانه اعقل منك :nosweat: لا تزعلي من صراحتي فهي الحقيقه :icon30:



نصيحه ارجوا ان تصل اليك لانني مررت بما مررت به/

ان تتكري هذا التفكير وتطرديه من حياتك لانه سيسبب لك متعاب ومشاكل كثيره بالمستقبل

وربما ستتعودين على ذلك بعدها .. وستكون بعدها صعبه ان تزيلها من شخصيتك.


اتمنى لك السعاده الحقيقه بكنف زوجك اختي الحبيبه

سامحيني على الاطاله / حفظك الله ورعاك يا بعد عمري

 

[دانـــة]

الغالية ام مريم

تسلمين على المرور العطر والرد الرائع

صدقتي فعلا هالشي متعبني كثير واحس انه تمكن من تفكيري ومو قادرة اخلص منه .. بس لازم احاول لا يتغلب علي اكثر واموت من القهر آخرتها:thumbdown:

وهو مرات لما يعصب يقول لي نفس كلامج :blushing: هذي افكار جهال وانتي عقلج صغير وماعندج ثقة لابنفسج ولافيني ومخج كله شكوك:no:

ان شاء الله باخذ بنصايحج يالطيبة .. وادعيلي ربي يخلصني من هالافكار واقدر احافظ عليه

لاني حاسة انه راح يطفش بسبتي وعلى قولته راح اخرب بيتي بايدي وهالافكار راح تفرق بينا لانه مهما صبر للصبر حدود:icon1366:

الله يوفقج ويرزقج السعادة دنيا وآخرة حبيبتي

وتقبلي مني ارق تحية

 

[ملكة الخليج]

من عقب نصيحة الاخت موزه خلفان بعد مانقدر نتكلم ولا ننصح
كفت و وفت الله يزيج خير ويوفقكم جميع
ومثل ماقالتلج بطلي دلع يا دندوووونه

 

[الوسمى]

أختي الغالية انتي تقارنين قلب المرأة بقلب الرجل كأنك تقارنين بين الحرير والشوك وبعدين كلنا نشعر بالضيق وحزات مانشتهي من كثر الضيق نتكلم اوجدي له العذر واكتفي بكلمتين حلوين تبرد على القلب وتركيه تأكدي بعد فترة ستكونين اول من يلجأ اليهم ويحكي ما به من ضيق ويكفي انك متأكدة من حبه لك وهذا اهم شيء عسى ان يجمعك به ربي على الخير والحب في الدنيا والاخرة .

 

[دانـــة]

ملكة الخليج

حياج يالطيبة .. تسلمين على مرورج وردج حبيبتي

تامرين امر راح ابطل دلع هههههههه بس هو الدلع لاحقني مايستغني عني شو اسوي خخخ

ربي يعطيج العافية ويوفقج يالغالية

تقبلي تحياتي

 

[دانـــة]

عزيزتي mony

اسعدني ردج وريحني والله

تسلمين يالطيبة على التواصل الرائع .. ربي يبارك فيج ويعطيج العافيه ويرزقج السعادة وراحة البال

ولج مني اطيب تحية

 

[روح القلوب]

اختي العزيزه دانه الله يهداج
اعتقد الاخوات كفن ووفن بما فيه الخير

اعملي بنصائحهن وراح تعيشي بسلام

 

[غاليه]

الاخوات ماشاء الله ماقصروا

 

[دانـــة]

عزيزاتي روح القلوب وغالية

تسلمون على تواجدكم الطيب

ربي يعطيكم العافية ويجزيكم الخير